Trust Long Jehovah Evribit Long Taem Bilong Trabol
“For iumi, God hem wanfala ples for haed and kasem strong, wanfala help wea isi for faendem long taem bilong trabol.”—PSALM 46:1.
1, 2. (a) Wanem nao example wea showimaot hao hem no inaf for iumi sei iumi trust long God? (b) Why nao iumi mas duim moa samting winim wei for sei iumi trust long Jehovah?
HEM moa isi for sei iumi trust long God winim wei for showimaot datfala trust thru long samting iumi duim. Olsem example, for longfala taem datfala toktok “Iumi Trust Long God” hem stap long selen bilong United States.a Long 1956, U.S. Congress mekem law wea sei datfala toktok hem theme bilong United States. Bat, planti pipol—no long datfala kantri nomoa bat evriwea long world—trust long selen and olketa material samting winim wei for trust long God.—Luke 12:16-21.
2 From iumi olketa tru Christian, iumi mas no just sei iumi trust long Jehovah. Long sem wei wea “faith wea no garem waka hem dae finis,” sapos iumi sei iumi trust long God bat no showimaot datwan thru long samting iumi duim, hem iusles. (James 2:26) Long firstfala article, iumi lanem hao iumi showimaot iumi trust long Jehovah taem iumi prea long hem, luk aotem direction thru long Word bilong hem, and luk long organization bilong hem for leadim iumi. Distaem, iumi lukluk hao nao iumi savve duim thrifala samting hia long taem bilong trabol.
Taem Iumi Lusim Waka or Wages hem Smol
3. Wanem nao olketa hevi saed long selen wea olketa servant bilong Jehovah feisim long disfala “nogud taem,” and hao nao iumi savve God hem willing for helpem iumi?
3 Long olketa “nogud taem” distaem, iumi olketa Christian feisim olketa sem hevi saed long selen olsem nara pipol. (2 Timothy 3:1) Dastawe, maet iumi seknomoa lusim waka for selen. Or maet iumi mas waka for planti hour for kasem smolfala wages nomoa. Taem samting olsem hem happen, maet iumi faendem hem hard for ‘provaed for olketa wea bilong iumi.’ (1 Timothy 5:8) Waswe, Most Hae God hem willing for helpem iumi long taem olsem? Barava nao! Hem tru, Jehovah no protectim iumi from evri hard samting wea kamap long laef long disfala system. Bat, sapos iumi trust long hem, toktok bilong Psalm 46:1 bae kamap tru for iumi: “For iumi, God hem wanfala ples for haed and kasem strong, wanfala help wea isi for faendem long taem bilong trabol.” Bat, hao nao iumi savve showimaot iumi trust long Jehovah evribit taem iumi kasem hevi saed long selen?
4. Taem iumi feisim olketa problem saed long selen, iumi savve prea for wanem samting, and hao nao Jehovah ansarem olketa prea olsem?
4 Wanfala wei for showimaot iumi trust long Jehovah hem for prea long hem. Bat iumi savve prea for wanem samting? From iumi garem problem saed long selen, winim enitaem bifor maet iumi needim wisdom wea helpem man. So, barava prea for datfala wisdom! Word bilong Jehovah promisim iumi: “Sapos eniwan long iufala hem no garem wisdom, hem shud go ahed for askem God, from hem givim planti samting long evriwan long wei wea no mekem man feel shame; and God bae givim long hem.” (James 1:5) So, askem Jehovah for wisdom—wea hem nao wei for iusim savve, wei for minim samting, and fasin for luksavve long gudfala wei—for mekem olketa wise and stretfala disison. Loving Father bilong iumi long heven hem promis for lisin long olketa prea olsem. Hem evritaem willing for stretem gogo bilong olketa wea trust long hem witim full heart.—Psalm 65:2; Proverbs 3:5, 6.
5, 6. (a) Why nao hem fitim for iumi luk long Word bilong God for kasem help for deal witim olketa hevi saed long selen? (b) Wanem nao iumi savve duim for daonem wari sapos iumi lusim waka bilong iumi?
5 Nara wei for showimaot iumi trust long Jehovah hem for lukluk long Word bilong God for leadim iumi. Wise kaonsel insaed Bible hem samting wea “man barava fit for trustim.” (Psalm 93:5) Nomata olketa raetem Bible finis winim 1,900 year bifor, datfala buk from God garem advaes wea iumi savve depend long hem and wisdom wea savve helpem iumi for deal witim olketa hevi saed long selen. Lukluk long samfala example bilong wisdom bilong Bible.
6 Longfala taem bifor, wisefala King Solomon hem sei: “Swit tumas nao sleep bilong man wea serve, nomata sapos hem kaikai lelebet or staka; bat planti samting bilong rich man no letem hem for sleep.” (Ecclesiastes 5:12) Iumi needim taem and selen for fixim, klinim, keepim gud, and protectim olketa material samting bilong iumi. So, sapos iumi lusim waka bilong iumi, maet iumi iusim datfala taem olsem chance for lukluk gud long living bilong iumi and trae for luksavve long wanem iumi really needim and samting wea iumi no needim. For daonem wari, maet hem wise for iumi changem samfala samting. Olsem example, waswe, iumi savve mekem laef bilong iumi moa simpol, maet long wei for muv go long haos wea moa smol or no keepim samfala samting wea iumi no needim?—Matthew 6:22.
7, 8. (a) Hao nao Jesus showaot hem luksavve hao hem wei bilong olketa man wea no perfect for wari tumas abaotem olketa material samting? (Lukim footnote tu.) (b) Wanem nao wisefala advaes bilong Jesus abaotem hao for stap klia long wei for wari tumas?
7 Long datfala Sermon Long Maunten, Jesus givim disfala kaonsel: “No go ahed for wari abaotem soul bilong iufala long wanem iufala bae kaikaim or wanem iufala bae drinkim, or abaotem body bilong iufala saed long wanem iufala bae werem.”b (Matthew 6:25) Jesus savve hao hem wei bilong olketa man wea no perfect for wari abaotem need bilong olketa. Nomata olsem, hao nao iumi savve “no go ahed for wari” abaotem kaen samting olsem? Jesus sei: “Go ahed for luk aotem firstaem kingdom.” Nomata wanem problem iumi feisim, iumi mas go ahed for putim worship bilong Jehovah firstaem long laef bilong iumi. Sapos iumi duim olsem, ‘bae iumi kasem’ olketa need bilong iumi from Father bilong iumi long heven. Jehovah bae openem wei for iumi kasem wanem iumi needim.—Matthew 6:33.
8 Jesus talem tu disfala advaes: “No wari abaotem next day, from next day bae garem wari bilong hemseleva.” (Matthew 6:34) Hem no wise for wari tumas abaotem samting wea maet happen tumoro. Wanfala Bible savveman hem sei: “Planti taem, nogud samting wea iumi tingse bae happen and wea mekem iumi wari, hem nating kamap olsem.” Taem iumi hambol for followim advaes bilong Bible for putim olketa samting wea important firstaem long laef bilong iumi and for feisim each day nomoa, datwan savve help for daonem wari.—1 Peter 5:6, 7.
9. Taem iumi feisim olketa hevi saed long selen, wanem nao help wea iumi savve faendem insaed olketa pablikeson bilong “faithful and wise slave”?
9 Taem iumi feisim olketa hevi saed long selen, iumi savve showimaot iumi trust long Jehovah tu taem iumi lukluk for help insaed olketa pablikeson bilong “faithful and wise slave.” (Matthew 24:45) Planti taem, Awake! magasin garem olketa article wea garem gudfala advaes and idea abaotem hao for deal witim problem saed long selen. Datfala article “Out of a Job—What Are the Solutions?” long magasin bilong August 8, 1991, talem eitfala gudfala point for followim wea helpem planti for balance saed long selen and feeling taem olketa no garem waka.c Hem tru, iumi mas balancem olketa point hia witim stretfala tingting abaotem selen. Datfala article “Something More Vital Than Money,” long sem magasin storyim datwan.—Ecclesiastes 7:12.
Taem Iumi Garem Problem Saed Long Health
10. Hao nao example bilong King David showimaot hem fitim for iumi trust long Jehovah taem iumi garem bigfala sik?
10 Waswe, hem fitim for iumi trust long Jehovah taem iumi garem bigfala sik? Barava nao! Jehovah tingim feeling bilong pipol bilong hem wea sik. Winim datwan, hem willing for helpem olketa. Olsem example, tingim King David. Maet hemseleva garem bigfala sik taem hem raet abaotem wei wea God deal witim raeteous man wea sik. Hem sei: “Jehovah nao bae strongim hem taem hem sik long bed, bae iu changem kava bilong hem taem hem sik.” (Psalm 41:1, 3, 7, 8) Trust bilong David long God hem strong, and gogo sik bilong datfala king hem finis. Bat, hao nao iumi savve showimaot iumi trust long God taem iumi safa long olketa health problem?
11. Taem iumi kasem bigfala sik, wanem nao iumi savve askem Father bilong iumi long heven?
11 Taem iumi kasem bigfala sik, wanfala wei for showimaot iumi trust long Jehovah hem for barava askem hem long prea for helpem iumi go ahed strong. Iumi savve askem hem for helpem iumi for iusim “wisdom wea helpem man” mekem iumi duim wanem iumi fit for duim for savve daonem datfala sik or finisim. (Proverbs 3:21) Iumi savve askem hem tu for helpem iumi garem patient fasin and fasin for stand strong for deal witim datfala sik. Winim evri samting, iumi laek askem Jehovah for saportim iumi, strongim iumi for go ahed faithful long hem and no lusim gudfala tingting, nomata wanem samting maet happen. (Philippians 4:13) For keepim faithful fasin long God hem moa important winim wei for sevem laef bilong iumi distaem. Sapos iumi go ahed faithful, Nambawan Man for Givim Reward bae givim iumi perfect laef and health for olowe.—Hebrews 11:6.
12. Olketa wanem Bible principle savve helpem iumi for mekem olketa wise disison saed long medical treatment?
12 Trust bilong iumi long Jehovah muvim iumi tu for lukluk long Word bilong hem, Bible, for leadim iumi. Olketa Bible principle savve helpem iumi for mekem olketa wise disison saed long medical treatment. Olsem example, from iumi savve Bible tambuim “spiritism,” iumi bae stap klia long eni medical treatment wea join witim spiritism. (Galatians 5:19-21; Deuteronomy 18:10-12) Nara example bilong wisdom bilong Bible wea iumi savve trustim hem olsem: “Eniwan wea no garem savve hem bilivim evri toktok, bat man wea wise hem ting raonem wanem hem duim.” (Proverbs 14:15) Dastawe, taem iumi disaedem samting saed long medical treatment, hem wise for iumi luk aotem information wea iumi savve trustim winim wei for “bilivim evri toktok.” “Stretfala tingting” olsem savve helpem iumi for ting raonem long careful wei best samting for duim and then disaed followim datwan.—Titus 2:12.
13, 14. (a) Wanem nao samfala article wea garem planti information saed long health wea olketa pablisim insaed olketa Watchtower and Awake! magasin? (Lukim box long page 17.) (b) Wanem nao advaes wea stap long Awake! magasin bilong January 22, 2001 abaotem olketa sik wea no savve finis kwiktaem?
13 Iumi savve showimaot iumi trust long Jehovah tu taem iumi luk aotem information insaed olketa pablikeson wea faithful slave provaedem. Samfala taem olketa Wastaoa and Wekap! magasin pablisim olketa article wea garem planti information abaotem olketa difren kaen sik and problem saed long health.d Samfala taem, olketa magasin hia talem story bilong samfala wea win for deal witim problem saed long body, olketa difren kaen sik and wei for disable. And tu, samfala article talem olketa idea from Bible and gudfala advaes long hao for deal witim olketa problem saed long health wea no savve finis kwiktaem.
14 Olsem example, Awake! magasin bilong January 22, 2001, storyim datfala subject “Comfort for the Sick.” Olketa article hia storyim olketa Bible principle wea savve helpem man, and tu, information from olketa interview witim pipol wea deal witim nogud sik for planti year finis and savve gud long datwan. Datfala article “Living Successfully With Your Ailment—How?” talem disfala advaes: Lanem evri samting iu fit for lanem abaotem sik bilong iu. (Proverbs 24:5) Markem olketa goal wea fitim, and tu olketa goal for helpem narafala pipol, bat luksavve hao maet iu no fit for kasem sem goal olsem nara man. (Acts 20:35; Galatians 6:4) No stap seleva. (Proverbs 18:1) Taem pipol visitim iu, mekem datwan wanfala hapi taem for olketa. (Proverbs 17:22) Winim evri samting, keepim klos wei for fren witim Jehovah and kongregeson. (Nahum 1:7; Romans 1:11, 12) Iumi barava thankiu for direction wea iumi savve trustim wea Jehovah provaedem thru long organization bilong hem.
Taem Wanfala Wik Point Long Body hem Go Ahed
15. Hao nao aposol Paul winim stragol bilong hem againstim olketa wik point long body wea no perfect, and iumi savve feel sure long wanem samting?
15 Aposol Paul hem raet: “Insaed long body bilong mi, no eni gud samting hem stap.” (Romans 7:18) Paul savve from samting wea hemseleva experiencem hao hem no isi for barava stragol againstim olketa wik point and samting wea body wea no perfect laekem. Nomata olsem, Paul feel sure tu hao hem savve win. (1 Corinthians 9:26, 27) Hao nao hem savve duim? Long wei for trust evribit long Jehovah. Dastawe Paul savve sei: “Mi wanfala iusles man nomoa! Hu nao bae sevem mi from disfala body wea bae dae? Thankiu long God thru long Jesus Christ Lord bilong iumi!” (Romans 7:24, 25) Waswe iumi? Iumi tu stragol witim olketa wik point long body. Taem iumi duim olsem, hem isi for wikdaon and start for tingse iumi hard for win. Bat sapos iumi followim example bilong Paul and barava depend long Jehovah and no long strong bilong iumiseleva, bae Hem helpem iumi.
16. Taem wanfala wik point long body hem go ahed, iumi need for prea for wanem samting, and wanem nao iumi shud duim sapos iumi foldaon moa long datwan?
16 Taem wanfala wik point long body hem go ahed, iumi savve showimaot iumi trust long Jehovah taem iumi prea strong long hem. Iumi need for askem, begim Jehovah for help bilong holy spirit bilong hem. (Luke 11:9-13) Iumi savve barava ask for fasin for bossim seleva, wea hem wanfala part bilong frut bilong spirit bilong God. (Galatians 5:22, 23) Wanem nao iumi shud duim sapos iumi foldaon moa long wanfala wik point? Iumi mas no givap. Iumi mas no taed for prea long hambol wei long God bilong iumi wea showimaot mercy and askem hem for forgivim and helpem iumi. Jehovah bae nating rejectim heart wea “brek and pisis” from guilty conscience. (Psalm 51:17) Sapos iumi prea long hem witim heart wea honest, feel sorre and repent, Jehovah bae helpem iumi for againstim temptation.—Philippians 4:6, 7.
17. (a) Why nao hem savve helpem iumi for ting raonem feeling bilong Jehovah abaotem wik point wea iumi stragol witim? (b) Wanem nao olketa scripture wea iumi savve baeheartim sapos iumi stragol witim wei for kros kwiktaem? for kontrolem tongue bilong iumi? for againstim feeling for laekem nogud hapitaem?
17 Iumi savve showimaot iumi trust long Jehovah tu taem iumi lukluk long Word bilong hem for help. Iumi savve iusim Bible concordance or Watch Tower Publications Index for luk aotem ansa for datfala kwestin, ‘Hao nao Jehovah hem feel abaotem datfala wik point wea mi stragol witim?’ Wei for ting raonem feeling bilong Jehovah abaotem datfala samting savve strongim feeling bilong iumi for laek mekem hem hapi. Long wei olsem, iumi savve start for garem sem feeling olsem hem and heitim samting wea hem heitim. (Psalm 97:10) Samfala kasem help long wei for baeheartim olketa Bible scripture wea fitim wik point wea olketa stragol witim. Waswe, iumi stragol for kontrolem wei for kros kwiktaem? Sapos olsem, maet iumi baeheartim olketa scripture olsem Proverbs 14:17 and Ephesians 4:31. Waswe, iumi faendem hard for gardim tongue bilong iumi? Maet iumi baeheartim olketa scripture olsem Proverbs 12:18 and Ephesians 4:29. Waswe, iumi garem feeling for laekem nogud hapitaem? Maet iumi trae for rememberim olketa verse olsem Ephesians 5:3 and Colossians 3:5.
18. Why nao iumi shud no letem feeling for shame mekem iumi hol bak for askem help from olketa elder for winim wik point bilong iumi?
18 Nara wei for showimaot iumi depend long Jehovah hem for luk aotem help from olketa elder long kongregeson wea spirit appointim. (Acts 20:28) Diswan hem fitim bikos Jehovah thru long Christ provaedem “olketa present olsem man” for protectim and lukaftarem olketa sheep bilong hem. (Ephesians 4:7, 8, 11-14) Tru nao, maet hem no isi for askem help for deal witim wanfala wik point. Maet iumi feel shame and tingse olketa elder bae ting nogud long iumi. Bat olketa man hia wea mature long spiritual wei bae respectim iumi for wei wea iumi no fraet for askem help. And tu, olketa elder trae for showimaot fasin bilong Jehovah taem olketa deal witim flock. Maet kaonsel from olketa wea comfortim and helpem man and instruction from Word bilong God barava strongim go moa wei wea iumi disaed strong for winim datfala wik point.—James 5:14-16.
19. (a) Satan trae for iusim iusles laef long disfala world for duim wanem? (b) Wanem nao insaed long trust, and iumi mas disaed strong for duim wanem?
19 No forget, Satan savve hem garem shortfala taem nomoa. (Revelation 12:12) Hem laek for iusim wei wea disfala laef hem iusles for mekem iumi wikdaon and givap. Iumi mas trustim evribit disfala toktok long Romans 8:35-39: “Hu nao bae separatem iumi from love bilong Christ? Waswe, bae trabol or pain or persecution or hangre or wei for naked or danger or sword duim diswan? . . . Long evri samting hia iumi barava win thru long hem wea lovem iumi. From mi barava sure hao nomata dae or laef or angel or gavman or samting wea stap distaem or samting wea bae kamap bihaen or paoa or eni hae samting or eni deep samting or eni nara creation no fit for separatem iumi from love bilong God wea stap insaed long Christ Jesus, Lord bilong iumi.” Toktok hia barava showimaot trust long Jehovah! Bat, kaen trust olsem, hem no wanfala feeling nomoa, bat hem trust wea showaot long olketa disison wea iumi mekem long evriday living bilong iumi bihaen iumi tingting gud raonem samting. So, iumi mas disaed strong for trust long Jehovah evribit long taem bilong trabol.
[Olketa Footnote]
a Long wanfala leta wea Treasury Secretary Salmon P. Chase hem raetem long U.S. Mint, long November 20, 1861, hem sei: “No eni nation savve strong sapos olketa no depend long strong bilong God, or stap sef sapos Hem no defendim olketa. Iumi shud raetem long selen bilong iumi hao pipol bilong iumi trust long God.” From diswan, firstaem for olketa raetem datfala toktok “Iumi Trust Long God” long wanfala U.S. coin, hem long 1864.
b Wari wea iumi storyim hia hem “wei for wari and fraet wea aotem evri hapi from laef bilong man.” Samfala transleison sei “no wari.” Bat datwan minim iumi mas no start for wari. Wanfala buk hem sei: “Greek verb wea disfala toktok hem kam from hem minim for finis for duim samting wea iu duim distaem.”
c Eitfala point hia hem olsem: (1) No fraet; (2) go ahed for tingim gud saed; (3) mas willing for duim difren kaen waka; (4) garem living wea fitim selen wea iu garem—no trae for garem sem living olsem nara pipol; (5) keakea long wei for kaon; (6) keepim wan mind long famili; (7) keepim wei for respectim seleva; and (8) followim wanfala plan long hao for iusim selen.
d Olketa magasin hia no recommendim or mekhae long eni medical treatment bat luksavve hao hem samting wea man seleva mas disaedem. Olketa article storyim olketa sik or problem saed long health for givim trufala information abaotem datwan long disfala taem.
Waswe, Iu Remember?
• Taem iumi feisim olketa problem saed long selen, hao nao iumi savve showimaot iumi trust long Jehovah?
• Hao nao iumi savve showimaot iumi trust long God taem iumi garem olketa problem saed long health wea iumi safa tumas long hem?
• Taem wanfala wik point long body hem go ahed, hao nao iumi savve showimaot iumi barava depend long Jehovah?
[Box long page 17]
Waswe, Iu Rememberim Olketa Article Hia?
Taem iumi safa from olketa problem saed long health, for read abaotem wei wea olketa narawan deal witim olketa problem saed long body, sik, or wei for disable hem encouragem iumi. Long daon hem samfala article wea stap long Watchtower and Awake! magasin.
“Coping With My Weaknesses” storyim wei for deal witim fasin for tingim nogud saed and sorre feeling wea no savve finis.—The Watchtower, May 1, 1990.
“Not Even an Iron Lung Could Stop Her Preaching.”—Awake!, January 22, 1993.
“A Bullet Changed My Life” storyim wei for deal witim wei for paralyze.—Awake!, October 22, 1995.
“Iufala No Savve Wanem Nao Bae Happen Tumoro” storyim hao for deal witim sik bipolar disorder.—Wastaoa, December 1, 2000.
“Loida’s Journey out of Silence” storyim wei for deal witim sik cerebral palsy.—Awake!, May 8, 2000.
“My Struggle With Endometriosis.”—Awake!, July 22, 2000.
“My Fight With Scleroderma.”—Awake!, August 8, 2001.
“I Won My Battle With Postpartum Depression.”—Awake!, July 22, 2002.
[Piksa long page 15]
Sapos iumi lusim waka, maet hem wise for lukluk gud long living bilong iumi
[Piksa long page 16]
Story bilong Loida showim hao wei for trust long Jehovah savve helpem man for go ahed strong. (Lukim box long page 17)
[Piksa long page 18]
Iumi no need for feel shame for askem help for winim olketa wik point