Barava Tinghae Long ‘Olketa wea No Strong Olsem Man’

Barava Tinghae Long ‘Olketa wea No Strong Olsem Man’

APOSOL Peter hem sei: ‘Iufala hasband, gohed for stap witim waef bilong iufala fitim savve. Givim honor long olketa from olketa woman and olketa no strong olsem man.’ (1 Peter 3:7) Waswe, disfala scripture hia hem daonem olketa woman from olketa “no strong olsem man”? Bae iumi lukim wanem nao Peter really minim taem spirit bilong God muvim hem for raetem disfala toktok.

Greek word wea olketa transleitim “honor” hem minim “price, tinghae, . . . respect.” Dastawe, wanfala Christian hasband mas deal witim waef bilong hem long kaenfala wei, long wei for showimaot hem barava kea for hem olsem hem spesol and samting wea savve isi for brek. Diswan hem no daonem olketa woman. Olsem wanfala example, tingim datfala Tiffany lotus lamp. Pipol sei hao disfala lamp wea barava luk naes tumas hem savve isi for brek. Waswe, from datfala lamp hem isi for brek hem minim hem no spesol nao? Barava nomoa nao! Long 1997, olketa salem firstfala Tiffany lotus lamp wea olketa wakem for 2.8 million (U.S.) dollar! Wei wea lamp hia savve isi for brek mekem hem garem barava hae price, hem mekem hem barava spesol.

Olsem tu, for givim honor long wanfala woman from hem no strong olsem man hem no daonem hem. For wanfala hasband stap witim waef bilong hem “fitim savve,” hem minim hem mas tingim and acceptim samting wea waef bilong hem fit for duim and no fit for duim, samting hem laekem and no laekem, tingting bilong hem abaotem olketa samting and olketa feeling bilong hem. Wanfala hasband wea barava kea for waef bilong hem luksavve and respectim hao hem and waef bilong hem garem difren tingting. From diswan, hasband tingim and respectim feeling bilong waef bilong hem, “mekem diswan no stopem prea bilong [hem].” (1 Peter 3:7) Sapos wanfala hasband hem fail for respectim waef bilong hem olsem wanfala woman, diswan bae spoelem wei wea hasband hem fren witim God. Hem barava klia tumas, Word bilong God nating daonem olketa woman. Bat, Word bilong God respectim and givim honor long olketa.

[Piksa Credit long page 32]