Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • w04 2/1 p. 32
  • Wanfala Honest Conscience

Disfala sekson no garem eni video.

Sorre, disfala video no savve plei distaem.

  • Wanfala Honest Conscience
  • Wastaoa wea Talemaot Kingdom Bilong Jehovah—2004
Wastaoa wea Talemaot Kingdom Bilong Jehovah—2004
w04 2/1 p. 32

Wanfala Honest Conscience

WANDAY, taem hem gogo bak long haos from waka, Charles, man wea waka long university long Kenya lusim mobile phone bilong hem. Long Kenya, kaen samting olsem hem samting wea kost bilong hem hae tumas.

Charles hem sei: “Mi barava no expectim man wea faendem for givim kam bak.” Bihaen samfala day, hem sapraes for kasem wanfala telephone kol from branch office bilong Olketa Jehovah’s Witness long Kenya. Hem no savve bilivim taem olketa askem hem for go long there and tekem mobile phone bilong hem! Charles faendaot hao wanfala full-taem minister bilong Olketa Jehovah’s Witness nao go insaed sem trak wea hem go insaed and faendem datfala mobile phone. From hem trae for faendem man wea ownim, datfala full-taem minister tekem go datfala mobile phone long branch office, and gogo olketa volunteer wakman long there nao faendem Charles taem olketa iusim telephone namba wea showaot long datfala mobile phone.

Charles sei long wanfala leta wea hem raetem go long branch office: “Mi barava tinghae long wei wea iufala trae for luk aotem mi nomata hem hard. Mi barava laek for sei thankiu long olketa member bilong organization bilong iufala wea faendem datfala mobile phone, and wea faendaot hem bilong mi and then givim bak. Long distaem hem no isi for faendem eni man wea honest, bat hem barava encouragem mi for lukim hao samfala barava showaot klia olsem trufala Witness bilong Jehovah God.”

Pipol evriwea savve long Olketa Jehovah’s Witness olsem pipol wea honest. Olketa followim aposol Paul, wea sei: “Mifala savve mifala garem honest conscience, from mifala want for duim evri samting long honest wei.” (Hebrews 13:18; 1 Corinthians 11:1) Olketa luksavve hao kaen fasin olsem givim glory long Jehovah God, olsem Jesus sei: “Letem laet bilong iufala shaen front long olketa man, mekem olketa savve lukim olketa gudfala waka bilong iufala and givim glory long Father bilong iufala wea stap long heven.”—Matthew 5:16.

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem