Careful Long Hu Nao Iu Chus for Associate Witim
“Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.”—1 COR. 15:33.
1. Iumi stap long wanem taem distaem?
IUMI stap long taem wea “evri samting hem hard tumas.” Bihaen “olketa last day” start long 1914, staka nogud samting happen long world winim enitaem bifor. (2 Tim. 3:1-5) And iumi savve evri samting long world bae kamap worse go moa bikos Bible sei: “Wei bilong olketa nogud man and olketa man for laea bae worse moa.”—2 Tim. 3:13.
2. Wanem kaen hapitaem nao pipol long world distaem laekem? (Lukim piksa long start bilong study.)
2 Staka pipol distaem interest tumas long hapitaem wea pipol raf, durong, or duim samting wea join witim magic or devildevil. Olsem example, staka samting long Internet, TV, olketa movie, buk, and olketa magasin mekem pipol tingse wei for raf and wei for durong hem gud nomoa. And samfala samting wea pipol ting hem nogud tumas bifor, distaem law bilong samfala kantri sei hem olraet nomoa for duim. Bat datwan no minim Jehovah acceptim olketa nogud samting hia.—Readim Rome 1:28-32.
3. Wanem nao tingting bilong staka pipol abaotem olketa wea followim olketa standard bilong God?
3 Pipol wea stap long first century tu laekem hapitaem wea pipol raf and durong. Bat olketa disaepol bilong Jesus no olsem, bikos olketa laek obeyim God. Aposol Peter sei long olketa Christian hia: “From iufala no gohed duim olketa rabis samting olsem olketa, olketa konfius and tok spoelem iufala.” (1 Pet. 4:4) Distaem tu, staka pipol long world no minim why nao iumi followim olketa standard bilong God. And tu, Bible sei “pipol bae spoelem” olketa wea followim Jesus Christ.—2 Tim. 3:12.
OLKETA NOGUD FREN BAE SPOELEM GUDFALA WEI BILONG IU
4. Why nao iumi mas no lovem world?
4 Sapos iumi laek for duim wanem God laekem, iumi mas no “lovem world and no lovem tu olketa samting long world.” (Readim 1 John 2:15, 16.) Satan nao hem “god bilong disfala world.” Hem iusim olketa religion, olketa gavman, bisnis, and olketa wea reportim nius for laea long pipol. (2 Cor. 4:4; 1 John 5:19) Iumi no laek for olsem pipol long world, so iumi mas careful long hu nao iumi chus for associate witim. Bible givim disfala kliafala warning: “No letem eniwan laea long iufala. Sapos man hem fren witim pipol wea wei bilong olketa hem nogud, olketa bae spoelem gudfala wei bilong hem.”—1 Cor. 15:33.
5, 6. Hu nao iumi shud no associate witim, and why nao olsem?
5 From iumi no laek for spoelem wei wea iumi fren witim Jehovah, iumi bae no fren witim pipol wea wei bilong olketa hem nogud. Diswan minim tu olketa wea sei olketa worshipim Jehovah bat olketa no obeyim hem. Sapos olketa hia duim bigfala sin and no repent, iumi mas stop for associate witim olketa nao.—Rome 16:17, 18.
6 Hem wei bilong iumi olketa man for laek mekem fren bilong iumi hapi and for olketa laekem iumi. So sapos iumi associate witim olketa wea no obeyim God, maet iumi tu start for duim olketa nogud samting wea olketa duim. Olsem example, sapos iumi associate witim pipol wea savve durong and olobaot, maet bae iumi kamap olsem olketa tu. Datwan nao kasem samfala brata and sista bilong iumi. Olketa hia wea no laek for repent, olketa disfellowship. (1 Cor. 5:11-13) And sapos olketa no repent, maet bae olketa kasem samting wea aposol Peter story abaotem.—Readim 2 Peter 2:20-22.
7. Hu nao iumi shud fren gud witim?
7 Nomata iumi laek for kaen long evriwan, iumi shud no klos long olketa wea no obeyim God. Hem barava no wise for eni Witness bilong Jehovah for stap witim olketa narawan wea no tinghae long olketa standard bilong God, nomata olketa relative tu. Hem rong tu for frenim eniwan wea no worshipim Jehovah. Samting wea barava important nao hem for God hapi long iumi winim wei for pipol wea no lovem God hapi long iumi. Iumi shud fren gud nomoa witim olketa wea duim wanem God laekem. Jesus sei: “Eniwan wea duim wanem God hem laekem nao hem brata, sista, and mami bilong mi.”—Mark 3:35.
8. Wanem nao kamaot from wei wea olketa Israelite associate witim pipol wea wei bilong olketa hem nogud?
8 Barava nogud samting savve kamaot from wei for associate witim pipol wea wei bilong olketa hem nogud. Tingim samting wea happen long olketa Israelite. Bifor olketa kasem Promis Land, Jehovah warnim olketa abaotem pipol wea stap long there. Hem sei: “Iufala mas no baodaon long olketa god bilong olketa or worshipim olketa, and iufala mas no duim wanem olketa duim. Bat iufala mas distroem olketa idol and pisisim olketa ston post bilong olketa. Iufala mas worshipim God bilong iufala Jehovah.” (Ex. 23:24, 25) Bat staka Israelite no obeyim wanem God talem and gogo olketa no faithful long hem. (Ps. 106:35-39) Wanem nao kamaot from datwan? Jehovah rejectim nation bilong Israel and chusim Christian kongregeson for kamap pipol bilong hem.—Acts 2:1-4.
CAREFUL LONG WANEM IU CHUS FOR READIM AND LUKLUK LONG HEM
9. Hao nao olketa samting long disfala world savve spoelem wei wea iumi fren witim Jehovah?
9 Staka samting long disfala world, olsem olketa TV program, olketa website, and olketa buk, savve spoelem wei wea iumi fren witim Jehovah. Olketa samting hia no helpem olketa Christian for garem faith long Jehovah and olketa promis bilong hem. Bat olketa encouragem pipol for trustim disfala nogud world bilong Satan. So iumi mas careful for no readim, herem, or lukluk long olketa samting wea savve mekem iumi laekem “wanem pipol long disfala world laekem.”—Titus 2:12.
10. Wanem nao bae happen long evri nogud samting wea pipol long world readim and lukluk long hem?
10 Klosap nao world bilong Satan and evri nogud samting wea pipol readim and lukluk long hem bae finis. Bible sei: “World bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.” (1 John 2:17) And man wea raetem psalm hem sei: “Olketa wea wicked bae finis.” Then hem sei: “God bae givim earth long olketa wea hambol, and olketa bae hapi fogud bikos evriwan bae garem peace.” And hem sei tu: “Olketa wea raeteous bae stap long earth, and olketa bae stap for olowe.”—Ps. 37:9, 11, 29.
11. Wanem nao God duim for helpem iumi gohed faithful long hem?
11 Organization bilong Jehovah hem helpem iumi for obeyim God and for kasem laef olowe, wea datwan hem barava difren from wanem world bilong Satan duim. Jesus prea olsem long Jehovah: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.” (John 17:3) Jehovah iusim organization bilong hem for givim iumi staka spiritual kaikai for strongim faith bilong iumi. Olsem example, iumi garem staka magasin, brochure, buk, video, and information long Web site bilong iumi wea helpem iumi for gohed worshipim Jehovah. Iumi garem tu olketa meeting evri week insaed long winim 110,000 kongregeson evriwea long world. Wanem iumi lanem from Bible long olketa meeting and assembly savve strongim faith bilong iumi long Jehovah and long olketa promis bilong hem.—Heb. 10:24, 25.
MARITIM NOMOA SAMWAN WEA WORSHIPIM JEHOVAH
12. Wanem nao Bible minim taem hem sei for maritim nomoa “wanfala disaepol bilong Christ”?
12 Olketa Christian wea laek for marit mas careful long hu nao olketa chus for frenim. Bible talem disfala warning: “Iufala mas no join witim olketa wea no biliv. Hem hard tumas for samting wea raeteous hem join witim samting wea no stret, or for laet hem stap tugeta witim darkness.” (2 Cor. 6:14) Bible sei olketa wea worshipim Jehovah mas maritim nomoa “wanfala disaepol bilong Christ,” wea minim for maritim nomoa samwan wea dedicate and baptaes and wea followim olketa standard bilong Jehovah long laef bilong hem. (1 Cor. 7:39) Taem iu maritim samwan wea lovem Jehovah hem bae helpem iu for gohed faithful for worshipim God.
13. Wanem law nao God givim long olketa Israelite saed long marit?
13 Jehovah savve wanem nao hem best samting for iumi, and komand bilong hem for maritim nomoa “wanfala disaepol bilong Christ” hem no niu samting. Olsem example, tingim wanem Jehovah talem long olketa Israelite abaotem pipol wea no worshipim hem. Hem talem Moses for givim disfala law long olketa Israelite: “Iufala mas no maritim olketa. Iufala mas no givim dota bilong iufala long son bilong olketa, and no tekem dota bilong olketa for son bilong iufala. Diswan hem bikos olketa bae mekem son bilong iufala for lusim God and worshipim olketa nara god, and Jehovah bae barava kros long iufala, and bae hem kwiktaem finisim iufala.”—Deut. 7:3, 4.
14, 15. Wanem nao kasem Solomon from hem no obeyim law bilong Jehovah?
14 No longtaem bihaen Solomon kamap king long Israel, hem prea long Jehovah for givim wisdom long hem, and Jehovah ansarem prea bilong hem. Gogo staka pipol savve abaotem wisdom bilong King Solomon, and olketa gudfala samting wea olketa Israelite kasem anda long rul bilong hem. Taem queen bilong Sheba visitim Solomon, hem sei: “Wisdom and riches bilong iu barava winim wanem mi herem.” (1 Ki. 10:7) Bat example bilong Solomon showimaot tu wanem savve happen long man taem hem no followim komand bilong God for maritim nomoa samwan wea worshipim Jehovah.—Eccl. 4:13.
15 Nomata Jehovah givim Solomon staka samting, hem no obeyim datfala law bilong God. Solomon “lovem staka woman bilong olketa nara kantri” wea no worshipim Jehovah, and gogo hem garem 700 waef and 300 concubine. Wanem nao kamaot from datwan? Taem Solomon hem olo, olketa waef bilong hem “switim hem for worshipim olketa nara god, . . . and Solomon duim olketa samting wea Jehovah no hapi long hem.” (1 Ki. 11:1-6) From Solomon associate witim olketa wea no worshipim Jehovah, datwan mekem hem for lusim Jehovah. Sapos datwan happen long King Solomon, hem savve happen long eniwan tu. Diswan hem wanfala warning for eni Christian wea tingting for maritim samwan wea no lovem Jehovah!
16. Wanem kaonsel nao Bible talem for Christian wea hasband or waef bilong hem no worshipim Jehovah?
16 Waswe sapos samwan hem marit finis bifor hem kam insaed long truth? Bible sei: “Iufala olketa waef mas stap anda long hasband bilong iufala. Then nomata sapos eniwan long olketa no obeyim toktok bilong God, gudfala wei bilong waef nao bae mekem olketa biliv nomata waef no talem eni samting.” (1 Pet. 3:1) Disfala principle hem fitim tu hasband wea waef bilong hem no worshipim Jehovah. Datfala kaonsel bilong Bible hem klia: Hasband or waef mas showimaot gudfala wei insaed long marit, and followim olketa standard bilong God. Taem marit partner bilong iu lukim olketa gudfala wei bilong iu, maet hem tu bae laek for worshipim Jehovah. Datwan hem happen finis long staka Christian.
ASSOCIATE WITIM OLKETA WEA LOVEM JEHOVAH
17, 18. Wanem nao helpem Noah for no dae long datfala Flood, and wanem nao helpem olketa tru Christian long first century for no dae taem Jerusalem hem finis?
17 Sapos iumi associate witim pipol wea no lovem Jehovah, datwan savve spoelem gudfala wei bilong iumi. Bat sapos iumi garem olketa gudfala fren, datwan savve helpem iumi for gohed faithful long Jehovah. Tingim gudfala example bilong Noah. Long taem bilong hem, “wei bilong pipol long earth hem barava nogud tumas and tingting bilong olketa hem nogud olowe.” (Gen. 6:5) So Jehovah disaed for finisim world long datfala taem. Bat Noah hem difren. Bible sei “Noah hem wanfala raeteous man” wea “evritaem duim wanem trufala God laekem.”—Gen. 6:7-9.
18 Noah hem no associate witim pipol wea no lovem Jehovah. Hem and famili bilong hem gohed busy for wakem ark, and tu, hem “preach abaotem samting wea raeteous.” (2 Pet. 2:5) Noah, waef bilong hem, thrifala son bilong hem, and waef bilong olketa nao associate tugeta. Olketa gohed busy for duim wanem Jehovah laekem, and bikos long datwan olketa no dae long datfala Flood. Iumi evriwan kam from laen bilong Noah, so iumi tinghae long wei wea Noah and famili bilong hem obeyim Jehovah and no associate witim nogud pipol. Olketa Christian long first century tu no associate witim pipol wea no lovem Jehovah. From olketa obeyim Jehovah olketa no dae taem Jerusalem hem finis long 70 C.E.—Luke 21:20-22.
Wei for associate witim olketa wea lovem Jehovah distaem savve helpem iumi for tingim laef long niu world (Paragraf 19 storyim diswan)
19. Wanem nao bae helpem iumi for gohed faithful long Jehovah?
19 Olsem Noah and famili bilong hem, and olketa Christian long first century, iumi tu mas no associate witim eniwan wea no lovem Jehovah. Staka million faithful brata and sista stap wea iumi savve associate witim olketa. Olketa bae helpem iumi “gohed for faithful” long disfala taem wea evri samting hem hard tumas. (1 Cor. 16:13; Prov. 13:20) Hem bae nambawan samting for stap laef taem disfala nogud world hem finis, and tu, for laef insaed long niu world bilong Jehovah! Dastawe hem barava important for iumi no associate witim pipol wea no lovem Jehovah!