Waswe, Evil Hem Win Nao?
OLKETA man for raet and olketa savveman long history staka taem storyim olketa idea abaotem wanfala faet midolwan gud and evil bilong full universe. Bat, wanfala buk stap wea garem trufala story abaotem faet midolwan God and Devil. Datfala buk hem Bible. Hem showimaot olketa important samting abaotem disfala faet and provaedem information for iumi savve hu nao really win.
No longtaem bihaen God wakem firstfala man and woman, wanfala spirit wea man no savve lukim, Devil Satan, hem challengem rul bilong God. Long wanem wei? Long wei wea hem givim idea hao God hem holem bak gud samting from olketa wea hem wakem and hao olketa man bae garem living wea moabeta sapos olketa stap difren from hem.—Genesis 3:1-5; Revelation 12:9.
Bihaen, long taem bilong Job, Satan mekem nara idea for daot kamap. From hem trae for spoelem wei wea Job hem faithful long God, Satan hem sei: “Skin for skin, and evri samting wea man garem bae hem givim for sevem soul bilong hem.” (Job 2:4) Barava bighed toktok tu datwan! Taem hem sei “man” and no Job, Satan daotem faithful fasin bilong evri man. Hem really sei: ‘Man bae duim eniting for sevem laef bilong hem. Givim mi chance, and mi savve tanem eniwan awe from God.’
Wan wea win long disfala faet midolwan God and Devil hem depend long ansa bilong tufala kwestin hia: Waswe, man fit for rulim hemseleva? Waswe, Devil win for tanem evri pipol awe from datfala tru God?
Waswe, Olketa Man Fit for Rulim Olketa Seleva?
For staka thousand year, olketa man testim olketa difren kaen wei for rul. Olketa difren kaen gavman olsem monarchy, aristocracy, democracy, autocracy, Fascism, and Communism kamap finis insaed long history. Wei wea pipol evritaem need for traem olketa difren kaen wei for rul showimaot olketa difren kaen gavman hia no mekem olketa satisfae yet!
Insaed buk bilong hem, A History of the World, wea olketa pablisim long 1922, H. G. Wells hem raet: “Pipol bilong Rome insaed wei for testim olketa difren kaen wei for rul.” Hem sei moa: “Wei for rul hem evritaem change, no enitaem hem go ahed stedy. Long wan wei, disfala test hem fail. Long nara wei, disfala test no finis yet, and Europe and America distaem traem yet for stretem wei for stretem olketa hardfala problem saed long gavman, wea pipol bilong Rome feisim firstaem.”
Wei for testim difren kaen gavman hem kam kasem taem bilong iumi. Democracy nao wei for rul wea staka appruvim insaed mek-20 century. Goal bilong democracy hem for evri pipol garem share long gavman. Bat waswe, democracy hem showimaot man fit for rul seleva long gud wei, wea no needim God? Prime minister bilong India bifor, Jawaharlal Nehru, hem sei democracy hem gud bat hem sei tu: “Mi talem diswan bikos olketa nara wei for rul hem moa worse.” President bilong France bifor, Valéry Giscard d’Estaing, hem sei: “Iumi go ahed for lukim bigfala problem saed long representative democracy.”
Nomata long mek-faev century B.C.E., Greek savveman Plato hem lukim wanfala wik point long rul bilong democracy. Insaed buk A History of Political Theory, hem tok daonem “wei for no savve and no fit bilong olketa politician, wea hem curse bilong democracy.” Staka politician komplen hao hem hard for faendem pipol wea fit and garem savve for waka long gavman. The Wall Street Journal hem sei pipol “kros long olketa leader wea luk olsem olketa no fit for deal witim olketa big problem.” Hem sei moa: “Pipol feel nogud tumas taem olketa leader wea olketa luk go long olketa for lead no disaed gud and duim raverave fasin.”
Tingim rul bilong King Solomon bilong Israel bifor. Jehovah God givim Solomon bigfala wisdom. (1 Kings 4:29-34) Hao nao nation bilong Israel long taem bilong 40-year rul bilong Solomon? Bible hem ansa: “Judah and Israel olketa staka, olsem sandbis long saedsea wea staka tumas, olketa kaikai and drink and hapi.” Hem sei moa: “Judah and Israel go ahed for garem sef living, evriwan anda long vine bilong hemseleva and anda long fig tree bilong hemseleva, from Dan go kasem Beer-sheba, long full taem wea Solomon hem rul.” (1 Kings 4:20, 25) From hem garem wanfala wise king wea stand for datfala Barava Hae Ruler, Jehovah God, datfala nation enjoyim sef living, riches, and hapi wea winim eni nara taem.
Rul bilong man hem barava difren from rul bilong God! Waswe, eniwan fit for sei Satan hem win nao saed long kwestin bilong hu nao fit for rul? Nomoa, from profet Jeremiah talem stret: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem.”—Jeremiah 10:23.
Waswe, Satan Savve Mekem Evriwan Tanawe From God?
Waswe, bighed toktok bilong Satan hao hem savve mekem evriwan tanawe from God hem kamap tru? Long chapter 11 bilong Hebrews, aposol Paul hem nemem samfala faithful man and woman bilong bifor. Then hem sei: “Bae mi no garem inaf taem sapos mi go ahed for story abaotem Gideon, Barak, Samson, Jephthah, David and Samuel tu and olketa nara profet.” (Hebrews 11:32) Paul storyim olketa loyal servant bilong God hia olsem wanfala “bigfala cloud bilong olketa witness.” (Hebrews 12:1) Greek word wea hem iusim long disfala scripture for “cloud” hem no minim kaen cloud wea garem klia size and sheip bat hem kaen bigfala cloud wea no garem sheip wea kavarem full skae. Diswan hem fitim bikos olketa faithful servant bilong God bifor olketa staka tumas, wea olsem bigfala cloud. Yes, insaed olketa year wea go pas, staka pipol chus seleva for loyal long Jehovah God.—Joshua 24:15.
Waswe distaem? Winim six million Jehovah’s Witness stap distaem evriwea long world, nomata pipol againstim and persecutim olketa insaed long disfala mek 20th century. Nara naen million pipol joinim olketa, and staka long olketa hia duim samting for garem klos wei for fren witim God.
Son bilong God, Jesus Christ, nao givim best ansa for bighed toktok bilong Satan hao hem savve tanem evri man awe from Jehovah. Nomata bigfala pain long torture stake bat hard for brekem faithful fasin bilong hem. Just bifor Jesus dae, hem singaot: “Father, mi putim spirit bilong mi long hand bilong iu.”—Luke 23:46.
Satan duim evriting hem fit for duim, temptation and persecution tu, for trae and kontrolem man. For keepim or pullim pipol awe from Jehovah, Satan hem iusim “samting wea body wantem and samting wea eye wantem and wei for show-off witim samting wea man garem.” (1 John 2:16) And tu, Satan hem ‘blindim mind bilong olketa wea no biliv for mekem laet bilong nambawan gud nius bilong Christ for no showaot.’ (2 Corinthians 4:4) And for kasem goal bilong hem, Satan bae nating hol bak for iusim wei for mekem man fraet or for mekius long fasin for fraetem man.—Acts 5:40.
Nomata olsem, Devil bae hard for winim olketa wea stap long saed bilong God. Olketa savve long Jehovah God and ‘lovem hem witim full heart and witim full soul and witim full mind.’ (Matthew 22:37) Yes, loyal fasin bilong Jesus Christ and bilong staka moa showimaot Devil Satan hem barava lus.
Wanem Nao Bae Happen Long Future?
Waswe, bae olketa man go ahed for testim difren kaen gavman olowe? Profet Daniel talem finis: “Long taem bilong olketa king hia God bilong heven bae startim wanfala kingdom wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom hia, and hemseleva nao bae stap olowe.” (Daniel 2:44) Datfala Kingdom wea God bilong heven hem startim hem stap long heven and Jesus Christ nao ruler bilong hem. Hem nao Kingdom wea Jesus teachim olketa follower bilong hem for prea for hem. (Matthew 6:9, 10) Datfala Kingdom bae distroem evri gavman bilong man long “war [wea klosap for happen] bilong bigfala day bilong God Olmaeti” and hem bae affectim full earth.—Revelation 16:14, 16.
Wanem nao bae happen long Satan? Bible storyim disfala samting wea bae happen long future: “[Wanfala angel bilong Jehovah] hem kasholem datfala dragon, snek bilong firstaem, wea hem nao Devil and Satan, and taemapem hem for wan thousand year. And hem torowem hem go insaed long hol wea deep tumas and satem and lokim strong ovarem hem, mekem hem no savve giamanim olketa nation moa go kasem taem datfala thousand year hem finis.” (Revelation 20:1-3) Thousand Year Rul bilong Jesus Christ bae start bihaen datfala angel torowem Satan insaed hol wea deep tumas wea hem no savve duim eniting.
Earth bae kamap nambawan ples! Evri wicked samting and wicked pipol bae nomoa nao. Bible hem promis: “Olketa wea duim evil samting bae finis . . . Bat olketa wea garem kwaet fasin bae kasem earth, and olketa bae kasem nambawan hapi long bigfala peace.” (Psalm 37:9-11) No eni samting—man or animal—bae spoelem peace bilong olketa. (Isaiah 11:6-9) Nomata staka million pipol wea saed witim Devil taem olketa laef from olketa no kasem savve and chance for savve long Jehovah bae laef bak and kasem teaching bilong God.—Acts 24:15.
Long end bilong Thousand Year Rul, earth bae kamap paradaes, and olketa wea stap insaed bae kamap olketa perfect man. Then Satan bae kamap free for “lelebet taem,” bifor hem distroe evribit witim evriwan wea againstim rul bilong God.—Revelation 20:3, 7-10.
Hu Nao Bae Iu Saed Witim?
Mek-20 century hem taem wea Satan barava spoelem earth. Bat winim wei for showimaot Satan hem win, living wea kamap long earth hem showimaot iumi insaed olketa last day bilong disfala wicked world. (Matthew 24:3-14; Revelation 6:1-8) For savve hu nao win hem no depend long hao big nao wicked fasin long earth or wanem nao tingting bilong staka pipol. Hem depend long hu nao best wan for rul and sapos eniwan servem God from olketa lovem hem. Long tufala samting hia evriwan, Jehovah nao hem win.
Sapos history pruvim finis hao Satan hem rong, why nao God letem wicked fasin for go ahed? Jehovah hem go ahed for showimaot patient fasin “from hem no laekem eniwan for dae bat hem laekem evriwan for repent.” (2 Peter 3:9) Will bilong God “hem nao for evri difren kaen man mas sev and kasem stretfala savve bilong truth.” (1 Timothy 2:4) Mifala hope iu bae iusim taem wea stap yet for studyim Bible and ‘kasem savve long datfala only tru God, and long datwan wea hem sendem kam, Jesus Christ.’ (John 17:3) Olketa Jehovah’s Witness bae hapi for helpem iu kasem datfala savve, mekem iu tu savve joinim staka thousand pipol wea stand strong long saed wea win.
[Olketa Piksa long page 5]
Faithful fasin bilong Olketa Jehovah’s Witness strongim pruv hao Satan hem lus
[Piksa long page 7]
Staka loyal wan saed witim Jehovah