Jehovah Hem God Bilong Long-Safaring
“Jehovah, God wea garem mercy and kaenfala fasin, slow for kros and garem bigfala loving-kaeness.”—EXODUS 34:6.
1, 2. (a) Hu long bifor nao kasem gud samting from long-safaring bilong Jehovah? (b) Wanem nao word “long-safaring” hem minim?
PIPOL long taem bilong Noah, olketa Israelite wea wakabaot insaed wilderness witim Moses, olketa Jew wea stap long taem Jesus long earth—evriwan garem difren living. Bat evriwan kasem gud samting from sem kaenfala fasin bilong Jehovah—long-safaring. Long samfala, diswan sevem laef bilong olketa. And long-safaring bilong Jehovah savve sevem laef bilong iumi tu.
2 Wanem nao long-safaring? Wanem taem nao Jehovah showimaot, and why? Mining bilong “long-safaring” hem “wei wea man patient for go ahed strong nomata narawan duim rong samting long hem or trae for mekem hem feel kros, wea join witim wei for no givap hope for datfala wei for fren hem kamap moabeta.” So, disfala fasin hem garem purpose. Hem trae for helpem datwan wea kosim problem. Nomata olsem, wei for long-safaring no minim man acceptim samting wea no stret. Taem purpose bilong long-safaring hem fulfill or taem no eni gud reason stap for hem go ahed moa, long-safaring hem finis.
3. Wanem nao purpose bilong long-safaring bilong Jehovah, and wanem taem nao hem bae finis?
3 Nomata olketa man savve showimaot long-safaring, Jehovah nao nambawan example bilong disfala fasin. From taem wea sin spoelem wei for fren midolwan Jehovah and olketa man, Creator bilong iumi showimaot patient fasin and provaedem wei wea olketa man wea repent savve mekem moabeta wei for fren witim hem. (2 Peter 3:9; 1 John 4:10) Bat taem purpose bilong long-safaring bilong hem fulfill, God bae duim samting againstim olketa wea min for duim rong, hem bae finisim disfala wicked system.—2 Peter 3:7.
Semsem Witim Olketa Main Fasin Bilong God
4. (a) Hao nao idea bilong long-safaring hem showaot insaed Hebrew Scripture? (Lukim tu footnote.) (b) Hao nao profet Nahum storyim Jehovah, and wanem nao diswan showimaot abaotem long-safaring bilong Jehovah?
4 Long Hebrew Scripture, idea bilong long-safaring hem showaot long tufala Hebrew word wea really minim “long bilong nose” and olketa transleitim olsem “slow for kros” insaed New World Translation.a Taem hem story abaotem long-safaring bilong God, profet Nahum sei: “Jehovah no savve kros kwiktaem and hem garem bigfala paoa, and Jehovah bae no hol bak for givimaot panis.” (Nahum 1:3) So, long-safaring bilong Jehovah hem no wanfala saen wea showaot hem wik and no garem spialaen. Wei wea olmaeti God hem slow for kros and long semtaem garem bigfala paoa showaot long-safaring bilong hem kamaot from wei wea hem holem bak kros for wanfala reason. Hem garem paoa for givim panis, bat hem hol bak for duim datwan mekem hem givim chance long man wea duim rong for change. (Ezekiel 18:31, 32) So, long-safaring bilong Jehovah hem wanfala wei wea hem showimaot love bilong hem, and hem showimaot wisefala wei wea hem iusim paoa bilong hem.
5. Long wanem wei nao long-safaring bilong Jehovah hem fitim justice bilong hem?
5 Long-safaring bilong Jehovah hem fitim tu justice and raeteous fasin bilong hem. Hem showim hemseleva long Moses olsem “God wea garem mercy and kaenfala fasin, slow for kros [“long-safaring,” King James Version] and garem bigfala loving-kaeness and truth.” (Exodus 34:6) Planti year bihaen, Moses sing olsem for praisem Jehovah: “Evri wei bilong hem followim justice. Wanfala God bilong faithful fasin, wea showimaot justice evribit; hem nao raeteous and stret.” (Deuteronomy 32:4) Tru nao, mercy, long-safaring, justice, and stretfala fasin bilong Jehovah waka tugeta.
Long-Safaring Bilong Jehovah Bifor Flood
6. Wanem nambawan long-safaring nao Jehovah showimaot for olketa pikinini bilong Adam and Eve?
6 Wei wea Adam and Eve disobey long Eden hem spoelem evribit spesol wei for fren wea tufala garem witim loving Creator bilong tufala, Jehovah. (Genesis 3:8-13, 23, 24) Diswan affectim pikinini bilong tufala, wea born witim sin, wei for no perfect, and dae. (Romans 5:17-19) Nomata first hasband and waef min for sin, Jehovah letem tufala for garem pikinini. Bihaen, hem showimaot love taem hem provaedem wei for olketa pikinini bilong Adam and Eve for fren bak witim hem. (John 3:16, 36) Aposol Paul explainim olsem: “God showim love bilong hem long iumi long wei wea, taem iumi sinner yet, Christ hem dae for iumi. So from iumi kamap raeteous thru long blood bilong hem, bigfala reason moa stap for iumi sev from kros, thru long hem. From sapos, taem iumi enemy, iumi kam bak moa long God thru long dae bilong Son bilong hem, long bigfala wei moa, from distaem iumi kam bak finis, iumi bae sev thru long laef bilong hem.”—Romans 5:8-10.
7. Hao nao Jehovah showimaot long-safaring bifor long Flood, and why nao genereson wea laef bifor Flood fit for distroe evribit?
7 Long-safaring bilong Jehovah hem showaot long taem bilong Noah. Winim wan handred year bifor Flood, “God lukim earth and, lukim! hem nogud nao, bikos evri man hem spoelem wei bilong hem long earth.” (Genesis 6:12) Nomata olsem, for lelebet taem, Jehovah showimaot long-safaring for olketa man. Hem sei: “Spirit bilong mi bae no deal olowe long man from hem flesh nomoa. For fitim datwan olketa day bilong hem bae kasem wan handred and twenti year.” (Genesis 6:3) Datfala 120 year hem mekem Noah garem taem for garem famili and—taem God komandim hem—hem buildim wanfala ark and warnim pipol abaotem Flood wea bae kam. Aposol Peter raet olsem: “Patient fasin [wanfala fasin wea join witim long-safaring] bilong God hem weit long taem bilong Noah, taem olketa still buildim ark, wea tu-thri pipol nomoa, hem nao, eitfala soul, stap sef antap long wata.” (1 Peter 3:20) Tru, olketa wea no part long famili bilong Noah “nating lisin” long preaching waka bilong hem. (Matthew 24:38, 39) Bat taem Noah buildim ark and waka for staka year olsem “man wea preach abaotem raeteous fasin,” Jehovah givim bigfala chance long pipol wea stap long taem bilong Noah for repent from raf wei bilong olketa and servem Hem. (2 Peter 2:5; Hebrews 11:7) Gogo datfala wicked genereson fit for distroe evribit.
Spesol Long-Safaring for Israel
8. Hao nao Jehovah showimaot long-safaring for nation bilong Israel?
8 Long-safaring bilong Jehovah for Israel hem go ahed for winim 120 year. Insaed 1,500 year wea olketa stap olsem pipol wea God chusim, klosap evritaem olketa Israelite testim long-safaring bilong God. Tu-thri week bihaen olketa sev long Egypt, olketa tan go long wei for worshipim idol, wea showimaot bigfala wei for no respectim Jehovah wea Sevem olketa. (Exodus 32:4; Psalm 106:21) Insaed olketa year bihaen, olketa Israelite komplen abaotem kaikai wea Jehovah provaedem long wilderness long mirakol wei, olketa komplen againstim Moses and Aaron, tok againstim Jehovah, duim fornication witim olketa heathen, and share tu long Baal worship. (Numbers 11:4-6; 14:2-4; 21:5; 25:1-3; 1 Corinthians 10:6-11) Jehovah fit for finisim pipol bilong hem, bat hem showimaot long-safaring.—Numbers 14:11-21.
9. Hao nao Jehovah showimaot hem wanfala God bilong long-safaring long taem bilong olketa Judge and taem wea olketa king rul?
9 Long taem bilong olketa Judge, planti taem olketa Israelite foldaon long wei for worshipim idol. Taem olketa duim olsem, Jehovah letem enemy for winim olketa. Bat taem olketa repent and singaot long hem for help, hem showimaot long-safaring and givim olketa judge for sevem olketa. (Judges 2:17, 18) Long taem wea olketa king rul, samfala king nomoa hol strong long klin worship bilong Jehovah. And nomata anda long olketa faithful king, planti taem pipol mixim tru worship witim giaman wan. Taem Jehovah sendem olketa profet for warnim olketa againstim fasin for no faithful, planti taem pipol hia want for lisin long olketa nogud priest and giaman profet nomoa. (Jeremiah 5:31; 25:4-7) Tru nao, olketa Israelite persecutim olketa faithful profet bilong Jehovah and killim dae samfala long olketa tu. (2 Chronicles 24:20, 21; Acts 7:51, 52) Nomata olsem, Jehovah go ahed for showimaot long-safaring.—2 Chronicles 36:15.
Long-Safaring Bilong Jehovah No Lus
10. Wanem taem nao long-safaring bilong Jehovah kasem spialaen bilong hem?
10 Nomata olsem, history showimaot hao long-safaring bilong Jehovah garem spialaen. Long 740 B.C.E., hem letem olketa bilong Assyria for winim ten-tribe kingdom bilong Israel and tekem pipol long there olsem prisoner. (2 Kings 17:5, 6) Long end bilong next wan handred year, hem letem olketa bilong Babylon for attakim tu-tribe kingdom bilong Judah and distroem Jerusalem and temple bilong hem.—2 Chronicles 36:16-19.
11. Hao nao Jehovah savve showimaot long-safaring nomata taem hem givim judgment?
11 Nomata taem hem givim judgment againstim Israel and Judah, Jehovah no forget for showimaot long-safaring. Thru long profet bilong hem Jeremiah, Jehovah talem profesi hao wanfala wei for kamap gud moa stap for pipol wea hem chusim. Hem sei: “For fitim wei wea seventi year hem fulfill long Babylon, mi bae lukluk long iufala, and mi bae duim samting for iufala followim gudfala toktok bilong mi for tekem iufala kam bak long disfala ples. And mi bae openem wei for iufala faendem mi . . . And mi bae hipimap sekson bilong olketa prisoner bilong iufala and kolektem iufala tugeta from evri nation and from evri ples wea mi sendem iufala go long hem.”—Jeremiah 29:10, 14.
12. Saed long kakam bilong Messiah, hao nao wei wea smol sekson bilong olketa Jew go bak long Judah hem will bilong God?
12 Tru nao, wanfala smol sekson from olketa Jew wea prisoner go bak long Judah and startim moa worship bilong Jehovah long temple wea olketa buildim moa long Jerusalem. For fitim purpose bilong Jehovah, disfala sekson bae kamap olsem “wata bilong morning from Jehovah,” wea givim strong and gudfala living. Olketa bae no fraet and strong tu olsem “wanfala lion midolwan olketa animal bilong forest.” (Micah 5:7, 8) Disfala toktok maet fulfill long taem bilong olketa Maccabee taem olketa Jew anda long famili bilong Maccabee aotem olketa enemy from Promis Land and dedicatem moa datfala temple wea kamap dirty. So, datfala land and datfala temple stap go kasem taem narafala faithful sekson bae fit for welkamim Son bilong God taem hem kam long there olsem Messiah.—Daniel 9:25; Luke 1:13-17, 67-79; 3:15, 21, 22.
13. Nomata bihaen olketa Jew killim dae Son bilong hem, hao nao Jehovah go ahed for showimaot long-safaring long olketa?
13 Nomata bihaen olketa Jew killim dae Son bilong hem, Jehovah go ahed for showimaot long-safaring long olketa for thri and haf year moa, givim chance for olketa nomoa for kamap part long spiritual seed bilong Abraham. (Daniel 9:27)b Bifor and bihaen long year 36 C.E., samfala Jew acceptim diswan, dastawe olsem Paul talem bihaen, “wanfala sekson kamap wea hem chusim thru long kaeness wea iumi no fit for kasem.”—Romans 11:5.
14. (a) Long 36 C.E., hu nao kasem privilege for kamap part long spiritual seed bilong Abraham? (b) Hao nao Paul talemaot feeling bilong hem abaotem wei wea Jehovah chusim olketa member bilong spiritual Israel?
14 Long 36 C.E., hem firstaem for olketa wea no Jew or proselyte for kasem privilege for kamap part long spiritual seed bilong Abraham. Eniwan wea acceptim kasem tu kaeness bilong Jehovah wea iumi no fit for kasem and long-safaring. (Galatians 3:26-29; Ephesians 2:4-7) Taem hem storyim bigfala wei for tinghae long wisdom and goal bilong long-safaring bilong Jehovah wea showimaot mercy, for hipimap full namba bilong olketa wea insaed spiritual Israel, Paul sei: “Riches and wisdom and savve bilong God hem barava deep tumas! Man no savve minim evribit olketa judgment and wei bilong hem!”—Romans 11:25, 26, 33; Galatians 6:15, 16.
Long-Safaring for Nem Bilong Hem
15. Wanem nao main reason why God showimaot long-safaring, and wanem kwestin nao needim taem for stretem?
15 Why nao Jehovah showimaot long-safaring? Main reason hem for mekhae long holy nem bilong hem and vindicatem olmaeti rul bilong hem. (1 Samuel 12:20-22) Kwestin wea Satan askem abaotem wei wea Jehovah iusim rul bilong Hem, needim taem for stretem long wei wea bae satisfaem mind bilong evri creation. (Job 1:9-11; 42:2, 5, 6) Dastawe, taem pipol bilong hem kasem hevi long Egypt, Jehovah talem Pharaoh: “Mi letem iu stap from disfala samting, for showim iu paoa bilong mi and for mekem evriwan savve long nem bilong mi long evri ples long earth.”—Exodus 9:16.
16. (a) Hao nao long-safaring bilong Jehovah mekem wei kamap for redyim pipol for nem bilong hem? (b) Hao nao bae nem bilong Jehovah kamap holy and wei for vindicatem olmaeti rul bilong hem kamap?
16 Aposol Paul talem toktok bilong Jehovah for Pharaoh taem hem explainim waka bilong long-safaring bilong God for givim glory long holy nem bilong Hem. And then Paul raet olsem: “So, sapos God, nomata hem fit for showimaot kros bilong hem and mekem pipol savve long paoa bilong hem, hem showimaot long-safaring long olketa dish bilong kros wea fit for finis evribit, for mekem hem savve showimaot richfala samting bilong glory bilong hem long olketa dish bilong mercy, wea hem redyim firstaem for kasem glory, hem nao iumi, wea hem kolemaot no from olketa Jew nomoa, bat from olketa nation tu, hem hao? Hem olsem hem talem insaed Hosea tu: ‘Olketa wea no pipol bilong mi, mi bae kolem “pipol bilong mi.”’” (Romans 9:17, 22-25) From Jehovah showimaot long-safaring, hem fit for tekemaot from olketa nation “wanfala pipol for nem bilong hem.” (Acts 15:14) Anda long Hed bilong olketa, Jesus Christ, olketa “holy wan” hia bae rul insaed Kingdom wea Jehovah bae iusim for mekem holy nambawan nem bilong Hem and vindicatem olmaeti rul bilong Hem.—Daniel 2:44; 7: 13, 14, 27; Revelation 4:9-11; 5:9, 10.
Long-Safaring Bilong Jehovah Givim Salvation
17, 18. (a) Wei for duim wanem samting nao maet mekem iumi tok againstim wei wea Jehovah showimaot long-safaring? (b) Iumi kasem encouragement for ting waswe long long-safaring bilong Jehovah?
17 Start long taem wea olketa man firstaem foldaon long sin kam kasem distaem, Jehovah showimaot wei wea hem wanfala God bilong long-safaring. Long-safaring bilong hem bifor long Flood letem inaf taem for givim warning and for buildim samting wea bae sevem olketa. Bat patient fasin bilong hem kasem spialaen bilong hem, and Flood hem kam. Olsem tu distaem, Jehovah showimaot bigfala long-safaring, and diswan hem stap longtaem winim wanem samfala tingim. Nomata olsem, datwan hem no reason for feel wiki. Man wea feel wiki hem olsem hem tok againstim long-safaring bilong God. Paul ask olsem: “Waswe, iu lukdaonem riches bilong kaenfala fasin and patient fasin and long-safaring bilong hem, bikos iu no savve hao kaenfala [fasin] bilong God hem trae for leadim iu for repent?”—Romans 2:4.
18 No eniwan long iumi savve long haomas long-safaring bilong God nao iumi needim for mek sure hem appruvim iumi for kasem salvation. Paul kaonselem iumi for “go ahed for waka for salvation bilong [iumi] witim wei for fraet and seksek.” (Philippians 2:12) Aposol Peter hem raet olsem for olketa Christian: “Jehovah hem no slow long saed bilong promis bilong hem, olsem samfala pipol tingim wei for slow, bat hem patient witim iufala from hem no laekem eniwan for dae bat hem laekem evriwan for repent.”—2 Peter 3:9.
19. Long wanem wei nao iumi savve iusim gud long-safaring bilong Jehovah?
19 So, iumi mas no wiki long wei wea Jehovah deal witim evri samting. Bat, iumi mas followim kaonsel wea Peter givim and “tingim patient fasin bilong Lord bilong iumi olsem salvation.” Salvation bilong hu? Bilong iumi and bilong planti narawan wea still need for herem “gud nius bilong kingdom.” (2 Peter 3:15; Matthew 24:14) Diswan bae helpem iumi for tinghae long barava kaenfala fasin bilong long-safaring bilong Jehovah and muvim iumi for showimaot long-safaring taem iumi deal witim nara pipol.
[Olketa Footnote]
a Long Hebrew languis, planti taem olketa iusim datfala word for “nose” or “nostril” (ʼaph) long tokpiksa wei for minim kros. Diswan hem bikos taem man kros hem breath big thru long nose bilong hem.
b For moa information long disfala profesi, lukim buk Tingting Strong Long Profesi Bilong Daniel!, page 191-4, wea Olketa Jehovah’s Witness pablisim.
Waswe, Iu Savve Minim?
• Wanem nao Bible minim taem hem iusim word “long-safaring”?
• Hao nao Jehovah showimaot long-safaring bifor long Flood, bihaen Babylon kasholem Judah, and long first century C.E.?
• Jehovah showimaot long-safaring for olketa wanem important reason?
• Hao nao iumi shud ting long long-safaring bilong Jehovah?
[Piksa long page 9]
Long-safaring bilong Jehovah bifor long Flood givim pipol planti chance for repent
[Piksa long page 10]
Bihaen Babylon foldaon, olketa Jew kasem gud samting from long-safaring bilong Jehovah
[Piksa long page 11]
Long first century, olketa wea Jew and wea no Jew kasem gud samting from long-safaring bilong Jehovah
[Olketa Piksa long page 12]
Olketa Christian distaem iusim gud long-safaring bilong Jehovah