Standard Bilong Hu Nao Iu Savve Trustim?
Wanfala wea visitim Africa for firstaem interest tumas for lukim wanfala man wea standap barava stret long saed road. Hem lukim hao klosap evri minute, man hia pullim leg bilong hem lelebet go long wansaed taem hem go ahed for standap barava stret. Bihaen nao visitor hia just savve why nao man hia muv olsem. Hem trae for no lusim shadow bilong wanfala post. Disfala shadow muv slow taem aftanun sun change position.
OLSEM datfala shadow bilong sun, living and standard bilong man evritaem go ahed for change. Long wei wea difren, Jehovah God, “Dadi bilong olketa laet long heven,” hem no savve change. Disaepol James raet: “Hem no savve change olsem shadow.” (James 1:17) Hebrew profet Malachi raetem disfala toktok bilong God seleva: “Mi nao Jehovah; mi nating change.” (Malachi 3:6) Long nation bilong Israel long taem bilong Isaiah, God hem sei: “Taem man kamap olo mi nao sem Wan; and mi bae lukaotem man wea garem gray hair. Miseleva bae duim samting.” (Isaiah 46:4) Dastawe, taem nating savve changem trust wea iumi savve garem long olketa promis bilong Olmaeti.
Wanfala Leson From Law
Long sem wei wea olketa promis bilong Jehovah no savve change and man fit for trustim, hem olsem tu for olketa standard bilong hem long wanem hem stret and rong. Waswe, bae iu trustim wanfala bisnisman wea iusim tufala difren scale, wea wanfala hem no stret? Barava nomoa nao. Olsem tu, “Jehovah barava heitim scale wea raverave, bat wanfala scale wea stret mekem hem hapi.” (Proverbs 11:1; 20:10) Long Law wea hem givim long olketa Israelite, Jehovah givim tu disfala komand: “Iu mas no brekem justice long wei for judge, wei for measurem hevi or measurem olketa wata. Iu mas garem olketa stretfala scale, stretfala samting for markem hevi, stretfala ephah and stretfala hin. Mi nao Jehovah God bilong iufala, wea tekem iufala kamaot from land bilong Egypt.”—Leviticus 19:35, 36.
From olketa Israelite obeyim datfala komand, God hapi long olketa and olketa kasem planti material samting. Olsem tu, wei for followim olketa standard bilong Jehovah wea no savve change, no just long hevi and wei for measure bat long evri saed long living, bae bringim blessing for worshiper wea trust long hem. God talemaot: “Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem.”—Isaiah 48:17.
Why Olketa Standard Distaem Gogo Daon?
Bible showimaot why nao olketa standard distaem gogo daon. Lastfala buk bilong Bible, Revelation, storyim war long heven, and samting wea kamaot from diswan affectim evri man kam kasem tuday. Aposol John hem raet: “War hem start long heven: Michael and olketa angel bilong hem faet againstim dragon, and dragon and olketa angel bilong hem faet bat olketa no win, and no moa eni ples stap for olketa long heven. So, olketa torowem go daon datfala bigfala dragon, datfala firstfala snek, datwan wea olketa kolem Devil and Satan, wea hem giamanim olketa man long earth; olketa torowem hem kamdaon long earth, and olketa torowem olketa angel bilong hem go daon witim hem.”—Revelation 12:7-9.
Wanem nao stretawe kamaot from disfala war? John go ahed for sei: “Dastawe iufala hapi, iufala heven and iufala wea stap long there! Trabol for earth and for sea, bikos Devil hem kamdaon finis long iufala, and hem kros tumas, from hem savve hem garem shortfala taem nomoa.”—Revelation 12:12.
“Trabol for earth” kamap taem World War I hem start long 1914 and hem endim wanfala sekson bilong taem wea olketa standard barava difren from olketa standard distaem. “Datfala Great War bilong 1914-18 stap olsem wanfala spialaen wea separatem datfala taem from taem bilong iumi,” woman for raetem history, Barbara Tuchman, hem sei. “Wei for killim dae staka pipol wea fit for duim planti samting bihaen, distroem olketa biliv, changem olketa idea, and mekem garekil wea no heal long wei for spoelem hope, hem mekem pipol wea stap bihaen long war barava difren saed long tingting and physical wei from olketa wea stap bifor long war.” Narawan for raetem history, Eric Hobsbawm, hem agree: “Bihaen 1914, standard wea pipol tingim olsem wei bilong olketa rich kantri hem barava gogo daon . . . Hem no isi for minim hao big nao disfala nogud wei for go bak long samting wea olketa laen dadi bilong iumi long mek-naentin century bae kolem olketa standard bilong heathen wei bilong bifor.”
Long buk bilong hem Humanity—A Moral History of the Twentieth Century, Jonathan Glover sei: “Wanfala mark bilong taem bilong iumi hem wei wea law saed long fasin hem gogo for finis.” Nomata hem daotem law wea no kam from man saed long fasin bikos long wei wea religion gogo for lus long olketa big kantri, hem givim warning: “Olketa long iumi wea no biliv long olketa law saed long fasin wea religion teachim shud still wari long wei wea hem gogo for lus.”
Wei for brekem trust distaem—nomata long bisnis, politik, or religion or nomata insaed wei for fren midolwan pipol and famili—and barava nogud samting wea kamaot from diswan hem from Devil givim trabol long evri pipol long earth. Satan garem goal for faetem war bilong hem go kasem end and for distroem witim hem olketa wea laek for live followim standard bilong God.—Revelation 12:17.
Waswe, eni wei stap, wanfala ansa for bigfala wei for spoelem trust? Aposol Peter ansa olsem: “Iumi weitim niu heven and niu earth olsem [God] promisim, wea raeteous fasin bae stap.” (2 Peter 3:13) Iumi savve trustim disfala promis bikos God no just garem paoa for fulfillim olketa promis bilong hem, bat hem pruvim tu wei wea hem bae fulfill. Abaotem ‘toktok wea go aot from mouth bilong hem,’ Jehovah hem sei: “Hem bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.” Hem wanfala promis wea iumi barava fit for trustim!—Isaiah 55:11; Revelation 21:4, 5.
Live Followim Standard Bilong God
Long world wea standard hem olabaot and gogo daon, Olketa Jehovah’s Witness trae hard for live followim olketa standard saed long fasin wea Bible talem. From diswan, olketa difren from big sekson bilong pipol, and diswan planti taem kasem interest—and nogud toktok—bilong pipol.
Long wanfala convention bilong Olketa Jehovah’s Witness long London, wanfala TV niusman askem wanfala brata sapos Olketa Jehovah’s Witness olketa really Christian. Hem ansa: “Yes, barava nao bikos Jesus hem example bilong mifala. Selfish fasin hem big long world, and mifala tinghevi long Jesus Christ olsem wei, truth, and laef. Mifala biliv hem Son bilong God, no part bilong wanfala Trinity, so wei wea mifala minim Bible hem difren from olketa nara religion.”
Taem olketa showim datfala interview long BBC television, datfala niusman finisim disfala program taem hem sei: “Mi lanem staka moa samting abaotem why Olketa Jehovah’s Witness kam noknok long door bilong iumi. And mi no ting mi bin lukim 25,000 pipol wea werem gud kaleko and wea barava showim gud fasin long wan ples long semtaem.” Barava naesfala praise from wanfala wea lukluk long wisdom bilong wei for followim olketa standard bilong God wea no savve change!
Nomata idea for live followim standard bilong difren man mekem samfala for les, mifala encouragem iu for luk insaed Bible bilong iu and lanem wanem nao olketa standard bilong God. Bat no just kasem main savve nomoa. Followim kaonsel bilong aposol Paul: “Finis for followim disfala system, bat kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.” (Romans 12:2) Visitim Kingdom Hall long area bilong iu, and trae for savve long olketa Witness long there. Iu bae faendaot hao olketa olsem iu nomoa wea putim trust bilong olketa long olketa promis bilong Bible and wea showimaot trust bilong olketa long God thru long wei wea olketa trae for live followim olketa standard bilong hem.
Wei for followim olketa standard bilong God wea no savve change and wea man fit for trustim bae sure for givim blessing long iu. Acceptim invitation bilong God: “O sapos iufala barava obeyim olketa komandment bilong mi! Then peace bilong iufala bae kamap olsem wanfala river, and raeteous fasin bilong iufala olsem olketa wave long sea.”—Isaiah 48:18.
[Olketa Piksa long page 5]
Distaem, wei for spoelem trust kamap long bisnis, politik, religion, and wei for fren insaed famili