Evritaem Acceptim Discipline wea Jehovah Givim
“No rejectim discipline wea Jehovah givim.”—PROVERBS 3:11.
1. Why nao iumi shud acceptim discipline wea God givim?
KING SOLOMON long Israel bifor hem talem gudfala reason for each wan long iumi acceptim discipline wea God givim. Hem sei olsem: “O son bilong mi, no rejectim discipline wea Jehovah givim, and no heitim strongfala kaonsel from hem, bikos man wea Jehovah lovem hem kaonselem hem, olsem wanfala dadi hem duim long son wea hem hapi long hem.” (Proverbs 3:11, 12) Tru nao, Dadi bilong iu long heven hem givim discipline long iu bikos hem lovem iu.
2. Wanem nao mining bilong “discipline,” and long olketa wanem wei nao man savve kasem discipline?
2 “Discipline” hem minim for givim panis, stretem samting, givim instruction, and education. Aposol Paul hem sei: “Tru nao, taem iumi kasem discipline iumi no hapi and iumi feel sorre; bat bihaen, olketa wea kasem training from diswan bae garem frut bilong peace, wea hem nao raeteous fasin.” (Hebrews 12:11) Wei for acceptim and followim discipline wea God givim savve helpem iu for aftarem raeteous wei wea bae mekem iu fren gud go moa witim datfala holy God, Jehovah. (Psalm 99:5) Maet iumi kasem kaonsel from olketa spiritual brata and sista, from olketa Christian meeting, and from wei for studyim Word bilong God and olketa pablikeson bilong “datfala faithful wakman.” (Luke 12:42-44) Iu savve barava tinghae long eni kaonsel wea helpem iu for savve long samting wea iu need for kamap moabeta long hem! Bat wanem kaen discipline nao man needim sapos hem duim bigfala sin?
Why Samfala Disfellowship
3. Wanem taem nao man savve disfellowship?
3 Olketa servant bilong God studyim Bible and olketa Christian pablikeson. Iumi lane abaotem olketa standard bilong Jehovah long olketa meeting, assembly, and convention. So iumi olketa Christian savve long samting wea Jehovah laekem iumi for duim. Only sapos wanfala member bilong kongregeson hem duim bigfala sin and no repent, then bae hem disfellowship.
4, 5. Wanem example abaotem man wea disfellowship nao Bible storyim, and why nao olketa long kongregeson kasem encouragement for acceptim bak datfala man?
4 Tingim wanfala example insaed Bible abaotem samwan wea disfellowship. Kongregeson long Corinth hem acceptim nomoa ‘fornication wea nomata pipol bilong olketa nation tu bat no duim kaen fornication olsem wea man tekem waef bilong dadi bilong hem.’ Paul encouragem olketa long Corinth for “givim man olsem go long Satan wea distroem body, mekem spirit hem sev.” (1 Corinthians 5:1-5) Taem man hia disfellowship and olketa givim hem go long Satan, hem kamap part bilong world bilong Devil moa. (1 John 5:19) Taem olketa disfellowshipim hem, olketa aotem nogud samting wea savve spoelem kongregeson and protectim “spirit” bilong kongregeson, wea minim fasin and tingting wea followim God.—2 Timothy 4:22; 1 Corinthians 5:11-13.
5 No longtaem bihaen datwan, Paul encouragem olketa Christian long Corinth for acceptim bak datfala man wea duim bigfala sin, wea minim hem reinstate nao long kongregeson. Why nao olsem? Aposol Paul sei diswan hem for “mekem Satan no win ovarem” olketa. Luk olsem datfala man hem repent and stretem bak laef bilong hem. (2 Corinthians 2:8-11) Sapos olketa long Corinth no laek for acceptim bak datfala man wea repent, Satan bae win ovarem olketa, wea minim olketa no garem feeling for hem and no garem fasin for forgive, wea hem nao samting wea Devil laekem olketa for duim. Bat iumi savve sure hao bihaen, olketa hia “forgivim and comfortim” disfala man wea repent.—2 Corinthians 2:5-7.
6. Why nao samfala disfellowship and hao nao diswan helpem olketa?
6 Why nao man disfellowship? Datwan hem stopem wei for pipol ting daonem and tok againstim holy nem bilong God and pipol bilong hem. (1 Peter 1:14-16) Wei for aotem man wea duim bigfala rong and no repent from kongregeson hem mekhae long olketa standard bilong God and mekem kongregeson gohed for stap klin long spiritual wei. And tu, diswan savve helpem datfala man for luksavve hao sin wea hem duim hem serious samting.
Important Tumas for Repent
7. Hao nao David hem feel taem hem no talemaot rong bilong hem?
7 Staka wea duim bigfala sin barava repent and no disfellowship from kongregeson. Samfala faendem hem no isi for barava repent. Tingim King bilong Israel, David, wea raetem Psalm 32. Datfala song hem showimaot hao for lelebet taem David no talemaot bigfala sin wea hem duim witim Bath-sheba. From hem barava feel guilty long wanem hem duim, hem no garem eni strong, and hem olsem wanfala tree wea hot sun hem mekem kamap drae. David hem safa long physical wei and conscience barava sutim hem, bat taem hem ‘talemaot rong bilong hem, Jehovah forgivim hem.’ (Psalm 32:3-5) Then David hem sing olsem: “Hapi nao man wea Jehovah no tingim sin bilong hem.” (Psalm 32:1, 2) Man wea God showimaot mercy long hem barava hapi tumas!
8, 9. Hao nao man showimaot hem repent, and why nao datwan hem barava important for man wea laek reinstate?
8 Tru nao, man wea duim bigfala sin mas repent sapos hem laekem God for showimaot mercy long hem. Nomata olsem, wei for feel shame or for wari nogud nara pipol faendaot abaotem sin bilong hem no minim man hia hem repent. “For repent” hem minim for “man changem tingting bilong hem” saed long nogud fasin, from hem sorre long bigfala sin wea hem duim. Man wea repent hem garem “heart wea brek and pisis” and laek for “stretem samting wea rong” sapos hem fit for duim datwan.—Psalm 51:17; 2 Corinthians 7:11.
9 Barava important samting wea mas showaot taem man laek reinstate insaed long Christian kongregeson hem fasin for repent. Wei wea man reinstate long kongregeson hem no depend long haomas month or year hem disfellowship finis. Heart bilong hem mas kamap gud moa bifor hem savve reinstate. Hem mas luksavve wei wea hem duim barava bigfala sin and hao samting wea hem duim mekem pipol ting daonem Jehovah and kongregeson. Hem mas repent, prea strong for Jehovah forgivim hem, and followim olketa raeteous mark bilong God. Taem hem ask for reinstate, hem mas showimaot wei wea hem repent and duim ‘olketa waka wea showimaot hem repent.’—Acts 26:20.
Why Nao Man Mas No Haedem Sin?
10, 11. Why nao iumi shud no trae for haedem sin wea iumi duim?
10 Samfala wea sin maet ting olsem: ‘Sapos mi talem long samwan sin wea mi duim, maet mi mas ansarem samfala kwestin wea savve mekem mi feel shame and maet mi disfellowship tu. Bat sapos mi no talemaot, bae mi no kasem datwan and no eniwan insaed long kongregeson bae savve.’ Tingting olsem hem no stret, bikos man hia forgetim samfala important samting. Wanem nao olketa samting hia?
11 Jehovah hem “God wea garem mercy and kaenfala fasin, slow for kros and wea fulap witim loving-kaeness and truth, wea keepim loving-kaeness for olketa thousand, forgivim mistek and rong and sin.” Bat hem savve stretem pipol bilong hem “long wei wea fitim.” (Exodus 34:6, 7; Jeremiah 30:11) Sapos iu duim bigfala rong, waswe, God savve showimaot mercy long iu sapos iu trae for haedem sin wea iu duim? Jehovah savve iu duim datwan, and hem no ting smol nomoa long datwan.—Proverbs 15:3; Habakkuk 1:13.
12, 13. Wanem nao savve kamaot from wei wea man trae for haedem sin?
12 Sapos iu duim wanfala big sin, wei for talemaot datwan savve helpem iu for kasem bak gudfala conscience. (1 Timothy 1:18-20) Bat sapos iu no talemaot, diswan savve spoelem conscience bilong iu and leadim iu go long wei for duim samfala sin moa. Iu mas remember hao iu no sin againstim narawan or kongregeson nomoa. Iu sin againstim God. Man wea raetem psalm hem singsing olsem: “Throne bilong Jehovah hem stap long heven. Eye bilong hem lukluk gud long olketa man. Jehovah hem lukluk gud long raeteous man and wicked man tu.”—Psalm 11:4, 5.
13 Jehovah bae no blessim eniwan wea haedem bigfala sin and trae for stap insaed long Christian kongregeson wea klin. (James 4:6) So sapos iu duim bigfala rong and laek for duim samting wea stret, no trae for haedem datwan. Sapos iu trae for haedem, bae iu garem guilty conscience, especially taem iu readim or herem kaonsel abaotem datfala sin wea iu duim. Wanem nao bae happen sapos Jehovah tekem awe spirit bilong hem from iu, olsem hem duim long King Saul? (1 Samuel 16:14) Sapos iu no kasem spirit bilong God, iu savve duim sin wea moa big.
Trustim Olketa Faithful Brata Bilong Iu
14. Why nao man wea duim bigfala rong shud followim kaonsel long James 5:14, 15?
14 So wanem nao man wea duim bigfala rong and repent hem shud duim? “Hem shud kolem kam olketa older man bilong kongregeson, and olketa savve prea for hem, and oilim hem witim oil long nem bilong Jehovah. And prea bilong faith bae mekem sikman kamap gud, and Jehovah bae mekem hem kamap gud moa.” (James 5:14, 15) Wanfala wei for “showimaot frut bilong wei for repent” hem for go lukim olketa elder. (Matthew 3:8) Olketa faithful man hia wea kaen and showimaot love bae “prea for hem, and oilim hem witim oil long nem bilong Jehovah.” Olsem oil wea smel naes and feel gud, kaonsel wea olketa givim from Bible bae comfortim eniwan wea barava repent.—Jeremiah 8:22.
15, 16. Hao nao olketa Christian elder followim example wea God showimaot olsem Ezekiel 34:15, 16 hem storyim?
15 Shepherd bilong iumi Jehovah showimaot nambawan example bilong love taem hem mekem olketa Jew kamap free from wei for prisoner long Babylon long 537 B.C.E., and taem hem mekem spiritual Israel kamap free from “Bigfala Babylon” long 1919 C.E.! (Revelation 17:3-5; Galatians 6:16) Hem fulfillim disfala promis bilong hem: “Mi nao bae feedim olketa sheep bilong mi, and mi nao bae mekem olketa leidaon . . . Mi bae lukaotem datwan wea lus, and mi bae tekem kam bak datwan wea stap olobaot, and bae mi bandagem datwan wea brek and bae mi strongim datwan wea sik.”—Ezekiel 34:15, 16.
16 Jehovah feedim olketa tokpiksa sheep bilong hem, hem mekem olketa stap sef, and hem lukaotem olketa wea lus. Olsem tu, olketa Christian shepherd mek sure olketa sheep bilong God kaikai gud and stap sef long spiritual saed. Olketa elder lukaotem eni sheep wea start for go difren from kongregeson. Long sem wei wea God “bandagem datwan wea brek,” olketa overseer “bandagem” eni sheep wea garekil long tokpiksa wei from toktok wea narawan talem or from samting wea hemseleva duim. And long sem wei wea God “strongim datwan wea sik,” olketa elder helpem olketa wea kamap sik long spiritual wei, maet from olketa duim bigfala sin.
Wei wea Olketa Shepherd Helpem Narawan
17. Why nao iumi shud no hol bak for askem spiritual help from olketa elder?
17 Olketa elder hapi for followim disfala kaonsel: “Gohed for showim mercy . . . , duim diswan witim fasin for fraet.” (Jude 23) Samfala Christian duim bigfala rong taem olketa duim dirty fasin. Bat sapos olketa barava repent, olketa savve feel sure bae olketa elder showimaot love and mercy and barava laek for helpem olketa long spiritual wei. Paul sei olsem abaotem olketa elder wea hem tu insaed diswan: “Mifala no bossim faith bilong iufala, bat mifala waka tugeta witim iufala for iufala savve hapi.” (2 Corinthians 1:24) So, no hol bak enitaem for askem spiritual help from olketa.
18. Olketa elder deal witim olketa wea duim rong samting long wanem wei?
18 Sapos iu duim bigfala sin, why nao iu fit for trustim olketa elder? Bikos main waka bilong olketa hem for shepherdim olketa sheep bilong God. (1 Peter 5:1-4) No eni shepherd wea garem love bae panisim wanfala sheep wea singaot from hem duim samting wea mekem hem garekil. So taem olketa elder deal witim samwan wea duim rong samting, main samting olketa tingim nao hem no wanem kaen panis for givim, bat olketa tingim datfala rong and eni wei for olketa savve helpem hem for gud bak moa long spiritual saed. (James 5:13-20) Olketa elder mas judge long raeteous wei and ‘kaen long olketa sheepsheep.’ (Acts 20:29, 30; Isaiah 32:1, 2) Olketa elder no difren from evri nara Christian, olketa tu mas ‘showimaot justice and lovem kaenfala fasin and no ova tumas taem olketa wakabaot witim God bilong olketa.’ (Micah 6:8) Hem important tumas for olketa garem olketa fasin hia taem olketa disaedem samting wea bae affectim laef and holy service bilong ‘olketa sheep bilong Jehovah.’—Psalm 100:3.
19. Olketa Christian elder garem wanem tingting taem olketa trae for stretem samwan wea duim rong samting?
19 Holy spirit nao appointim olketa Christian shepherd and olketa traem best for followim direction bilong hem. Sapos “wanfala man hem go rong bat hem no luksavve yet hem go rong,” olketa man wea fit long spiritual saed “showimaot kwaet fasin taem olketa trae for stretem datfala man.” (Galatians 6:1; Acts 20:28) Olketa elder trae for stretem tingting bilong hem bat long semtaem strong for followim olketa standard bilong God. Diswan hem olsem taem wanfala doctor hem isisi stretem bak bon bilong wanfala man wea brek, mekem datfala man hem no feelim tumas pain. Nomata olsem, man hia bae feelim lelebet pain bikos datwan nao only wei for fixim datfala bon wea brek. (Colossians 3:12) From olketa elder depend long prea and olketa scripture insaed Bible taem olketa disaedem for showimaot mercy or nomoa, samting olketa disaedem hem followim tingting bilong God.—Matthew 18:18.
20. Wanem taem nao bae hem fitim for announcem long kongregeson hao samwan hem kasem strongfala kaonsel?
20 Sapos staka pipol savve or bae savve abaotem rong wea samwan duim, hem fitim for olketa elder savve talem wanfala announcement long kongregeson mekem pipol no ting daonem kongregeson. Maet olketa elder bae talem announcement sapos kongregeson bae need for savve. Insaed olketa month wea datfala man wea kasem help from wanfala judicial komiti hem isisi gud bak long spiritual wei, hem bae olsem man wea garekil bilong hem isisi gud bak, wea for lelebet taem datwan bae stopem hem for duim staka samting. Staka taem, wei wea datfala man lisin nomoa and no givim koment long olketa meeting bae barava helpem hem. Maet olketa elder arrange for samwan duim Bible study witim hem for helpem hem long olketa samting wea hem need for kamap moabeta long hem mekem hem kamap “healthy long faith” moa. (Titus 2:2) Goal bilong evri samting hia hem for showimaot love, no for panisim hem.
21. Hao nao olketa elder savve deal witim samfala rong wea samwan duim?
21 Olketa elder savve givim spiritual help long olketa difren wei. Olsem example, maet wanfala brata wea garem problem for drunk bifor hem drink tumas taem hem stap seleva long haos, long wan or tufala taem. Or maet wanfala wea lusim wei for smoke longtaem finis hem foldaon wan or tufala taem and smoke moa bat no eniwan savve long datwan. Nomata hem prea and bilivim hao God forgivim hem finis, hem shud askem help from wanfala elder mekem datwan no kamap samting wea hem duim plande taem. Maet wan or tufala elder deal witim datfala problem. Bat olketa mas talem long presiding overseer bikos maet hem savve long olketa samting abaotem datwan wea olketa no savve.
Gohed for Acceptim Discipline wea God Givim
22, 23. Why nao iu shud gohed for acceptim discipline wea God givim?
22 For Jehovah acceptim iumi, each Christian mas acceptim discipline wea hem givim. (1 Timothy 5:20) So followim eni kaonsel wea iumi kasem taem iumi studyim Bible and olketa Christian pablikeson, or long olketa meeting, assembly and convention bilong pipol bilong Jehovah. Gohed strong for duim will bilong Jehovah. Sapos iu duim datwan, discipline and kaonsel wea God givim bae olsem wanfala strong spiritual wall wea protectim iu from sin.
23 Wei for acceptim discipline wea God givim bae mekem iu gohed for kasem love bilong God. Hem tru, samfala disfellowship from Christian kongregeson, bat diswan bae no happen long iu sapos iu “protectim gud heart bilong iu” and ‘wakabaot olsem man wea wise.’ (Proverbs 4:23; Ephesians 5:15) Bat sapos distaem iu disfellowship, bae hem gud tumas sapos iu duim olketa samting wea bae mekem iu fit for reinstate! God laekem evriwan wea dedicatem olketa seleva long hem for worshipim hem long faithful wei and for duim datwan witim “hapi heart.” (Deuteronomy 28:47) Iu savve duim diswan for olowe sapos iu acceptim discipline wea Jehovah givim evritaem.—Psalm 100:2.
Hao Nao Bae Iu Ansa?
• Why nao samfala disfellowship from Christian kongregeson?
• Wanem nao insaed long wei for barava repent?
• Why nao iumi shud talem long olketa elder sapos iumi duim bigfala sin?
• Wanem nao olketa wei wea olketa Christian elder helpem olketa wea duim rong and wea repent?
[Piksa long page 8]
Why nao aposol Paul givim olketa instruction abaotem wei for disfellowship for olketa long Corinth?
[Piksa long page 11]
Olsem olketa shepherd bifor, olketa Christian elder “bandagem” olketa sheep bilong God wea garekil