Putim Bridle Long Horse and Long Tongue

Wise king Solomon long Israel bifor hem sei: “Horse hem samting wea redi for day bilong faet.” (Proverbs 21:31) Insaed long history, olketa soldia wea raedem horse duim bigfala part for win long faet. From taem bifor kam, olketa army iusim bridle for kontrolem strong bilong horse and wei wea hem laek followim mind bilong hemseleva.

Olsem Encyclopædia Britannica talem, bridle “hem olketa kaen rope wea holem datfala bit (pis metal) long mouth bilong animal mekem man savve kontrolem hem witim olketa rein (rope wea hem pullim).” Olketa bridle long taem bifor klosap semsem witim olketa bridle distaem, and olketa barava mekem man savve kontrolem and raedem olketa horse.

Dadi bilong Solomon, King David, tingim wei wea datfala bridle hem important tumas taem hem sei: “No mekem iuseleva olsem wanfala horse or mule wea no garem fasin for minim samting, wea needim wanfala bridle or halter for kontrolem hem.” (Psalm 32:9) Bihaen man win for mekem wanfala horse obey, animal hia savve kamap wanfala fren wea faithful. Wei wea Alexander the Great barava lovem tumas horse bilong hem Bucephalus showaot taem hem nemem wanfala taon long India followim datfala horse.

Nomata olketa man win for mekem horse obey for planti thousand year finis, for kontrolem fasin bilong iumiseleva hem moa hard from iumi no perfect. Christian disaepol James talem hao “iumi evriwan foldaon staka taem. Sapos eniwan hem no foldaon long toktok, hem wanfala perfect man, wea fit for kontrolem tu full body bilong hem.” (James 3:2) Tru nao, no eniwan long iumi savve sei hem nating tok spoelem samwan or tok kros enitaem!

So sapos ‘no eniwan savve kontrolem evribit’ tongue bilong hem, why nao iumi shud barava trae hard for kontrolem datwan? (James 3:8) Tingim diswan, pipol willing for waka hard and iusim staka taem for teachim horse for obey bikos olketa savve iusim animal hia for duim planti gudfala samting. Olsem tu, sapos iumi trainim tongue bilong iumi, wea minim for kontrolem tongue bilong iumi, iumi savve iusim for duim olketa gud samting.

Olketa kaenfala toktok savve comfortim and encouragem olketa fren, wakfren, and relative. (Proverbs 12:18) Olketa toktok olsem savve mekem pipol wea stap witim iumi hapi. Bat tongue wea man no savve kontrolem bae mekem trabol kamap. Bible givim disfala warning: “Go ahed for gardim . . . tongue bilong iu and iu bae missim trabol.” (Proverbs 21:23, The New English Bible) Taem iumi trae for kontrolem tongue bilong iumi, iumi helpem iumiseleva and olketa wea lisin long iumi.a

[Footnote]

[Piksa long page 31]

Alexander the Great

[Credit Line]

Alinari/Art Resource, NY