Ting Stret—Act Long Wise Wei
TINGIM disfala samting: Jesus Christ hem go ahed for explainim hao olketa enemy bilong hem long Jerusalem bae kosim bigfala pain long hem and killim hem dae. Klos fren bilong hem aposol Peter hard for bilivim diswan. Tru nao, hem tok strong long Jesus. Hem klia hao Peter wari abaotem Jesus. Bat wanem nao Jesus luksavve abaotem tingting bilong Peter? “Go bihaen long mi, Satan!” Jesus sei. “Iu trae for mekem mi stambol, bikos tingting bilong iu no olsem tingting bilong God, bat olsem olketa man.”—Matthew 16:21-23.
Datwan mas barava mekem Peter seke! Winim wei for givim help and saport, hem kamap samting wea savve mekem Masta bilong hem “stambol.” Hao nao diswan happen? Peter maet foldaon insaed trap bilong wanfala rong tingting wea planti pipol foldaon insaed—wei for bilivim nomoa samting wea hem want for bilivim.
No Ova Tumas for Trustim Seleva
Wanfala samting wea mekem iumi no ting stret hem wei for ova tumas for trustim seleva. Aposol Paul warnim olketa Christian fren bilong hem long Corinth bifor: “Man wea tingse hem standap mas luk aot nogud hem foldaon.” (1 Corinthians 10:12) Why nao Paul talem diswan? Bikos luk olsem hem savve hao hem isi for tingting bilong man no stret—nomata mind bilong olketa Christian tu savve “lusim stretfala and klinfala fasin wea fitim Christ.”—2 Corinthians 11:3.
Diswan happen long wanfala full genereson bilong olketa laen dadi bilong Paul. Long datfala taem, Jehovah talem olketa: “Olketa tingting bilong iufala olketa no tingting bilong mi, and olketa wei bilong mi olketa no wei bilong iufala.” (Isaiah 55:8) Olketa kamap “wise long eye bilong olketa seleva,” and trabol nao kamap from diswan. (Isaiah 5:21) Dastawe, hem wise for lukluk gud long hao iumi savve keepim tingting bilong iumi stret and missim kaen trabol olsem.
Luk Aot Long Wei for Tingting Long Physical Samting
Wei for tingting long physical samting barava affectim samfala long Corinth. (1 Corinthians 3:1-3) Olketa mekhae tumas long olketa idea bilong man winim Word bilong God. Hem tru olketa savveman long datfala taem barava kleva. Bat long eye bilong God, olketa krangge nomoa. Paul hem sei: “Olketa raetem finis: ‘Mi bae mekem wisdom bilong olketa wise man finis, and savve bilong olketa savveman mi bae torowem.’ Wea nao wisefala man? Wea nao scribe? Wea nao savveman bilong disfala system? Waswe, God no mekem wisdom bilong disfala world olsem krangge samting?” (1 Corinthians 1:19, 20) Olketa savveman followim “spirit bilong world” no spirit bilong God. (1 Corinthians 2:12) Olketa tingting and idea bilong olketa no fitim tingting bilong Jehovah.
Wei for tingting long physical samting hem start kam from Devil Satan, wea iusim datfala snek for switim Eve. (Genesis 3:1-6; 2 Corinthians 11:3) Waswe, hem still wanfala danger for iumi? Yes! Olsem Word bilong God talem, Satan “hem blindim mind” bilong pipol long bigfala wei gogo “hem giamanim olketa man long earth.” (2 Corinthians 4:4; Revelation 12:9) Hem barava important for luksavve long olketa trik bilong hem!—2 Corinthians 2:11.
Luk Aot Long “Giaman Wei Bilong Man”
Aposol Paul givim warning tu againstim “giaman wei bilong man.” (Ephesians 4:14) Hem feisim olketa “pipol for giamanim narawan” wea sei olketa talem truth bat wea barava twistim. (2 Corinthians 11:12-15) For kasem goal bilong olketa, olketa man olsem iusim nomoa olketa pruv wea saportim tingting bilong olketa, toktok for muvim feeling, toktok wea haf-tru, toktok wea no garem kliafala mining, and wei for laea.
Planti taem olketa wea talem samting witim goal for mekem pipol garem rong tingting iusim word olsem “sect” for daonem pipol. Long wanfala tok for advaesem Parliament Assembly for the Council of Europe, olketa talem long olketa bigman wea lukluk long olketa niu religion hao “hem moabeta for no iusim disfala word.” Why? Bikos olketa tingse disfala word “cult” savve mekem pipol tingim nogud samting. Long sem wei, olketa Greek savveman accusim aposol Paul long rongfala wei and sei hem wanfala “man for tok olabaot.” Olketa iusim disfala toktok for mekem pipol tingse hem wanfala man for toktok olabaot, samwan wea talem moa planti smol information wea hem herem olabaot. Bat, Paul “hem talemaot gud nius abaotem Jesus and datfala resurrection.”—Acts 17:18; footnote.
Waswe, olketa teknik bilong olketa wea laek for mekem pipol for garem rong tingting hem waka? Yes. Diswan nao main samting wea kosim heit midolwan olketa difren tribe and religion from hem mekem pipol garem rong tingting abaotem olketa difren kantri or religion. Planti iusim diswan for daonem olketa smol grup wea pipol long community no laekem. Adolf Hitler win for iusim wei olsem taem hem kolem olketa Jew and olketa nara grup olsem “pipol wea low tumas,” “nogud,” and wanfala “danger” long gavman. No letem diskaen kleva trik bilong pipol for spoelem tingting bilong iu.—Acts 28:19-22.
No Giamanim Iuseleva
Hem isi tu for giamanim iumiseleva. Tru nao, maet hem hard tumas for aotem or daotem biliv wea iumi ting strong long hem. Why nao olsem? Bikos feeling hem join witim tingting bilong iumi. Then iumi savve giamanim iumiseleva taem iumi trae for tingim eni reason for bilivim olketa biliv wea no tru.
Diswan happen long samfala first-century Christian. Olketa savve long Word bilong God, bat olketa no letem diswan for bossim tingting bilong olketa. Gogo olketa “giamanim [olketa seleva] witim giaman tingting.” (James 1:22, 26) Wanfala samting wea showimaot hao iumi maet foldaon long diskaen wei for giamanim seleva hem sapos iumi kros taem pipol challengem olketa biliv bilong iumi. Winim wei for kros, hem wise for willing for lisin gud long samting wea nara pipol bae talem—nomata iumi feel sure dat tingting bilong iumi hem stret.—Proverbs 18:17.
Dig for “Barava Savve Bilong God”
Wanem nao iumi savve duim for keepim tingting bilong iumi stret? Staka help stap, bat iumi mas willing for waka hard for hem. Wise King Solomon sei: “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; and tu, sapos iu singaot for minim samting and ask for fasin for luksavve, sapos iu go ahed for luk aotem olsem silver, and olsem riches wea haed iu go ahed for luk aotem, then iu bae minim wei for fraet long Jehovah, and iu bae faendem barava savve bilong God.” (Proverbs 2:1-5) Tru nao, sapos iumi waka hard for fulimap mind and heart bilong iumi witim truth bilong Word bilong God, iumi bae kasem really wisdom, savve, and fasin for luksavve. Long datfala wei, iumi digdig for olketa samting wea garem barava hae price wea winim eni nara treasure.—Proverbs 3:13-15.
Wisdom and savve hem barava important samting long wei for ting stret. Word bilong God hem sei: “Taem wisdom go insaed long heart bilong iu and soul bilong iu barava laekem savve, wei for tingting gud bae gardim iu, fasin for luksavve bae protectim iu, sevem iu from nogud wei, from man wea tok abaotem rabis samting, from olketa wea lusim road bilong raeteous fasin and wakabaot long olketa wei bilong darkness.”—Proverbs 2:10-13.
Hem barava important for letem tingting bilong God for leadim tingting bilong iumi long olketa taem bilong hevi or danger. Olketa strongfala feeling olsem wei for kros or fraet savve mekem man hard for ting stret. Solomon hem sei: “Hardfala living savve mekem wise wan duim krangge samting.” (Ecclesiastes 7:7) Nomata wei for “kros long Jehovah” tu savve kamap. (Proverbs 19:3) Hao nao olsem? Long wei for blamem God for olketa problem bilong iumi and iusim olketa olsem excuse for duim samting wea no fitim olketa law and principle bilong hem. Winim wei for tingse iumi savve long best samting, iumi shud hambol for lisin long olketa wea wise and wea givim kaonsel from Bible from olketa want for helpem iumi. And sapos fitim, iumi shud willing for lusim olketa strongfala tingting bilong iumi sapos hem klia hao olketa rong.—Proverbs 1:1-5; 15:22.
“Go Ahed for Askem God”
Iumi stap long olketa taem wea danger tumas and mekem man konfius. For iumi wise and garem gudfala tingting, hem barava important for prea evritaem long Jehovah for direction bilong hem. Paul raet olsem: “No wari long eni samting, bat long evri samting thru long prea and wei for barava askem witim wei for sei thankiu, talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Sapos iumi short long wisdom long hao for deal witim olketa hard problem or test, iumi need for “go ahed for askem God, from hem givim planti samting long evriwan long wei wea no mekem man feel shame.”—James 1:5-8.
From hem luksavve hao olketa Christian brata bilong hem need for showimaot wisdom, aposol Peter trae hard for ‘wekapem kliafala tingting bilong olketa.’ Hem wantem olketa for “rememberim toktok wea olketa holy profet talem bifor and komandment bilong Lord and Man wea Sevem Pipol” Jesus Christ. (2 Peter 3:1, 2) Sapos iumi duim diswan and keepim tingting bilong iumi followim Word bilong Jehovah, iumi bae ting stret and act long wise wei.
[Olketa Piksa long page 21]
Olketa Christian bifor letem wisdom bilong God, no tingting bilong man, for sheipim tingting bilong olketa
[Olketa Credit Line]
Philosophers left to right: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini
[Olketa Piksa long page 23]
Prea and wei for studyim Word bilong God hem barava important