Bible Buk Namba 19​—Psalms

Olketa wea Raetem: David and samfala narawan

Taem Olketa Finis Raetem: c. 460 B.C.E.

BUK bilong Psalms hem songbuk bilong olketa trufala worshiper bilong Jehovah longtaem bifor, wea olketa putim tugeta 150 holy song, or olketa psalm, wea followim music and olketa arrangem for pablik worship bilong Jehovah God long temple bilong hem long Jerusalem. Olketa psalm hia olketa song for praisem Jehovah, and tu, olketa garem olketa prea wea barava askem God for mercy and help, and olketa toktok wea showimaot trust and wei for biliv tu. Olketa fulap witim toktok bilong thankiu and singaot bilong hapi and barava bigfala hapi. Samfala storyim moa history, for ting raonem loving-kaeness bilong Jehovah and olketa nambawan waka bilong hem. Olketa fulap witim olketa profesi, wea plande long olketa fulfill long spesol wei. Olketa garem plande instruction wea helpem and buildimap man, wea olketa iusim toktok and tokpiksa for hem wea nambawan wea barava muvim man wea readim. Olketa psalm olketa richfala spiritual kaikai wea olketa preparem gud and redim naes front long iumi.

² Wanem nao mining bilong title bilong disfala buk, and hu nao raetem Psalms? Long Hebrew Bible, olketa kolem disfala buk Seʹpher Tehil·limʹ, wea minim “Buk Bilong Olketa Praise,” or Tehil·limʹ, wea minim, “Olketa Praise.” Hem kam from disfala word Tehil·lahʹ, wea minim “Wanfala Praise” or “Song Bilong Praise,” wea stap long toktok wea kam firstaem long Psalm 145. Disfala nem “Olketa Praise” hem barava fitim, from disfala buk hem mekhae long wei for praisem Jehovah. Disfala title “Psalms” hem kam from Greek Septuagint, wea iusim disfala word Psal·moiʹ, wea minim olketa song wea olketa sing followim music. Disfala word stap tu long samfala ples long Christian Greek Scripture, olsem long Luke 20:42 and Acts 1:20. Wanfala psalm hem wanfala holy song or poem wea olketa iusim for praisem and worshipim God.

³ Plande long olketa psalm garem olketa heding or toktok wea kam firstaem, and plande taem hem for talem nem bilong man wea raetem. Seventi-thri heding garem nem bilong David, “datfala man wea savve tumas for singsing long Israel.” (2 Sam. 23:1) Luk olsem David raetem tu Psalm 2, 72, and 95. (Lukim Acts 4:25, Psalm 72:20, and Hebrews 4:7.) Luk olsem Psalm 10 and 71 join witim Psalm 9 and 70 and dastawe maet David nao raetem. Twelvfala psalm kam from Asaph, wea minim haos bilong Asaph, from samfala samting wea hem storyim hem happen bihaen Asaph dae. (Ps. 79; 80; 1 Chron. 16:4, 5, 7; Ezra 2:41) Olketa son bilong Korah raetem elevenfala psalm. (1 Chron. 6:31-38) Luk olsem Psalm 43 join witim Psalm 42, and dastawe maet olketa son bilong Korah tu raetem. For join witim “olketa son bilong Korah,” toktok wea kam firstaem long Psalm 88 sei Heman tu raetem, and Psalm 89 nemem Ethan olsem man wea raetem. Moses raetem Psalm 90 and luk olsem hem raetem Psalm 91. Solomon raetem Psalm 127. Bigfala haf long olketa psalm garem nem bilong olketa wea raetem.

⁴ Buk bilong Psalms hem big winim evri nara Bible buk. Olsem hem showaot long Psalm 90, 126, and 137, olketa raetem insaed staka year, olsem from taem wea Moses hem raetem (1513-1473 B.C.E.) go kasem bihaen long taem wea olketa kam bak from Babylon and maet long taem bilong Ezra (537–c. 460 B.C.E.). Dastawe, luk olsem olketa raetem disfala buk insaed samting olsem wan thousand year. Bat olketa year wea hem storyim winim datwan, hem start from taem bilong creation, and hem reviewim history bilong wei wea Jehovah deal witim olketa servant bilong hem, kam kasem taem wea olketa raetem lastfala psalm.

⁵ Buk bilong Psalms hem showimaot wei for organize gud. David seleva tok abaotem “sekson wea march for God bilong mi, King bilong mi, go insaed long holy ples. Olketa wea singsing olketa stap long front, olketa wea pleim string instrument stap bihaen long olketa; long midol hem olketa young gele wea pleim tambourine. Long olketa sekson wea hipap blessim God, Jehovah.” (Ps. 68:24-26) Diswan nao reason why disfala toktok “To the director,” and tu plande toktok bilong olketa poem and music, hem kamap plande taem long olketa toktok wea kam firstaem. Samfala toktok wea kam firstaem showimaot reason why olketa raetem wanfala psalm, or givim samfala instruction for music. (Lukim olketa toktok wea kam firstaem long Psalm 6, 30, 38, 60, 88, 102, and 120.) Long winim 13-fala psalm bilong David, olsem Psalm 18 and 51, hem storyim lelebet olketa samting wea muvim hem for raetem. Thirti-foa long olketa psalm no garem olketa toktok wea kam firstaem. Disfala smol word “Seʹlah,” wea kamap 71 taem long main part bilong buk, olketa tingse hem spesol word for music or wei for talem moa, bat olketa no savve long really mining bilong hem. Samfala sei hem markem ples for stop and ting raonem samting insaed long singsing and music. Dastawe, taem iu read iu no need for talem disfala word.

⁶ From bifor kam, olketa divaedem buk bilong Psalms long faevfala separate buk, or volume, olsem: (1) Psalms 1-41; (2) Psalms 42-72; (3) Psalms 73-89; (4) Psalms 90-106; (5) Psalms 107-150. Hem luk olsem David nao hipimap olketa firstfala song hia. Luk olsem Ezra, datfala priest and “man wea savve tumas for copyim law bilong Moses,” hem nao man wea Jehovah iusim for arrangem buk bilong Psalms long wei wea iumi lukim distaem.—Ezra 7:6.

⁷ Wei wea olketa isisi hipimap olketa song maet explainim why samfala psalm repeat long samfala difren sekson, olsem long Psalm 14 and 53; 40:13-17 and 70; 57:7-11 and 108:1-5. Each wan long faevfala sekson hia olketa finis witim wanfala toktok for blessim Jehovah, or for praisem God—first fofala olketa garem tu ansa bilong pipol and last wan hem full Psalm 150.—Ps. 41:13, footnote.

⁸ Wanfala spesol stael for raetem song hem stap long naenfala psalm; olketa kolem diswan acrostic from olketa iusim olketa leta bilong alphabet. (Psalm 9, 10, 25, 34, 37, 111, 112, 119, and 145) Long disfala stael, olketa firstfala verse bilong firstfala sekson hem start witim firstfala leta bilong Hebrew alphabet, ʼaʹleph (א), olketa nextfala verse witim mek-tu leta, behth (ב), and gogo kasem klosap evri leta bilong Hebrew alphabet. Maet olketa duim olsem for helpem olketa rememberim song—just tingim olketa wea singsing long temple wea need for rememberim olketa song olsem Psalm 119! Iumi interest for savve hao wanfala acrostic bilong nem bilong Jehovah stap long Psalm 96:11. First haf bilong disfala verse long Hebrew hem garem fofala word, and olketa firstfala leta bilong olketa word hia, sapos iu read from raet saed go long left saed, olketa nao fofala Hebrew leta bilong Tetragrammaton, YHWH (יהוה).

⁹ Olketa raetem olketa holy toktok bilong song long olketa Hebrew verse wea no here semsem bat olketa showimaot barava naesfala stael and followim wan mind. Olketa tok stret long mind and heart. Olketa mekem klia piksa kamap long mind bilong man. Olketa deep mining, long samting wea olketa sing abaotem and strongfala feeling wea olketa talem, hem from olketa samting wea happen long laef bilong David, wea givim mining long plande psalm. No staka man bin garem difren kaen living—olsem wanfala shepherd boy, man wea faet seleva againstim Goliath, man for pleim music, man wea olketa enemy ronem wea stap midolwan long olketa loyal fren and olketa wea denyim hem, king and man wea win, loving dadi wea kasem trabol wea divaedem famili bilong hem, man wea tufala taem hem kasem nogud samting from bigfala sin bat evritaem hem strong for worshipim Jehovah and lovem Law bilong Hem. From diswan, iumi no sapraes hao buk bilong Psalms hem barava fulap witim olketa feeling bilong man! Olketa parallel poetry and wei for iusim difren toktok wea Hebrew raeting savve iusim hem givim hem paoa and mekem hem naes tumas.—Ps. 1:6; 22:20; 42:1; 121:3, 4.

¹⁰ Olketa old song hia wea praisem Jehovah olketa tru evribit from olketa agree witim olketa nara Scripture. Olketa wea raetem Christian Greek Scripture iusim toktok long buk bilong Psalms plande taem. (Ps. 5:9 [Rom. 3:13]; Ps. 10:7 [Rom. 3:14]; Ps. 24:1 [1 Cor. 10:26]; Ps. 50:14 [Matt. 5:33]; Ps. 78:24 [John 6:31]; Ps. 102:25-27 [Heb. 1:10-12]; Ps. 112:9 [2 Cor. 9:9]) David seleva hem sei olsem long lastfala song bilong hem: “Spirit bilong Jehovah nao hem tok long mi, and word bilong hem stap long mouth bilong mi.” Disfala spirit nao hem stap witim hem from taem Samuel anointim hem. (2 Sam. 23:2; 1 Sam. 16:13) And tu, olketa aposol iusim toktok wea kam from Psalms. Peter hem tok abaotem “scripture . . . wea holy spirit talem bifor thru long mouth bilong David,” and taem hem iusim samfala toktok from Psalms, man wea raet go long olketa Hebrew tok abaotem diswan olsem toktok wea God talem or hem start witim disfala toktok, “olsem holy spirit talem.”—Acts 1:16; 4:25; Heb. 1:5-14; 3:7; 5:5, 6.

¹¹ Strongfala pruv bilong wei wea hem tru evribit hem toktok bilong Jesus, Lord wea hem resurrect, taem hem sei long olketa disaepol: “Diswan nao olketa toktok bilong mi wea mi talem long iufala . . . hao evri samting wea olketa raetem insaed long law bilong Moses and insaed long Olketa Profet and Olketa Psalm abaotem mi mas fulfill.” Long hia Jesus putim tugeta full Hebrew Scripture olsem olketa Jew savve duim and wea olketa savve gud long hem. Taem hem tok abaotem Psalms hem minim full mek-thri sekson bilong Bible, wea olketa kolem Hagiographa (or Olketa Holy Raeting), wea Psalms hem firstfala buk. Diswan showaot klia from samting wea hem talem tu-thri hour bifor long tufala man taem olketa go long Emmaus, taem “hem minim long olketa samting abaotem hemseleva insaed long olketa Scripture.”—Luke 24:27, 44.

WEI WEA HEM HELPEM IUMI

²³ From raeting bilong olketa psalm hem gud tumas, olketa fit for kamap olketa nambawan raeting long eni languis. Bat, olketa no raeting nomoa. Olketa wanfala living message from Sovereign bilong full universe, Jehovah God seleva. Olketa givim bigfala savve long olketa main teaching bilong Bible, wea main and first samting hem story abaotem nao hem Jehovah, Man wea Raetem. Long kliafala wei hem showimaot hao hem Creator bilong universe and evriting insaed long hem. (8:3-9; 90:1, 2; 100:3; 104:1-5, 24; 139:14) Buk bilong Psalms barava mekhae long nem Jehovah, wea hem kamap samting olsem 700 taem. And tu, disfala short wei for raetem, “Jah,” hem kamap 43 taem, wea evriwan tugeta hem olsem evri psalm raetem nem bilong God 5 taem. Nara samting moa, olketa raetem Jehovah samting olsem 350 taem olsem ʼElo·himʹ, or God. Wei wea hem Most Hae Ruler hem showaot long wei wea samfala psalm kolem hem “Sovereign Lord.”—68:20; 69:6; 71:5; 73:28; 140:7; 141:8.

²⁴ Long wei wea difren from God bilong olowe, disfala buk showimaot hao man wea savve dae hem born long sin and needim Man Wea Baem bak, hem showim tu hao hem gogo for dae and go bak olsem “samting wea pisis,” go daon long Sheol, grev bilong olketa man. (6:4, 5; 49:7-20; 51:5, 7; 89:48; 90:1-5; 115:17; 146:4) Disfala buk bilong Psalms mekhae long need for obeyim law bilong God and for trust long Jehovah. (1:1, 2; 62:8; 65:5; 77:12; 115:11; 118:8; 119:97, 105, 165) Hem givim warning againstim bighed fasin and “sin wea haed” (19:12-14; 131:1) and encouragem honest fasin and gudfala kaban. (15:1-5; 26:5; 101:5) Hem showimaot hao stretfala fasin hem mekem Jehovah hapi. (34:13-15; 97:10) Hem givim naesfala hope taem hem sei “salvation hem bilong Jehovah” and hao long saed bilong olketa wea fraet long hem, hem bae “sevem soul bilong olketa from dae.” (3:8; 33:19) Diswan bringim iumi long saed long profesi.

²⁵ Disfala buk bilong Psalms hem fulap witim olketa profesi wea point go long Jesus Christ, datfala “son bilong David,” and waka wea hem bae duim olsem Anointed Wan and King bilong Jehovah.a (Matt. 1:1) Taem Christian kongregeson kamap long Pentecost 33 C.E., holy spirit start for givim moa savve long olketa aposol mekem olketa lukim hao olketa profesi hia fulfill. Long datfala day, Peter talem moa olketa Psalm for minim theme bilong datfala tok bilong hem wea staka savve long hem. Diswan hem abaotem wanfala man: “Jesus bilong Nazareth.” End part bilong tok bilong hem, klosap full wan, kam from Psalms wea pruvim hao Christ Jesus nao datfala Bigfala David and hao Jehovah bae no lusim soul bilong Jesus long Hades bat bae liftimap from dae. Nomoa, “David hem no go ap long heven,” bat olsem olketa raetem finis long Psalm 110:1, Lord bilong hem go ap. Hu nao Lord bilong David? Peter kasem main part bilong tok bilong hem and talem strong: “Disfala Jesus wea iufala nilam”!—Acts 2:14-36; Ps. 16:8-11; 132:11.

²⁶ Waswe, eni gud samting kamaot from datfala tok bilong Peter, wea kam from Psalms? Wei wea 3,000 baptaes and joinim Christian kongregeson long datfala sem day ansarem diswan.—Acts 2:41.

²⁷ No longtaem bihaen, long wanfala spesol hipap, olketa disaepol prea long Jehovah and talem toktok bilong Psalm 2:1, 2. Olketa sei diswan hem fulfill taem olketa ruler wan mind for againstim ‘holy servant Jesus, wea [God] anointim.’ And story go ahed for sei “evriwan fulap witim holy spirit.”—Acts 4:23-31.

²⁸ Distaem, lukim leta wea go for olketa Hebrew. Long first tufala chapter, iumi faendem samfala toktok from Psalms abaotem position bilong Jesus, olsem Son bilong God long heven wea kamap King, ovarem olketa angel. Paul showimaot from Psalm 22:22 and samfala nara scripture hao Jesus garem wanfala sekson bilong “olketa brata,” part long seed bilong Abraham wea “share long hope for go long heven.” (Heb. 2:10-13, 16; 3:1) Then, start long Hebrews 6:20 and go kasem chapter 7, datfala aposol minim moa olketa nara waka bilong Jesus olsem ‘hae priest long wei bilong Melchizedek for olowe.’ Diswan hem join witim promis bilong God long Psalm 110:4, wea Paul plande taem talem moa for pruvim hao wei wea Jesus hem priest hem hae ovarem wei wea Aaron hem priest. Paul explainim hao thru long promis bilong Jehovah, Jesus Christ hem wanfala priest, no long earth, bat long heven and “hem stap olsem wanfala priest olowe”—olketa gud samting from service bilong hem olsem wanfala priest for olowe.—Heb. 7:3, 15-17, 23-28.

²⁹ And tu, long Hebrews 10:5-10, iumi lanem hao Jesus tinghae long will bilong God for hem sakrifaesim seleva and hem disaed strong for fulfillim diswan. Diswan kam from toktok bilong David long Psalm 40:6-8. Disfala feeling for worship barava savve helpem iumi evriwan for ting raonem and followim for mekem God hapi.—Lukim tu Psalm 116:14-19.

³⁰ Psalms storyim evribit living bilong Jesus bifor hem happen, wea end long datfala barava nogud test taem hem dae long post. Insaed diswan hem wei wea olketa offerim vinegar for hem drinkim, plei kura for aotsaed kaleko bilong hem, kill long hand and leg bilong hem, mekfani long hem, and bigfala pain long mind taem hem singaot: “God bilong mi, God bilong mi, why nao iu lusim mi?” (Matt. 27:34, 35, 43, 46; Ps. 22:1, 7, 8, 14-18; 69:20, 21) Olsem John 19:23-30 talem, nomata long olketa taem hia, Jesus mas kasem comfort and direction from Psalms, from hem savve evri scripture hia mas fulfill evribit. Jesus savve hao Psalms storyim tu resurrection and wei wea hem bae kasem haefala position. Hem mas tingim olketa samting olsem taem hem tekem lead for “singim song bilong praise,” or olketa psalm, witim olketa aposol bilong hem long lastfala naet bifor dae bilong hem.—Matt. 26:30.

³¹ So Psalms showimaot klia datfala “son bilong David” and datwan wea bae kamap Kingdom Seed, hem Christ Jesus, wea distaem kasem hae position olsem King and Priest long Zion long heven. Spes nomoa no mekem hem fit for storyim evribit evri verse bilong Psalms wea olketa raetem moa insaed olketa Christian Greek Scripture wea fulfill long disfala Anointed Wan bilong Jehovah, bat samfala moa example long hia: Ps. 78:2—Matt. 13:31-35; Ps. 69:4—John 15:25; Ps. 118:22, 23—Mark 12:10, 11 and Acts 4:11; Ps. 34:20—John 19:33, 36; Ps. 45:6, 7—Heb. 1:8, 9. And tu, olketa raet finis abaotem kongregeson bilong olketa tru follower bilong Jesus insaed Psalms, no olsem man wanwan, bat olsem wanfala sekson wea God chusim from evri nation for share insaed waka wea praisem nem bilong Jehovah.—Ps. 117:1—Rom. 15:11; Ps. 68:18—Eph. 4:8-11; Ps. 95:7-11—Heb. 3:7, 8; 4:7.

³² Wei wea iumi studyim Psalms hem mekem iumi tinghae moa long rul bilong Jehovah God, wea distaem Hem rul thru long promis Seed and Wan wea kasem Kingdom, wea givim Hem glory. Letem iumi olowe stap midolwan olketa loyal wan wea hapi long ‘nambawan position bilong Jehovah wea luk gud tumas’ and wea Psalm 145 sei olsem abaotem olketa, wea olketa kolem “wanfala praise, bilong David”: “Olketa bae tok abaotem glory bilong rul bilong iu, and olketa bae story abaotem bigfala strong bilong iu, for mekem olketa son bilong man savve long olketa strongfala akson wea hem duim and glory bilong rul bilong hem wea luk gud tumas. Rul bilong iu hem bae stap go kasem taem olketa no markem, and iu bae rul ovarem evri genereson for olowe.” (Ps. 145:5, 11-13) Olsem disfala profesi bilong psalm talem, glory bilong Kingdom bilong God thru long Christ hem distaem go aot for evri man long evri nation. Iumi shud barava thankiu for datfala Kingdom and King bilong hem! Lastfala toktok bilong Psalms hem barava fitim: “Evri samting wea laef—letem hem praisem Jah. Praisem Jah, iufala pipol!”—150:6.

[Olketa Footnote]