Olketa Vision and Profesi Abaotem Kingdom Olketa Fulfill
“Hem gud tumas for iufala tingting strong long [wanem olketa profet talem], wea hem olsem wanfala lamp wea shaen long ples wea dark.”—2 PETER 1:19.
1. World hem hao distaem, bat why nao planti million pipol garem hope?
WORLD distaem hem fulap witim enikaen problem. Olketa problem wea man feisim olsem disaster saed long environment, and terrorism, kamap moa big long evri ples and barava tumas nao. Olketa religion tu bat no savve help for stretem datwan. For tok stret, staka taem olketa nao mekem problem kamap worse from olketa sapotim bighed fasin, fasin for heit, and wei for mekhae long nation wea divaedem pipol. Tru tumas, olsem profesi long Bible talem, “olketa nation” stap insaed long “dark cloud.” (Isaiah 60:2) Bat, nomata olsem, planti million pipol garem strongfala hope for future. Why nao olsem? Bikos olketa lisin gud long profesi bilong God wea olsem “wanfala lamp wea shaen long ples wea dark.” Olketa letem message bilong God wea stap insaed Bible for leadim olketa.—2 Peter 1:19.
2. Olsem profesi bilong Daniel abaotem “taem bilong end” hem showimaot, hu nomoa bae kasem spiritual savve?
2 Profet Daniel story abaotem “taem bilong end” taem hem sei: “Planti bae muv raon, and trufala savve bae kamap staka. Planti bae klinim olketa seleva and mekem olketa seleva kamap white, and bae olketa kamap moa klin. And wicked pipol bae duim nogud samting, and no eni wicked man bae garem fasin for minim samting; bat olketa wea garem fasin for luksavve bae minim.” (Daniel 12:4, 10) Olketa wea bae minim olketa spiritual samting nao hem olketa wea “muv raon” insaed Word Bilong God, wea minim olketa waka hard for study gud insaed datwan, followim olketa standard bilong hem, and traem best for duim will bilong hem.—Matthew 13:11-15; 1 John 5:20.
3. Long olketa year bilong 1870, wanem important samting nao olketa Bible student luksavve?
3 Bifor “olketa last day” start long olketa year bilong 1870, Jehovah God mekem savve abaotem “olketa holy secret bilong kingdom long heven” kamap moa klia. (2 Timothy 3:1-5; Matthew 13:11) Long wei wea difren from tingting bilong staka pipol, olketa Bible student luksavve hao pipol long earth bae no lukim taem Christ hem kam bak. So, bihaen Jesus kamap king long heven, hem kam bak long wei wea hem startim waka bilong hem olsem King for disfala earth. Wanfala saen wea garem didifren part nao hem mekem olketa disaepol bilong hem luksavve hem start for rul finis long heven.—Matthew 24:3-14.
Taem Samting wea Showaot Long Vision Hem Fulfill
4. Hao nao Jehovah strongim faith bilong olketa servant bilong hem distaem?
4 Datfala vision wea Christ change and kasem glory, hem showimaot long spesol wei glory wea Christ bae kasem long Kingdom. (Matthew 17:1-9) Datwan strongim faith bilong Peter, James, and John long taem wea staka stop for followim Jesus bikos hem no duim wanem olketa tingse bae hem duim. Olsem tu, long disfala taem bilong end, Jehovah hem strongim faith bilong olketa servant bilong hem long wei for givim olketa moa savve abaotem wei wea datfala vision and staka nara profesi wea join witim hem fulfill. For strongim faith bilong iumi, bae iumi lukluk long wei wea disfala vision and olketa profesi fulfill.
5. Hu nao datfala star bilong morning, and wanem taem and hao nao hem “kamap”?
5 Taem aposol Peter story abaotem datfala vision wea Jesus change and kasem glory, hem sei olsem: “From olketa samting hia nao mifala barava biliv strong go moa long wanem olketa profet talem. And hem gud tumas iufala tingting strong long datwan, wea hem olsem wanfala lamp wea shaen long ples wea dark, hem nao heart bilong iufala, wea shaen go kasem taem wea star bilong morning hem kamap.” (2 Peter 1:19) Datfala tokpiksa “star bilong morning” hem Jesus Christ wea kasem glory. (Revelation 22:16) Hem “kamap” long 1914 taem Kingdom bilong God hem start for rul long heven, wea markem start bilong wanfala niu tokpiksa day saed long wei wea plan bilong God gohed for fulfill. (Revelation 11:15) Long datfala vision wea Jesus change and kasem glory, Moses and Elijah nao story witim Jesus. Hu nao tufala hia piksarem?
6, 7. Insaed long datfala vision wea Jesus change and kasem glory, hu nao Moses and Elijah piksarem, and wanem nao Bible sei abaotem olketa hia?
6 From Moses and Elijah sharem glory bilong Christ long datfala vision, hem klia hao tufala faithful witness hia piksarem olketa wea rul witim Jesus insaed Kingdom bilong hem. Diswan hem fitim vision wea Daniel lukim abaotem Messiah wea rul olsem king. Daniel lukim “samwan wea olsem son bilong man” wea kasem ‘rul wea bae no finis’ from Jehovah God, wea hem nao “man from taem bifor kam.” Bat tingim wanem Daniel lukim no longtaem bihaen. Hem raet olsem: “Datfala kingdom and datfala rul and datfala glory bilong olketa kingdom anda long heven, olketa givim long pipol wea olketa nao olketa holy wan bilong Most Hae.” (Daniel 7:13, 14, 27) Tru nao, winim faev handred year bifor datfala vision wea Jesus change and kasem glory, God showimaot hao samfala “holy wan” bae kasem tu glory witim Christ.
7 Hu nao olketa holy wan insaed vision bilong Daniel? Aposol Paul hem storyim olketa hia taem hem sei: “Datfala spirit seleva givim witness witim spirit bilong iumi hao iumi nao olketa pikinini bilong God. So, sapos iumi olketa pikinini, iumi garem right olsem pikinini tu: right wea kam from God, bat right wea semsem witim Christ, sapos iumi safa tugeta mekem iumi savve kasem glory tugeta.” (Romans 8:16, 17) Olketa holy wan hia nao olketa disaepol bilong Jesus wea spirit anointim. Long Revelation, Jesus sei: “Long man wea win bae mi askem hem for sidaon witim mi long throne bilong mi, olsem wei wea mi win and sidaon witim Dadi bilong mi long throne bilong hem.” Olketa hia wea resurrect wea “win” bae rul ovarem full earth witim Jesus. Full namba bilong olketa hem 144,000.—Revelation 3:21; 5:9, 10; 14:1, 3, 4; 1 Corinthians 15:53.
8. Long wanem wei nao olketa disaepol bilong Jesus wea spirit anointim duim waka wea semsem olsem Moses and Elijah, and wanem nao kamaot from diswan?
8 Bat why nao Moses and Elijah piksarem olketa Christian wea spirit anointim? Reason hem bikos taem olketa Christian hia stap yet long earth, olketa duim waka wea klosap semsem witim waka wea Moses and Elijah duim. Example nao, nomata olketa kasem persecution, olketa duim waka for witness abaotem Jehovah. (Isaiah 43:10; Acts 8:1-8; Revelation 11:2-12) Olsem Moses and Elijah, olketa no fraet for showimaot wei wea giaman religion hem no stret and long semtaem encouragem honest pipol for worshipim God nomoa. (Exodus 32:19, 20; Deuteronomy 4:22-24; 1 Kings 18:18-40) Waswe, waka bilong olketa kasem eni gud samting? Barava nao! Olketa help for hipimap full namba bilong sekson wea spirit anointim, and tu, olketa helpem planti million “nara sheep” for willing for stap anda long Jesus Christ.—John 10:16; Revelation 7:4.
Christ Winim Faet Bilong Hem
9. Hao nao Revelation 6:2 hem showimaot samting wea Jesus duim distaem?
9 Distaem Jesus hem wanfala King wea garem bigfala paoa. Hem no raed antap wanfala young donkey nao. Bible storyim hao hem raedem wanfala horse, wea long Bible diswan piksarem war. (Proverbs 21:31) Long Revelation 6:2 hem sei: “Lukim! wanfala white horse; and man wea sidaon antap long hem garem wanfala bow; and olketa givim hem wanfala crown, and hem go aot for win and for winim faet bilong hem.” Nara samting moa, David, man wea raetem psalm hem sei olsem abaotem Jesus: “Stik bilong strong bilong iu, Jehovah bae sendem go aot from Zion, and sei: ‘Go and rul midolwan olketa enemy bilong iu.’”—Psalm 110:2.
10. (a) Hu nao olketa first wan wea Jesus win againstim taem hem kamap King? (b) Hao nao disfala wei wea Christ win hem affectim world?
10 Firstfala wei wea Jesus win, hem taem hem winim Satan and olketa demon, wea hem barava strongfala enemy bilong hem. Hem aotem olketa from heven and torowem olketa kam daon long earth. Olketa wicked spirit hia savve olketa garem lelebet taem nomoa, so olketa kosim bigfala trabol taem olketa aotem kros bilong olketa long olketa man. Revelation sei thrifala man wea raedem thrifala horse nao piksarem bigfala trabol hia. (Revelation 6:3-8; 12:7-12) Olsem profesi wea Jesus talem abaotem “saen for markem taem wea [hem] stap moa and taem bilong end bilong disfala world,” thrifala man hia mekem war, bigfala hangre, and nogud sik kamap. (Matthew 24:3, 7; Luke 21:7-11) Olsem pain bilong woman wea redi for bornem pikinini, olketa “pain bilong trabol” hia bae kakamap moa big go kasem taem Christ “winim faet bilong hem,” taem hem distroem full organization bilong Satan long earth.a—Matthew 24:8.
11. Hao nao history bilong Christian kongregeson pruvim Christ hem rul olsem king?
11 Paoa wea Jesus garem for rul olsem king, hem showaot klia tu long wei wea hem keepim Christian kongregeson sef, mekem hem savve duim waka for preachim message bilong Kingdom evriwea long world. Nomata Bigfala Babylon—wea hem nao world rul bilong giaman religion—and olketa raf gavman againstim waka for preach, disfala waka hem gohed and kamap big winim eni narataem long history bilong world. (Revelation 17:5, 6) Datwan barava pruvim hao Christ hem King distaem!—Psalm 110:3.
12. Why nao staka pipol no luksavve Christ hem start for rul finis?
12 Bat sorre samting nao, planti pipol and staka million wea sei olketa Christian fail for luksavve hao olketa bigfala samting wea happen long earth, fulfillim olketa vision and profesi. Olketa tok spoelem tu sekson wea witness abaotem Kingdom bilong God. (2 Peter 3:3, 4) Why nao olsem? Bikos Satan blindim olketa. (2 Corinthians 4:3, 4) Tru nao, wei wea hem blindim pipol wea sei olketa Christian hem start bifor kam, and hem mekem olketa lusim datfala nambawan hope bilong Kingdom.
Lusim Hope for Kingdom
13. Wei for blind long spiritual wei hem lead go long wanem?
13 Jesus talem profesi hao olketa apostate, wea olsem rabis grass wea man plantim witim wheat, bae kamap insaed long Christian kongregeson and tanem pipol go difren. (Matthew 13:24-30, 36-43; Acts 20:29-31; Jude 4) Gogo, sekson hia sei olketa heathen celebration, kastom, and teaching, olketa “Christian” samting. Olsem example, celebration bilong Christmas hem really kam from wei for worshipim Mithra and Saturn, tufala heathen god. Bat wanem nao muvim olketa wea sei olketa Christian, for followim olketa celebration olsem? The New Encyclopædia Britannica (1974) hem sei: “Christmas, wea hem nao festival bilong taem wea Jesus Christ hem born, hem kamap from staka start for tingse Christ no klosap for kam bak.”
14. Long wanem wei nao olketa teaching bilong Origen and Augustine teachim difren samting abaotem Kingdom?
14 Tingim tu wei wea pipol minim rong datfala word “kingdom.” Datfala buk The Kingdom of God in 20th-Century Interpretation hem sei: “Origen [wanfala savveman bilong religion wea laef samting olsem 200 year bihaen Christ] hem startim teaching wea sei ‘kingdom’ hem minim rul bilong God insaed long heart bilong man.” Wanem nao mekem Origen startim teaching olsem? Diswan no kam from Bible bat from “tingting bilong olketa man wea difren tumas from tingting bilong Jesus and firstfala church.” Long buk bilong Augustine of Hippo (354-430 C.E.) wea garem title De Civitate Dei (The City of God) hem talem hao church nao hem Kingdom bilong God. Tingting olsem wea no followim Bible hem mekem olketa church tingse hem olraet nomoa for joinim politik. And for staka handred year olketa garem paoa insaed politik and iusim diswan long raf wei tu.—Revelation 17:5, 18.
15. Long wanem wei nao Galatians 6:7 hem fulfill saed long planti giaman Christian religion?
15 Nomata olsem, distaem olketa church harvestim samting wea olketa plantim. (Galatians 6:7) Staka church start for lusim paoa wea olketa garem and olketa member bilong olketa tu. Long Europe diswan hem kamap big. Datfala magasin Christianity Today hem sei: “Distaem olketa bigfala church long Europe no ples for worship bat olketa kamap ples for pipol go wakabaot for lukluk insaed, main wan nao olketa tourist.” Sem samting kamap long olketa nara part long world tu. So diswan showimaot wanem samting nao bae kasem giaman religion? Waswe, bae hem finis evribit bikos no eniwan sapotim and givim selen long hem? And hao nao diswan bae affectim tru worship?
Reredi for Bigfala Day Bilong God
16. Wei wea olketa nation start for barava againstim Bigfala Babylon hem showimaot wanem?
16 Taem smoke and asis kamaot from wanfala volcano wea stap kwaet for planti year, diswan showimaot volcano hia klosap for bosta. Long sem wei tu, heit wea pipol garem for religion long staka part long world hem showimaot giaman religion hem klosap for finis. Klosap nao, Jehovah bae mekem olketa politik long world join tugeta for showimaot klia nogud fasin bilong datfala spiritual jury woman, Bigfala Babylon, and olketa bae distroem hem. (Revelation 17:15-17; 18:21) Waswe, fitim olketa tru Christian for fraet long datwan and olketa nara part bilong datfala “big trabol” wea bae kamap bihaen? (Matthew 24:21) Nomoa nao! Bae olketa garem planti reason for hapi taem God Judgem wicked pipol. (Revelation 18:20; 19:1, 2) Tingim example bilong Jerusalem long taem bilong olketa firstfala Christian.
17. Why nao olketa faithful servant bilong Jehovah distaem no fraet taem olketa feisim end bilong disfala world?
17 Taem army bilong Rome raonem Jerusalem long 66 C.E., olketa Christian wea wekap long spiritual wei no seke or fraet. From olketa studyim gud Word bilong God, olketa savve end bilong Jerusalem “hem klosap for kam nao.” (Luke 21:20) Olketa savve tu hao God bae givim olketa chance for ranawe go long sef ples. Taem datwan happen, olketa Christian ranawe nao. (Daniel 9:26; Matthew 24:15-19; Luke 21:21) Semsem tu distaem, olketa wea savve long God and obeyim son bilong hem no fraet taem olketa feisim end bilong disfala world. (2 Thessalonians 1:6-9) Tru nao, taem datfala big trabol hem kam, bae olketa hapi and ‘liftimap hed bilong olketa, bikos olketa savve taem for sevem olketa hem kam klosap nao.’—Luke 21:28.
18. Wanem nao bae happen taem evri sekson bilong Gog againstim olketa servant bilong Jehovah?
18 Bihaen Bigfala Babylon hem distroe, Gog bilong Magog, wea hem nao Satan, bae barava attakim olketa Witness bilong Jehovah wea stap long peace. From sekson bilong Gog olketa ‘olsem cloud for kavarem land,’ olketa tingse bae olketa nao win. Bat bae olketa seke fogud! (Ezekiel 38:14-16, 18-23) Aposol John hem raet olsem: “Mi lukim heven hem open, and lukim! wanfala white horse. And man wea sidaon long hem garem nem Faithful and Tru . . . Wanfala long sharp sword kamaot from mouth bilong hem, mekem hem savve whipim olketa nation witim datwan.” Disfala strongfala “King bilong olketa king” bae sevem olketa wea loyal for worshipim Jehovah, and bae hem killim dae evri enemy bilong olketa. (Revelation 19:11-21) Datwan barava nambawan wei wea datfala vision wea Jesus change and kasem glory hem fulfill!
19. Hao nao wei wea Christ barava win hem affectim olketa loyal disaepol bilong hem, and wanem nao olketa shud trae hard for duim distaem?
19 “Evriwan wea showimaot faith long [Jesus] bae tinghae long hem long datfala taem.” (2 Thessalonians 1:10) Waswe, iu laek for stap midolwan olketa wea barava tinghae long Son bilong God wea win? Sapos olsem, gohed for strongim faith bilong iu and ‘pruvim hao iu redi, bikos long hour wea iu no tingim, Son bilong man bae kam nao.’—Matthew 24:43, 44.
Gohed for Luk Aot Gud
20. (a) Hao nao iumi savve showimaot iumi tinghae long datfala “faithful and wise slave” wea God givim? (b) Wanem nao olketa kwestin wea iumi shud askem iumiseleva?
20 Datfala “faithful and wise slave” evritaem encouragem pipol bilong God for wekap long spiritual saed and gohed for luk aot gud. (Matthew 24:45, 46; 1 Thessalonians 5:6) Waswe, iu tinghae long olketa reminder hia? Waswe, iu iusim olketa for markem samting wea important long living bilong iu? Hem gud for askem olketa kwestin hia long iuseleva: ‘Waswe, mi barava luksavve long spiritual mining bilong olketa samting wea happen long world, and wei wea Son bilong God hem rul distaem long heven? Waswe, mi luksavve hao hem redi for judgem Bigfala Babylon and evri nara part long world bilong Satan?
21. Why nao samfala lusim wei for luksavve and ting strong long olketa spiritual samting, and wanem nao olketa mas kwiktaem for duim?
21 Samfala wea kaban witim pipol bilong God lusim wei for luksavve and ting strong long olketa spiritual samting. Waswe, maet hem from olketa no patient or no gohed strong, olsem samfala disaepol bilong Jesus bifor? Waswe, maet olketa wari bilong living, wei for aftarem tumas material samting, or persecution affectim olketa? (Matthew 13:3-8, 18-23; Luke 21:34-36) Maet samfala faendem hem hard for minim samfala information wea “faithful and wise slave” printim. Sapos eniting olsem kasem iu, mifala encouragem iu for strong moa for studyim Word bilong God and for prea strong long Jehovah mekem iu kasem bak klos wei for fren witim hem.—2 Peter 3:11-15.
22. Datfala vision wea Jesus change and kasem glory and olketa nara profesi wea join witim hem affectim iu long wanem wei?
22 Olketa disaepol bilong Jesus lukim datfala vision wea Jesus change and kasem glory long taem wea olketa barava needim. Long distaem, iumi garem samting wea moa big for strongim iumi—wei wea datfala spesol vision and staka nara profesi wea join witim hem fulfill. Taem iumi ting raonem wei wea olketa fulfill and hao olketa bae affectim future, hem gud for iumi talemaot sem toktok olsem aposol John taem hem sei: “Amen! Kam, Lord Jesus.”—Revelation 22:20.
[Footnote]
a Long Greek languis wea olketa iusim taem olketa raetem Bible, word wea olketa transleitim “pain bilong trabol” really minim “pain for bornem pikinini.” (Matthew 24:8, Kingdom Interlinear) So, long sem wei wea pain start for kakamap staka and kamap moa big taem pikinini redi for born, olketa problem bilong world tu bae olsem taem hem gogo for datfala big trabol.
Waswe, Iu Remember?
• Long olketa year bilong 1870, wanem nao wanfala smol grup bilong olketa Bible student start for luksavve saed long wei wea Christ kam bak?
• Hao nao vision wea Jesus change and kasem glory hem fufill?
• Wei wea Jesus winim faet bilong hem affectim world and Christian kongregeson long wanem wei?
• Wanem nao iumi mas duim for stap midolwan long olketa wea bae laef taem Jesus winim faet bilong hem?
[Olketa Piksa long page 16, 17]
Wanfala vision hem fulfill
[Olketa Piksa long page 18]
Waswe, iu savve wanem nao happen taem Jesus start for faet?