Bible Buk Namba 58​—Hebrews

Man wea Raetem: Paul

Ples Hem Raetem: Rome

Taem Hem Finis Raetem: c. 61 C.E.

PAUL is best known as the apostle “to the naPIPOL savve long Paul olsem aposol “long olketa nation.” Bat, waswe, hem preach long olketa Gentile nomoa? Nomoa nao! Bifor Paul hem baptaes and kasem disfala waka, Lord Jesus hem sei long Ananias: “Mi chusim disfala man [Paul] for karem nem bilong mi go long olketa nation and tu long olketa king and olketa son bilong Israel.” (Acts 9:15; Gal. 2:8, 9) Raeting long buk bilong Hebrews fitim waka bilong Paul for tekem nem bilong Jesus long olketa son bilong Israel.

² Bat, samfala pipol daotem wei wea Paul raetem Hebrews. Wanfala reason for daot hem from nem bilong Paul no stap long leta. Bat diswan hem no really problem, bikos olketa narafala buk long Bible no talem nem bilong man wea raetem, bat staka taem iumi savve from narafala pruv insaed datfala leta. Nara samting moa, samfala tingse Paul no want for raetem nem bilong hem long leta for olketa Hebrew Christian long Judea bikos olketa Jew long there heitim nem bilong hem. (Acts 21:28) And tu wei wea Paul changem wei for raet wea difren from narafala leta bilong hem no mekem reason for daot kamap. Nomata hem story long olketa heathen, Jew, or Christian, Paul evritaem showimaot wei wea hem “kamap evri samting long evrikaen pipol.” Story hia hem bilong wanfala Jew go long olketa Jew, and hem story long wei wea olketa savve minim and tinghae long hem.—1 Cor. 9:22.

³ Pruv insaed disfala buk sapotim wei wea Paul nao raetem. Hem stap long Italy and kaban witim Timothy. Disfala information fitim Paul. (Heb. 13:23, 24) And tu, teaching hia fitim Paul, nomata hem fitim tingting bilong olketa Jew, hem raetem leta for muvim disfala Hebrew kongregeson. Long diswan Clarke’s Commentary, Volume 6, page 681, hem sei abaotem Hebrews: “Full buk pruvim hem raet go long olketa Jew. Sapos hem raet go long olketa Gentile, no eniwan bae savve long teaching bilong hem, from olketa no savve long system bilong Jew; wea Paul savve pipol wea readim leta bae minim.” Diswan helpem iumi for savve hao disfala leta hem difren from narafala leta bilong Paul.

⁴ Long 1930 olketa faendem Chester Beatty Papyrus No. 2 (P⁴⁶) wea provaedem moa pruv hao Paul raetem leta hia. Nambawan savveman bilong raeting Sir Frederic Kenyon wea story abaotem disfala papyrus pepa, wea olketa raetem only 150 year bihaen Paul dae, hem sei: “Iu lukim hao Hebrews hem bihaen Romans, so hem showimaot taem olketa raetem disfala papyrus olketa luksavve Paul nao raetem Hebrews.”a Long sem point, McClintock and Strong’s Cyclopedia talem stret: “No eni pruv stap, insaed or aotsaed, wea pruvim Paul no raetem disfala buk.”b

⁵ Nomata olketa Christian from bifor acceptim disfala buk, information wea stap insaed Hebrews pruvim hem “kam from God.” Hem gohed for point go long olketa profesi long Hebrew Scripture, wea story plande taem abaotem olketa raeting bifor, and hao olketa fulfill long Christ Jesus. Long first chapter, winim sevenfala taem Hebrew Scripture talem hao Son hem hae winim olketa angel. Hem olowe mekhae long Word bilong Jehovah and nem bilong hem, and point go long Jesus olsem Chief Wei bilong laef and long Kingdom bilong God thru long Christ olsem only hope for man.

⁶ Paul raetem disfala leta taem hem stap long Italy, olsem iumi lukim finis. Taem hem finisim leta, hem sei: “Lukim hao olketa releasem brata bilong iumi Timothy, wea, sapos hem kam kwiktaem, mi savve lukim iufala witim hem.” (13:23) Diswan showimaot hao Paul savve bae hem kamaot from prison early and hem hope for joinim Timothy, wea stap insaed prison tu bat olketa releasem finis. So, luk olsem hem raetem diswan taem hem insaed prison long Rome klosap long end bilong firstfala taem long prison, long year 61 C.E.

⁷ Insaed long taem bilong end bilong Jew system, wanfala taem bilong test kasem olketa Hebrew Christian long Judea and olketa long Jerusalem tu. From gud nius hem grow and go aot, olketa Jew kamap kros tumas and barava krangge long wei for againstim olketa Christian. Samfala year bifor, taem olketa lukim Paul nomoa wanfala bigfala raoa kamap long Jerusalem, and olketa Jew singaot long bigfala voice: “Tekem go disfala man from earth, from hem no fit for laef!” Winim 40-fala Jew disaed for no kaikai or drink go kasem taem olketa killim dae Paul, and so staka soldia mas tekem go Paul midol long naet long Caesarea. (Acts 22:22; 23:12-15, 23, 24) Midolwan long disfala wei for krangge long saed bilong religion and heitim olketa Christian, kongregeson mas stap, preach and keepim olketa seleva strong long faith. Olketa mas garem gudfala savve and minim hao nao Christ fulfillim Law mekem olketa no go bak long Jew religion and followim Law bilong Moses witim wei for offerim animal sakrifaes, wea hem kastom nomoa.

⁸ Aposol Paul barava minim gud olketa hevi and persecution wea olketa Jew Christian kasem long datfala taem. Paul, wanfala Pharisee bifor, barava fit for helpem olketa witim strongfala toktok and wei for toktok againstim olketa Jew kastom. From hem savve tumas long Law bilong Moses, wea hem lane from Gamaliel, hem givim pruv wea no eniwan savve againstim abaotem wei wea Christ fulfillim disfala Law, witim olketa law and sakrifaes. Hem showimaot hao nara samting wea moabeta nao hem changem olketa law, and bae givim kam staka gud samting wea insaed wanfala niu covenant wea moabeta. Paul iusim stretfala tingting for givim plande klia and strongfala pruv. Hem showimaot end bilong Law covenant and start bilong niu covenant, hao sekson bilong olketa priest bilong Christ hem winim sekson bilong olketa priest bilong Aaron, wei wea sakrifaes bilong Christ hem important winim olketa buluka and goat, wei wea Christ go front long Jehovah long heven winim wanfala ples long earth—evri niufala teaching hia, wea olketa Jew wea no biliv heitim, Paul talem long olketa Hebrew Christian witim staka pruv from olketa Hebrew Scripture mekem eni honest Jew fit for bilivim hem.

⁹ Taem olketa kasem disfala leta, olketa Hebrew Christian garem niu and strongfala samting for faet for stopem mouth bilong olketa Jew wea persecutim olketa, and tu for iusim olsem strongfala pruv for olketa honest Jew wea lukaotem truth bilong God and willing for change. Disfala leta showimaot bigfala love bilong Paul for olketa Hebrew Christian and wei wea hem barava want for helpem olketa long gudfala wei insaed taem wea olketa needim tumas.

WEI WEA HEM HELPEM IUMI

²³ Olsem wanfala samting bilong law wea sapotim Christ, leta bilong Hebrews hem barava nambawan raeting wea no eniwan savve challengem, wea hem raetem long barava gudfala wei and garem staka pruv from olketa Hebrew Scripture. Hem storyim difren part long Law Bilong Moses—covenant, blood, mediator, tent bilong worship, sekson bilong olketa priest, olketa sakrifaes—and hem showimaot evri samting hia hem example nomoa from God wea point go long samting wea moa big, wea fulfill long Christ Jesus and sakrifaes bilong hem, and wea fulfillim Law. Disfala Law “wea hem finis and kamap olo hem klosap for finis evribit,” Paul hem sei. Bat “Jesus Christ hem semsem yesterday and tuday, and for olowe.” (8:13; 13:8; 10:1) Olketa Hebrew mas hapi tumas taem olketa readim leta hia!

²⁴ Bat hao nao diswan helpem iumi distaem, long difren living wea iumi garem? From iumi no stap anda long datfala Law, waswe, iumi savve faendem eni samting long toktok bilong Paul wea fitim iumi? Yes. Hem showim iumi disfala nambawan niu covenant, wea faondeson hem datfala promis long Abraham wea thru long Seed bilong hem evri famili long earth bae blessim olketa seleva. Diswan nao hope bilong iumi for kasem laef, only hope, wea fulfillim promis bilong Jehovah bifor for givim blessing thru long Seed bilong Abraham, Jesus Christ. Nomata iumi no stap anda long datfala Law, iumi pikinini bilong Adam wea born witim sin, and iumi needim hae priest wea garem mercy, wea fitim stretfala sakrifaes for sin, and wea savve go front long Jehovah long heven and story for evriwan. Hem nao Hae Priest wea savve leadim iumi long laef insaed niu world bilong Jehovah, wea savve feel sorre long wik point bilong iumi, bikos hem “man wea kasem test long evri wei olsem iumi,” and wea encouragem iumi for “feel free for toktok taem iumi kam klosap long throne bilong kaeness wea no fitim, mekem iumi savve kasem mercy and faendem kaeness wea no fitim for kasem help long taem wea fitim.”—4:15, 16.

²⁵ Narafala samting, long leta bilong Paul for olketa Hebrew, iumi lukim pruv wea muvim heart bilong iumi abaotem samfala profesi wea fulfill long nambawan wei wea Hebrew Scripture talem long taem bifor. Evri samting hia hem for comfortim and teachim iumi distaem. For example, long Hebrews, faevfala taem Paul talem wei wea Kingdom profesi long Psalm 110:1 point go long Jesus Christ and Kingdom Seed, wea hem “sidaon long raet saed long throne bilong God” for weitim “taem olketa enemy kamap olsem stul for putim leg bilong hem.” (Heb. 12:2; 10:12, 13; 1:3, 13; 8:1) And tu, Paul story from Psalm 110:4 taem hem minim important position bilong Son bilong God olsem “priest for olowe olsem wei bilong Melchizedek.” Olsem Melchizedek from bifor, wea Bible sei “hem no garem dadi, mami, no garem laen dadi, no garem start or end bilong laef,” Jesus hem King and “wanfala priest olowe” for givimaot gudfala samting olowe from ransom sakrifaes bilong hem for pipol wea willing for stap anda long rul bilong hem. (Heb. 5:6, 10; 6:20; 7:1-21) Paul hem minim disfala sem King-Priest taem hem story from Psalm 45:6, 7: “God hem throne bilong iu for olowe and olowe, and datfala stik bilong Kingdom bilong iu hem stik bilong stretfala fasin. Iu lovem raeteous fasin, and iu heitim fasin for brekem law. Dastawe God, God bilong iu, anointim iu witim oil bilong bigfala hapi winim olketa partner bilong iu.” (Heb. 1:8, 9) Taem Paul hem story from olketa Hebrew Scripture and showimaot wei wea hem fulfill long Christ Jesus, iumi lukim plan bilong God hem showaot moa klia.

²⁶ Leta bilong Hebrews hem showaot klia hao Abraham luk forward long datfala Kingdom, “taon wea garem trufala faondeson, wea man wea buildim and wakem datfala taon hem God”—taon wea hem “bilong heven.” “Thru long faith” hem lukaotem datfala Kingdom, and hem mekem bigfala sakrifaes for kasem blessing thru long “resurrection wea moabeta.” Iumi lukim nambawan example long Abraham and olketa olo man and woman bilong faith—“bigfala cloud bilong olketa witness” wea Paul talemaot long Hebrews chapter 11! Taem iumi readim disfala chapter, heart bilong iumi hapi, from iumi tinghae long privilege and hope wea iumi garem tu witim olketa wea faithful. So hem encouragem iumi for “ran witim fasin for stand strong long datfala resis wea stap front long iumi.”—11:8, 10, 16, 35; 12:1.

²⁷ Taem Paul storyim profesi bilong Haggai, hem strongim moa promis bilong God: “Wanfala taem moa mi bae sekem earth and skae tu.” (Heb. 12:26; Hag. 2:6) Bat, Kingdom bilong God thru Christ Jesus, datfala Seed, bae stap olowe. “Dastawe, from iumi savve iumi bae kasem kingdom wea olketa no savve sekem, letem iumi gohed for garem kaenfala fasin wea man no fit for kasem, wea thru long diswan iumi savve duim holy service wea God acceptim witim fasin for no fraet long hem and respect.” Disfala toktok strongim iumi hao Christ hem showaot mek-tu taem “no for sin bat for olketa wea barava lukaotem hem for salvation bilong olketa.” So, thru long hem, “iumi mas evritaem givim sakrifaes bilong praise long God, hem nao, frut bilong mouth wea talemaot nem bilong hem long pablik.” Dastawe bigfala nem bilong Jehovah God mas olowe kamap holy thru long King-Priest bilong hem, Jesus Christ!—Heb. 12:28; 9:28; 13:15.

[Olketa Footnote]