“Gohed Lukluk Long Wanem Kaen Man Nao Iufala”

“Gohed for testim sapos iufala biliv yet, gohed lukluk long wanem kaen man nao iufala.”—2 CORINTHIANS 13:5.

1, 2. (a) Hao nao wei for no sure long olketa samting iumi bilivim savve affectim iumi? (b) Wanem samting wea happen long Corinth long first century nao maet mekem samfala for no sure long wanem wei for wakabaot followim?

WANFALA man hem wakabaot long bush road and gogo hem kasem part long road wea divaed. From hem no savve wanem road nao bae lead go long ples wea hem laek go, hem askem olketa man wea wakabaot go pas bat each wan talem difren samting from narawan. Man hia konfius and pas long there nao. Wei for garem olketa daot abaotem wanem iumi bilivim savve affectim iumi long semkaen wei tu. Wei for no sure olsem savve spoelem wei wea iumi disaed gud long samting, wea mekem iumi no sure long wanem wei for wakabaot followim.

² Long first century, wanfala samting kamap insaed Christian kongregeson long Corinth wea maet affectim samfala long kaen wei olsem. “Olketa stael aposol” kwestinim paoa wea Paul garem taem olketa sei: “Olketa leta bilong hem talem toktok wea barava strong, bat taem hem stap witim iumi hem wanfala boring man and wei bilong hem for toktok nating here gud.” (2 Corinthians 10:7-12; 11:5, 6) Maet kaen tingting olsem hem mekem samfala insaed kongregeson long Corinth for no sure long wanem wei for wakabaot followim.

3, 4. Why nao iumi shud interest long advaes wea Paul givim for olketa long Corinth?

³ Paul hem startim kongregeson long Corinth taem hem visitim datfala taon long 50 C.E. Hem stap long Corinth for “wan and haf year, and teachim toktok bilong God long olketa.” Tru nao, “staka pipol long Corinth wea herem start for biliv and baptaes.” (Acts 18:5-11) Paul hem barava laekem olketa Christian long Corinth for gohed strong long spiritual wei. And tu, olketa long Corinth askem advaes from Paul long samfala samting. (1 Corinthians 7:1) So hem givim nambawan advaes long olketa.

⁴ Paul hem raet olsem: “Gohed for testim sapos iufala biliv yet, gohed lukluk long wanem kaen man nao iufala.” (2 Corinthians 13:5) Sapos olketa brata long Corinth followim disfala advaes, diswan bae protectim olketa from wei for no sure long wanem wei for wakabaot followim. Diswan savve protectim iumi long sem wei tu. So, hao nao iumi savve followim advaes bilong Paul? Hao nao iumi savve testim sapos iumi biliv yet? And wanem nao insaed long wei for lukluk gud long wanem kaen man nao iumi?

“Gohed for Testim Sapos Iufala Biliv Yet”

5, 6. Wanem standard nao iumi garem for testim sapos iumi biliv yet, and why nao diswan hem best standard?

⁵ Taem pipol testim wanfala man or wanfala samting, plande taem olketa followim wanfala standard wea set finis. Long test wea iumi storyim hia, iumi no testim biliv bilong iumi, bat iumi testim iumiseleva. Iumi duim datfala test followim wanfala perfect standard. Wanfala psalm wea King David raetem hem sei olsem: “Law bilong Jehovah hem perfect, hem mekem soul kamap gud moa. Man fit for trustim reminder bilong Jehovah, hem mekem man wea no garem savve hem kamap wise. Olketa law from Jehovah olketa stret, mekem heart hem hapi; komandment bilong Jehovah hem klin, mekem eye hem shaen.” (Psalm 19:7, 8) Insaed long Bible hem olketa perfect law wea stret, and olketa reminder and komandment bilong Jehovah wea klin. Dastawe message wea stap insaed Bible hem barava gudfala standard for testim iumiseleva long hem.

⁶ Aposol Paul hem sei olsem abaotem message wea kam from God: “Word bilong God hem laef and garem paoa for duim samting and hem sharp winim eni tu-saed sword and hem savve kat go for divaedem soul and spirit, and olketa join and bon, and hem fit for luksavve long tingting and samting wea heart want for duim.” (Hebrews 4:12) Tru nao, toktok bilong God savve testim heart bilong iumi, wea minim olketa really fasin bilong iumi. Hao nao iumi wanwan savve followim disfala sharp and strongfala message? Man wea raetem psalm hem talemaot klia hao iumi savve duim diswan. Hem sing olsem: “Hapi nao man wea . . . laekem tumas law bilong Jehovah, and hem read smol long law bilong hem day and naet.” (Psalm 1:1, 2) “Law bilong Jehovah” hem stap insaed Word bilong God, Bible. Iumi mas laekem tumas for readim Word bilong Jehovah. Tru nao, iumi mas markem taem for read smol long hem, wea minim for ting raonem. Taem iumi duim diswan, iumi need for letem samting iumi readim for testim iumi.

7. Wanem nao main wei for testim sapos iumi biliv yet?

⁷ So main wei for testim sapos iumi biliv yet hem for readim and ting raonem Word bilong God, and lukim sapos fasin bilong iumi hem followim wanem iumi lanem. Iumi hapi from iumi kasem staka help saed long wei for minim Word bilong God.

8. Hao nao olketa pablikeson from “faithful and wise slave” helpem iumi for testim sapos iumi biliv yet?

⁸ Jehovah hem provaedem olketa teaching and instruction thru long olketa buk bilong “faithful and wise slave,” wea explainim Bible for iumi. (Matthew 24:45) Olsem example, tingim olketa box wea garem title “Olketa Kwestin for Ting Raonem” long end bilong klosap evri chapter insaed buk Kam Klos Long Jehovah.a Olketa box hia givim chance long man for lukluk long hemseleva! Staka difren topic insaed Wastaoa and Awake! magasin helpem iumi tu for testim sapos iumi biliv yet. Wanfala Christian woman hem sei olsem abaotem olketa article wea storyim buk bilong Proverbs insaed Wastaoa magasin no longtaem go nomoa: “Olketa article hia barava helpem mi. Olketa helpem mi for lukluk gud sapos toktok, fasin, and tingting bilong mi followim olketa raeteous standard bilong Jehovah or nomoa.”

9, 10. Wanem nao Jehovah provaedem for helpem iumi gohed testim sapos iumi biliv yet?

⁹ Iumi kasem tu staka direction and encouragement long olketa kongregeson meeting, assembly, and convention. Olketa hia part long help wea Jehovah givim for olketa wea Isaiah profesi abaotem taem hem sei: “Long lastfala part bilong olketa day maunten bilong haos bilong Jehovah bae standap strong hae winim olketa maunten, and hem bae stap hae winim olketa hill; and evri nation bae go long hem. And plande pipol bae go and sei: ‘Kam, iufala pipol, iumi go ap long maunten bilong Jehovah, . . . and hem bae teachim iumi abaotem olketa wei bilong hem, and iumi bae wakabaot long olketa road bilong hem.’” (Isaiah 2:2, 3) Tru nao, hem wanfala blessing for kasem kaen instruction olsem abaotem olketa wei bilong Jehovah.

¹⁰ Narafala wei for testim iumiseleva hem kaonsel wea iumi kasem from olketa wea garem mark long spiritual wei, olsem olketa Christian elder. Bible sei olsem abaotem olketa: “Olketa brata, nomata wanfala man hem go rong taem hem no minim yet, iufala wea garem mark long spiritual wei mas trae for stretem datfala man witim kwaet fasin, bat luk aot gud long iufala seleva, nogud iufala tu kasem test.” (Galatians 6:1) Iumi tinghae tumas long kaen help olsem wea iumi kasem for stretem iumi!

11. Wanem nao hem insaed long wei for testim sapos iumi biliv yet?

¹¹ Olketa pablikeson, olketa Christian meeting, and olketa man wea kasem appointment—evriwan hia olketa nambawan present from Jehovah. Nomata olsem, for testim sapos iumi biliv yet minim iumi mas lukluk gud long iumiseleva. So taem iumi readim olketa pablikeson or lisin long kaonsel from Bible, iumi need for askem iumiseleva: ‘Waswe, diswan fitim mi? Waswe, mi duim diswan? Waswe, mi followim evri Christian biliv?’ Wei wea iumi ting long information wea iumi kasem from evri samting hia bae affectim spiritual saed bilong iumi. Bible hem sei: “Physical man no savve kasem olketa samting bilong spirit bilong God, bikos diswan olsem krangge samting long hem . . . Bat, spiritual man savve lukluk gud long evri samting.” (1 Corinthians 2:14, 15) Waswe, iu lukim hao best samting nao hem for garem spiritual tingting and for thankiu long evri samting wea iumi readim insaed olketa buk, magasin, and olketa nara pablikeson, and tu, samting wea iumi herem long olketa meeting and from olketa elder?

“Gohed Lukluk Long Wanem Kaen Man Nao Iufala”

12. Wanem nao hem showimaot wanem kaen man nao iumi?

¹² For gohed lukluk long wanem kaen man nao iumi, hem minim for lukluk gud long iumiseleva. Hem tru, maet iumi insaed truth bat waswe, laef bilong iumi hem followim truth evribit? Wei wea iumi mature and barava tinghae long olketa spiritual samting, hem showimaot wanem kaen man nao iumi.

13. Olsem Hebrews 5:14 hem talem, wanem nao showimaot iumi mature?

¹³ Taem iumi lukluk long iumiseleva, wanem nao iumi mas luk aotem for savve sapos iumi wanfala mature Christian? Aposol Paul hem raet olsem: “Strongfala kaikai hem for mature pipol, for olketa wea luksavve long samting wea stret and no stret from wei wea olketa iusim evritaem fasin for luksavve.” (Hebrews 5:14) Iumi showimaot iumi mature taem iumi trainim fasin bilong iumi for luksavve. Wanfala sportsman need for trainim samfala difren masol long body bilong hem bifor hem savve kamap barava gud long sport wea hem joinim. Long sem wei iumi need for trainim fasin bilong iumi for luksavve thru long wei for followim olketa Bible principle.

14, 15. Why nao iumi shud strong for studyim olketa deep samting insaed long Word bilong God?

¹⁴ Bat, for trainim fasin for luksavve iumi mas kasem savve fastaem. For kasem datwan iumi need for strong for duim study seleva. Taem iumi duim olsem evritaem—especially saed long olketa deep samting insaed Word bilong God—fasin for luksavve wea iumi garem bae kamap moabeta. Insaed olketa year wea go pas, Wastaoa magasin hem storyim staka deep subject. Hao nao tingting bilong iumi taem iumi lukim olketa article wea storyim olketa deep truth? Waswe, hem wei bilong iumi for no readim bikos olketa storyim ‘samfala samting wea hard for minim’? (2 Peter 3:16) Iumi traem best for barava minim information hia.—Ephesians 3:18

¹⁵ Waswe sapos iu samwan wea faendem hem hard tumas for study seleva? Hem barava important for iumi waka hard for kasem or mekem grow feeling for enjoyim datwan.b (1 Peter 2:2) For kamap mature hem minim iumi mas feedim iumiseleva witim strong kaikai, hem nao olketa deep truth insaed Word bilong God. Sapos iumi no duim datwan, bae iumi garem lelebet fasin for luksavve nomoa. Bat for showimaot iumi mature hem minim moa samting winim wei for kasem fasin for luksavve nomoa. Long laef bilong iumi evriday, iumi mas iusim savve wea iumi kasem from wei for study seleva wea iumi strong for duim.

16, 17. Wanem kaonsel nao disaepol James talem saed long wei for “kamap pipol wea followim datfala word”?

¹⁶ Nara samting wea showimaot wanem kaen man nao iumi hem olketa samting iumi duim for showimaot iumi tinghae long truth—olketa samting wea iumi duim from faith wea iumi garem. Disaepol James hem iusim wanfala tokpiksa wea barava mekem man tingting taem hem storyim diskaen wei for lukluk gud long seleva. Hem sei olsem: “Kamap pipol wea followim datfala word, no pipol wea herem nomoa datwan, and wea laea long olketa seleva witim rongfala tingting. From sapos eniwan herem word and no followim, hem olsem man wea lukim feis bilong hem long mirror. Bihaen hem lukim hemseleva, hem go and kwiktaem nomoa forgetim wanem kaen man nao hem. Bat man wea luk insaed long perfect law bilong freedom and gohed for followim datwan, hem kamap man wea hapi for duim datfala waka, from hem no man wea herem nomoa and forgetim datwan, bat hem man wea followim datwan.”—James 1:22-25.

¹⁷ Samting James minim hem olsem: ‘Luk insaed word bilong God wea olsem mirror, and lukluk gud long iuseleva. Gohed for duim olsem thru long wei for markem iuseleva witim samting wea God talem. Then, no kwiktaem forgetim wanem iu lukim. Stretem eni samting wea iu need for stretem.’ Maet samfala taem wei for followim disfala advaes bae hard samting for duim.

18. Why nao hem no isi for followim kaonsel bilong disaepol James?

¹⁸ Olsem example, tingim wei wea iumi mas tekpart insaed waka for preach abaotem Kingdom. Paul hem raet olsem: “Heart bilong man showimaot faith mekem hem kamap raeteous, bat mouth bilong man nao talemaot faith bilong hem long pablik mekem hem kasem salvation.” (Romans 10:10) For talemaot faith long pablik mekem iumi kasem salvation, iumi mas changem samfala samting. Staka long iumi faendem hem hard for duim preaching waka. For mekem iumi strong for duim disfala waka, and for mekem diswan kamap important samting long laef bilong iumi, bae iumi need for mekem samfala nara change and sakrifaes moa. (Matthew 6:33) Bat taem iumi kamap man wea duim disfala waka wea God givim, iumi hapi bikos diswan praisem Jehovah. So waswe, iumi pipol wea strong for talemaot Kingdom?

19. Wanem nao shud insaed olketa waka wea iumi duim wea showimaot faith bilong iumi?

¹⁹ Wanem nao shud insaed olketa waka wea iumi duim wea showimaot faith bilong iumi? Paul hem sei: “Evri samting wea iufala lanem and acceptim and herem and lukim long saed bilong mi, followim evri samting hia; and God bilong peace bae stap witim iufala.” (Philippians 4:9) Iumi showimaot wanem kaen man nao iumi taem iumi followim samting iumi lanem, acceptim, herem, and lukim—evri samting wea insaed wei for olsem wanfala Christian disaepol. Thru long profet Isaiah, Jehovah sei: “Diswan nao wei. Wakabaot followim.”—Isaiah 30:21.

20. Wanem kaen man and woman nao olsem bigfala blessing for kongregeson?

²⁰ Olketa man and woman wea strong for studyim Word bilong God, strong for preachim gud nius, barava faithful long evri samting, and loyal for sapotim Kingdom, olketa olsem bigfala blessing for kongregeson. Olketa help for mekem kongregeson strong. Olketa givim bigfala help saed long wei for helpem olketa niu wan. Taem iumi barava ting strong long advaes bilong Paul for ‘gohed testim sapos iumi biliv yet, and gohed lukluk long wanem kaen man nao iumi,’ iumi tu savve helpem nara pipol.

Kasem Hapi From Wei for Duim Will Bilong God

21, 22. Hao nao iumi savve kasem hapi from wei for duim will bilong God?

²¹ King David bilong Israel bifor hem sing olsem: “Mi barava hapi tumas for duim will bilong iu, O God bilong mi, and law bilong iu hem stap insaed long mi.” (Psalm 40:8) David kasem hapi from wei for duim will bilong God. Why nao olsem? Bikos law bilong Jehovah hem insaed long heart bilong David. David hem barava sure long wanem wei for wakabaot followim.

²² Taem law bilong God hem stap deep insaed long iumi, iumi sure long wanem wei for wakabaot followim. Iumi kasem hapi from wei for duim will bilong God. Tru nao, iumi mas ‘barava trae hard’ taem iumi servem Jehovah witim full heart.—Luke 13:24.

[Olketa Footnote]

Waswe, Iu Remember?

• Hao nao iumi savve testim sapos iumi biliv yet?

• Wanem nao insaed long wei for showimaot wanem kaen man nao iumi?

• Hao nao iumi savve showimaot iumi mature Christian?

• Hao nao olketa samting wea iumi duim for showimaot faith hem helpem iumi for lukluk long wanem kaen man nao iumi?

[Piksa long page 23]

Waswe, iu savve wanem nao main wei for testim sapos iu biliv yet?

[Piksa long page 24]

Iumi showimaot iumi mature Christian taem iumi iusim fasin bilong iumi for luksavve

[Olketa Piksa long page 25]

Iumi showimaot wanem kaen man nao iumi taem iumi “followim datfala word, and no herem nomoa”