Waswe, Iu Faithful Long Evri Samting?
“Man wea faithful long smol samting hem faithful long big samting tu.”—LUKE 16:10.
1. Wanem nao wanfala wei wea Jehovah hem faithful?
WASWE, enitaem iu lukim wanem nao happen long shadow bilong wanfala tree taem sun muv long skae? Datfala shadow hem savve change long size and gogo bilong hem! Staka taem samting wea man duim and promis for duim, hem savve change evritaem olsem datfala shadow. Bat, Jehovah God no savve change enitaem. Disaepol James sei hem “Dadi bilong olketa laet long heven, and hem no savve change olsem shadow.” (James 1:17) Jehovah hem no savve change and iumi fit for trustim hem nomata long eni smol samting. Hem “God wea faithful.”—Deuteronomy 32:4.
2. (a) Why nao iumi shud lukluk gud long iumiseleva for lukim sapos iumi faithful or nomoa? (b) Wanem nao olketa kwestin abaotem faithful fasin wea iumi bae storyim?
2 Hao nao God ting long faithful fasin bilong olketa wea worshipim hem? Hem garem sem tingting olsem David wea tok olsem abaotem olketa: “Eye bilong mi lukluk long olketa faithful wan long earth, for olketa savve stap witim mi. Man wea wakabaot followim stretfala wei nao, bae man wea servem mi.” (Psalm 101:6) Tru nao, Jehovah hem hapi long wei wea olketa servant bilong hem faithful. Dastawe aposol Paul raet olsem: “Samting wea olketa laekem from olketa wakman hem for man mas faithful.” (1 Corinthians 4:2) For faithful hem minim wanem? Long olketa wanem part long laef nao iumi shud faithful long hem? Wanem nao samfala gud samting iumi kasem taem iumi “wakabaot followim stretfala wei”?
For Faithful Hem Minim Wanem?
3. Wanem nao showimaot sapos iumi faithful or nomoa?
3 Hebrews 3:5 sei ‘Moses hem servant wea faithful.’ Wanem nao mekem datfala profet Moses hem faithful? Taem olketa buildim and wakem tabernacle, “Moses duim evri samting wea Jehovah komandim hem for duim. Hem barava duim olsem.” (Exodus 40:16) From iumi pipol wea worshipim Jehovah, iumi faithful taem iumi obey for servem hem. Diswan minim for gohed loyal long Jehovah taem iumi feisim olketa hardfala taem and bigfala test. Nomata olsem, wei for win taem iumi feisim olketa bigfala test hem no only samting wea showimaot iumi faithful. Jesus hem sei: “Man wea faithful long smol samting hem faithful long big samting tu, and man wea no raeteous long smol samting hem no raeteous long big samting tu.” (Luke 16:10) Iumi mas gohed faithful nomata long olketa samting wea maet luk olsem olketa smol samting nomoa.
4, 5. Wei wea iumi faithful long “smol samting” hem showimaot wanem?
4 For obey each day long “smol samting” hem important from tufala reason. First reason, hem showimaot feeling bilong iumi abaotem sovereign rul bilong Jehovah. Tingim tambu wea Jehovah putim for testim loyal fasin bilong fasfala man and woman, Adam and Eve. Datwan no putim bigfala hevi long tufala. Tufala garem enikaen kaikai insaed garden bilong Eden, bat frut bilong wanfala tree nomoa tufala tambu for kaikaim—“tree bilong savve long gud and nogud samting.” (Genesis 2:16, 17) Wei wea tufala faithful for obeyim datfala komand bae showimaot hao first man and woman hia sapotim rul bilong Jehovah. Wei for followim olketa teaching bilong Jehovah long laef bilong iumi evriday, showimaot iumi sapotim sovereign rul bilong Jehovah.
5 Mek-tu reason, wei wea iumi ting long olketa “smol samting” hem affectim wei wea iumi ting long olketa “big samting,” wea hem nao olketa bigfala test wea iumi savve feisim. Olsem example, tingim samting wea happen long Daniel and thrifala faithful Hebrew fren bilong hem—Hananiah, Mishael, and Azariah. Olketa go olsem prisoner long Babylon long year 617 B.C.E. Taem olketa young yet, maet teenager, fofala hia stap insaed haos bilong King Nebuchadnezzar. Olketa givim olketa “ration for each day from kaikai and wine bilong king, for feedim olketa for thrifala year, mekem long end bilong diswan olketa savve standap front long king.”—Daniel 1:3-5.
6. Wanem test nao Daniel and thrifala Hebrew fren bilong hem feisim taem olketa stap long haos bilong king bilong Babylon?
6 Nomata olsem, kaikai wea kam from king bilong Babylon hem mekem test kamap for fofala young Hebrew hia. Luk olsem samfala kaikai wea kam from king hem kaikai wea Law Bilong Moses tambuim. (Deuteronomy 14:3-20) Maet olketa no aotem gud blood bilong animal wea olketa killim dae, wea minim for kaikaim meat olsem bae brekem Law bilong God. (Deuteronomy 12:23-25) From hem wei bilong pipol long Babylon for worship, maet olketa offerim kaikai hia fastaem long olketa idol bifor evriwan kaikaim tugeta.
7. Wei wea Daniel and thrifala fren bilong hem obey showimaot wanem samting?
7 Olketa wea waka for king bilong Babylon bae ting nating long olketa tambu bilong olketa Hebrew saed long kaikai. Nomata olsem, Daniel and olketa fren bilong hem disaed strong for no kamap dirty from wei for kaikaim samting wea Law bilong God tambuim for Israel. Diswan hem join witim wei wea olketa loyal and faithful long God. So olketa ask for olketa vegetable and wata, and olketa bilong Babylon givim datwan long olketa. (Daniel 1:9-14) Long tingting bilong samfala pipol distaem, maet samting wea fofala young man hia duim hem smol samting nomoa. Bat, wei wea olketa obeyim God showimaot olketa sapotim sovereign rul bilong Jehovah.
8. (a) Wanem bigfala test bilong loyal fasin nao thrifala Hebrew feisim? (b) Wanem nao kamaot from datfala test, and diswan showimaot wanem?
8 Wei wea Daniel and thrifala fren bilong hem faithful long samting wea luk olsem hem smol samting nomoa, hem redim olketa for deal witim wanfala big test. Tan go long chapter 3 bilong Daniel long Bible bilong iu and readim hao thrifala Hebrew hia feisim dae from olketa no willing for worshipim gold image wea King Nebuchadnezzar putim. Taem olketa tekem olketa go front long datfala king, wei wea olketa disaed strong hem showaot long disfala toktok bilong olketa: “Sapos hem disaed for duim, God bilong mifala wea mifala servem hem fit for sevem mifala. From bigfala fire and from hand bilong iu, O king, bae hem sevem mifala. Bat sapos nomoa, iu mas savve, O king, hao mifala no servem olketa god bilong iu, and mifala bae no worshipim gold image wea iu wakem.” (Daniel 3:17, 18) Waswe, Jehovah sevem olketa? Olketa soldia wea torowem olketa young man hia insaed fire olketa dae, bat thrifala faithful Hebrew hia laef—nomata for bone lelebet from hot bilong fire bat nomoa tu! Wei wea olketa faithful evritaem hem redim olketa for faithful long taem bilong bigfala test. Diswan hem showimaot hem important tumas for faithful long olketa smol samting.
Faithful Saed Long “Olketa Riches wea No Raeteous”
9. Wanem nao Jesus storyim long Luke 16:9-13?
9 Bifor Jesus talem principle abaotem man wea faithful long smol samting bae faithful tu long big samting, hem talem disfala advaes: “Mek-fren thru long olketa riches wea no raeteous, mekem taem olketa samting hia finis, bae olketa welkamim iufala long olketa ples wea stap for olowe.” Bihaen diswan nao hem talem toktok abaotem wei for faithful long smol samting. Then Jesus sei: “Dastawe, sapos iufala no faithful saed long olketa riches wea no raeteous, hu nao bae trustim iufala witim samting wea tru? . . . No eni servant savve waka for tufala masta; from bae hem lovem wanfala and heitim narawan or bae hem lisin long wanfala and ting daonem narawan. Iufala kanduit kamap slave bilong God and bilong riches.”—Luke 16:9-13.
10. Hao nao iumi savve showimaot iumi faithful long wei wea iumi iusim “olketa riches wea no raeteous”?
10 Olketa verse hia showimaot hao toktok bilong Jesus long Luke 16:10 hem minim wei for iusim “olketa riches wea no raeteous,” hem nao olketa material samting or olketa samting wea man ownim. Jesus kolem olketa samting hia, riches wea no raeteous—especially selen—bikos olketa man wea no perfect nao iusim olketa. Nara samting moa, wei for laek kasem olketa riches savve leadim man for duim samting wea no raeteous. Iumi showimaot iumi faithful taem iumi iusim olketa material samting long wisefala wei. Iumi no iusim olketa for kasem samting for iumiseleva bat iumi laek iusim for sapotim Kingdom and helpem pipol wea garem need. Taem iumi faithful long wei olsem, iumi mek-fren witim Jehovah God and Jesus Christ, olketa wea ownim “olketa ples wea stap for olowe.” Olketa bae welkamim iumi insaed olketa ples hia, wea minim bae olketa givim iumi laef olowe long heven or long wanfala Paradaes long earth.
11. Why nao iumi shud no hol bak for explainim long pipol hao iumi acceptim contribution for waka wea Olketa Jehovah’s Witness duim evriwea long world?
11 Tingim tu, hao taem iumi storyim message bilong Kingdom and offerim Bible or Bible pablikeson long pipol and explainim hao iumi acceptim olketa contribution for waka wea pipol bilong Jehovah duim evriwea long world, iumi givim olketa wanfala samting. Iumi givim chance long olketa for iusim material samting bilong olketa long wisefala wei! Nomata Luke 16:10 hem story abaotem wei for iusim olketa material samting, principle long there hem fitim tu olketa nara part long laef.
Honest Fasin Hem Barava Important
12, 13. Wanem nao olketa samting wea iumi savve honest long hem?
12 Aposol Paul hem raet olsem: “Mifala savve mifala garem honest conscience, from mifala want for duim evri samting long honest wei.” (Hebrews 13:18) “Evri samting” hem minim tu saed long wei wea iumi iusim selen bilong iumi. Iumi kwiktaem for peim kaon and olketa tax, and iumi honest taem iumi duim datwan. Why nao olsem? Iumi duim datwan bikos long conscience bilong iumi, and main samting nao from love wea iumi garem for God and from iumi obeyim olketa instruction bilong hem. (Romans 13:5, 6) Wanem nao iumi duim taem iumi faendem wanfala samting wea no bilong iumi? Iumi givim bak long man wea ownim. Taem iumi explainim samting wea muvim iumi for duim datwan, diswan hem nambawan witness!
13 For faithful and honest long evri samting hem minim tu for honest long ples wea iumi waka. Taem iumi honest, diswan hem mekem pipol luksavve wanem kaen God nao iumi servem. Iumi no ‘stealim’ taem long wei for lesy. Bat, iumi waka hard, olsem iumi waka for Jehovah. (Ephesians 4:28; Colossians 3:23) Olketa talem hao long wanfala kantri long Europe, wanfala long evri thrifala wakman wea askem doctor for taem off bikos olketa sik, olketa laea nomoa. Olketa tru servant bilong God no mekem eni excuse for no go long waka. Samfala taem, Olketa Jehovah’s Witness kasem hae position bikos olketa boss luksavve olketa honest and waka hard.—Proverbs 10:4.
Faithful Long Christian Ministry
14, 15. Wanem nao samfala wei wea iumi savve showimaot iumi faithful long Christian ministry bilong iumi?
14 Hao nao iumi showimaot iumi faithful long ministry wea God givim long iumi? Bible hem sei: “Iumi mas evritaem givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik.” (Hebrews 13:15) Main wei for showimaot faithful fasin long field ministry hem for go aot evritaem. No eni reason stap for iumi no go aot preach long wanfala full month! Wei for share evritaem long preaching waka savve helpem iumi for kamap moabeta long wei for duim diswan.
15 Nara gudfala wei for showimaot faithful fasin long field service hem for iusim olketa idea insaed long Wastaoa and Kingdom Ministry Bilong Iumi. Taem iumi redim and iusim olketa idea hia, waswe, ministry bilong iumi kamap moabeta? Taem iumi story witim samwan wea interest long message bilong Kingdom, waswe, iumi kwiktaem for visitim datfala man moa for mekem grow interest bilong hem? And waswe long olketa Bible study wea iumi startim witim pipol wea interest? Waswe, iumi faithful for duim olketa evritaem? Wei wea iumi faithful long ministry savve mekem iumi and olketa wea lisin long iumi kasem laef.—1 Timothy 4:15, 16.
Stap Separate From World
16, 17. Wanem nao olketa wei wea iumi savve stap separate from world?
16 Taem Jesus prea long God, hem sei olsem abaotem olketa follower bilong hem: “Mi givim word bilong iu long olketa, bat world hem heitim olketa, bikos olketa no part bilong world, olsem mi tu no part bilong world. Mi askem iu, no for tek aotem olketa from world, bat for lukaftarem olketa bikos long wicked wan. Olketa no part bilong world, olsem mi tu no part bilong world.” (John 17:14-16) Maet iumi disaed strong finis for stap separate from world long olketa big samting, olsem wei for no teksaed, olketa holiday and kastom bilong religion, and dirty fasin. Bat waswe long olketa smol samting? Waswe, maet world hem affectim iumi long samfala wei wea iumi no luksavve? Olsem example, sapos iumi no careful, hem isi tumas for kaleko and lukluk bilong iumi for no fitim and no showimaot respect! For faithful hem minim iumi mas “showimaot respect and stretfala tingting” saed long kaleko and lukluk bilong iumi. (1 Timothy 2:9, 10) Tru nao, ‘iumi no givim eni reason for mekem man stambol, mekem no eniwan savve faendem rong long ministry bilong iumi; bat long evri wei iumi showimaot iumi olketa minister bilong God.’—2 Corinthians 6:3, 4.
17 From iumi want for givim honor long Jehovah, iumi werem kaleko wea showimaot respect taem iumi go long olketa meeting bilong kongregeson. Semsem tu taem iumi hipap long olketa assembly and convention. Kaleko bilong iumi mas gudfala and fitim. Diswan hem givim witness long nara pipol wea lukim iumi. Olketa angel tu lukluk kam long samting iumi duim, olsem olketa lukluk long Paul and olketa Christian brata long taem bilong hem. (1 Corinthians 4:9) For tok stret, iumi shud evritaem werem kaleko wea fitim. Samfala maet ting wei for faithful taem iumi chusim kaleko hem smol samting nomoa, bat diswan hem important long God.
Blessing wea Iumi Kasem Bikos Iumi Faithful
18, 19. Wanem nao olketa blessing wea iumi kasem from iumi faithful?
18 Bible sei olketa tru Christian olketa “olsem gudfala servant [wea] iusim kaeness bilong God wea man no fit for kasem long olketa difren kaen wei.” From diswan, olketa “depend long strong wea God givim.” (1 Peter 4:10, 11) And tu, iumi olketa servant kasem samting wea no bilong iumi—olketa samting wea showimaot kaeness bilong God wea man no fit for kasem, wea wanfala nao hem ministry. Taem iumi gohed for showimaot iumi olketa gudfala servant, iumi depend long strong wea God givim, “datfala paoa wea winim wanem iumi garem.” (2 Corinthians 4:7) Datwan hem nambawan training wea iumi kasem for helpem iumi deal witim eni hard samting wea bae kamap long future!
19 Man wea raetem psalm hem sei: “O lovem Jehovah, iufala evriwan wea loyal long hem. Jehovah bae protectim olketa wea faithful.” (Psalm 31:23) Iumi mas disaed strong for showimaot iumi faithful, and barava sure hao Jehovah hem “Man for sevem evri difren kaen man, main wan nao olketa wea faithful.”—1 Timothy 4:10.
Waswe Iu Remember?
• Why nao iumi shud “faithful long smol samting”?
• Hao nao iumi savve faithful
saed long honest fasin?
insaed ministry?
saed long wei for stap separate from world?
[Olketa Piksa long page 26]
Faithful long smol samting, faithful long big samting tu
[Piksa long page 29]
‘Duim evri samting long honest wei’
[Piksa long page 29]
Nambawan wei for faithful hem for redi gud for field ministry
[Piksa long page 30]
Showimaot respect saed long kaleko and lukluk