Toktok Bilong Jehovah Hem Laef
Olketa Main Point From James and First Peter and Mek-tu Peter
KLOSAP 30 year bihaen Pentecost 33 C.E., disaepol James, wea hem haf brata bilong Jesus, hem raetem wanfala leta long “twelvfala tribe” bilong spiritual Israel. (Jas. 1:1) Wanem nao mekem hem laek raet go long olketa? Hem encouragem olketa for garem strongfala faith and for no givap taem olketa kasem hard taem. Hem givim kaonsel tu for stretem samfala nogud samting wea kamap long olketa kongregeson.
Bifor 64 C.E. taem Emperor Nero long Rome hem duim olketa nogud samting long olketa Christian, aposol Peter raetem first leta long olketa Christian hia for helpem olketa for gohed strong. No longtaem bihaen, hem raetem mek-tu leta for encouragem olketa for followim toktok bilong God and for talem hao day bilong Jehovah hem klosap nao. Iumi tu savve lanem gud samting from olketa leta bilong James and Peter.—Heb. 4:12.
GOD SAVVE GIVIM GUDFALA TINGTING LONG MAN WEA GAREM “FAITH”
James hem talem olsem: “Man wea no givap taem hem kasem hard taem hem hapi. Taem hem no givap, God bae hapi long hem and mekem hem kasem laef olowe.” Taem eniwan hem kasem hard taem bat hem “gohed prea long Jehovah and hem garem faith,” Jehovah bae givim gudfala tingting long hem.—Jas. 1:5-8, 12.
Olketa wea “teach” long kongregeson mas garem faith and gudfala tingting tu. James storyim hao tongue hem “smolfala part” nomoa long body bat hem savve ‘mekem man luk nogud.’ Then hem storyim olketa wei bilong pipol long world wea savve spoelem wei wea man fren gud witim God. Hem storyim tu olketa samting wea man wea no fren gud witim God mas duim mekem hem fren gud moa witim Hem.—Jas. 3:1, 5, 6; 5:14, 15.
Ansa for Olketa Bible Kwestin:
2:13—Long wanem wei nao ‘man wea sorre and kaen long narawan hem no fraetem judgment bilong God’? Taem God hem judgem iumi, hem bae lukluk long wei bilong iumi sapos iumi sorre and kaen long nara man. Sapos iumi kaen and sorre long narawan, hem bae iusim ransom sakrifaes bilong Son bilong hem for forgivim iumi. (Rom. 14:12) Dastawe iumi mas kaen and sorre long pipol.
4:5—Toktok bilong wanem scripture nao James hem talem moa long disfala verse? James hem no talem moa toktok from wanfala nara verse. Holy spirit nao mekem hem for raetem datwan and maet hem kasem idea for samting wea hem raetem from Genesis 6:5; 8:21; Proverbs 21:10; and Galatians 5:17.
5:20—“Man wea helpem nara man wea hem sin for lusim nogud wei bilong hem,” hem sevem laef bilong hu? Christian wea helpem nara man wea hem sin for lusim nogud wei bilong hem, hem sevem soul bilong man hia. Datwan minim hem sevem man hia for no lusim wei wea hem fren witim Jehovah and hem sevem hem from kaen dae wea hem for olowe tu. Samwan wea helpem man long wei olsem bae ‘forgivim tu plande sin bilong datfala man.’
Wanem Nao Iumi Lanem?
1:14, 15. Taem man hem laekem tumas rabis samting, datwan nao bae mekem hem for duim sin. Dastawe iumi mas no tingim olketa rabis samting bat iumi mas “gohed for tingim” olketa gudfala samting.—Phil. 4:8.
2:8, 9. ‘Sapos iumi gohed for favorim narawan,’ iumi no followim nao “nambawan law” bilong love. Dastawe olketa tru Christian no favorim eniwan.
2:14-26. ‘Samting wea sevem iumi nao hem faith,’ bat ‘no samting wea iumi duim’ followim Law bilong Moses or samting iumi duim from iumi Christian. Hem isi nomoa for man sei hem garem faith, bat samting wea showimaot datwan nao hem taem hem duim samting wea God laekem.—Eph. 2:8, 9; John 3:16.
3:13-17. “Tingting wea followim God” hem barava winim nao “rabis tingting bilong olketa man and olketa demon”! Iumi mas gohed for lukaotem ‘tingting bilong God olsem hao iumi lukaotem rich samting wea haed long graon.’—Prov. 2:1-5.
3:18. Olketa wea go long pipol for plantim seed bilong Kingdom message mas ‘story long wei wea mekem pipol no kros bat hapi for herem datfala message.’ So hem important for iumi no bighed or laek raoa taem iumi story witim olketa.
‘GOHED FOR GAREM STRONGFALA FAITH’
Peter talem olketa Christian for tingim “hope” bilong olketa for go long heven. Hem talem hao “olketa nao ‘pipol wea God chusim, sekson bilong olketa priest for rul, wanfala holy nation.’” Bihaen hem storyim wei wea iumi mas obeyim olketa wea iumi stap anda long olketa, hem encouragem evriwan for “garem sem tingting, minim feeling bilong narawan, lovem olketa brata, garem wei for kaen, and hambol.”—1 Pet. 1:3, 4; 2:9; 3:8.
Peter hem talem olketa brata for ‘garem gudfala tingting and no givap for prea’ ‘from evri samting saed long olketa Jew hem klosap finis.’ Hem talem olketa: “Iufala mas tingting gud and lukaot gud . . . Gohed for garem strongfala faith mekem iufala savve againstim [Satan].”—1 Pet. 4:7; 5:8, 9.
Ansa for Olketa Bible Kwestin:
3:20-22—Hao nao wei for baptaes hem sevem iumi? Olketa wea laekem God for sevem olketa, olketa mas baptaes. Bat no datwan nomoa savve sevem iumi. From “Jesus Christ hem laef bak moa” datwan nao sevem iumi. Man wea bae baptaes mas garem faith hao samting wea sevem hem nao, Jesus givim laef bilong hem for iumi taem hem dae, hem laef bak moa, and “hem sidaon long raet saed bilong God.” Datwan minim hem garem paoa ovarem pipol wea laef and pipol wea dae finis. Taem man baptaes from hem garem strong faith long olketa samting hia, datwan sevem hem olsem hao God sevem ‘eitfala man long taem bilong flood.’
4:6—Hu nao olketa wea nomata olketa “dae finis,” olketa “herem gud nius”? Olketa hia nao olsem pipol wea ‘dae finis from olketa duim sin.’ Diswan minim taem olketa no herem gud nius yet, olketa no laef long spiritual wei from olketa no fren witim Jehovah. (Eph. 2:1) Bat bihaen olketa garem faith long gud nius, olketa start for laef long spiritual wei from olketa fren witim Hem.
Wanem Nao Iumi Lanem?
1:7. Olketa test nao savve strongim faith bilong iumi. Kaen strong faith olsem savve mekem ‘man gohed laef.’ (Heb. 10:39) Iumi mas no laek ranawe from eni samting wea testim faith bilong iumi.
1:10-12. Olketa angel laek tumas for minim olketa samting abaotem kongregeson bilong olketa anointed Christian wea hem nao olketa profet bilong God long bifor story abaotem. Bat olketa angel start for minim nomoa taem olketa lukim wanem Jehovah duim for helpem and leadim olketa hia. (Eph. 3:10) Dastawe hem gud for iumi followim wei bilong olketa angel for iumi mas trae hard for lanem “savve from God wea man mas lukluk gud long hem and trae for minim.”—1 Cor. 2:10.
2:21. Iumi mas followim wanem Jesus Christ hem duim. Hem willing for kasem nogud samting and dae from hem laekem pipol for luksavve Jehovah nomoa hem fit for rulim evri samting.
5:6, 7. Taem iumi prea long Jehovah for talemaot wanem iumi wari abaotem, hem bae helpem iumi for busy evritaem long worship bilong iumi and no warim tumas olketa nara samting wea maet kamap.—Matt. 6:33, 34.
“DAY BILONG JEHOVAH BAE KAM”
Peter hem talem olsem: “Toktok bilong olketa profet no kam from olketa seleva, bat holy spirit nao mekem olketa for talemaot olketa toktok wea God hem givim kam long olketa.” Taem iumi savve gud long Bible datwan savve protectim iumi from “olketa wea teachim laea samting” and olketa nara man wea laek spoelem biliv bilong iumi.—2 Pet. 1:21; 2:1-3.
Peter hem talem olsem: “Long olketa last day pipol bae mekfani long samting wea iufala talem.” Bat “day bilong Jehovah bae kam olsem hao man for steal savve kam.” Olketa last samting wea Peter talem long leta bilong hem, hem gudfala advaes for olketa wea “weitim and tingim evritaem day bilong Jehovah wea bae kam.”—2 Pet. 3:3, 10-12.
Ansa for Olketa Bible Kwestin:
1:19—Hu nao datfala “star bilong morning”? Wanem taem nao hem kamap? Wanem nao mekem iumi luksavve diswan kamap finis? Bihaen Jesus Christ hem kamap King long Kingdom bilong God, hem kamap datfala “star bilong morning.” (Rev. 22:16) Jesus kamap Messiah King long 1914 wea datwan hem olsem wanfala niu day hem start for disfala earth and olketa man bikos long samting wea Kingdom bae duim. Taem Jesus stap long wanfala maunten and lukluk bilong hem change, datwan piksarem taem wea Jesus bae kamap King long Kingdom. Datwan mekem iumi savve trustim olketa profesi from God insaed long Bible. Taem iumi tingting strong long olketa profesi insaed Bible, hem olsem wanfala lamp shaen insaed long heart bilong iumi. Iumi luksavve nao datfala star bilong morning hem kamap nao.
2:4—Wanem nao “Tartarus”? Long wanem taem nao olketa putim olketa bighed angel long Tartarus? Tartarus hem olsem wanfala prison wea God putim nomoa olketa angel bat no olketa man. Tartarus hem wei wea olketa angel hia barava tudak nao abaotem olketa nambawan plan bilong God. Olketa no garem eni hope for gohed laef long future. Long taem bilong Noah nao God hem putim olketa angel wea no obeyim hem long Tartarus. Olketa bae stap olsem go kasem taem God finisim olketa.
3:17—Taem Peter hem talem datfala toktok “iufala savve finis,” wanem nao hem minim? Peter storyim hao hem witim olketa nara man wea raetem Bible olketa savve long olketa samting wea bae kamap long future. Holy spirit nao mekem olketa for savve long datwan. Diswan no minim olketa firstfala Christian hia savve long evri samting wea bae happen long future. Olketa savve nomoa long olketa main samting wea bae happen.
Wanem Nao Iumi Lanem?
1:2, 5-7. Taem iumi trae hard for garem faith, for gohed strong and no givap, and for lovem God, datwan savve helpem iumi for mekem big go moa ‘stretfala savve wea iumi garem abaotem God and abaotem Jesus,’ and tu, hem bae ‘mekem iumi duim olketa gud samting and for no slakdaon long waka bilong iumi saed’ long datfala savve.—2 Pet. 1:8.
1:12-15. For helpem iumi “gohed strong long truth,” iumi need for herem evritaem olketa gudfala toktok for helpem iumi, olsem wea iumi herem long olketa meeting, taem iumi study seleva, and readim Bible.
2:2. Iumi mas tingting gud long wanem iumi duim, nogud wei bilong iumi hem spoelem nem bilong Jehovah and organization bilong hem.—Rom. 2:24.
2:4-9. Taem iumi tingim wanem Jehovah hem duim long bifor, iumi barava luksavve “Jehovah savve hao for helpem pipol wea lovem hem long hard taem wea kasem olketa, and hem savve tu hao for finisim nogud pipol long day wea hem judgem evriwan.”
2:10-13. “Olketa wea kasem glory,” wea hem nao olketa elder long kongregeson, olketa tu savve mistek samfala taem so iumi mas no tok spoelem olketa.—Heb. 13:7, 17.
3:2-4, 12. Taem iumi tingting strong long “toktok wea olketa holy profet talem bifor and komandment bilong Lord and man wea sevem iumi,” datwan bae helpem iumi for no forgetim day bilong Jehovah hem klosap tumas.
3:11-14. From iumi “weitim and tingim evritaem day bilong Jehovah wea bae kam,” iumi mas (1) ‘holy.’ Diswan minim body bilong iumi, tingting bilong iumi, wei bilong iumi, and worship bilong iumi mas klin; (2) iumi mas duim olketa samting wea showimaot iumi “lovem God,” olsem for preach abaotem Kingdom and helpem pipol kamap disaepol; (3) iumi mas no letem disfala world “spoelem” wei bilong iumi; (4) iumi mas no letem world “spoelem” tu wei wea stretfala tingting nao hem samting wea mekem iumi laek duim samting; and (5) iumi mas “stap gud” witim God, olketa Christian brata and sista, and nara pipol.