Long olketa Hebrew Christian long first-century, aposol Paul raet olsem: “So wanfala sabbath rest hem stap yet for pipol bilong God. From man wea go insaed long rest bilong God hem tu rest from olketa waka bilong hemseleva, olsem God duim from waka bilong hemseleva. Dastawe iumi mas duim barava best bilong iumi for go insaed long datfala rest.”—Hebrews 4:9-11.

Sapos iumi ting moa long toktok bilong Paul long Hebrews, iumi lukim hao “wanfala sabbath hem stap yet for pipol bilong God,” and hem encouragem olketa Christian fren bilong hem for duim best bilong olketa “for go insaed long datfala rest.” Diswan showimaot hao taem Paul raetem olketa toktok hia, “datfala mek-seven day” bilong rest bilong God, wea start samting olsem 4,000 year bifor, hem still go ahed. Hem bae no finis go kasem taem purpose bilong God for olketa man and disfala earth hem finis long end bilong Thousand Year Rul bilong Jesus Christ, wea hem nao “Lord bilong sabbath.”—Matthew 12:8; Revelation 20:1-6; 21:1-4.