Stap Longtaem Winim Klin Gold

GOLD garem hae price from hem luk naes and savve stap longtaem. Pipol laekem tumas from hem shaen and klin olowe. Diswan hem bikos wata, oxygen, sulfur, and klosap evri nara samting hard for spoelem gold. Staka gold samting shaen yet nomata olketa faendem long olketa shiprek and nara ples bihaen planti handred year.

Bat, hem interesting hao Bible sei wanfala samting hem stap wea savve stap longtaem and “wea winim price bilong gold wea savve finis nomata olketa testim long fire.” (1 Peter 1:7) Gold wea olketa “testim,” or klinim, thru long fire and nara wei moa savve kamap 99.9 percent klin. Bat, olketa klin gold savve finis, or melt, taem hem mix witim aqua regia (royal wata), wea diswan hem 75 percent hydrochloric acid and 25 percent nitric acid. So, Bible hem stret saed long science taem hem sei ‘gold savve finis.’

Long wei wea difren, trufala Christian faith “keepim soul laef.” (Hebrews 10:39) Olketa man savve killim dae man wea garem strong faith, olsem olketa duim long Jesus Christ. Bat olketa wea garem tru faith kasem disfala promis: “Pruvim iuseleva faithful go kasem dae, and mi bae givim iu crown bilong laef.” (Revelation 2:10) Olketa faithful man wea dae stap long memory bilong God, and hem bae resurrectim olketa. (John 5:28, 29) Nomata haomas gold hard for duim diswan. Long disfala wei, faith barava garem hae price winim gold. Bat, for faith garem hae price olsem, hem tu mas kasem test. Tru nao, Peter hem sei ‘faith wea kasem test’ nao hem garem hae price winim gold. Olketa Jehovah’s Witness bae hapi for helpem iu studyim Bible mekem faith bilong iu long trufala God, Jehovah, and long Son bilong hem, Jesus Christ, savve grow and stap strong. Jesus sei diswan nao “minim laef olowe.”—John 17:3.