Honorim Olketa wea Kasem Paoa Ovarem Iu
“Honorim evri difren kaen man, garem love for full grup bilong olketa brata, fraet long God, garem honor for king.”—1 PETER 2:17.
1, 2. Hao nao pipol ting long paoa tuday? Why?
“OLKETA pikinini garem evri raet. No eni respect stap for dadi and mami,” hem nao tok sorre bilong wanfala mami. “Kwestinim Boss,” wanfala car sticker hem sei. Diswan hem tufala nomoa long kaen wei wea stap tuday, wea iu savve finis. Wei for no respectim dadi and mami, teacher, boss, and bigman bilong gavman hem kamap evriwea long world.
2 Samfala maet sekem hed nomoa and sei, ‘Olketa wea sidaon long ples bilong paoa no fit for kasem respect bilong mi.’ Samfala taem, maet hem hard for denyim datwan. Iumi evritaem herem nius abaotem olketa corrupt bigman bilong gavman, greedy boss, teacher wea no fit, and dadi and mami wea raf tumas. Gud samting nao, no planti Christian ting olsem abaotem olketa wea garem paoa insaed long kongregeson.—Matthew 24:45-47.
3, 4. Why nao olketa Christian shud showim respect for olketa wea garem paoa?
3 Olsem olketa Christian, iumi garem “strongfala reason” for respectim olketa wea garem paoa long world. Aposol Paul encouragem olketa Christian for “stap anda long olketa hae paoa, from no eni paoa bae stap sapos God hem no letem; olketa paoa bilong distaem stap long ples wea God letem olketa for stap.” (Romans 13:1, 2, 5; 1 Peter 2:13-15) Paul showim tu gudfala reason for obeyim olketa wea garem paoa insaed long famili: “Iufala waef, stap anda long hasband bilong iufala, olsem hem fitim iufala for duim long Lord. Iufala pikinini, obeyim dadi and mami bilong iufala long evri samting, from diswan nao mekem Lord hapi.” (Colossians 3:18, 20) Olketa kongregeson elder fit for kasem honor bilong iumi bikos ‘holy spirit appointim olketa olsem overseer, for shepherdim kongregeson bilong God.’ (Acts 20:28) So from respect for Jehovah nao iumi honorim olketa man wea garem paoa. Wei for honorim paoa bilong Jehovah hem evritaem kam first insaed laef bilong iumi.—Acts 5:29.
4 Taem iumi tingim bigfala paoa bilong Jehovah, letem iumi ting raonem samfala example bilong olketa wea nating respectim olketa wea garem paoa and samfala wea garem respect.
No Respect Lead Go for No Appruv
5. Wanem fasin wea no showim respect nao Michal showim long David, and wanem nao kamaot from datwan?
5 From taem bilong King David, iumi savve lukim hao nao Jehovah hem ting long olketa wea lukdaonem paoa wea God givim. Taem David mekem olketa for muvim kam ark bilong covenant long Jerusalem, waef bilong hem Michal “lukim King David jampjamp and dance raon front long Jehovah; and [Michal] start for lukdaonem hem insaed heart bilong hem.” Michal shud luksavve finis hao David hem no hed bilong famili nomoa bat hem king bilong land tu. Nomata olsem, Michal talemaot feeling bilong hem witim nogud toktok: “King bilong Israel mekem hemseleva nambawan tumas tuday taem hem aotem kaleko tuday go long eye bilong olketa slave girl bilong olketa servant bilong hem, olsem hao wanfala emti-hed man hem barava aotem evri kaleko bilong hem!” Wan samting wea kamaot from diswan nao hem hao Michal nating garem eni pikinini.—2 Samuel 6:14-23.
6. Hao nao Jehovah ting long fasin bilong Korah for no respectim anointed wan bilong Hem?
6 Wanfala barava nogud example long wei for no honorim man for lead wea God chusim hem nao example bilong Korah. Olsem wanfala Kohathite, hem garem nambawan privilege for servem Jehovah long tabernacle! Nomata olsem, hem faendem mistek long saed bilong Moses and Aaron, tufala leader bilong Israel wea God anointim. Korah kaban witim olketa nara chief bilong Israel and tok long bighed wei long Moses and Aaron: “Evriwan wea hipap hia olketa holy and Jehovah stap midol long olketa. So, why nao iufala shud apim iufala seleva winim kongregeson bilong Jehovah?” Hao nao Jehovah ting long fasin bilong Korah and olketa wea saportim hem? God lukim samting wea olketa duim olsem hem againstim Jehovah seleva. Bihaen Korah and 250 chief bilong hem lukim graon kaikaim olketa wea saed witim hem, Jehovah sendem fire for distroem olketa.—Numbers 16:1-3, 28-35.
7. Waswe, “olketa stael aposol” garem eni reason for tokdaonem paoa bilong Paul?
7 Insaed first-century Christian kongregeson, samfala stap wea ting nating long paoa wea God givim. “Olketa stael aposol” insaed kongregeson long Corinth garem fasin for no respectim aposol Paul. Olketa tokdaonem wei bilong Paul for toktok, taem olketa sei: “Hem wiki and toktok bilong hem samting nating.” (2 Corinthians 10:10; 11:5) Nomata sapos Paul hem savve tumas for toktok or nomoa, hem fit for kasem respect olsem wanfala aposol. Bat waswe, toktok bilong Paul hem barava samting nating? Olketa pablik tok bilong hem wea stap insaed long Bible showimaot hem savve tumas hao for toktok. Tingim, from shortfala story bilong hem witim Herod Agrippa II, wanfala wea “savve gud long evri . . . problem midolwan olketa Jew,” Paul story gogo king hem sei: “Long shortfala taem iu bae muvim mi for kamap wanfala Christian”! (Acts 13:15-43; 17:22-34; 26:1-28) Nomata olsem, olketa stael aposol long Corinth talemse toktok bilong hem samting nating! Hao nao Jehovah ting long fasin bilong olketa? Insaed wanfala message for olketa overseer bilong kongregeson long Ephesus, Jesus Christ tok gud abaotem olketa wea les for followim pipol ‘wea sei olketa nao aposol, bat wea no tru.’—Revelation 2:2.
Respect Nomata No Perfect
8. Hao nao David showimaot hem honorim paoa wea Jehovah givim long Saul?
8 Planti example stap long Bible abaotem olketa wea honorim olketa wea garem paoa, nomata taem olketa spoelem or no iusim gud datfala paoa bilong olketa. David hem wanfala gud example. King Saul, wea David serve anda long hem, hem jealous long olketa samting wea David kasem and hem trae for killim hem dae. (1 Samuel 18:8-12; 19:9-11; 23:26) Nomata hem garem olketa chance for killim dae Saul, David hem sei: “Hem barava no fitim, long saed bilong mi, from tingting bilong Jehovah, for iusim hand bilong mi againstim man wea Jehovah anointim!” (1 Samuel 24:3-6; 26:7-13) David hem savve hao Saul hem rong, bat hem leavim long Jehovah for judgem hem. (1 Samuel 24:12, 15; 26:22-24) Hem no tok nogud abaotem Saul or long hem.
9. (a) Hao nao David feel taem Saul deal nogud witim hem? (b) Hao nao iumi savve hao respect bilong David for Saul hem tru wan?
9 Waswe, David hem barava wari taem olketa deal nogud witim hem? ‘Samfala . . . ruler stap wea lukaotem soul bilong mi,’ David hem krae olsem long Jehovah. (Psalm 54:3) Hem pourimaot heart bilong hem long Jehovah: “Sevem mi from olketa enemy bilong mi, O God bilong mi . . . Olketa strong wan attakim mi, mi nating againstim olketa, no eni sin long saed bilong mi, O Jehovah. Nomata no eni rong, olketa ran and stap redy. Kam taem iu herem kol bilong mi and lukim.” (Psalm 59:1-4) Waswe, enitaem iu feel olsem—iu no duim eni rong long wanfala man wea garem paoa, bat hem go ahed for givim iu hardfala taem? David nating fail for showimaot respect long Saul. Long dae bilong Saul, David no hapi, bat hem raetem wanfala song bilong sorre: “Saul and Jonathan, tufala wea fit for kasem love and olketa gud wan long laef bilong tufala . . . Tufala fast winim olketa eagle, tufala strong winim olketa lion. Iufala olketa dota bilong Israel, krae for Saul.” (2 Samuel 1:23, 24) Barava gudfala example bilong trufala respect for man wea Jehovah anointim, nomata Saul hem duim rong samting long David!
10. Wanem nambawan example nao Paul duim saed long wei for showim honor long paoa wea God givim long governing body, and wanem nao kamaot from diswan?
10 Long taem bilong Christian tu, iumi lukim olketa nambawan example bilong olketa wea honorim paoa wea God givim. Tingim Paul, olsem example. Hem showimaot respect for olketa disison bilong governing body bilong Christian kongregeson long first century. Long last visit bilong Paul for Jerusalem, governing body kaonselem hem for klinim hemseleva followim law for showimaot long olketa narawan hao hem no againstim Law Bilong Moses. Paul hem savve sei: ‘Olketa brata hia askem mi bifor for lusim Jerusalem taem laef bilong mi hem stap long danger. Distaem olketa wantem mi for showimaot long pablik respect bilong mi for Law Bilong Moses. Mi raetem finis wanfala leta for olketa long Galatia for talem olketa for stap klia from wei for followim datfala Law. Sapos mi go long temple, samfala maet no minim wanem mi duim, maet olketa bae tingse mi changem tingting bilong mi followim olketa bilong circumcise sekson.’ Bat, luk olsem Paul nating ting olsem. From diswan no minim wei for lusim eni Christian principle, hem respectim and followim kaonsel bilong first-century governing body. Samting wea barava kamaot from diswan hem hao Paul hem needim help bihaen wanfala Jew gang attakim hem, and then hem stap tu year long prison. Bat gogo, will bilong God hem happen. Paul hem witness front long olketa bigman long Caesarea and then gavman peim pasis bilong hem for go long Rome for witness front long Caesar seleva.—Acts 9:26-30; 21:20-26; 23:11; 24:27; Galatians 2:12; 4:9, 10.
Iu Savve Showim Respect?
11. Hao nao iumi savve showim respect long olketa wea garem paoa long world?
11 Iu savve showim respect long olketa wea garem paoa? Olketa Christian garem komand for “givim long evriwan samting wea olketa fit for askem, . . . long man wea askem honor, givim honor.” Tru nao, wei wea iumi stap anda long “olketa hae paoa” hem minim no wei for peim tax nomoa bat for iumi honorim olketa long paoa witim fasin and toktok bilong iumi. (Romans 13:1-7) Taem iumi feisim olketa wakman long gavman wea maet olketa raf, hao nao iumi ansa? Long Chiapas State, Mexico, olketa wea garem paoa long wanfala community tekova long farm area bilong 57 Jehovah’s Witness famili bikos olketa Christian hia no tekpart long samfala kastom bilong religion. Taem olketa holem olketa meeting for trae stretem datfala problem, olketa Witness, wea klin and werem kaleko long gudfala wei, evritaem tok witim honor and respect. Winim wan year bihaen, disison hem kamaot wea saedem olketa. Fasin bilong olketa kasem respect bilong samfala wea lukluk gogo olketa tu want for kamap Olketa Jehovah’s Witness!
12. Why nao hem important for garem “barava respect” for hasband wea no biliv?
12 Hao nao iu savve showimaot respect for paoa wea God givim insaed long famili? Bihaen hem storyim example bilong Jesus for acceptim nogud treatment, aposol Peter hem sei: “Long wei olsem, iufala waef, stap anda long hasband bilong iufala, mekem sapos eniwan no obeyim word, iufala maet savve pullim kam olketa, no long toktok, bat thru long fasin bilong waef bilong olketa, from olketa lukim klinfala fasin bilong iufala witim wei for showimaot barava respect.” (1 Peter 3:1, 2; Ephesians 5:22-24) Long hia, Peter mekhae hao hem important for waef stap anda long hasband witim “barava respect,” nomata samfala hasband no duim planti samting for kasem disfala respect. Wei bilong waef for respect savve pullim kam heart bilong hasband bilong hem wea no biliv.
13. Hao nao olketa waef savve honorim hasband bilong olketa?
13 From samting wea olketa scripture hia storyim, Peter pullim tingting bilong iumi long example bilong Sarah, wea hasband bilong hem, Abraham, hem wanfala nambawan example bilong faith. (Romans 4:16, 17; Galatians 3:6-9; 1 Peter 3:6) Waswe, olketa waef shud givim moa honor long hasband wea no biliv winim olketa wea garem hasband wea biliv? Waswe sapos iu no agree witim hasband bilong iu long wanfala samting? Jesus givim samfala advaes wea iumi savve followim long hia: “Sapos samwan wea garem paoa forcem iu for wakabaot witim hem for wan mile, go witim hem for tufala mile.” (Matthew 5:41) Waswe iu honorim hasband bilong iu long wei for followim tingting bilong hem? Sapos diswan luk hard tumas, story witim hem abaotem olketa feeling bilong iu. No tingse hem savve long feeling bilong iu. Bat taem iu talem tingting bilong iu long hem, duim long wei bilong respect. Bible hem encouragem iumi: “Letem toktok bilong iufala for evritaem hem kaenfala, garem salt, mekem iufala savve hao for givim ansa long each wan.”—Colossians 4:6.
14. Wanem nao insaed long wei for showim honor long dadi and mami?
14 Waswe long iufala olketa pikinini? Word bilong God givim komand olsem: “Olketa pikinini, obeyim dadi and mami bilong iufala insaed long Lord, from diswan hem raeteous fasin: ‘Honorim dadi and mami bilong iu’; hem nao firstfala komand witim promis.” (Ephesians 6:1-3) Lukim hao wei for obeyim dadi and mami hem sem witim wei for “honorim dadi and mami.” Greek toktok wea olketa transleitim “honorim” garem mining “for tinghae” or “putim price long hem.” Dastawe, for obey hem minim moa samting winim wei for followim olketa rul olsem dadi and mami forcem iu wea maet no luk stret long iu. God askem iu for tinghae long dadi and mami and long gaedens from tufala.—Proverbs 15:5.
15. Hao nao pikinini savve keepim respect bilong olketa nomata sapos olketa tingse dadi and mami nao mekem mistek?
15 Waswe sapos dadi and mami duim samting wea daonem respect bilong iu for tufala? Trae for lukim diswan from saed or wei wea tufala tingim. Waswe, no tufala nao “mekem iu born” and givim samting for iu? (Proverbs 23:22) Waswe, no love for iu nao muvim tufala? (Hebrews 12:7-11) Witim respect, tok witim dadi and mami bilong iu, minim long kwaet wei hao nao iu feel. Nomata sapos tufala ansa long wei wea iu no laekem, no lusim respect taem iu tok. (Proverbs 24:29) Tingim hao David hem keepim respect for Saul nomata taem king hem go difren from kaonsel bilong God. Askem Jehovah for helpem iu deal witim olketa feeling bilong iu. David hem sei: “Pourimaot heart bilong iufala front long hem. God hem wanfala sef ples for iumi.”—Psalm 62:8; Lamentations 3:25-27.
Honorim Olketa wea Lead
16. Wanem nao iumi savve lanem from olketa example bilong olketa false teacher and olketa angel?
16 Nomata holy spirit nao appointim olketa kongregeson elder, olketa no perfect and savve mekem olketa mistek. (Psalm 130:3; Ecclesiastes 7:20; Acts 20:28; James 3:2) From diswan, samfala insaed long kongregeson maet no feel hapi witim olketa elder. Wanem nao iumi shud duim taem iumi feel samting insaed long kongregeson hem no stret, or iumi ting olsem? Lukim wanem nao difren midolwan olketa first-century false teacher and olketa angel: “Bighed, followim tingting bilong olketa seleva, olketa [false teacher] no fraet long olketa wea kasem glory bat tokspoelem, bat olketa angel, nomata olketa garem moa strong and paoa, nating accusim olketa witim nogud toktok, olketa no duim diswan from olketa respectim Jehovah.” (2 Peter 2:10-13) Taem olketa false teacher tokspoelem “olketa wea kasem glory”—olketa elder wea kasem paoa insaed first-century Christian kongregeson—olketa angel nating tokspoelem olketa false teacher wea kosim wei for divaed midolwan olketa brata. Olketa angel, from olketa long hae position and garem kleva tingting abaotem justice winim man, olketa luksavve long samting wea happen insaed long kongregeson. Nomata olsem, “from olketa respectim Jehovah,” olketa leavim for God nao judgem.—Hebrews 2:6, 7; Jude 9.
17. Hao nao faith bilong iu shud helpem iu taem iu ting olketa elder rong long wei wea olketa deal witim wanfala problem?
17 Nomata sapos wanfala samting no followim wanem iumi ting hem shud followim, waswe, iumi shud no garem faith long Jesus Christ wea laef olsem Hed bilong Christian kongregeson? Waswe, hem no savve long wanem nao happen insaed own kongregeson bilong hem raonem world? Waswe, iumi shud no respectim wei bilong hem for stretem problem and luksavve hao hem fit for kontrolem olketa samting? For tok stret, ‘hu nao iumi for iumi judgem neiba bilong iumi?’ (James 4:12; 1 Corinthians 11:3; Colossians 1:18) Waswe, hem gud sapos iu talem olketa wari bilong iu long Jehovah insaed long prea?
18, 19. Wanem nao iu savve duim taem iu feel wanfala elder nao rong?
18 Bikos man no perfect, olketa hevi and problem savve kamap. Maet samtaem elder tu hem mekem mistek, kosim samfala for wari. Wei for iumi ansa kwiktaem long olketa taem olsem bae no stretem problem. Maet hem savve mekem problem kamap moa worse. Olketa wea garem spiritual tingting bae weit long Jehovah for stretem samting and givim wanem kaen discipline hem need for duim long taem and wei bilong hemseleva.—2 Timothy 3:16; Hebrews 12:7-11.
19 Waswe sapos iu wari tumas abaotem wanfala samting? Winim wei for tok long olketa narawan insaed long kongregeson abaotem, waswe iu no, witim respect, tok witim olketa elder for help? Long wei for no judge, minim hao diswan hem affectim iu. Evritaem garem “feeling” for olketa, and keepim respect taem iu tok long olketa. (1 Peter 3:8) No trae for tokspoelem, bat trustim wei wea olketa mature long Christian wei. Tinghae long eni encouragement from Bible wea olketa maet givim. And sapos luk olsem samfala nara samting moa olketa bae need for stretem, garem trust hao Jehovah bae gaedem olketa elder for duim samting wea gud and stret.—Galatians 6:10; 2 Thessalonians 3:13.
20. Wanem nao bae iumi storyim long next article?
20 Nomata olsem, wanfala narasaed stap yet for iumi tingim long wei for showim honor and respect for olketa wea garem paoa. Waswe, hem fitim for olketa wea garem paoa for respectim olketa wea stap long kea bilong olketa? Letem iumi lukim diswan long next article.
Hao Nao Bae Iu Ansa?
• Wanem gudfala reason nao iumi garem for honorim olketa wea garem paoa?
• Hao nao Jehovah and Jesus ting long olketa wea no respectim paoa wea God givim?
• Wanem gudfala example nao iumi garem abaotem olketa wea honorim olketa wea kasem paoa?
• Wanem nao iumi savve duim taem iumi ting wanfala wea garem paoa ovarem iumi luk olsem hem rong?
[Piksa long page 12]
Sarah barava respectim paoa bilong Abraham and hem hapi
[Piksa long page 13]
Michal fail for respectim paoa bilong David olsem hed bilong famili and olsem king
[Piksa long page 15]
“Hem barava no fitim, long saed bilong mi, . . . for iusim hand bilong mi againstim man wea Jehovah anointim!”
[Piksa long page 16]
Waswe, iu talem olketa wari bilong iu long Jehovah insaed long prea?