Waswe, Iu ‘Wanfala Wakaman wea God Kaen Tumas Long Iu’?
“Iufala mas lovem iufala evriwan olsem olketa brata. Iufala nao mas firstaem showimaot respect long nara man.”—ROM. 12:10.
1. Staka toktok long Bible helpem iumi for luksavve long wanem samting?
STAKA toktok long Bible showimaot Jehovah bae helpem iumi taem iumi wikdaon or barava sorre. Tingim olketa toktok hia: “Jehovah hem helpem olketa wea foldaon, and hem liftimap olketa wea wikdaon.” “Hem healim olketa wea sorre tumas, and hem bandagem garekil bilong olketa.” (Ps. 145:14; 147:3) And Dadi bilong iumi long heven tok olsem tu: “Mi nao Jehovah, God bilong iufala. Mi holem strong raet hand bilong iufala and tok olsem long iufala, ‘Iufala no fraet, bae mi helpem iufala.’”—Isa. 41:13.
2. Long wanem wei nao Jehovah helpem olketa wea worshipim hem?
2 Bat from Jehovah hem stap long heven, long wanem wei nao hem savve ‘holem strong raet hand bilong iumi’? Hao nao hem savve ‘liftimap iumi taem iumi barava wikdaon’? Jehovah God hem helpem iumi long staka difren wei. Wanfala wei nao, hem givim pipol bilong hem “strong wea winim wanem [olketa seleva] garem,” wea hem nao holy spirit bilong hem. (2 Cor. 4:7; John 14:16, 17) Message long Bible tu hem garem paoa and hem savve barava strongim olketa wea worshipim God. (Heb. 4:12) Bat Jehovah strongim iumi long nara wei tu. Hem nao samting wea disfala Bible buk First Peter hem storyim.
‘God Showimaot Hem Kaen Tumas Long Staka Difren Wei’
3. (a) Wanem nao aposol Peter talem abaotem olketa test wea olketa Christian bae kasem? (b) Wanem nao Peter storyim klosap long end bilong leta bilong hem?
3 Taem aposol Peter raetem leta bilong hem for olketa anointed Christian, hem talem olketa for hapi bikos olketa bae kasem nambawan reward. Bat bihaen hem talem datwan, hem sei: “Iufala mas safa for lelebet taem nomoa long staka difren samting.” (1 Pet. 1:1-6) Long datfala scripture, Peter talem hao staka “difren” samting nao bae testim olketa. Bat Peter talem nara samting for mekem olketa savve hao olketa bae winim olketa test hia. Hem talem olketa Christian hao Jehovah bae helpem olketa for gohed strong nomata wanem kaen test nao kasem olketa. Samting hia wea aposol Peter storyim hem stap klosap long end bilong leta bilong hem, wea hem story abaotem “taem wea evri samting long world hem finis.”—1 Pet. 4:7.
4. Why nao toktok long 1 Peter 4:10 barava strongim iumi?
4 Peter hem sei: “Iufala wanwan kasem savve from God. Iufala kasem diswan bikos God hem kaen tumas. Hem showimaot hem kaen tumas long staka difren wei. So from iufala olketa faithful wakaman, iufala mas iusim savve hia for helpem narawan.” (1 Pet. 4:10) Peter talem moa disfala toktok staka “difren” wei. So long datfala scripture, wanem Peter hem talem nao hem olsem: ‘Nomata iumi kasem staka difren kaen test, God bae kaen tumas long iumi long staka difren wei tu.’ Samting wea Peter talem barava strongim iumi. Why nao olsem? Diswan showimaot nomata wanem test iumi kasem, God bae kaen long iumi and helpem iumi for gohed strong and no givap. Bat long wanem wei nao Jehovah showimaot hem kaen long iumi? Hem iusim olketa brata and sista long kongregeson.
“Helpem Narawan”
5. (a) Wanem nao evri Christian mas duim? (b) Wanem nao olketa kwestin wea iumi bae storyim?
5 Peter sei olsem long evriwan long Christian kongregeson: “Wanfala samting wea iufala mas duim wea important winim evri nara samting, hem for iufala barava lovem iufala evriwan.” Then hem sei: “Iufala wanwan kasem savve from God. . . . Iufala mas iusim savve hia for helpem narawan.” (1 Pet. 4:8, 10) Dastawe evriwan long kongregeson mas duim samting for strongim olketa brata and sista. Jehovah givim olketa barava spesol samting bilong hem long iumi, and hem laekem iumi for iusim olketa samting hia for helpem narawan. So wanem nao olketa spesol samting hia wea hem givim long iumi? Peter hem sei iumi kasem “savve.” Wanem kaen savve nao diswan? Long wanem wei nao iumi savve iusim disfala savve for “helpem narawan”?
6. Wanem nao samfala spesol samting wea God givim long olketa Christian?
6 Bible hem sei: “Evri samting wea hem gud tumas hem kam from heven.” (Jas. 1:17) Tru tumas, evri gud samting wea Jehovah givim long pipol bilong hem, hem showimaot hem kaen tumas. Wanfala nambawan samting wea Jehovah givim long iumi nao hem holy spirit. Datfala paoa helpem iumi for garem olketa wei wea God hapi long hem, olsem for garem love, duim gudfala samting, and for hambol. Sapos iumi garem olketa wei hia, iumi bae showimaot love long olketa brata and sista and iumi bae laek for helpem olketa. Holy spirit helpem iumi for garem gudfala tingting and savve tu. (1 Cor. 2:10-16; Gal. 5:22, 23) Tru tumas, evri strong and savve wea iumi garem hem olketa gudfala samting wea iumi savve iusim for mekhae long Dadi bilong iumi long heven. God laekem iumi for iusim olketa samting hia for helpem olketa brata and sista. Datwan bae showimaot God hem kaen long olketa.
Long Wanem Wei Nao Iumi ‘Iusim Savve Bilong Iumi for Helpem Narawan’?
7. (a) Wanem nao 1 Peter 4:10 showimaot abaotem “savve” wea iumi wanwan kasem? (b) Wanem nao olketa kwestin wea hem gud for iumi tingim, and why nao olsem?
7 Toktok wea stap long 1 Peter 4:10 showimaot iumi evriwan kasem “savve” for duim samting. Maet savve wea iumi garem hem difren from savve wea nara man garem. Nomata olsem, from iumi “olketa faithful wakaman,” Jehovah sei iumi mas “iusim savve hia [wea hem nao eni savve wea iumi kasem] for helpem narawan.” Dastawe hem gud for iumi tingim olketa kwestin hia: ‘Waswe, mi iusim savve wea mi kasem for strongim olketa brata and sista long kongregeson?’ (Markem witim 1 Timothy 5:9, 10.) ‘Or waswe, mi iusim savve wea mi kasem from Jehovah for kasem samting for miseleva nomoa, olsem for kasem staka material samting or for garem bignem?’ (1 Cor. 4:7) Sapos iumi iusim savve bilong iumi for “helpem narawan,” Jehovah bae hapi tumas long iumi.—Prov. 19:17; readim Hebrews 13:16.
8, 9. (a) Wanem nao samfala samting wea olketa Christian savve duim for helpem olketa brata and sista? (b) Wanem nao olketa brata and sista long kongregeson bilong iu duim for helpem narawan?
8 Bible storyim staka difren samting wea olketa Christian long first century duim for helpem narawan. (Readim Romans 15:25, 26; 2 Timothy 1:16-18.) Olketa Christian distaem tu hapi tumas for iusim savve bilong olketa for helpem olketa brata and sista. Tingim samfala samting wea iumi savve duim for helpem olketa.
9 Plande brata iusim staka hour evri month for redyim olketa part long meeting. Taem olketa brata hia storyim kam olketa nambawan samting wea olketa lanem from Bible, datwan savve helpem evriwan long kongregeson for gohed strong and no givap. (1 Tim. 5:17) Staka brata and sista duim samting wea showimaot olketa tingim olketa nara Christian. (Rom. 12:15) Samfala go visitim olketa wea wikdaon and prea witim olketa. (1 Thess. 5:14) Olketa narawan raetem olketa leta for strongim olketa brata and sista wea no givap nomata olketa kasem hard taem. Samfala moa helpem olketa wea no savve wakabaot gud for kam long olketa kongregeson meeting. Staka thousand Witness duim relief waka for wakem bak haos bilong olketa brata and sista wea disaster kasem olketa. Taem olketa brata and sista duim olketa samting hia for helpem narawan, hem nao wei wea God showimaot hem “kaen tumas long staka difren wei.”—Readim 1 Peter 4:11.
Wanem Samting Nao Barava Important?
10. (a) Wanem nao tufala samting wea Paul luksavve hem mas duim for worshipim God? (b) Wanem nao iumi savve duim for followim wei bilong Paul?
10 God laekem iumi for iusim savve bilong iumi for helpem olketa brata and sista, bat hem laekem iumi mas talemaot message bilong Hem long nara pipol tu. Aposol Paul luksavve long tufala samting hia wea hem mas duim for worshipim Jehovah. Hem talem kongregeson long Ephesus ‘hao God kaen tumas long hem and givim waka long hem’ mekem hem savve helpem olketa hia. (Eph. 3:2) Bat hem talem tu: “God lukluk gud long mifala and hem lukim hao mifala fit for kasem disfala waka for talemaot gud nius.” (1 Thess. 2:4) Olsem Paul, iumi luksavve hao iumi tu kasem disfala waka for preach abaotem Kingdom bilong God. Taem iumi strong for duim preaching waka, iumi followim wei bilong Paul and no givap for talemaot gud nius. (Acts 20:20, 21; 1 Cor. 11:1) Iumi savve disfala Kingdom message wea iumi storyim long pipol savve mekem man kasem laef. Bat iumi savve hem important tu for iumi “storyim olketa samting abaotem God” long olketa brata and sista for strongim olketa, olsem Paul tu hem duim.—Readim Romans 1:11, 12; 10:13-15.
11. Iumi mas garem wanem tingting abaotem preaching waka and wei for strongim olketa brata?
11 So waswe, preaching waka hem important winim wei for helpem olketa brata, or waswe, wei for helpem olketa brata nao barava important? Taem iumi askem kwestin olsem, hem olsem iumi askem wanfala bird, Which wan long tufala wing bilong iu nao barava important? Iumi savve finis long ansa. Bird hia hem needim tufala wing evriwan. Hem semsem tu long iumi. Iumi mas talemaot gud nius bat iumi mas strongim olketa brata and sista tu. So iumi mas no tingim waka bilong iumi for preachim gud nius hem important winim wei for strongim olketa brata, bat iumi mas tingim tufala samting hia olsem hao aposol Peter and Paul tingim olketa. Tufala waka hia barava important. Why nao olsem?
12. Jehovah savve iusim iumi for duim olketa wanem samting?
12 Taem iumi preach, iumi iusim savve wea iumi garem for teach mekem iumi kasem tingting bilong olketa man wea iumi preach long olketa. Taem iumi duim olsem, iumi laek for helpem olketa kamap disaepol bilong Christ. Bat iumi iusim savve bilong iumi tu for strongim olketa brata and sista. Iumi talem olketa gudfala toktok and duim olketa samting for helpem olketa. Evri samting hia showimaot God hem kaen tumas. (Prov. 3:27; 12:25) Taem iumi duim olsem, iumi helpem olketa brata and sista for gohed followim Christ. So iumi hapi tumas taem Jehovah iusim iumi for preach and for “helpem narawan.”—Gal. 6:10.
“Iufala Mas Lovem Iufala Evriwan”
13. Wanem nao bae happen sapos iumi no “helpem narawan”?
13 Paul talem olketa Christian: “Iufala mas lovem iufala evriwan olsem olketa brata. Iufala nao mas firstaem showimaot respect long nara man.” (Rom. 12:10) Tru tumas, from iumi lovem olketa brata and sista, datwan savve mekem iumi waka hard for kamap wakaman bilong God from hem kaen tumas long iumi. Iumi luksavve sapos Satan hem stopem iumi for no “helpem narawan,” datwan bae spoelem sem tingting wea iumi evriwan garem for worshipim God. (Col. 3:14) Sapos olsem, gogo bae iumi no strong for duim preaching waka tu. Satan savve sapos hem stopem iumi for no duim wanfala long tufala samting hia, datwan savve mekem iumi no duim wanem Jehovah hem laekem. Hem olsem hem spoelem wanfala wing bilong bird wea mekem hem hard for datfala bird flae nao.
14. Hu nao kasem gud samting taem iumi “helpem narawan”? Talem kam wanfala story.
14 Taem iumi “helpem narawan,” datwan helpem olketa for kasem kaeness bilong God. Hem savve helpem iumi tu. (Prov. 11:25) Tingim samting wea Ryan and Roni duim, wanfala hasband and waef wea stap long Illinois, long America. Taem datfala big cyclone wea nem bilong hem Hurricane Katrina hem spoelem staka handred haos bilong olketa Witness, tufala lusim waka bilong olketa and ples wea olketa stap. Olketa peim wanfala trak and wakem gud mekem olketa savve stap insaed. Then olketa draev go long Louisiana wea hem stap 1,400 kilometer from Illinois. Olketa stap long there winim wan year for helpem olketa brata and sista. Ryan wea 29 year hem sei olsem: “Taem mi duim disfala relief waka, diswan helpem mi for fren gud witim God. Mi lukim Jehovah lukaftarem pipol bilong hem.” Hem sei moa: “Taem mi waka witim olketa mature brata, mi lanem hao for lukaftarem olketa brata. Mi luksavve tu hao mifala olketa young wan savve duim staka samting long organization bilong Jehovah.” Roni wea 25 year hem sei olsem: “Mi hapi tumas from mi helpem olketa narawan. Mi barava hapi distaem winim enitaem bifor. Mi savve samting wea mi duim bae gohed helpem mi for plande year bihaen.”
15. Wanem nao olketa samting wea mekem iumi laek gohed olsem olketa wakaman wea God kaen tumas long iumi?
15 Tru tumas, iumi evriwan kasem gud samting taem iumi obeyim God for preachim gud nius and strongim olketa brata and sista. Olketa wea iumi helpem savve gohed worshipim Jehovah and iumiseleva hapi tu from iumi givim samting long olketa. (Acts 20:35) Taem evriwan long kongregeson tingim narawan, datwan savve mekem evriwan fren gud tugeta. Nara samting tu, iumi showimaot iumi olketa tru Christian from iumi lovem iumi evriwan. Jesus sei olsem: “Evriwan bae luksavve iufala nao olketa disaepol bilong mi sapos iufala lovem narawan.” (John 13:35) Barava important samting nao, diswan bae mekhae long Dadi bilong iumi, Jehovah. Taem iumi helpem olketa wea worshipim hem, iumi duim wanem Jehovah hem laekem. So taem iumi tingim evri samting hia, datwan mekem iumi laek iusim savve bilong iumi for ‘helpem narawan bikos iumi nao olketa faithful wakaman wea God kaen tumas long iumi’! Waswe, bae iu gohed for duim datwan?—Readim Hebrews 6:10.
Waswe, Iu Tingim Yet?
• Long olketa wanem wei nao Jehovah strongim pipol bilong hem?
• Wanem nao Jehovah givim long iumi?
• Wanem nao olketa samting wea iumi savve duim for helpem olketa brata and sista?
• Wanem nao bae mekem iumi laek gohed iusim savve bilong iumi for “helpem narawan”?
[Piksa long page 13]
Waswe, iu iusim “savve” bilong iu for helpem narawan or for kasem samting for iuseleva nomoa?
[Piksa long page 15]
Iumi preachim gud nius and strongim olketa brata and sista tu
[Piksa long page 16]
Iumi praisem olketa wea duim relief waka from olketa givim taem and strong bilong olketa for helpem narawan