Waswe, Iu Laek for Wanem Kaen Man?

BIGMAN bilong police long wanfala taon long Philippines askem wanfala pioneer sista olsem, “Wanem nao iu duim for mekem man hia changem wei bilong hem?” Hem point go long staka pepa antap tebol bilong hem and hem sei: “Iu savve, olketa pepa hia hem abaotem olketa kot case bilong man hia bifor. Hem duim staka nogud samting long disfala taon, bat iu nao mekem hem changem nogud wei bilong hem.” Datfala man hem savve drunk olowe, hem laek for faet, and hem kosim staka trabol. Wanem nao mekem datfala man barava changem wei bilong hem? Bible nao helpem hem.

Plande pipol barava followim toktok bilong aposol Paul and olketa ‘lusim olketa rabis wei bilong olketa and garem olketa fasin wea God hem laekem.’ (Eph. 4:​22-​24) Sapos iumi laek for Christian, iumi mas changem wei bilong iumi, nomata sapos hem big samting or hem smol samting nomoa wea iumi mas changem.

Bat for iumi changem wei bilong iumi mekem gogo iumi fit for baptaes, datwan hem first samting nomoa wea iumi mas duim. Long taem wea iumi baptaes, iumi olsem wanfala pis timba nomoa wea man for mekem karving hem start for wakem. Iu savve lukim sheip bilong datwan, bat hem mas wakem datfala timba go moa for mekem samting hia luk naes tumas. Iumi olsem tu taem iumi baptaes. Iumi garem olketa fasin wea mekem iumi fit for worshipim God, bat iumi mas gohed for kamap gud moa long olketa wei bilong iumi.

Nomata Paul tu bat luksavve hem mas kamap gud moa long samfala wei bilong hem. Hem sei: “Taem mi laek duim stretfala samting, olketa rabis samting nomoa mi tingim.” (Rom. 7:​21) Paul luksavve long olketa wei bilong hem and hem savve tu long olketa wei wea hem laek for garem. Waswe long iumi? Hem gud for iumi tingim diswan: ‘Mi wanem kaen man? Wanem nao olketa wei wea mi laek for garem?’

“Mi Wanem Kaen Man”?

Taem iumi laek for wakem gud moa wanfala old haos, iumi no paintim nomoa datfala haos, bat iumi mas aotem firstaem olketa timba and walling wea rotten. Sapos nomoa, no longtaem nomoa bae haos hia nogud moa. Datwan hem semsem tu witim wei bilong iumi. Hem nogud sapos iumi trae haedem samfala fasin bilong iumi wea nogud, mekem pipol tingse iumi evritaem duim stret samting. Bat iumi mas barava lukluk gud long iumiseleva and stretem eni wei bilong iumi wea no mas gud. Sapos nomoa, bae gogo olketa nogud wei bilong iumi showaot moa. Iumi mas luksavve long eni nogud wei bilong iumi and stretem datwan. (2 Cor. 13:5) Jehovah givim staka samting long iumi for helpem iumi duim datwan.

Paul hem sei: “Toktok bilong God hem laef and garem paoa. Hem sharp winim naef for faet wea hem sharp long tufala saed and hem savve divaedem soul and spirit, and barava go insaed olketa join and bon bilong man. Hem fit for luksavve long tingting bilong man and wanem hem laek tumas for duim.” (Heb. 4:​12) Message long Bible savve barava helpem iumi for changem olketa wei bilong iumi. Hem olsem wanfala naef wea barava kat go deep insaed olketa join and bon bilong iumi. Hem helpem iumi for barava luksavve long wanem nao really tingting bilong iumi and why iumi duim samting, wea datwan savve difren tumas from wanem iumi tingim finis abaotem iumiseleva. Bible barava helpem iumi for luksavve long olketa wik point bilong iumi!

Taem iumi wakem gud moa wanfala old haos, maet hem no inaf nomoa for changem olketa post or nara samting wea nogud. Iumi mas savve wanem nao mekem olketa post nogud mekem iumi savve duim samting for stopem datwan for no happen moa. Iumi tu mas duim sem samting. Iumi mas luksavve long olketa wik point bilong iumi, bat iumi mas savve tu long wanem nao mekem iumi garem olketa wei olsem. Wei for duim olsem bae helpem iumi for kontrolem iumiseleva. Staka samting nao savve gogo mekem iumi for garem wanfala wei. Maet samfala long olketa samting hia nao hem position wea iumi garem long community, selen wea iumi garem, ples wea iumi stap, kastom, dadi and mami bilong iumi, olketa fren bilong iumi, and religion bilong iumi. Maet olketa nara samting tu hem television and olketa video wea iumi lukluk long hem and kaen hapitaem wea iumi chusim. Taem iumi luksavve long olketa samting wea savve mekem iumi for garem samfala wei wea no mas gud, iumi savve stap klia long olketa samting hia.

Bihaen iumi lukluk gud long iumiseleva, maet iumi garem tingting olsem: ‘Hem nao wei bilong mi, hard for mi change nao.’ Kaen tingting olsem hem no stret. Paul story abaotem samfala long kongregeson long Corinth wea bifor olketa durong, duim olketa dirty samting, drunk olowe, and duim olketa nara nogud samting olsem. Bat hem sei: ‘Hem nao wanem iufala duim bifor. Bat distaem spirit bilong God bilong iumi mekem iufala klin nao.’ (1 Cor. 6:​9-​11) Holy spirit bilong Jehovah savve helpem iumi tu for changem wei bilong iumi.

Tingim wanfala man long Philippines wea nem bilong hem Marcos.a Marcos storyim laef bilong hem taem hem young. Hem sei: “Dadi and mami bilong mi savve raoa olowe. Dastawe taem mi 19 year, mi start for duim olketa rabis samting nao.” Marcos savve gambol, steal, and iusim gun for demandim selen. Hem witim samfala narawan tu plan for tekovarem wanfala plane taem hem flae go long wanfala ples, bat gogo olketa no duim datwan. Nomata bihaen Marcos hem marit, hem gohed nomoa for duim olketa rabis samting. Hem gambol, gogo hem lusim evri material samting bilong olketa. No longtaem bihaen, taem wanfala Jehovah’s Witness kam study witim waef bilong Marcos, hem tu kam lisin long datfala study. Long firstaem, Marcos tingse hem no fit for kamap wanfala Witness. Bat from hem followim samting wea hem lanem and go long olketa meeting, datwan helpem Marcos for lusim olketa nogud wei bilong hem. Distaem hem baptaes and hem gohed teachim nara pipol abaotem hao olketa tu savve changem wei bilong olketa.

Iu Laek for Wanem Kaen Man?

Wanem nao maet samfala samting iumi mas changem for barava showimaot olketa Christian fasin? Paul hem sei olsem long olketa Christian: “Iufala mas barava lusim evri rabis wei. Iufala mas no kros long eniwan, no garem tingting for spoelem narawan, no tok spoelem narawan, and no talem eni rabis toktok. No laea long narawan. Lusim olketa old wei bilong iufala.” Aposol Paul hem sei moa: “Werem olsem kaleko olketa fasin and wei wea man savve garem taem hem lanem olketa samting wea stret and wea olsem nao fasin bilong Man wea startim datwan.”​—Col. 3:​8-​10.

So main goal bilong iumi nao hem for lusim olketa old wei bilong iumi and garem kaen wei wea God hem laekem. Wanem nao olketa fasin wea savve helpem iumi long diswan? Paul hem sei: “Werem olsem kaleko olketa fasin olsem wei for barava tingim narawan, kaen long pipol, hambol, no kros, and no givap kwiktaem. Taem eniwan long iufala hem feel nogud long narawan, iufala no kros bat iufala mas forgivim hem. Jehovah hem forgivim iufala, dastawe iufala mas forgivim narawan. Bat winim evri samting hia, iufala mas garem love, bikos no eni samting moa hem savve mekem pipol for stap gud tugeta winim datwan.” (Col. 3:​12-​14) Sapos iumi traem best for garem olketa fasin olsem “iumi bae stap gud witim nara pipol and bae mekem Jehovah hapi.” (1 Sam. 2:​26) Taem Jesus stap long earth, hem barava showimaot olketa semkaen fasin and wei olsem God. Taem iumi studyim and followim example bilong hem, iumi tu savve olsem hem, from iumi “followim God.”​—Eph. 5:​1, 2.

Nara samting wea savve helpem iumi luksavve long eni samting wea iumi need for changem, hem for read abaotem olketa man and woman wea Bible storyim. Maet samfala wei bilong olketa hem gud or maet hem nogud. Hem gud for ting raonem why olketa garem olketa fasin olsem. Tingim Joseph, wea hem son bilong Jacob. Olketa brata bilong Joseph duim samting long hem wea barava no stret, bat hem no kros. Hem hambol nomoa nomata samting olketa brata duim barava spoelem hem. (Gen. 45:​1-​15) Man wea garem fasin wea barava difren from Joseph hem Absalom, wea hem son bilong King David. Hem duim olketa samting wea mekem pipol barava tinghae long hem and olketa tingse hem barava laek helpem olketa, batawea, hem laea long olketa nomoa, and hem savve killim man dae tu. (2 Sam. 13:28, 29; 14:25; 15:​1-​12) Kaen wei for act olsem iumi gud and wei wea iumi luk naes bae no mekem pipol tinghae long iumi.

Iumi Savve Change

For mekem iumi garem olketa wei wea God hem laekem and tinghae long hem nao, iumi mas lukluk gud long iumiseleva. (1 Pet. 3:​3, 4) Iumi mas luksavve long olketa fasin bilong iumi wea nogud and long samting wea mekem iumi for garem fasin olsem. Iumi mas traem best tu for garem olketa fasin wea God hem garem. Waswe, man savve changem wei bilong hem sapos hem trae hard olsem?

Ia, Jehovah savve helpem iumi for change. Iumi savve talem sem samting wea datfala man for raetem psalm hem talem. Hem sei: “Plis God, mekem mi for garem heart wea klin, mekem mi for garem stretfala tingting, and mekem mi strong for keepim datwan.” (Ps. 51:10) Iumi savve ask for spirit bilong God helpem iumi for barava laek mekem evri samting iumi duim hem followim nao samting wea God hem laekem. Iumi savve barava change and garem olketa wei wea mekem Jehovah hem hapi!

[Footnote]

[Piksa long page 4]

Waswe, for paintim disfala haos wea cyclone spoelem bae mekem haos hem gud nao?

[Piksa long page 5]

Waswe, iu garem sem fasin wea Christ garem tu?