Tingting Strong Long Profesi Toktok Bilong God

“Iumi garem toktok bilong profesi wea kamap moa sure; and hem gud tumas iufala tingting strong long datwan.”—2 PETER 1:19.

1, 2. Wanem example abaotem false messiah nao iu savve storyim?

FOR planti handred year, olketa false messiah trae for talem wanem bae happen long future. Long mek-faev century C.E., wanfala man wea sei nem bilong hem Moses talem olketa Jew long island bilong Crete hem nao messiah and bae hem mekem olketa kamap free from hard living bilong olketa. Long day wea olketa bae kamap free, olketa followim hem go long wanfala hae ples wea luk ovarem Mediterranean Sea. Hem sei sapos olketa jamp go insaed long sea bae sea hem open for olketa. Planti wea jamp insaed long wata olketa draon, and datfala false messiah ranawe from datfala ples.

² Long mek-12 century, wanfala “messiah” kamap long Yemen. Ruler long datfala ples askem hem for wanfala saen for showimaot hem wanfala messiah. Disfala “messiah” talem ruler hia for katemaot hed bilong hem. Hem sei wei wea hem bae resurrect kwiktaem nao hem datfala saen. Ruler hia agree long disfala plan—and datwan nao end bilong datfala “messiah.”

3. Hu nao trufala Messiah, and wanem nao ministry bilong hem pruvim?

³ Olketa false messiah and profesi bilong olketa hem fail evribit, bat wei for tingting strong long profesi toktok bilong God hem nating savve fail for iumi. Laef bilong trufala Messiah, Jesus Christ, hem fulfillim planti Bible profesi. Olsem example, taem Matthew, man wea raetem Gospel, talem moa toktok from profesi bilong Isaiah, hem raet: “‘O land bilong Zebulun and land bilong Naphtali, wea stap long road bilong sea, long narasaed long Jordan, Galilee bilong olketa nation! pipol wea sidaon long dark ples lukim wanfala bigfala laet, and olketa wea sidaon insaed long shadow bilong dae, laet kasem olketa.’ Start long datfala taem Jesus hem go ahed for preach and sei: ‘Repent, iufala pipol, from kingdom bilong heven hem klosap kam nao.’” (Matthew 4:15-17; Isaiah 9:1, 2) Jesus nao datfala “bigfala laet,” and ministry bilong hem pruvim hem nao Profet wea Moses storyim bifor. Pipol wea no willing for lisin long Jesus bae finis evribit.—Deuteronomy 18:18, 19; Acts 3:22, 23.

4. Hao nao Jesus fulfillim Isaiah 53:12?

⁴ Jesus fulfillim tu profesi long Isaiah 53:12: “Hem kapsaetem soul bilong hem long dae, and olketa kaontem hem witim olketa sinner; and hemseleva karem sin bilong planti pipol, and hem go ahed for helpem olketa sinner.” From Jesus luksavve hao klosap nao hem bae givim laef bilong hem olsem ransom, hem strongim faith bilong olketa disaepol bilong hem. (Mark 10:45) Hem duim diswan long wanfala barava spesol wei long taem wea hem change and kasem glory.

Taem wea Hem Change and Kasem Glory Buildimap Faith

5. Long toktok bilong iuseleva, hao nao bae iu storyim taem wea Jesus change and kasem glory?

⁵ Datfala taem wea Jesus change and kasem glory hem olsem profesi. Jesus hem sei: “Son bilong man mas kam long glory bilong Dadi bilong hem witim olketa angel bilong hem . . . Tru nao, mi talem iufala, samfala wea standap long hia bae no dae go kasem taem wea olketa lukim Son bilong man kam long kingdom bilong hem.” (Matthew 16:27, 28) Waswe, samfala aposol lukim Jesus kam long Kingdom bilong hem? Matthew 17:1-7 hem sei: “Sixfala day bihaen, Jesus tekem Peter and James and brata bilong hem John and tekem olketa antap long wanfala hae maunten. And hem change and kasem glory front long olketa.” Datfala samting hem barava spesol! “Feis bilong hem shaen olsem sun, and kaleko bilong hem kamap white olsem laet. And, lukim! olketa lukim tu Moses and Elijah, wea story witim hem.” And tu, “wanfala braet cloud kam ovarem olketa,” and olketa herem voice bilong God sei: “‘Dis wan hem Son bilong mi, wea mi lovem, wea mi appruvim; lisin long hem.’ Taem olketa herem diswan olketa disaepol foldaon long feis bilong olketa and fraet for gud. Then Jesus kam klosap long olketa and tasim olketa, and sei: ‘Standap and no fraet.’”

6. (a) Why nao Jesus kolem taem wea hem change and kasem glory olsem wanfala vision? (b) Datfala vision hem point go long wanem?

⁶ Maet disfala spesol samting happen antap long wanfala hill bilong Maunt Hermon, wea Jesus and thrifala aposol sleep long datfala naet. Luk olsem Jesus hem change and kasem glory long naet, wea mekem olketa lukim klia tumas. Wanfala reason why Jesus kolem diswan wanfala vision hem from Moses and Elijah, wea dae longtaem finis, no stap long there long really wei. Christ nomoa hem really stap long there. (Matthew 17:8, 9) Disfala spesol vision hem mekem Peter, James, and John lukim samting wea point go long nambawan taem wea Jesus bae stap long Kingdom paoa. Moses and Elijah piksarem olketa anointed wan wea bae rul witim Jesus, and datfala vision mekem moa sure witness wea Jesus givim abaotem Kingdom and wei wea hem bae rul long future.

7. Hao nao iumi savve Peter barava rememberim taem wea Jesus change and kasem glory?

⁷ Datfala taem wea Jesus change and kasem glory hem help for strongim faith bilong thrifala aposol hia wea bae duim bigfala waka for leadim Christian kongregeson. Feis bilong Christ wea shaen, kaleko bilong hem wea luk white, and voice bilong God seleva wea sei Jesus nao Son bilong Hem wea Hem lovem wea olketa mas lisin long hem—evri samting hia duim waka bilong hem for strongim olketa long gudfala wei. Bat olketa aposol mas no talem disfala vision long eniwan go kasem taem Jesus hem resurrect. Samting olsem 32 year bihaen, disfala vision hem stap klia yet insaed long mind bilong Peter. Taem hem story abaotem and talem mining, hem raet: “Nomoa, hem no from olketa kleva giaman story nao mifala mekem iufala savve abaotem paoa and taem wea Lord bilong iumi Jesus Christ stap moa, bat hem from wei wea mifala seleva nao lukim barava nambawan glory bilong hem. From hem kasem honor and glory from God and Father, taem hem herem olketa toktok hia thru long barava nambawan glory: ‘Dis wan hem son bilong mi, dat wan wea mi lovem, wea mi appruvim.’ Tru nao, olketa toktok hia wea mifala herem kam from heven taem mifala stap witim hem long datfala holy maunten.”—2 Peter 1:16-18.

8. (a) Toktok wea God talem abaotem Son bilong hem point go long wanem? (b) Cloud wea kamap long vision hem showimaot wanem?

⁸ Samting wea barava important nao hem disfala toktok bilong God: “Dis wan hem Son bilong mi, wea mi lovem, wea mi appruvim; lisin long hem.” Disfala toktok point go long Jesus olsem King bilong God wea rul, wea evri creation mas obeyim. Cloud wea kavarem olketa hem showimaot man bae no savve lukim taem wea datfala vision fulfill. Hem only showaot long olketa eye for minim samting bilong olketa wea luksavve long “saen” wea markem taem Jesus stap moa long Kingdom paoa. (Matthew 24:3) Tru nao, wei wea Jesus sei for no talem datfala vision long eniwan go kasem taem hem laef bak from dae hem showimaot hem bae kamap hae and kasem glory bihaen hem resurrect.

9. Why nao taem wea Jesus change and kasem glory shud strongim faith bilong iumi?

⁹ Bihaen Peter tok abaotem taem wea Jesus change and kasem glory, hem sei: “Dastawe iumi garem toktok bilong profesi wea kamap moa sure; and hem gud tumas iufala tingting strong long datwan olsem wanfala lamp wea shaen long dark ples, go kasem taem hem daylaet and wanfala daystar hem kamap, insaed long heart bilong iufala. Bikos iufala savve finis long diswan, no eni profesi insaed long Scripture hem kamaot from tingting bilong eni man. No enitaem profesi kamap from will bilong man, bat olketa man tok kam from God taem holy spirit leadim olketa.” (2 Peter 1:19-21) Datfala taem wea Jesus change and kasem glory hem mekhae long wei wea iumi fit for trustim profesi toktok bilong God. Iumi mas tingting strong long datfala toktok and no long “olketa kleva giaman story” wea God no saportim or appruvim. Faith wea iumi garem long profesi toktok shud kamap strong thru long vision wea Jesus change and kasem glory bikos datfala vision wea showimaot glory and Kingdom paoa bilong Jesus hem kamap wanfala really samting. Yes, iumi garem trufala pruv wea showimaot Christ hem stap distaem olsem King wea garem bigfala paoa long heven.

Hao Datfala Daystar Hem Kamap

10. Hu or wanem nao datfala “daystar” wea Peter storyim, and why nao iu ansa olsem?

¹⁰ Peter raet olsem: “Hem gud tumas iufala tingting strong long [profesi toktok] olsem wanfala lamp wea shaen long dark ples, go kasem taem hem daylaet and wanfala daystar hem kamap.” Hu or wanem nao datfala “daystar”? Disfala word “daystar” stap wanfala taem nomoa insaed Bible, and garem sem mining olsem “morning star.” Revelation 22:16 kolem Jesus Christ “morning star wea shaen.” Long samfala taem insaed long year, olketa star olsem nao last wan for kamap long east skae. Olketa kamap just bifor sun hem showaot, and so olketa showimaot start bilong niu day. Peter iusim disfala word “daystar” for minim Jesus bihaen Hem kasem Kingdom paoa. Long datfala taem, Jesus hem kamap long full universe, and long earth tu! Olsem Messiah Daystar, hem showimaot start bilong wanfala niu day, or taem, for olketa pipol wea obey.

11. (a) Why nao 2 Peter 1:19 hem no minim “wanfala daystar” kamap insaed really heart bilong man? (b) Hao nao bae iu explainim 2 Peter 1:19?

¹¹ Planti Bible transleison givim idea hao toktok bilong aposol Peter long 2 Peter 1:19 hem abaotem really heart bilong man. Hevi bilong heart bilong wanfala full-grown man hem 250 go kasem 300 gram nomoa. Hao nao Jesus Christ—wea distaem hem wanfala nambawan spirit wea kanduit dae long heven—savve kamap insaed olketa smol heart hia bilong man? (1 Timothy 6:16) Tru, tokpiksa heart bilong iumi hem insaed long diswan, bikos iumi iusim for tingting strong long profesi toktok bilong God. Bat lukluk gud long 2 Peter 1:19, and bae iu lukim hao New World Translation iusim comma for separatem disfala toktok “go kasem taem hem daylaet and wanfala daystar hem kamap” from nara toktok wea kam firstaem insaed datfala verse and from disfala toktok “insaed long heart bilong iufala.” Maet iumi savve talem disfala verse long wei olsem: ‘Iumi garem toktok bilong profesi wea kamap moa sure; and hem gud tumas iufala tingting strong long datwan olsem wanfala lamp wea shaen long dark ples, hem nao, insaed heart bilong iufala, go kasem taem hem daylaet and wanfala daystar hem kamap.’

12. Hao nao ??heart bilong olketa man, bat waswe long olketa tru Christian?

¹² Hao nao tokpiksa heart bilong olketa man wea sinner? Tru nao, heart bilong olketa stap long spiritual darkness! Bat, sapos iumi tru Christian, hem olsem lamp hem shaen insaed heart bilong iumi, wea bae dark nomoa sapos no eni laet stap. Olsem toktok bilong Peter showim, taem olketa tru Christian tingting strong long profesi toktok bilong God wea olsem laet, datwan bae mekem olketa go ahed for lukaot and luksavve long start bilong wanfala niu day. Olketa bae luksavve hao Daystar hem kamap finis, no insaed long really heart bilong man, bat front long evri creation.

13. (a) Why nao iumi savve sure Daystar hem kamap finis? (b) Why nao olketa Christian fit for go ahed strong nomata hard samting kamap long taem bilong iumi olsem Jesus talem?

¹³ Datfala Daystar hem kamap finis! Iumi savve sure long datwan taem iumi tingting strong long bigfala profesi bilong Jesus abaotem taem wea hem stap moa. Distaem, iumi lukim wei wea hem fulfill long olketa samting wea happen wea moa big winim bifor olsem olketa war, hangre, earthquake, and wei for preachim gud nius raonem world. (Matthew 24:3-14) Nomata olketa hard samting wea Jesus storyim hem affectim iumi olsem Christian tu, iumi fit for go ahed strong witim peace and hapi long heart. Why nao olsem? Bikos iumi tingting strong long profesi toktok bilong God and garem faith long wanem hem promisim for future. Iumi savve iumi klosap long start bilong best taem bikos iumi barava deep insaed long “taem bilong end”! (Daniel 12:4) World hem insaed big trabol olsem profesi long Isaiah 60:2 hem talem: “Lukim! darkness nao bae kavarem earth, and thick cloud kavarem olketa nation.” Hao nao man fit for gogo long disfala darkness? Hem mas hambol for tingting strong long profesi toktok bilong God distaem, bifor hem leit tumas. Pipol wea garem honest heart need for tan go long Jehovah God, Wan Wea Givim laef and laet. (Psalm 36:9; Acts 17:28) Only sapos man duim diswan bae hem kasem trufala savve and hope for garem nambawan future wea God markem for olketa man wea obey.—Revelation 21:1-5.

“Laet Hem Kasem World”

14. Wanem nao iumi mas duim for lukim olketa nambawan Bible profesi fulfill?

¹⁴ Bible talem klia hao Jesus Christ hem rul distaem olsem King. Bikos hem kamap King long 1914, samfala nambawan profesi bae fulfill yet. For lukim olketa fulfill, iumi mas pruvim iumi olketa hambol wan wea showimaot faith long Jesus Christ, repent long olketa waka bilong sin and sin wea iumi duim taem iumi no savve. Bat, olketa wea lovem darkness bae no kasem laef olowe. Jesus hem sei: “Diswan nao hem faondeson bilong judgment, laet hem kasem world bat olketa man lovem darkness winim laet, from waka bilong olketa hem wicked. Man wea duim olketa nogud samting hem heitim laet and no kam long laet, mekem hem no kasem repruv long waka bilong hem. Bat man wea duim trufala samting bae kam long laet, mekem waka bilong hem showaot olsem samting wea garem wan mind witim God.”—John 3:19-21.

15. Wanem nao bae happen sapos iumi rejectim salvation wea God provaedem thru long Son bilong hem?

¹⁵ Spiritual laet hem kasem world thru long Jesus, and man mas lisin long hem. Paul hem raet: “God, wea longfala taem go finis tok long planti taem and long planti wei long olketa laen dadi bilong iumi thru long olketa profet, long end bilong olketa day hia hem toktok long iumi thru long wanfala Son, wea hem appointim for kasem evri samting.” (Hebrews 1:1, 2) Wanem nao bae happen sapos iumi rejectim salvation wea God provaedem thru long Son bilong hem? Paul hem sei moa: “Sapos toktok wea kam thru long olketa angel hem sure, and evri rong and wei bilong disobey hem kasem panis for fitim justice; hao nao iumi bae ranawe sapos iumi rejectim salvation wea big tumas olsem olketa talem thru long Lord bilong iumi and olketa wea herem nao talem iumi datwan hem tru, and long semtaem God join for givim witness witim olketa saen and samfala strong waka and wei for givimaot holy spirit followim will bilong hem?” (Hebrews 2:2-4) Yes, Jesus hem main part long wei for talemaot profesi toktok.—Revelation 19:10.

16. Why nao iumi savve garem full trust long evri profesi bilong Jehovah God?

¹⁶ Olsem iumi readim finis, Peter hem sei: “No eni profesi insaed long Scripture hem kamaot from tingting bilong eni man.” Man seleva kanduit talem tru profesi, bat iumi savve garem full trust long evri profesi bilong God. Olketa kam from Jehovah God. Thru long holy spirit hem helpem olketa servant bilong hem for minim hao nao olketa Bible profesi fulfill. Tru tumas, iumi thankiu long Jehovah from iumi lukim planti Bible profesi hia fulfill start long year 1914. And iumi barava sure olketa nara profesi wea no fulfill yet abaotem end bilong disfala wicked system bae kamap tru. Hem barava important for iumi go ahed for tingting strong long olketa profesi bilong God taem iumi letem laet bilong iumi shaen. (Matthew 5:16) Iumi thankiu tumas from Jehovah mekem ‘laet sutaot for iumi long bigfala darkness’ wea kavarem earth distaem!—Isaiah 58:10.

17. Why nao iumi needim spiritual laet from God?

¹⁷ Physical laet hem mekem iumi savve lukim samting. Hem mekem kaikai grow for givim iumi planti difren kaikai. Iumi kanduit laef sapos physical laet no stap. Waswe long spiritual laet? Hem gaedem iumi and showim iumi future wea Word bilong God, Bible, storyim. (Psalm 119:105) Long loving wei Jehovah God ‘sendem aot laet and truth bilong hem.’ (Psalm 43:3) Tru nao, iumi shud showim bigfala thankiu for olketa samting hia wea hem provaedem. So letem iumi duim barava best for kasem disfala laet bilong “nambawan savve bilong God” for mekem hem shaen insaed long tokpiksa heart bilong iumi.—2 Corinthians 4:6; Ephesians 1:18.

18. Wanem nao Daystar bilong Jehovah redy for duim?

¹⁸ Iumi barava hapi for savve hao long 1914, Jesus Christ, datfala Daystar, kamap long full universe and start for fulfillim datfala vision abaotem taem wea hem change and kasem glory! Daystar bilong Jehovah hem stap distaem, redy for duim purpose bilong God for go ahed fulfillim datfala vision long “war bilong bigfala day bilong God Almighty.” (Revelation 16:14, 16) Bihaen disfala old system hem finis, Jehovah bae fulfillim promis bilong hem abaotem “niu heven and niu earth” wea iumi savve stap insaed and praisem hem for olowe olsem Sovereign Lord bilong universe and God bilong tru profesi. (2 Peter 3:13) Go kasem datfala barava nambawan day, letem iumi go ahed for wakabaot long laet from God taem iumi tingting strong long profesi toktok bilong hem.

Hao Nao Bae Iu Ansa?

• Hao nao bae iu storyim taem wea Jesus change and kasem glory?

• Hao nao taem wea Jesus change and kasem glory buildimap faith?

• Hu or wanem nao Daystar bilong Jehovah, and wanem taem nao hem kamap?

• Why nao iumi shud tingting strong long profesi toktok bilong God?

[Piksa long page 13]

Waswe, iu savve explainim mining bilong taem wea Jesus change and kasem glory?

[Piksa long page 15]

Daystar hem kamap finis. Waswe, iu savve hao nao and long wanem taem?