Jehovah Bae No Delay

“Nomata sapos [datfala vision] hem delay, go ahed for expectim; from hem bae no fail for kamap tru. Hem bae no leit.”—HABAKKUK 2:3.

1. Wanem nao pipol bilong Jehovah disaed strong for duim, and diswan muvim olketa for duim wanem?

“LONG ples bilong mi for gard mi bae go ahed for standap.” Datwan nao samting wea Habakkuk disaedem. (Habakkuk 2:1) Pipol bilong Jehovah long mek-20 century showimaot semkaen wei for disaed strong. Dastawe olketa acceptim invitation wea kamaot long wanfala spesol convention long September 1922: “Diswan hem day bilong olketa day. Lukim, King hem rul finis! Iufala nao sekson bilong hem for talemaot long pablik. Dastawe talemaot, talemaot, talemaot, King and kingdom bilong hem.”

2. Taem olketa waka strong moa bihaen World War I, wanem nao olketa anointed Christian savve talem?

² Bihaen World War I, Jehovah givim bak long anointed remnant wei for waka strong moa. Olsem Habakkuk, evriwan long olketa savve sei: “Mi bae standap long strong wall; and mi bae lukaot, for lukim wanem nao hem bae talem thru long mi.” Tufala Hebrew word for “lukaot” and “gard” kamap long planti profesi.

“Hem Bae No Leit”

3. Why nao iumi mas go ahed for lukaot?

³ Taem Olketa Witness Bilong Jehovah talemaot datfala warning distaem, olketa mas barava followim toktok bilong nambawan profesi bilong Jesus: “Go ahed for lukaot, from iufala no savve wanem taem nao masta bilong haos bae kam, maet leit long day or long midolnaet or taem kokorako krae or long early morning; mekem sapos seknomoa hem kam, hem no faendem iufala sleep. Bat samting wea mi talem long iufala mi talem long evriwan, Go ahed for lukaot.” (Mark 13:35-37) Olsem Habakkuk, and for fitim toktok bilong Jesus, iumi mas go ahed for lukaot!

4. Hao nao taem bilong iumi hem semsem olsem taem bilong Habakkuk long samting olsem 628 B.C.E.?

⁴ Maet Habakkuk finis raetem profesi bilong hem long samting olsem 628 B.C.E., bifor Babylon kamap world paoa. For planti year, judgment bilong Jehovah for apostate Jerusalem hem go aot. Bat, no eni samting showimaot wanem taem nao datfala judgment bae kam. Hu nao tingse datwan bae kamap long 21 year bihaen and Jehovah bae iusim Babylon for givim judgment? Distaem tu, iumi no savve long ‘datfala day and hour’ wea God markem for disfala system for finis, bat Jesus warnim iumi finis: “Redy evritaem, bikos long hour wea iufala no tingim, Son bilong man bae kam nao.”—Matthew 24:36, 44.

5. Wanem nao barava encouragem iumi long toktok bilong God wea stap long Habakkuk 2:2, 3?

⁵ Dastawe, waka wea Jehovah givim for datfala profet hem barava fitim: “Raetem daon vision, and raetem klia long olketa tablet, mekem dat wan wea readim big savve readim long stretfala wei. From vision hem stap yet for taem wea set finis, and hem hariap for kasem end, and hem bae no laea. Nomata sapos hem delay, go ahed for expectim; from hem bae no fail for kamap tru. Hem bae no leit.” (Habakkuk 2:2, 3) Distaem, wicked and raf fasin kamap moa big evriwea long earth, wea showimaot iumi barava stap klosap long “bigfala day bilong Jehovah wea fit for mekem man fraet.” (Joel 2:31) Tru nao, toktok bilong comfort from Jehovah hem barava encouragem iumi: “Hem bae no leit”!

6. Hao nao iumi savve stap laef long day bilong judgment for distroe?

⁶ So, hao nao iumi savve stap laef long datfala day bilong judgment for distroe? Jehovah talemaot ansa hao olketa wea raeteous difren tumas from olketa wea no raeteous: “Lukim! Soul bilong hem boela nao; hem no stap stret insaed long hem. Bat long saed bilong raeteous wan, bae hem go ahed for stap laef from faithful fasin bilong hem.” (Habakkuk 2:4) Olketa praod and greedy ruler mekem history bilong distaem fulap witim blood bilong planti million pipol, main taem nao long tufala world war and faet wea killim dae planti pipol midolwan long olketa tribe. Long narasaed, pipol bilong God wea lovem peace go ahed strong long faithful fasin. Olketa nao “raeteous nation wea keepim faithful wei.” Disfala nation, witim fren bilong hem, datfala “nara sheep,” followim disfala kaonsel: “Trust long Jehovah, iufala pipol, for olowe, from Jah Jehovah hem Rok bilong olowe.”—Isaiah 26:2-4; John 10:16.

7. For fitim wei wea Paul iusim Habakkuk 2:4, wanem nao iumi mas duim?

⁷ Taem hem raet for olketa Hebrew Christian, aposol Paul talem toktok bilong Habakkuk 2:4 taem hem sei long pipol bilong Jehovah: “Iufala garem need for go ahed strong, mekem, bihaen iufala duim finis will bilong God, iufala savve kasem wanem hem promisim. From ‘lelebet taem nomoa,’ and ‘dat wan wea bae kam bae arrive and bae no delay.’ ‘Bat raeteous wan bilong mi bae stap laef thru long faith,’ and, ‘sapos hem hol bak, soul bilong mi no hapi long hem.’ ” (Hebrews 10:36-38) Taem bilong iumi hem no taem for isisi or foldaon insaed trap for aftarem material samting and nogud hapitaem bilong world bilong Satan. Wanem nao iumi mas duim go kasem taem wea datfala “lelebet taem” hem finis? Olsem Paul, iumi wea bilong holy nation bilong Jehovah mas ‘trae hard for kasem olketa samting wea stap long front, aftarem datfala goal’ bilong laef olowe. (Philippians 3:13, 14) And olsem Jesus, iumi mas ‘go ahed strong for datfala hapi wea stap front long iumi.’—Hebrews 12:2.

8. Hu nao datfala “man” wea Habakkuk 2:5 storyim, and why nao hem bae no win?

⁸ Habakkuk 2:5 story abaotem “wanfala man” wea difren evribit from olketa servant bilong Jehovah, hem fail for kasem goal bilong hem, nomata hem “mekem soul bilong hem waed olsem Sheol.” Hu nao disfala man wea “no savve satisfae”? Olsem Babylon wea hangre tumas long taem bilong Habakkuk, disfala “man” hem olketa paoa bilong politik—nomata olketa Fascist, Nazi, Communist, or olketa wea sei olketa democratic tu—wea faet long olketa war for mekem land bilong hem kamap moa big. Hem fulimap tu Sheol, grev, witim olketa soul wea no guilty. Bat disfala “man” for giaman bilong world bilong Satan, wea drunk witim wei for tinghae long hemseleva, hem fail for “hipimap long hemseleva evri nation and hipimap tugeta long hemseleva evri pipol.” Jehovah God nomoa savve mekem evri man kasem wan mind, and hem bae duim diswan thru long Messiah Kingdom.—Matthew 6:9, 10.

First Wan Long Faevfala Big Trabol

9, 10. (a) Wanem nao Jehovah talemaot thru long Habakkuk? (b) Long wei for kasem samting long wei wea no raeteous, hao nao datwan go ahed distaem?

⁹ Jehovah, thru long profet bilong hem Habakkuk, talemaot faevfala trabol, judgment wea mas happen for redyim earth for olketa faithful worshiper bilong God stap insaed. Olketa hia wea garem stretfala heart ‘liftim wanfala tokpiksa’ wea story olsem abaotem Jehovah. Iumi readim long Habakkuk 2:6: “Trabol for man wea mekem staka samting wea no bilong hem—O hao long nao!—and wea mekem hevi kaon for hemseleva!”

¹⁰ Diswan story abaotem olketa wei for kasem samting long wei wea no raeteous. Long world raonem iumi, olketa wea rich kamap moa rich and olketa wea poor kamap moa poor. Pipol wea sellim drug and raverave kasem planti rich samting, bat long semtaem planti pipol hangre. Wanfala long evri fofala pipol long world garem living wea poor tumas. Living hem nogud tumas long planti kantri. Olketa wea barava wantem raeteous fasin long earth sei: “O hao long nao” olketa nogud fasin hia go ahed for kamap moa big! Nomata olsem, end hem klosap tumas! Tru nao, datfala vision “bae no leit.”

11. Wanem nao Habakkuk talem abaotem wei for kapsaetem blood bilong olketa man, and why nao iumi sei bigfala wei for guilty long blood hem stap long earth distaem?

¹¹ Profet hia talem datfala wicked man: “Bikos iuseleva barava spoelem planti nation, evriwan bilong olketa pipol wea stap yet bae barava spoelem iu, bikos long wei for kapsaetem blood bilong olketa man and raf fasin long earth, datfala taon and evriwan wea stap insaed.” (Habakkuk 2:8) Wei for guilty long blood hem big tumas long earth distaem! Jesus tok stret olsem: “Olketa wea iusim sword bae dae from sword.” (Matthew 26:52) Long disfala mek-20 century nomoa, olketa nation and difren tribe wea guilty long blood olketa nao bihaenem wei for killim dae winim wan handred million pipol. Trabol for olketa wea swim long blood hia!

Mek-tu Trabol

12. Wanem nao mek-tu trabol wea Habakkuk raet abaotem, and hao nao iumi savve sure wei for raverave for kasem samting bae iusles nomoa?

¹² Mek-tu trabol, wea stap long Habakkuk 2:9-11, hem for “man wea duim nogud samting for kasem samting for haos bilong hem, for mekem haos bilong hem stap long hae ples, mekem hem sev from trabol!” Wei for raverave for kasem samting bae iusles, olsem man for raetem psalm talemaot klia: “No fraet bikos wanfala man hem kasem riches, bikos glory bilong haos bilong hem kamap moa big, from taem hem dae hem kanduit tekem eni samting witim hem; glory bilong hem bae no go daon witim hem.” (Psalm 49:16, 17) Dastawe wise advaes bilong Paul hem gud tumas: “Givim order long olketa wea rich long disfala system for no praod, and for putim hope bilong olketa, no long riches wea bae finis, bat long God, wea givim iumi evri samting for mekem iumi hapi.”—1 Timothy 6:17.

13. Why nao iumi mas go ahed for talemaot warning bilong God?

¹³ Hem important tumas for olketa judgment message bilong God for go aot distaem! Taem olketa Pharisee kros from pipol singaotem Jesus olsem “dat Wan wea kam olsem King insaed nem bilong Jehovah,” hem ansarem olketa: “Mi talem iufala, Sapos olketa hia stap kwaet, olketa stone bae singaot.” (Luke 19:38-40) Long sem wei, sapos pipol bilong God distaem fail for talemaot wicked fasin bilong world, “aot from wall wanfala stone seleva bae singaot long sorre.” (Habakkuk 2:11) So iumi mas go ahed for talemaot warning bilong God!

Mek-thri Trabol and Wei for Guilty Long Blood

14. Olketa religion bilong world guilty long wanem samting?

¹⁴ Mek-thri trabol wea Habakkuk talemaot hem abaotem wei for guilty long blood. Habakkuk 2:12 sei: “Trabol for man wea buildim wanfala taon thru long wei for kapsaetem blood, and wea strongim wanfala taon thru long fasin wea no raeteous!” Long disfala system, fasin wea no raeteous and wei for kapsaetem blood join tugeta planti taem. Hem klia tumas, olketa religion bilong world garem blame for enikaen nogud dae long history. Samfala nao olketa Crusade, wea pipol wea sei olketa Christian faet againstim olketa Muslim; Catholic Inquisition long Spain and Latin America; Thirti-Year War Bilong Europe midolwan long olketa Protestant and Catholic; and barava worse wan nao, tufala world war long century bilong iumi, wea tufala evriwan start insaed long Christendom.

15. (a) Wanem nao olketa nation go ahed for duim wea church saportim and agree witim? (b) Waswe, United Nations savve finisim wei wea olketa nation mekem samting for faet long war?

¹⁵ Wanfala barava nogud samting bilong mek-tu world war hem Nazi Holocaust wea killim dae planti million Jew and nara pipol long Europe. No longtaem go nomoa olketa bigman bilong Roman Catholic church long France talemaot hao olketa fail for againstim wei wea olketa Nazi sendem go planti handred thousand pipol long gas chamber. Nomata olsem, olketa nation go ahed for redyim wei for kapsaetem blood, and church saportim or agree witim datwan. Taem hem story abaotem Russian Orthodox Church, Time magasin (international issue) hem sei: “Church wea kamap strong moa hem garem bigfala paoa insaed long wanfala area wea hard tumas bifor: olketa army bilong Russia. . . . Distaem wei for blessim olketa aeroplane for faet and haos bilong olketa soldia kamap samting wea olketa duim evritaem. Long November, long Danilovsky Monastery bilong Moscow, main headquarters bilong Russian Patriarchate, church hem blessim evri nuclear samting for faet bilong Russia.” Waswe, United Nations savve stopem olketa nation for mekem moa olketa samting for faet long war? Nomoa nao! Wanfala man wea winim Nobel Peace Prize hem sei long The Guardian niuspepa bilong London, England: “Samting wea mekem man wari nao hem hao faevfala main member bilong UN Security Council nao faevfala main nation long world for mekem samting for faet.”

16. Wanem nao Jehovah bae duim long olketa nation wea encouragem war?

¹⁶ Waswe, bae Jehovah judgem olketa nation wea encouragem war? Habakkuk 2:13 sei: “Lukim! Waswe, hem no from Jehovah bilong olketa army hao pipol bae waka hard for fire nomoa, and hao olketa nation bae mekem olketa seleva kamap taed for samting nating nomoa?” “Jehovah bilong olketa army”! Yes, Jehovah garem army bilong olketa angel long heven, wea hem bae iusim for mekem olketa pipol and nation wea laekem war for olsem samting nating!

17. Savve bilong Jehovah bae go kasem wea long earth bihaen hem judgem olketa raf nation?

¹⁷ Wanem nao bae kamap bihaen Jehovah givim judgment long olketa raf nation hia? Habakkuk 2:14 givim ansa: “Earth bae fulap witim wei for savve long glory bilong Jehovah olsem olketa wata seleva kavarem sea.” Datwan hem wanfala nambawan hope! Long Armageddon, rul bilong Jehovah bae kamap hae for olowe. (Revelation 16:16) Hem promisim iumi hao hem bae ‘givim glory long ples for putim leg bilong hem,’ disfala earth wea iumi stap insaed. (Isaiah 60:13) Evri man bae lane abaotem wei for live followim God, mekem savve bilong olketa abaotem olketa nambawan purpose bilong Jehovah bae olsem olketa wata wea fulimap sea.

Mek-foa and Mek-faev Trabol

18. Wanem nao mek-foa trabol wea Habakkuk talemaot, and hao nao diswan showaot long fasin bilong world distaem?

¹⁸ Mek-foa trabol hem stap long Habakkuk 2:15 wea sei: “Trabol for man wea givim olketa fren bilong hem samting for drink, wea joinim long datwan hot and kros bilong iu, for mekem olketa drunk, witim goal for lukluk long olketa private part bilong olketa.” Diswan hem showimaot olabaot, bighed living bilong world distaem. Dirty fasin bilong hem, wea olketa religion acceptim nomoa, hem kamap barava worse. Olketa sik, olsem AIDS and narafala sik wea kamaot from dirty fasin, kamap big tumas evriwea long earth. Winim wei for showimaot “glory bilong Jehovah,” mista-mi genereson bilong distaem kamap nogud tumas and gogo for judgment bilong God. From disfala olabaot world hem “fulap witim shame and no glory,” hem redy for drink from dish bilong kros bilong Jehovah, wea minim will bilong hem for datwan. ‘Glory bilong datwan bae kasem shame.’—Habakkuk 2:16.

19. Wanem nao introduction bilong mek-faev trabol wea Habakkuk talem, and why nao olketa toktok olsem garem mining long world distaem?

¹⁹ Introduction bilong mek-faev trabol hem givim strongfala warning againstim wei for worshipim olketa image. Jehovah mekem profet hia for talem disfala strongfala toktok: “Trabol for dat wan wea sei long pis timba: ‘Wekap!’ long wanfala stone wea no toktok: ‘Wekap! Hemseleva nao bae givim instruction’! Lukim! Gold and silver kavarem, and no eni wind stap insaed long hem.” (Habakkuk 2:19) Kam kasem distaem, olketa long Christendom and olketa heathen baodaon long olketa cross, Virgin Mary, image, and narafala samting wea luk olsem man and animal wea olketa wakem. No eni samting hia savve wekap for sevem pipol wea worshipim olketa taem Jehovah kam for givim judgment. Olketa gold and silver wea kavarem olketa hem iusles taem iumi markem witim nambawan samting bilong God, Jehovah, wea stap olowe, and olketa glory bilong creation bilong hem wea laef. Letem iumi praisem nambawan nem bilong hem for olowe!

20. Long wanem temple arrangement nao iumi garem privilege for hapi for serve?

²⁰ Yes, God bilong iumi, Jehovah, hem fit for kasem evri praise. Witim deep feeling for showimaot respect for hem, letem iumi obeyim strongfala warning bilong hem againstim wei for worshipim idol. Bat lisin! Jehovah hem story yet: “Jehovah hem stap long holy temple bilong hem. Stap kwaet front long hem, full earth!” (Habakkuk 2:20) Iumi sure, long hia profet hem tingim temple long Jerusalem. Bat, iumi distaem garem privilege for worship insaed wanfala spiritual temple arrangement wea barava moa hae, wea Lord bilong iumi Jesus Christ waka olsem Hae Priest. Long hia, long olketa courtyard bilong datfala temple long earth, iumi meet tugeta, serve, and prea, and givim honor long Jehovah wea nambawan nem bilong hem fit for kasem. And iumi hapi tumas for worshipim from heart loving Dadi bilong iumi long heven!

Waswe, Iu Remember?

• Hao nao iu ting long disfala toktok bilong Jehovah: “Hem bae no leit”?

• Wanem nao mining bilong olketa trabol wea Habakkuk talem for distaem?

• Why nao iumi mas go ahed for talemaot warning bilong Jehovah?

• Insaed courtyard bilong wanem temple nao iumi garem privilege for serve?

[Piksa long page 15]

Olsem Habakkuk, olketa servant bilong God distaem savve Jehovah bae no delay

[Piksa long page 18]

Waswe, iu tinghae long privilege for worshipim Jehovah long courtyard bilong spiritual temple bilong hem?

[Piksa Credit Line long page 16]

U.S. Army foto