Datfala Truth Hem Hao Spesol Long Iu?
“Iufala bae savve long datfala truth, and datfala truth bae mekem iufala free.”—JOHN 8:32.
1. Hao nao wei wea Pilate iusim word “truth” hem difren from wei wea Jesus iusim?
“WANEM nao truth?” Taem Pilate askem datfala kwestin, luk olsem hem interest long evrikaen samting wea iumi fit for sei hem tru. Bat long nara wei Jesus hem just bin sei: “For diswan nao mi born kam, and for diswan nao mi kam insaed long world, for mi mas witness abaotem datfala truth.” (John 18:37, 38) Long difren wei from Pilate, Jesus sei “datfala truth.” Hem story abaotem truth wea kam from God.
Tingting Bilong World Abaotem Datfala Truth
2. Wanem toktok bilong Jesus nao showimaot gudfala samting bilong truth?
2 Paul hem sei: “Faith hem no samting wea evriwan garem.” (2 Thessalonians 3:2) Datwan hem semsem tu witim datfala truth. Nomata taem olketa garem chance for savve long truth wea kam from Bible, planti pipol chus for no laek savve long datwan. Nomata olsem, hem wanfala barava spesol samting! Jesus sei: “Iufala bae savve long datfala truth, and datfala truth bae mekem iufala free.”—John 8:32.
3. Wanem warning abaotem giaman teaching nao iumi shud followim?
3 Aposol Paul sei datfala truth hem no stap long olketa idea and kastom bilong man. (Colossians 2:8) Tru nao, kaen teaching olsem savve giamanim man. Paul warnim olketa Christian long Ephesus hao sapos olketa putim faith long olketa samting hia, bae olketa olsem spiritual baby “wea seksek olabaot olsem wave pushim . . . from evrikaen teaching wea olsem wind wea kamaot from giaman wei bilong man, from olketa kleva for duim rong samting.” (Ephesians 4:14) Distaem, “giaman wei bilong man” hem go ahed from toktok for pullim man wea kamaot from olketa wea againstim truth from God. Kaen wei for talemaot information olsem hem tanem truth for kamap laea samting and apim olketa laea samting for olsem truth. For faendem truth, taem samting wea no isi for lukim hem pullim man, iumi mas waka hard for studyim Bible.
Olketa Christian and World
4. Hu nao savve kasem datfala truth, and wanem nao olketa wea kasem mas duim?
4 Jesus Christ prea olsem long Jehovah for olketa wea kamap disaepol bilong hem: “Mekem olketa kamap holy thru long datfala truth; word bilong iu nao truth.” (John 17:17) Olketa hia bae kamap holy, or stap separate, for servem Jehovah and talemaot nem and Kingdom bilong hem. (Matthew 6:9, 10; 24:14) Nomata no evri pipol garem, truth bilong Jehovah hem olsem wanfala free present for evriwan wea lukaotem, nomata wanem nation, kala skin, or kastom olketa kam from. Aposol Peter hem sei: “Mi luksavve hao God hem no saed witim eniwan, bat long evri nation man wea fraet long hem and duim raeteous fasin nao hem acceptim.”—Acts 10:34, 35.
5. Why nao olketa Christian planti taem kasem persecution?
5 Olketa Christian sharem truth bilong Bible witim nara pipol bat no evriwan welkamim olketa. Jesus givim disfala warning: “Pipol bae givim iufala long test and bae killim iufala dae, and evri nation bae heitim iufala from nem bilong mi.” (Matthew 24:9) Taem hem talem toktok abaotem disfala verse, bigman bilong church from Ireland, John R. Cotter hem raet olsem long 1817: “Hard waka bilong olketa [Christian] for changem laef bilong olketa man thru long preaching, bae no mekem pipol tinghae long olketa bat mekem olketa heitim and persecutim olketa disaepol bikos olketa showimaot klia rabis fasin bilong pipol hia.” Pipol wea persecutim olketa olsem no “acceptim love bilong truth mekem olketa savve sev.” Dastawe “God letem wei bilong giaman samting for kasem olketa, mekem olketa savve bilivim laea, mekem olketa kasem judgment bikos olketa no bilivim truth bat hapi long fasin wea no raeteous.”—2 Thessalonians 2:10-12.
6. Christian mas no mekem grow feeling for laekem olketa wanem samting?
6 Aposol John hem kaonselem olketa Christian wea stap insaed disfala raf world: “No lovem world or olketa samting insaed long world. . . . Evriting long world—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world.” (1 John 2:15, 16) Taem hem sei “evriting,” John minim evri samting. From diswan, iumi no want for mekem grow feeling for wantem eni samting bilong disfala world wea savve mekem iumi tan difren from datfala truth. Wei for followim kaonsel bilong John bae affectim living bilong iumi long strongfala wei. Hao?
7. Hao nao wei for savve long datfala truth muvim pipol wea garem stretfala heart?
7 Long year 2001, Olketa Jehovah’s Witness evriwea long world conductim winim foa and haf million hom Bible study evri month, hem teachim olketa man wanwan and grup tu olketa mark bilong God for kasem laef. From diswan, 263,431 nao baptaes. Laet bilong truth kamap spesol samting long olketa niu disaepol hia, and olketa rejectim wei for kaban witim nogud pipol and nogud dirty fasin wea big tumas insaed world distaem. Taem olketa baptaes, olketa go ahed for live followim olketa standard wea Jehovah putim for evri Christian. (Ephesians 5:5) Waswe, datfala truth hem barava spesol olsem long iu?
Jehovah Kea for Iumi
8. Wanem nao Jehovah duim taem iumi dedicate long hem, and why nao hem wise for “lukaotem firstaem kingdom”?
8 Nomata iumi no perfect, witim mercy Jehovah acceptim dedication bilong iumi. Hem olsem hem hol kam daon and pullim iumi go long hem. Long disfala wei nao hem teachim iumi for mekem moa hae olketa goal and samting wea iumi wantem. (Psalm 113:6-8) Long semtaem, Jehovah letem iumi fren gud witim hem, and hem promis for lukaftarem iumi sapos iumi “go ahed for lukaotem firstaem kingdom and raeteous fasin bilong hem.” Sapos iumi duim olsem and protectim iumiseleva long spiritual wei, hem promis olsem: “Iufala bae kasem olketa narafala samting.”—Matthew 6:33.
9. Hu nao “datfala faithful and wise slave,” and hao nao Jehovah kea for iumi taem hem iusim disfala “slave”?
9 Jesus Christ chusim 12-fala aposol bilong hem and leim faondeson for kongregeson bilong olketa anointed Christian wea kasem nem “Israel bilong God.” (Galatians 6:16; Revelation 21:9, 14) Bihaen, olketa kolem sekson hia “kongregeson bilong living God, olsem post and saport bilong truth.” (1 Timothy 3:15) Jesus showimaot hao olketa member bilong datfala kongregeson nao “datfala faithful and wise slave” and olsem “datfala faithful wakman, datfala wise wan.” Jesus sei datfala faithful servant bae kasem responsibility for givim olketa Christian “kaikai wea fitim olketa long barava taem.” (Matthew 24:3, 45-47; Luke 12:42) Sapos iumi no garem kaikai, bae iumi hangre gogo iumi dae. Long sem wei tu, sapos iumi no kaikaim spiritual kaikai, iumi bae kamap wik and dae long spiritual wei. So, wei wea “datfala faithful and wise slave” stap hem nara samting wea pruvim Jehovah kea for iumi. Iumi mas evritaem barava tinghae long datfala important spiritual kaikai wea iumi kasem thru long datfala “slave.”—Matthew 5:3.
10. Why nao hem important for iumi stap evritaem long olketa meeting?
10 For kasem spiritual kaikai man need for study seleva. Hem mas kaban witim olketa nara Christian tu and attendim olketa meeting bilong kongregeson. Waswe, iu barava rememberim samting wea iu kaikaim six month go finis, or six week go finis? Maet nomoa. Nomata olsem, samting wea iu kaikaim hem givim iu strong wea iu needim. And maet iu kaikaim semkaen kaikai tu bihaen. Diswan fitim tu spiritual kaikai wea iumi kasem long olketa Christian meeting. Maet iumi no rememberim evri samting wea iumi herem long olketa meeting. And semkaen information maet kamap planti taem. Nomata olsem, datwan hem spiritual kaikai wea iumi needim for stap healthy. Olketa meeting bilong iumi evritaem givim gudfala spiritual kaikai, wea iumi kasem long barava taem.
11. Wanem responsibility nao iumi garem taem iumi attendim olketa Christian meeting?
11 Iumi garem responsibility tu taem iumi attendim olketa Christian meeting. Olketa Christian kasem kaonsel for “encouragem narawan,” for muvim olketa nara member bilong kongregeson for “showimaot love and gudfala waka.” Wei wea iumi preparem, attendim, and tekpart long evri Christian meeting hem strongim faith bilong iumi wanwan and encouragem nara pipol tu. (Hebrews 10:23-25) Olsem smol pikinini wea savve chusim nomoa kaikai hem laekem, samfala maet needim encouragement evritaem for kasem spiritual kaikai. (Ephesians 4:13) Hem loving samting for provaedem encouragement wea pipol needim mekem olketa hia savve grow for kamap mature Christian, wea aposol Paul raet olsem abaotem olketa: “Strong kaikai hem for mature pipol, for olketa wea thru long wei for iusim, trainim paoa bilong olketa for luksavve long olketa stret samting and rong samting.”—Hebrews 5:14.
Lukaftarem Iumiseleva Long Spiritual Wei
12. Hu nao garem main responsibility for wei wea iumi go ahed insaed long truth? Minim diswan.
12 Marit partner or parents bilong iumi savve encouragem iumi long wei bilong truth. Long sem wei, olketa elder long kongregeson savve shepherdim iumi olsem sheep wea olketa lukaftarem. (Acts 20:28) Bat, sapos iumi laek for go ahed long living wea garem faondeson long datfala truth, hu nao garem main responsibility for diswan? For tok stret, datfala responsibility hem bilong iumi wanwan. And datwan hem fitim taem wea living hem isi and long hard taem tu. Tingim disfala example.
13, 14. Olsem story abaotem baby sheep hem showimaot, hao nao iumi savve kasem spiritual help wea iumi needim?
13 Long Scotland, samfala baby sheep kaikai long wanfala field taem wanfala hem wakabaot go saed long wanfala hill and foldaon and pas long wanfala flat ston. Hem no garem eni kill, bat hem fraet tumas and no savve klaem go ap. So hem start for krae big. Mami bilong hem herem, and hem tu start for krae big go kasem taem wea shepherd kam and sevem datfala baby sheep.
14 Lukim samting wea happen. Datfala baby sheep hem singaot for help, mami bilong hem joinim go krae bilong hem, and diswan mekem shepherd stretawe duim samting for sevem hem. Sapos wanfala baby animal and mami bilong hem feelim danger and stretawe singaot for help, waswe, fitim iumi tu for duim sem samting taem iumi foldaon long spiritual wei or feisim danger wea iumi no expectim from world bilong Satan? (James 5:14, 15; 1 Peter 5:8) Iumi shud duim olsem especially sapos iumi short long savve bikos iumi young or bikos iumi niu insaed truth.
Wei for Followim Instruction Bilong God Givim Hapi
15. Hao nao wanfala woman feel taem hem start for kaban witim Christian kongregeson?
15 Tingim gudfala samting from savve bilong Bible and peace long mind wea hem givim for olketa wea servem God bilong truth. Wanfala woman wea 70 year wea attendim Church of England for full laef bilong hem agree for studyim Bible witim wanfala Jehovah’s Witness. No longtaem bihaen hem lanem hao nem bilong God hem Jehovah and hem join for sei “Amen” long pablik prea wea olketa talem long Kingdom Hall. Witim strongfala feeling hem sei: “Winim wei for showimaot God olsem hae tumas winim iumi olketa man nating, iufala mekem hem kamap klos tumas olsem wanfala gudfala fren. Hem samting wea mi nating feelim bifor.” Datfala woman bae nating forgetim first samting wea mekem datfala truth spesol long hem. Long sem wei iumi tu mas nating forgetim wei wea datfala truth hem spesol tumas taem iumi firstaem acceptim.
16. (a) Wanem nao savve happen sapos iumi mekem wei for kasem selen olsem main goal bilong iumi? (b) Hao nao iumi savve faendem trufala hapi?
16 Planti tingse sapos olketa garem moa selen, bae olketa moa hapi. Nomata olsem, sapos iumi mekem wei for kasem selen olsem main goal long laef, bae iumi safa from “planti pain long mind.” (1 Timothy 6:10, Phillips) Tingim haomas pipol baem lottery ticket, spendem selen long casino, or iusim big selen long stock market for gamble, from olketa want for kamap rich. Tu-thri pipol nomoa kamap rich. And planti taem olketa wea kwiktaem kamap rich faendaot hao riches no mekem olketa hapi. Bat, hapi wea olowe hem kamaot from wei for duim will bilong Jehovah, for waka witim Christian kongregeson followim wei wea holy spirit bilong Jehovah hem lead and help bilong olketa angel bilong hem. (Psalm 1:1-3; 84:4, 5; 89:15) Taem iumi duim diswan, iumi maet kasem olketa blessing wea iumi no expectim. Waswe, datfala truth hem barava spesol long wei wea mekem iu kasem planti blessing insaed laef bilong iu?
17. Wei wea Peter stap witim Simon, man for wakem leather, hem showimaot wanem abaotem tingting bilong datfala aposol?
17 Tingim wanfala experience bilong aposol Peter. Long year 36 C.E., hem duim wanfala missionary gogo long Low Ples bilong Sharon. Hem stop long Lydda, wea hem healim Aeneas wea paralyze and then hem go long saedsea bilong Joppa. Long there hem resurrectim Dorcus. Acts 9:43 sei: “For samfala day hem stap long Joppa witim Simon, wanfala man for wakem leather.” Disfala short toktok showimaot wei wea Peter no teksaed taem hem servem pipol long datfala taon. Hao nao olsem? Man wea studyim Bible, Frederic W. Farrar hem raet olsem: “Eni man wea strong tumas for followim Oral Law [Law bilong Moses] bae nating willing for stap insaed haos bilong man for wakem leather. Medicine wea datfala man mas iusim, and wei wea hem mas tasim skin and dead body bilong olketa difren animal, mekem hem dirty and nogud tumas long eye bilong olketa wea strong for followim law.” Farrar sei nomata sapos haos bilong Simon “long saedsea” hem farawe from ples wea hem wakem leather, Simon hem duim ‘waka wea pipol ting nogud tumas long hem and diswan mekem nara pipol no respectim eniwan wea duim waka hia.’—Acts 10:6.
18, 19. (a) Why nao Peter hem konfius long wanfala vision wea hem kasem? (b) Wanem blessing wea Peter no expectim nao hem kasem?
18 Peter wea no teksaed hem acceptim wei wea Simon welkamim hem, and long there Peter kasem instruction from God wea hem no expectim. Hem lukim wanfala vision wea hem kasem komand for kaikaim olketa animal wea no klin long law bilong olketa Jew. Peter sei hem nating “kaikaim eni samting wea dirty and no klin.” Bat thrifala taem hem herem disfala toktok: “No kolem dirty, samting wea God mekem klin.” Dastawe “Peter barava konfius long wanem nao maet mining bilong vision wea hem lukim.”—Acts 10:5-17; 11:7-10.
19 Peter hem no savve hao long day bifor datwan, long Caesarea, 50 kilometer from datfala ples, wanfala Gentile man wea nem bilong hem Cornelius hem kasem wanfala vision tu. Angel bilong Jehovah givim instruction long Cornelius for sendem olketa servant for faendem Peter long haos bilong Simon, datfala man for wakem leather. Cornelius sendem olketa servant bilong hem go long haos bilong Simon, and Peter go bak witim olketa long Caesarea. Long there hem preach long Cornelius and olketa relative and fren bilong hem. Samting wea happen nao, olketa hia kamap firstfala Gentile pipol wea no circumcise for biliv and for kasem holy spirit for rul long Kingdom. Nomata olketa man hia no circumcise, evriwan wea herem toktok bilong Peter olketa baptaes. Diswan openem wei for pipol bilong olketa nation, wea olketa Jew ting long olketa olsem no klin, for kamap member bilong Christian kongregeson. (Acts 10:1-48; 11:18) Datwan hem wanfala spesol privilege for Peter—from datfala truth hem spesol long hem and leadim hem for followim instruction from Jehovah and duim samting followim faith!
20. Wanem help from God nao iumi bae kasem sapos iumi putim datfala truth firstaem long laef bilong iumi?
20 Paul sei: “Taem iumi talem datfala truth, iumi mas growap long love long evri samting long datwan wea hed, Christ.” (Ephesians 4:15) Tru nao, datfala truth bae givim iumi bigfala hapi winim eni nara hapi distaem sapos iumi putim truth firstaem long laef bilong iumi and letem Jehovah leadim gogo bilong iumi thru long holy spirit bilong hem. And tu, rememberim saport bilong olketa holy angel long waka bilong iumi for talemaot gud nius. (Revelation 14:6, 7; 22:6) Iumi garem bigfala privilege for kasem saport olsem long waka wea Jehovah komandim iumi for duim! Wei for keepim faithful fasin bae leadim iumi for praisem Jehovah, God bilong truth, for olowe. Waswe, eni samting hem moa spesol winim datwan?—John 17:3.
Wanem Nao Iumi Lanem Finis?
• Why nao planti no acceptim datfala truth?
• Hao nao olketa Christian shud ting long olketa samting long world bilong Satan?
• Hao nao iumi shud ting long olketa meeting, and why nao olsem?
• Wanem responsibility nao iumi garem for lukaftarem iumiseleva long spiritual wei?
[Map/Piksa long page 18]
(For formatted text, lukim pablikeson)
GREAT SEA
Caesarea
PLAIN OF SHARON
Joppa
Lydda
Jerusalem
[Piksa]
Peter followim instruction from God and kasem blessing wea hem no expectim
[Credit Line]
Map: Mountain High Maps® Copyright © 1997 Digital Wisdom, Inc.
[Piksa long page 13]
Jesus givim witness abaotem datfala truth
[Piksa long page 15]
Olsem physical kaikai, iumi needim spiritual kaikai for stap healthy