Joinim Go Fasin for Lovem God Long Fasin for Stand Strong
“Joinim go long faith bilong iufala . . . fasin for stand strong, long fasin for stand strong fasin for lovem God.”—2 PETER 1:5, 6.
1, 2. (a) Olketa pikinini shud grow long wanem wei? (b) Hao important nao spiritual wei for grow?
WEI for grow hem important for wanfala pikinini, bat no just long physical wei. Hem need for grow long mind and feeling tu. Gogo, bae hem lusim pikinini wei bilong hem and kamap wanfala mature man or woman. Aposol Paul raet abaotem diswan olsem: “Taem mi wanfala baby, mi savve toktok olsem baby, tingting olsem baby, ting raonem samting olsem baby; bat from distaem mi kamap wanfala man, mi lusim olketa wei bilong wanfala baby.”—1 Corinthians 13:11.
2 Toktok bilong Paul showimaot wanfala important point abaotem spiritual wei for grow. Olketa Christian need for lusim wei bilong pikinini and kamap “full-grown man long paoa for minim samting.” (1 Corinthians 14:20) Olketa shud reach aot and trae for kasem “full wei wea Christ showaot.” Then olketa bae no stap olsem ‘baby, wea seksek olabaot olsem wave pushim hem from evrikaen teaching.’—Ephesians 4:13, 14.
3, 4. (a) Wanem nao iumi mas duim for kamap full-grown long spiritual wei? (b) Olketa wanem fasin wea mekem God hapi nao iumi shud showimaot, and olketa hao important?
3 Hao nao iumi savve kamap full-grown long spiritual wei? Physical wei for grow hem normal samting wea happen, bat spiritual wei for grow needim man for waka hard. Hem start witim wei for kasem stretfala savve long Word bilong God and for duim wanem iumi lanem. (Hebrews 5:14; 2 Peter 1:3) Then, diswan bae mekem iumi fit for showimaot olketa fasin wea mekem God hapi. Long sem wei wea olketa difren part bilong physical body grow tugeta, planti taem olketa difren fasin wea mekem God hapi grow long semtaem tu. Aposol Peter hem raet: “Taem iufala nao barava waka hard, joinim go long faith bilong iufala gud fasin, long gud fasin bilong iufala savve, long savve bilong iufala fasin for kontrolem seleva, long fasin bilong iufala for kontrolem seleva fasin for stand strong, long fasin bilong iufala for stand strong fasin for lovem God, long fasin bilong iufala for lovem God feeling for olketa brata, long feeling bilong iufala for olketa brata love.”—2 Peter 1:5-7.
4 Evri fasin wea Peter listim hem important. Hem talem moa: “Sapos evri samting hia stap long iufala and fulap evribit long iufala, olketa bae stopem iufala from wei for stap nating or for no garem frut long saed bilong stretfala savve abaotem Lord bilong iumi, Jesus Christ.” (2 Peter 1:8) Bae iumi lukluk long need for joinim go fasin for lovem God long fasin bilong iumi for go ahed strong.
Needim Fasin for Stand Strong
5. Why nao iumi needim fasin for stand strong?
5 Peter and Paul joinim fasin for lovem God witim fasin for stand strong. (1 Timothy 6:11) For garem fasin for stand strong hem minim moa samting winim wei for strong long hardfala taem and no brekem faith nomoa. Hem minim tu for patient, no fraet, and for keepim strong, no lus hope taem man feisim test, hard samting, temptation, or persecution. From iumi stap witim wei for “lovem God wea join witim Christ Jesus,” iumi expectim persecution for kasem iumi. (2 Timothy 3:12) Iumi mas stand strong sapos iumi laek for pruvim iumi lovem Jehovah and mekem grow olketa fasin wea man needim for salvation. (Romans 5:3-5; 2 Timothy 4:7, 8; James 1:3, 4, 12) Sapos iumi no garem fasin for stand strong, iumi bae no kasem laef olowe.—Romans 2:6, 7; Hebrews 10:36.
6. Wanem nao insaed wei for stand strong go kasem end?
6 Nomata iumi start insaed Christian Wei long gudfala wei, samting wea important nao hem for iumi mas garem fasin for stand strong. Jesus hem sei: “Man wea stand strong go kasem end hem nao datwan wea bae sev.” (Matthew 24:13) Tru nao, iumi mas stand strong go kasem end, nomata datwan minim end bilong laef bilong iumi or end bilong system. Nomata wanem, iumi mas go ahed faithful long God. Bat sapos iumi no joinim go fasin for lovem God long fasin for stand strong, iumi hard for mekem Jehovah hapi, and iumi bae no kasem laef olowe. Bat wanem nao fasin for lovem God?
Mining Bilong Fasin for Lovem God
7. Wanem nao fasin for lovem God, and hem muvim iumi for duim wanem?
7 Fasin for lovem God minim respect, worship, and service long Jehovah God seleva, witim wei for loyal long olmaeti rul bilong hem long universe. For lovem Jehovah iumi needim stretfala savve abaotem hem and olketa wei bilong hem. Iumi shud want for barava klos long God. Diswan bae muvim iumi for lovem hem from heart, and hem bae showaot long wanem iumi duim and living bilong iumi. Iumi shud barava trae for olsem Jehovah—for copyim wei bilong hem and showimaot olketa fasin bilong hem. (Ephesians 5:1) Tru nao, fasin for lovem God hem muvim iumi for want for mekem God hapi long evriting iumi duim.—1 Corinthians 10:31.
8. Hao nao fasin for lovem God hem join witim wei for worshipim hem nomoa?
8 Fasin for lovem God minim wei for worshipim Jehovah nomoa, for no letem eni nara samting mekem heart bilong iumi forgetim hem. Olsem Creator bilong iumi, hem garem raet for askem iumi for servem hem nomoa. (Deuteronomy 4:24; Isaiah 42:8) Bat Jehovah no forcem iumi for worshipim hem. Hem laekem willing wei for lovem hem. Love for God, wea kamaot from stretfala savve abaotem hem, muvim iumi for klinim living bilong iumi,dedicate evribit long hem and then live followim.
Mekem Grow Wei for Fren Witim God
9, 10. Hao nao iumi savve mekem grow and keepim klos wei for fren witim God?
9 Bihaen iumi showimaot dedication bilong iumi long God thru long wei for baptaes, iumi still need for mekem grow wei for fren moa klos witim hem. So, wei wea iumi laek for duim diswan and for servem Jehovah long faithful wei hem muvim iumi for go ahed for studyim Word bilong hem and for ting raonem. Taem iumi letem spirit bilong God for waka long mind and heart bilong iumi, love bilong iumi for Jehovah bae kamap moa deep. Wei wea iumi fren witim hem bae go ahed for olsem nambawan important samting long laef bilong iumi. Iumi ting long Jehovah olsem best Fren bilong iumi and laek for mekem hem hapi evritaem. (1 John 5:3) Hapi bilong iumi long gudfala wei wea iumi fren witim God savve grow, and iumi thankiu from hem teachim and stretem iumi long loving wei taem iumi needim.—Deuteronomy 8:5.
10 Nambawan wei wea iumi fren witim Jehovah bae wikdaon sapos iumi no go ahed for strongim. Sapos diswan happen, no God nao duim, from “hem no farawe from iumi wanwan.” (Acts 17:27) Iumi hapi tumas hao Jehovah no mekem hem hard for iumi story witim hem! (1 John 5:14, 15) Bat, iumi mas waka hard for keepim klos wei for fren witim Jehovah. Nomata olsem, hem helpem iumi for kam moa klos long hem thru long wei wea hem provaedem evriting iumi needim for mekem grow and keepim fasin for lovem God. (James 4:8) Hao nao iumi savve iusim gud evriting wea hem provaedem?
Keepim Spiritual Strong
11. Wanem nao samfala wei wea iumi showimaot iumi lovem God?
11 Strongfala love bilong iumi for God bae muvim iumi for showimaot hao deep nao fasin bilong iumi for lovem God, long wei wea followim kaonsel bilong Paul: “Duim best bilong iu for mekem God acceptim iu, wanfala wakman wea no shame long eni samting, wea iusim word bilong truth long stretfala wei.” (2 Timothy 2:15) For duim diswan iumi need for garem gud schedule for duim Bible study, attendim meeting, and field ministry. Iumi savve stap klosap long Jehovah tu thru long wei for “prea evritaem.” (1 Thessalonians 5:17) Olketa hia showimaot iumi really lovem God. For no duim eniwan long olketa samting hia bae kosim spiritual sik and mekem iumi isi for foldaon long olketa trik bilong Satan.—1 Peter 5:8.
12. Hao nao iumi savve winim olketa test?
12 For stap strong and active long spiritual wei hem helpem iumi tu for deal witim staka test wea kasem iumi. Samfala samting savve barava testim iumi. Wei for no interest, againstim man, and persecution savve moa hard for deal witim sapos hem kam from olketa klos famili, relative, or neiba. Olketa hevi for no followim olketa Christian principle wea no mas showaot klia savve kamap long waka ples or long skul. Wei for feel wikdaon, sik, and feel sorre savve mekem iumi wiki long physical wei and mekem hem moa hard for deal witim test saed long faith. Bat iumi savve winim evri test sapos iumi go ahed strong “long holy fasin and waka wea showimaot fasin for lovem God, weitim and tingting evritaem long taem wea day bilong Jehovah bae stap.” (2 Peter 3:11, 12) And iumi savve keepim hapi bilong iumi sapos iumi duim olsem, witim wei for feel sure long olketa blessing bilong God.—Proverbs 10:22.
13. Wanem nao iumi mas duim for go ahed for garem fasin for lovem God?
13 Nomata Satan hem targetim olketa wea lovem God, iumi no need for fraet. Why? Bikos “Jehovah savve hao for sevem pipol wea garem fasin for lovem God from test.” (2 Peter 2:9) For stand strong long olketa kaen test olsem, and for God sevem iumi, iumi mas “rejectim fasin wea no followim God and olketa samting wea world wantem and . . . live followim stretfala tingting and raeteous fasin and fasin for lovem God insaed long system wea stap distaem.” (Titus 2:12) Olsem olketa Christian, iumi mas lukaot gud mekem no eni wik point saed long samting body laekem hem aotem and spoelem fasin for lovem God. Bae iumi lukim samfala danger hia.
Keakea Long Olketa Samting wea Savve Spoelem Fasin for Lovem God
14. Wanem nao iumi shud rememberim sapos trap bilong wei for lovem tumas material samting hem switim iumi?
14 Lovem tumas material samting hem trap for staka pipol. Maet iumi giamanim iumiseleva, for “ting long fasin for lovem God olsem wei for kasem selen.” From diswan, iumi maet mekius long trust wea olketa brata garem for iumi long selfish wei. (1 Timothy 6:5) Maet iumi ting rong for sei hem gud nomoa for askem wanfala rich Christian for kaon wea iumi savve maet iumi hard for peim bak. (Psalm 37:21) No riches bat fasin for lovem God nao “garem promis bilong laef distaem and datwan wea bae kam.” (1 Timothy 4:8) From ‘iumi no bringim eni samting insaed long world and no savve tekem eni samting aot,’ letem iumi disaed strong go moa for garem “love for God witim wei for satisfae nomoa” and for iumi ‘satisfae witim kaikai and kaleko.’—1 Timothy 6:6-11.
15. Wanem nao iumi savve duim sapos wei for aftarem hapitaem hem stopem wei wea iumi lovem God?
15 Wei for aftarem hapitaem savve stopem wei wea iumi lovem God. Waswe, maet iumi need for kwiktaem mekem samfala change long diswan? Hem tru, wei for trainim body and taem for relax savve helpem man. Bat, disfala help hem smol taem iumi markem witim laef olowe. (1 John 2:25) Distaem, staka pipol “lovem hapitaem winim wei for lovem God, hem luk olsem olketa worship long wei wea lovem God bat datwan nating affectim laef bilong olketa,” and iumi need for stap klia from kaen pipol olsem. (2 Timothy 3:4, 5) Pipol wea waka strong for kasem fasin for lovem God olketa “hipimap for olketa seleva gudfala faondeson for future, mekem olketa savve hol strong long datfala really laef.”—1 Timothy 6:19.
16. Olketa wanem rong samting wea body laekem nao stopem samfala for live followim olketa raeteous mark bilong God, and hao nao iumi savve win ovarem olketa samting hia wea body laekem?
16 Alcohol and drug, dirty fasin, and nogud samting wea body laekem savve distroem fasin for lovem God. For duim olketa samting hia bae stopem iumi for followim olketa raeteous mark bilong God. (1 Corinthians 6:9, 10; 2 Corinthians 7:1) Paul tu need for evritaem faetem body bilong hem wea garem sin. (Romans 7:21-25) Man mas barava trae hard for aotem olketa rong samting wea body laekem. Firstaem, man mas disaed strong for stap klin long fasin. Paul talem iumi: “Killim dae olketa part bilong body bilong iufala long earth long saed bilong fornication, fasin wea no klin, wei for wantem sex, wei for wantem nogud samting, and fasin for kavet, wea hem fasin for worshipim idol.” (Colossians 3:5) Man need for barava strong sapos hem laek for killim dae body bilong hem saed long olketa rong samting, for aotem olketa evribit. Wei for prea strong for help bilong God bae mekem iumi savve rejectim nogud samting body laekem and for aftarem raeteous fasin and fasin for lovem God midolwan disfala wicked world.
17. Hao nao iumi shud ting long discipline?
17 Wei for feel wikdaon savve mekem iumi wiki for stand strong and savve barava spoelem fasin for lovem God. Staka long olketa servant bilong Jehovah kasem feeling for wikdaon. (Numbers 11:11-15; Ezra 4:4; Jonah 4:3) Wei for wikdaon savve spoelem iumi especially sapos hem join witim feeling for kros from iumi kasem strongfala repruv or discipline. Bat repruv and discipline showimaot dat God hem interest and lovem iumi. (Hebrews 12:5-7, 10, 11) Iumi shud ting long discipline, no olsem panis nomoa, bat samting for trainim iumi long raeteous fasin. Sapos iumi hambol, iumi bae tinghae and acceptim kaonsel, from iumi luksavve “repruv bilong discipline nao wei bilong laef.” (Proverbs 6:23) Diswan savve helpem iumi muv ahed long spiritual wei saed long wei for aftarem fasin for lovem God.
18. Wanem responsibility nao iumi garem sapos iumi feel nogud long samwan?
18 Wei for no minim narawan and feel nogud long samwan savve affectim fasin bilong iumi for lovem God. Hem savve kosim wari or mekem man duim rong samting for stap klia from olketa spiritual brata and sista bilong olketa. (Proverbs 18:1) Bat hem gud for remember hao wei for keepim kros long nara pipol savve barava spoelem wei wea iumi fren witim Jehovah. (Leviticus 19:18) Tru nao, “man wea no lovem brata bilong hem, wea hem lukim, kanduit lovem God, wea hem no lukim.” (1 John 4:20) Long Sermon bilong hem long Maunten, Jesus strongim need for duim samting kwiktaem for stretem wanfala problem midolwan tufala pipol. Hem talem olketa wea lisin long hem: “Sapos iu tekem present bilong iu long altar, and taem iu long there iu remember hao brata bilong iu hem feel nogud long iu, leavim present bilong iu front long altar, and go; mek peace witim brata bilong iu firstaem, then taem iu kam bak, offerim present bilong iu.” (Matthew 5:23, 24) Wei for tok sorre savve help for healim pain wea kamap taem man talem or duim samting wea spoelem feeling bilong narawan. Wei for no fren gud witim samwan savve kamap gud sapos iumi ask for forgiveness and talemaot hao iumi no deal gud witim datfala samting. Jesus givim nara kaonsel tu long wei for deal witim problem. (Matthew 18:15-17) Iumi hapi tumas taem hard waka bilong iumi for stretem problem hem win!—Romans 12:18; Ephesians 4:26, 27.
Followim Example Bilong Jesus
19. Why nao hem barava important for followim example bilong Jesus?
19 Olketa test bae mekem iumi feel nogud, bat olketa no need for pullim iumi awe from datfala resis for laef olowe. Remember hao Jehovah savve sevem iumi aot from test. Taem iumi “aotem evri hevi” and “ran witim fasin for go ahed strong long datfala resis wea stap front long iumi,” iumi need for “lukluk gud long Chief Wan and Man wea Mekem Perfect faith bilong iumi, Jesus.” (Hebrews 12:1-3) For lukluk gud long example bilong Jesus and trae hard for followim hem saed long toktok and samting iumi duim bae helpem iumi mekem grow fasin for lovem God and showimaot diswan long wei wea moa big.
20. Wanem nao olketa reward bilong wei for aftarem fasin for stand strong and fasin for lovem God?
20 Fasin for stand strong and fasin for lovem God waka tugeta for mekem salvation bilong iumi sure. Taem iumi showimaot olketa gudfala fasin hia, iumi savve go ahed faithful long holy service bilong iumi long God. Nomata taem iumi kasem test, iumi savve hapi taem iumi feelim love and blessing bilong Jehovah from iumi stand strong and followim fasin for lovem God. (James 5:11) Witim diswan, Jesus seleva promisim iumi: “From iufala stand strong iufala bae kasem soul bilong iufala.”—Luke 21:19.
Hao Nao Bae Iu Ansa?
• Why nao fasin for stand strong hem important?
• Wanem nao fasin for lovem God, and hao nao hem showaot?
• Hao nao iumi savve buildimap and keepim klos wei for fren witim God?
• Wanem nao samfala samting wea savve spoelem fasin bilong iumi for lovem God, and hao nao iumi savve stap klia from olketa?
[Olketa Piksa long page 12, 13]
Fasin for lovem God hem showaot long planti wei
[Olketa Piksa long page 14]
Keakea long olketa samting wea savve spoelem fasin for lovem God