Wanem Nao Day Bilong God for Rest?
“Wanfala day for rest hem stap for pipol bilong God wea hem olsem wanfala sabbath.”—HEB. 4:9.
1, 2. (a) Wanem nao iumi lanem from Genesis 2:3? (b) Olketa wanem kwestin nao bae iumi ansarem?
LONG Genesis chapter 1, iumi lanem insaed sixfala day God wakem earth for pipol stap long hem. Sixfala day hia hem no 24 hour long each day bat hem minim staka year. Bible story olsem abaotem end bilong each day: “Hem evening then hem morning.” (Gen. 1:5, 8, 13, 19, 23, 31) Bat mek-seven day hem difren. Bible sei: “God blessim mek-seven day and mekem hem holy, bikos long datfala day hem rest from waka bilong hem for wakem evri samting hem finis.”—Gen. 2:3.
2 Taem Moses raetem buk bilong Genesis long 1513 B.C.E., hem sei God hem “rest.” So datwan minim God gohed for rest yet long datfala taem. Bible sei pipol savve rest long day bilong God for rest tu. Waswe, God gohed for rest kam kasem distaem? Sapos olsem, hao nao iumi savve rest long day bilong God for rest? Hem barava important for savve long ansa bilong olketa kwestin hia.
Waswe, Jehovah Gohed for “Rest” Yet?
3. Hao nao samting wea Jesus talem long John 5:16, 17 showimaot mek-seven day gohed yet long first century?
3 Tufala reason stap wea showimaot mek-seven day hem gohed yet long first century C.E. Iumi lanem firstfala reason from wanem Jesus talem long samfala wea againstim hem. Olketa kros long Jesus bikos hem healim pipol long Sabbath. Olketa sei hem no stret for duim datwan bikos Law bilong Moses sei Sabbath hem day for rest and no waka. Jesus sei long olketa: “Dadi bilong mi hem gohed waka kam kasem distaem, and mi tu gohed waka.” (John 5:16, 17) Wanem nao Jesus minim? Hem olsem Jesus sei: ‘Mi and Dadi bilong mi gohed for duim sem waka. For staka thousand year, Dadi bilong mi waka long Sabbath and hem gohed for waka yet, so mi tu savve waka long Sabbath.’ Samting wea Jesus talem showimaot mek-seven day hem gohed yet long taem bilong hem. Long datfala day God hem rest for wakem evri samting long earth, bat hem gohed waka for mekem plan bilong hem for olketa man and earth kamap tru.a
4. Hao nao samting wea Paul talem showimaot mek-seven day gohed yet long first century?
4 Mek-tu reason why iumi savve mek-seven day hem gohed yet long first century hem from wanem aposol Paul talem long olketa Hebrew Christian. Bifor Paul talem toktok from Genesis 2:2, hem sei: “Iumi wea showimaot faith iumi rest long day bilong God for rest.” (Heb. 4:3, 4, 6, 9) Diswan showimaot mek-seven day bilong God for rest hem gohed yet long taem bilong Paul. Wanem taem nao mek-seven day bae finis?
5. (a) Wanem nao Jehovah laek for duim long mek-seven day? (b) Wanem taem nao plan bilong God bae kamap tru?
5 For savve long ansa bilong datfala kwestin, hem gud for tingim Jehovah markem mek-seven day for wanfala spesol samting. Genesis 2:3 sei: “God blessim mek-seven day and mekem hem holy.” Jehovah mekem datfala day holy bikos hem nao day wea hem markem for plan bilong hem for earth kamap tru. Plan bilong Jehovah hem for evriwan wea obeyim hem for stap long earth and lukaftarem evri samting long earth. (Gen. 1:28) Reason why Jehovah God and Jesus Christ, wea hem “man wea rulim Sabbath,” “gohed waka kam kasem distaem” hem for mekem plan bilong God for earth kamap tru. (Matt. 12:8) So day bilong God for rest bae gohed go kasem taem datfala plan kamap tru. Datwan bae happen long end bilong wan thousand year rul bilong Christ.
No Followim “Wei Bilong Olketa for No Obey”
6. Olketa wanem example nao hem warning for iumi, and wanem nao iumi lanem from olketa?
6 God talem stret long Adam and Eve plan bilong hem for earth, bat tufala no laek followim datfala plan. Plande million pipol tu followim wei bilong Adam and Eve for no obey. Staka taem olketa Israelite no obeyim God. Paul warnim olketa Christian long first century maet samfala kamap olsem olketa Israelite hia. Hem sei: “Iumi mas traem best bilong iumi for rest long disfala day for rest, mekem no eniwan long iumi followim datfala wei bilong olketa for no obey.” (Heb. 4:11) Samting wea Paul talem showimaot pipol wea no obeyim God no savve rest long day bilong hem for rest. Wanem nao datwan minim for iumi? Sapos iumi duim samting againstim plan bilong God, waswe, bae iumi rest long day bilong God for rest? Hem important for savve long ansa bilong datfala kwestin, and bae iumi storyim long disfala study. Bat firstaem bae iumi storyim nogud example wea olketa Israelite showimaot and why olketa no rest long day bilong God for rest.
“Bae Olketa No Rest Long Day Bilong Mi for Rest”
7. (a) Why nao Jehovah mekem olketa Israelite kamap free from Egypt? (b) Wanem nao olketa Israelite mas duim?
7 Long 1513 B.C.E., Jehovah talem Moses plan bilong hem for olketa Israelite. Hem sei: “Mi kam daon for sevem olketa from olketa long Egypt and tekem olketa go aot from datfala ples go long ples wea barava naes and wea big tumas, and wea garem staka milk and honey.” (Ex. 3:8) Jehovah mekem olketa Israelite kamap free from Egypt mekem olketa kamap pipol bilong hem, olsem hem promisim long Abraham. (Gen. 22:17) God givim Law long olketa Israelite wea bae helpem olketa for garem peace and fren gud witim hem. (Isa. 48:17, 18) Hem talem olketa Israelite: “Sapos iufala barava obeyim mi and keepim agreement wea mi mekem witim iufala, iufala nomoa bae spesol pipol bilong mi bikos full earth hem bilong mi.” (Ex. 19:5, 6) So olketa Israelite savve kamap pipol bilong God sapos olketa obeyim Law bilong hem.
8. Wanem gud samting nao olketa Israelite savve kasem sapos olketa obeyim Jehovah?
8 Tingim gud samting wea olketa Israelite savve kasem sapos olketa obeyim Jehovah! Hem promis for blessim garden, planteison, and olketa animal bilong olketa. Hem promis for protectim olketa tu from olketa enemy. (Readim 1 Kings 10:23-27.) Olketa Israelite bae no stap anda long rul bilong olketa nara kantri nomata long taem bilong Jesus wea Rome rulim staka ples. Jehovah laekem olketa Israelite for showimaot gudfala example for pipol long nara kantri. Jehovah laekem evriwan for luksavve hem bae blessim pipol wea obeyim hem.
9, 10. (a) Why nao hem no stret for olketa Israelite laek go bak long Egypt? (b) Sapos olketa go bak long Egypt, waswe, olketa savve worshipim Jehovah long wei wea hem laekem?
9 Olketa Israelite garem spesol privilege for Jehovah iusim olketa for mekem plan bilong hem kamap tru. Olketa savve kasem blessing from Jehovah and mekem evri famili long earth tu for kasem blessing. (Gen. 22:18) Bat staka Israelite no tinghae long privilege for kamap pipol bilong God and for showimaot gudfala example for pipol long nara kantri. Olketa Israelite sei olketa laek for go bak long Egypt! (Readim Numbers 14:2-4.) Bat sapos olketa go bak long Egypt, bae olketa no savve worshipim Jehovah long wei wea hem laekem and showimaot gudfala example for nara pipol. Sapos olketa kamap slave moa long Egypt, bae olketa no free for obeyim Law bilong God and God bae no savve forgivim sin bilong olketa. Olketa Israelite tingim olketa seleva nomoa and nating tingim God and plan bilong hem. Dastawe Jehovah sei olsem abaotem olketa Israelite hia wea bighed: “Mi barava feel nogud long pipol hia and mi sei, ‘Tingting bilong olketa hem olowe go difren from wanem mi talem, and olketa no savve long olketa wei bilong mi.’ So from mi kros, mi sei, ‘Bae olketa no rest long day bilong mi for rest.’”—Heb. 3:10, 11; Ps. 95:10, 11.
10 Wei wea olketa Israelite laek go bak long Egypt showimaot olketa no tinghae long olketa blessing wea olketa kasem from Jehovah. Olketa tingim nomoa gudfala kaikai wea olketa kaikaim long Egypt. (Num. 11:5) Olketa olsem Esau, wea nating tinghae long raet bilong hem olsem firstborn and exchangem datwan for wanfala pleit kaikai nomoa.—Gen. 25:30-32; Heb. 12:16.
11. From olketa Israelite wea lusim Egypt no showimaot faith, waswe, datwan mekem God changem plan bilong hem?
11 Nomata olketa Israelite wea lusim Egypt no showimaot faith long Jehovah, Jehovah no changem plan bilong hem for datfala nation. Olketa pikinini bilong olketa nao showimaot wei for obey winim dadi and mami bilong olketa. Olketa obeyim wanem Jehovah talem for go insaed long Promis Land and winim olketa kantri long there. Joshua 24:31 sei: “Taem Joshua laef yet olketa Israelite gohed worshipim Jehovah. Olketa gohed for duim datwan tu long taem bilong olketa bigman wea laef bihaen Joshua and wea savve long evri samting wea Jehovah duim for Israel.”
12. Why nao iumi savve olketa Christian distaem savve rest long day bilong God for rest?
12 Gogo olketa Israelite hia wea obeyim Jehovah olketa dae. Bat olketa Israelite wea stap laef bihaen “no savve long Jehovah and olketa samting wea hem duim for Israel.” Olketa start for duim “samting wea Jehovah no laekem” and worshipim olketa false god. (Judg. 2:10, 11) From olketa no obeyim Jehovah, olketa no fren gud witim hem. So Promis Land hem no “wanfala ples for rest” for olketa. Paul sei olsem abaotem olketa Israelite hia: “Sapos Joshua hem leadim [olketa Israelite] go long wanfala ples for rest, God bae no story moa abaotem narafala day bihaen datwan. So wanfala day for rest hem stap for pipol bilong God wea hem olsem wanfala sabbath.” (Heb. 4:8, 9) “Pipol bilong God” wea Paul storyim hem olketa Christian wea Jew and olketa Christian wea no Jew. Diswan minim olketa Christian distaem tu savve rest long day bilong God for rest.
Samfala Christian No Rest Long Day Bilong God for Rest
13, 14. (a) Long taem bilong Moses, wanem nao olketa Israelite mas duim for rest long day bilong God for rest? (b) Long taem bilong Paul, wanem nao olketa Christian mas duim for rest long day bilong God for rest?
13 Paul raet long olketa Hebrew Christian bikos samfala duim samting againstim plan bilong God. (Readim Hebrews 4:1.) Wanem nao olketa duim? Olketa gohed for followim samfala part long Law bilong Moses. Hem tru, for samting olsem 1,500 year, pipol bilong God mas obeyim Law bilong Moses for mekem God hapi. Bat bihaen Jesus dae, olketa no need for followim datfala Law. Samfala Christian no minim datwan dastawe olketa gohed for followim samfala part long Law.b
14 Paul explainim long olketa Hebrew Christian, Jesus nao nambawan Hae Priest. Hem helpem olketa for luksavve niu agreement hem winim first agreement wea God mekem witim olketa Israelite. Hem sei spiritual temple bilong Jehovah hem moa important and gud winim temple wea olketa man wakem. (Heb. 7:26-28; 8:7-10; 9:11, 12) Paul iusim Sabbath for explainim wei wea olketa Christian savve rest long day bilong Jehovah for rest. Hem sei: “Wanfala day for rest hem stap for pipol bilong God wea hem olsem wanfala sabbath. Olsem God hem rest from waka bilong hem, man wea rest long day bilong God for rest hem rest tu from waka bilong hem.” (Heb. 4:8-10) Olketa Christian hia mas no tingse God bae acceptim olketa from olketa obeyim Law bilong Moses. Start long Pentecost 33 C.E., Jehovah acceptim worship bilong olketa wea showimaot faith long Jesus Christ.
15. Why nao iumi need for obeyim Jehovah mekem iumi rest long day bilong hem for rest?
15 Why nao olketa Israelite long taem bilong Moses no go insaed long Promis Land? Hem bikos olketa no obeyim Jehovah. Why nao samfala Christian long taem bilong Paul no rest long day bilong God for rest? Hem bikos olketa tu no obeyim Jehovah. Olketa no bilivim Jehovah laekem pipol bilong hem for worshipim hem long difren wei and for no gohed followim Law bilong Moses.
Hao Iumi Savve Rest Long Day Bilong God for Rest
16, 17. (a) Wanem nao olketa Christian savve duim for rest long day bilong God for rest? (b) Wanem nao bae iumi storyim long study bihaen?
16 Iumi no need for followim Law bilong Moses for sev. Wanem Paul talem long olketa Christian long Ephesus hem barava klia. Hem sei: “From God hem kaen long iufala olsem, iufala sev bikos iufala garem faith long datwan. Diswan hem no bikos long samting wea iufala duim, bat hem wanfala present from God. Iufala no sev bikos long samting wea iufala duim.” (Eph. 2:8, 9) So wanem nao olketa Christian savve duim for rest long day bilong God for rest? Jehovah markem datfala day for rest for mekem plan bilong hem for earth and olketa man wea obeyim hem kamap tru. Iumi savve rest long day bilong Jehovah for rest sapos iumi obeyim hem and followim wanem organization bilong hem talem.
17 Bat sapos iumi no followim samting wea wakaman wea faithful and wise talem or iumi followim nomoa wanem iumi tingse hem important, datwan showimaot iumi againstim plan bilong Jehovah. Sapos iumi duim datwan, hard for iumi fren witim Jehovah. Long study bihaen, bae iumi storyim samfala samting wea kamap long laef wea iumi savve showimaot iumi obeyim God. Olketa samting wea iumi disaedem bae showimaot sapos iumi rest long day bilong God for rest or nomoa.
[Olketa Footnote]
a Olketa priest and Levite waka long temple long Sabbath, and datwan no againstim Law bilong Moses. God chusim Jesus for kamap hae priest bilong iumi. Jehovah givim waka long Jesus, so hem stret nomoa for Jesus duim waka long Sabbath.—Matt. 12:5, 6.
b Bihaen Pentecost 33 C.E., iumi no savve sapos eni Christian wea Jew gohed duim olketa sakrifaes long day for forgivim olketa sin. Sapos olketa duim datwan, olketa no respectim sakrifaes bilong Jesus. Iumi savve samfala Christian wea Jew gohed for followim samfala samting wea join witim Law bilong Moses.—Gal. 4:9-11.
Olketa Kwestin for Ting Raonem
• Long mek-seven day, wanem nao Jehovah laek for duim?
• Why nao iumi savve mek-seven day gohed yet?
• Why nao olketa Israelite long taem bilong Moses and samfala Christian long taem bilong Paul no rest long day bilong God for rest?
• Wanem nao iumi savve duim for rest long day bilong God for rest?
[Blurb long page 27]
Iumi savve rest long day bilong Jehovah for rest sapos iumi obeyim hem and followim wanem organization bilong hem talem
[Olketa Piksa long page 26, 27]
Wanem nao iumi need for duim for rest long day bilong God for rest?