‘Bigfala Day Bilong Jehovah Hem Klosap Nao’
“Bigfala day bilong Jehovah hem klosap. Hem klosap nao, and hem hariap tumas.”—ZEPHANIAH 1:14.
1, 2. (a) Wanem spesol day nao olketa Christian weitim? (b) Wanem nao olketa kwestin wea gud for iumi askem, and why nao olsem?
WANFALA young gele hem hapi tumas and luk forward long wedding day bilong hem. Wanfala mami wea babule hem barava luk forward long taem wea baby bilong hem bae born. Wanfala man wea no holiday for longfala taem hem luk forward for start bilong holiday wea hem planim for longtaem finis. Wanem nao semsem long evri story hia? Evriwan weitim wanfala spesol day—wanfala day wea bae barava affectim laef bilong olketa. Thrifala evriwan barava luk forward long wanfala samting bat each wan luk forward long samting wea difren. Gogo, spesol day hia bae kam, and taem datwan happen, olketa hope olketa redi for hem.
2 Olsem tu, olketa tru Christian distaem barava luk forward long start bilong wanfala spesol day. Hem nao bigfala “day bilong Jehovah.” (Isaiah 13:9; Joel 2:1; 2 Peter 3:12) Wanem nao disfala “day bilong Jehovah” wea bae kam, and hao nao diswan bae affectim olketa man? And tu, hao nao iumi savve mek sure iumi redi for datwan? Hem barava important for iumi lukaotem ansa for olketa kwestin hia distaem bikos evri samting wea happen pruvim disfala toktok bilong Bible hem tru: “Bigfala day bilong Jehovah hem klosap. Hem klosap nao, and hem hariap tumas.”—Zephaniah 1:14.
“Bigfala Day Bilong Jehovah”
3. Wanem nao “bigfala day bilong Jehovah”?
3 Wanem nao “bigfala day bilong Jehovah”? Insaed long Bible, disfala toktok “day bilong Jehovah” hem minim olketa taem wea Jehovah panisim olketa enemy bilong hem and mekem nem bilong hem kasem glory. Olketa pipol bilong Judah and Jerusalem wea no faithful, and tu, olketa bilong Babylon and Egypt wea mek trabol for pipol bilong God feisim ‘olketa day bilong Jehovah’ taem Jehovah panisim olketa. (Isaiah 2:1, 10-12; 13:1-6; Jeremiah 46:7-10) Bat barava bigfala “day bilong Jehovah” hem no kam yet. Hem nao “day” wea Jehovah bae distroem pipol wea tok spoelem nem bilong hem. Diswan bae start taem “Bigfala Babylon” hem distroe, wea hem nao evri false religion long world, and hem bae finis taem evri nara part bilong disfala wicked world tu finis long war wea garem nem Armageddon.—Revelation 16:14, 16; 17:5, 15-17; 19:11-21.
4. Why nao staka pipol shud fraetem day bilong Jehovah wea kakam klosap tumas?
4 Staka pipol shud fraetem datfala day wea kakam klosap tumas, nomata olketa luksavve long datwan or nomoa. Why nao olsem? Jehovah hem ansa olsem thru long profet Zephaniah: “Datfala day hem wanfala day bilong bigfala kros, day for mekem man feel fraet and wari tumas, day bilong bigfala wind and for finisim evri samting, day bilong darkness, day bilong olketa cloud and bilong smoke.” Tru nao, datfala day hem barava fit for man fraetem! And tu, datfala profet hem sei: “Mi bae mekem olketa man feel wari tumas . . . bikos olketa sin againstim Jehovah.”—Zephaniah 1:15, 17.
5. Wanem gudfala tingting nao staka million pipol garem abaotem day bilong Jehovah, and why nao olsem?
5 Bat plande million narawan barava luk forward long taem wea day bilong Jehovah bae kam. Why nao olsem? Olketa savve hao hem taem wea olketa wea raeteous bae kasem salvation and sev. Hem day wea evriwan bae luksavve Jehovah nao datfala Most Hae and nambawan nem bilong hem, hem holy. (Joel 3:16, 17; Zephaniah 3:12-17) Samting wea man duim long living hem showaot sapos hem fraetem datfala day or hem luk forward long hem. Wanem nao tingting bilong iu abaotem wei wea datfala day hem klosap? Waswe, iu redi for hem? From day bilong Jehovah hem klosap tumas, waswe, datwan affectim wanem iu duim evriday?
“Pipol wea Laek for Tok Spoelem Samting Bae Kam”
6. Wanem nao tingting bilong staka pipol abaotem “day bilong Jehovah,” and why nao olketa tru Christian no sapraes long diswan?
6 Nomata datfala day hem klosap tumas, staka man no warim “day bilong Jehovah” wea klosap for kam. Olketa mekfani and tok spoelem pipol wea talem warning long olketa. Olketa tru Christian no sapraes long diswan. Olketa rememberim disfala warning bilong aposol Peter: “Iufala mas savve hao long olketa last day pipol wea laek for tok spoelem samting bae kam witim toktok bilong olketa, followim samting wea olketa seleva laekem and sei: ‘Mifala nating lukim yet taem wea hem promis for hem stap moa. Start long taem wea olketa laen dadi bilong iumi dae kam kasem distaem, evri samting gohed semsem olsem from start bilong creation.’”—2 Peter 3:3, 4.
7. Wanem nao bae helpem iumi for gohed tingim hao datfala day hem klosap?
7 Wanem nao bae helpem iumi for againstim kaen nogud tingting olsem and gohed for tingim hao datfala day hem klosap? Peter hem talem disfala toktok for iumi: “Thru long wanfala reminder, mi trae for muvim iufala for garem stretfala tingting mekem iufala mas no forgetim toktok wea olketa holy profet talem bifor and komandment bilong Lord and Datwan wea sevem pipol thru long olketa aposol bilong iufala.” (2 Peter 3:1, 2) Wei wea iumi lisin long olketa profesi wea talemaot warning bae helpem iumi for “garem stretfala tingting.” Maet iumi herem olketa reminder hia staka taem, bat hem barava important distaem, winim enitaem bifor, for iumi gohed ting strong long olketa warning hia.—Isaiah 34:1-4; Luke 21:34-36.
8. Why nao staka pipol no laek for herem olketa reminder insaed Bible?
8 Why nao samfala no laek for herem olketa reminder hia? Peter hem sei olsem: “Olketa no laek for tingim, hao from toktok bilong God bifor, skae and earth hem stap and wata stap raonem earth, and hem nao samting wea hem iusim for distroem earth long datfala taem, taem wata hem kavarem full earth.” (2 Peter 3:5, 6) Tru nao, samfala pipol no laekem day bilong Jehovah for kam. Olketa no laekem eni samting for spoelem samting wea olketa laek duim. Olketa no laek for ansa long Jehovah for wei wea olketa aftarem nomoa samting for olketa seleva and nating tingim hem! Olsem Peter hem talem, olketa “followim samting wea olketa seleva laekem.”
9. Wanem nao tingting bilong pipol wea stap long taem bilong Noah and Lot?
9 Olketa hia wea tok spoelem samting no laek “tingim” wei wea Jehovah distroem pipol long bifor. Jesus Christ and aposol Peter story abaotem tufala taem wea Jehovah duim olsem, hem nao “taem bilong Noah” and “taem bilong Lot.” (Luke 17:26-30; 2 Peter 2:5-9) Bifor datfala Flood, pipol no laek for followim warning wea Noah talem. Long sem wei, bifor Sodom and Gomorrah distroe, olketa son-in-law bilong Lot ting long hem olsem “man wea mekfani nomoa.”—Genesis 19:14.
10. Wanem nao Jehovah bae duim long olketa wea no ting strong long warning?
10 Hem semsem tu distaem. Bat lukim samting wea Jehovah talem for pipol wea no laek lisin: “Mi bae lukluk gud long olketa man wea olsem olketa sidaon long rabis wea stap nomoa long botom bilong drum wine and wea no eniwan sekem and disturbim olketa and wea sei olsem insaed heart bilong olketa, ‘Jehovah bae no duim gud samting, and bae hem no duim nogud samting.’ And pipol bae tekem riches bilong olketa and haos bilong olketa bae kamap emti ples. And bae olketa buildim haos, bat bae olketa no stap insaed; and bae olketa plantim grape plantation, bat bae olketa no drinkim wine bilong hem.” (Zephaniah 1:12, 13) Pipol savve gohed long samting olketa duim evriday, bat hard waka bilong olketa bae no mekem olketa kasem eni gud samting for olowe. Why nao olsem? Bikos seknomoa day bilong Jehovah bae kam, and eni material samting wea olketa garem bae nating sevem olketa.—Zephaniah 1:18.
“Gohed for Weitim and Tingim”
11. Wanem warning nao iumi shud tingim evritaem?
11 Iumi no olsem pipol long disfala wicked world wea iumi stap insaed, bat iumi mas evritaem tingim disfala warning wea profet Habakkuk hem talem: “Datfala vision hem stap yet for taem wea set finis, and hem hariap for kasem end, and hem bae no laea. Nomata sapos hem delay, gohed for weitim and tingim datwan; from hem bae no fail for kamap tru. Hem bae no leit.” (Habakkuk 2:3) Maet wei wea iumi no perfect mekem iumi tingse datfala day hem delay, nomata olsem, iumi mas no forgetim hao Jehovah hem no slow for duim samting. Day bilong hem bae kam long barava taem wea hem markem, long taem wea olketa man no expectim.—Mark 13:33; 2 Peter 3:9, 10.
12. Wanem warning nao Jesus hem givim, and hao nao diswan hem difren from olketa follower bilong Jesus wea faithful?
12 Jesus strongim wei wea hem important tumas for tingim evritaem day bilong Jehovah taem hem talem hao samfala follower bilong hem tu bae forgetim hao datfala day hem klosap. Hem sei olsem abaotem olketa: “Sapos enitaem datfala wicked slave hem sei long heart bilong hem, ‘Masta bilong mi hem delay,’ and start for hitim olketa nara slave and hem kaikai and drink witim olketa man for drunk, masta bilong datfala slave bae kam long day wea hem no tingim and long hour wea hem no savve, and bae barava panisim hem.” (Matthew 24:48-51) Datfala faithful and wise slave sekson barava difren bikos olketa nating forgetim hao datfala day hem klosap. Datfala slave sekson gohed for lukaot and showimaot olketa redi. Jesus markem hem “for lukaftarem evri samting bilong hem” hia long earth.—Matthew 24:42-47.
Need for Tingim Evritaem
13. Wanem nao Jesus duim for strongim hao olketa Christian mas evritaem tingim warning bilong hem?
13 Hem barava important for olketa Christian long first century for tingim evritaem hao Jerusalem hem klosap for distroe. Olketa mas no delay for ranawe from Jerusalem taem olketa lukim “olketa army camp raonem Jerusalem.” (Luke 21:20, 21) Datwan hem happen long year 66 C.E. Lukim hao Jesus hem mekhae long wei wea olketa Christian hia mas tingim evritaem diswan taem hem sei: “Man antap long haos mas no kam daon for tekem aot olketa samting from haos bilong hem; and man wea stap long garden mas no go bak long haos for tekem kaleko bilong hem.” (Matthew 24:17, 18) History showimaot hao Jerusalem no distroe stretawe, no eni samting happen for nara fofala year, so why nao long 66 C.E., olketa Christian mas kwiktaem followim toktok bilong Jesus?
14, 15. Why nao hem important tumas for olketa Christian long first century for kwiktaem duim samting taem olketa lukim army hem raonem Jerusalem?
14 Nomata army bilong Rome distroem Jerusalem long 70 C.E., fofala year from 66 go kasem 70 C.E. hem taem wea raf fasin and wei for killim man dae kamap big tumas. Wanfala man wea raetem history talem hao insaed Jerusalem long datfala taem “olketa difren sekson faetem each other, and olketa duim barava raf samting and staka pipol dae.” Olketa tekem olketa young man for mekem olketa wall moa strong, iusim olketa samting for faet, and for joinim army. Evriday olketa duim training saed long faet. Olketa ting long eniwan wea no sapotim olketa barava nogud samting wea olketa duim, olsem man wea againstim olketa. Sapos olketa Christian gohed for stap insaed long datfala taon, bae olketa stap long barava bigfala danger.—Matthew 26:52; Mark 12:17.
15 Interesting samting nao hem hao Jesus sei “olketa long Judea” tu and no olketa long Jerusalem nomoa, mas start for ranawe. Diswan hem important bikos tu-thri month bihaen army bilong Rome lusim Jerusalem, datfala army kam bak for faet moa. Firstaem olketa tekova long Galilee long 67 C.E., and then long year bihaen olketa winim Judaea. Diswan mekem bigfala wei for safa kamap long datfala ples. Hem kamap moa hard tu for eni Jew savve ranawe from Jerusalem. Olketa security stap long olketa gate bilong datfala taon, and olketa ting long eniwan wea trae for ranawe olsem hem sapotim olketa bilong Rome.
16. Wanem tingting nao olketa Christian long first century mas garem mekem olketa savve laef long datfala taem bilong trabol?
16 Taem iumi tingim evri samting hia, iumi minim nao why Jesus hem strongim hao olketa mas gohed for tingim end hem klosap. Olketa Christian mas willing for lusim olketa samting, and no letem olketa material samting for pullim tingting bilong olketa. For mekem olketa savve obeyim warning bilong Jesus, olketa mas “sei gudbae long evri samting bilong [olketa]” and willing for duim datwan. (Luke 14:33) Olketa wea kwiktaem obeyim datwan ranawe go long narasaed bilong Jordan and stap laef.
Gohed for Tingim Hao End Hem Klosap
17. Why nao iumi mas strongim go moa wei wea iumi tingim evritaem hao end hem klosap?
17 Olketa profesi insaed Bible showimaot iumi barava stap klosap long end. Distaem iumi need for barava tingting strong hao end hem klosap. Taem no eni war hem gohed, bae soldia no feel olsem hem stap insaed long danger. Nomata olsem, sapos hem relax tumas and seknomoa war hem start, and from hem no redi, maet hem savve dae long datfala faet. Diswan hem semsem tu long spiritual saed. Sapos iumi no evritaem tingim hao end hem klosap, maet iumi no redi taem Satan attakim iumi, and from datwan, maet iumi no redi tu taem day bilong Jehovah hem kam. (Luke 21:36; 1 Thessalonians 5:4) Sapos eniwan hem “slakdaon for followim Jehovah,” distaem nao hem taem for olketa lukaotem hem moa.—Zephaniah 1:3-6; 2 Thessalonians 1:8, 9.
18, 19. Wanem nao bae helpem iumi for evritaem tingim “day bilong Jehovah”?
18 Taem iumi tingim evri samting hia, iumi minim nao why aposol Peter warnim iumi for tingim evritaem “day bilong Jehovah”! Hao nao iumi savve duim diswan? Wanfala wei hem for kamap man wea garem “holy fasin” and duim olketa “waka wea showimaot fasin for lovem God.” (2 Peter 3:11, 12) Sapos iumi busy for duim olketa waka olsem, diswan bae helpem iumi for luk forward long taem wea “day bilong Jehovah” bae kam. Greek word wea olketa transleitim “tingim evritaem” hem really minim “muv moa fast.” Iumi no savve mekem datfala day bilong Jehovah kam bifor taem wea hem markem. Nomata olsem, sapos iumi gohed busy for servem God, datfala day bae kam, and from iumi busy hem bae feel olsem hem arrive kwiktaem tumas.—1 Corinthians 15:58.
19 Wei for ting raonem olketa reminder wea stap insaed Word bilong God bae mekem iumi fit for “barava luk forward long datfala day (laekem hem for hariap),” tru nao, bae iumi “olowe tingim and weitim” datwan. (2 Peter 3:12, The Amplified Bible; The New Testament, by William Barclay) Part long olketa reminder hia hem staka profesi wea storyim wei wea day bilong Jehovah bae kam, and tu, staka blessing for olketa wea ‘gohed for weitim Jehovah.’—Zephaniah 3:8.
20. Wanem kaonsel nao iumi shud tingting strong long hem?
20 Distaem nao hem taem for iumi evriwan tingting strong long disfala kaonsel wea profet Zephaniah hem talem: “Bifor bigfala kros bilong Jehovah hem kam againstim iufala pipol, bifor day bilong kros bilong Jehovah hem kam againstim iufala, lukaotem Jehovah, iufala evriwan wea garem kwaet fasin long earth, wea followim law bilong Hem. Lukaotem raeteous fasin, lukaotem kwaet fasin. Maet iufala savve haed long day bilong kros bilong Jehovah.”—Zephaniah 2:2, 3.
21. Wanem nao pipol bilong God bae disaed strong for duim long 2007?
21 Dastawe, yeartext for 2007 hem barava fitim, hem sei: “Bigfala day bilong Jehovah hem klosap.” Pipol bilong God barava sure hem “klosap nao, and hem hariap tumas.” (Zephaniah 1:14) “Hem bae no leit.” (Habakkuk 2:3) So taem iumi gohed weitim datfala day, iumi need for tingim evritaem hao iumi insaed olketa last day, and luksavve hao klosap nao olketa profesi hia bae fulfill evribit!
Waswe, Iu Savve Ansa?
• Wanem nao “bigfala day bilong Jehovah”?
• Why nao staka pipol no laek for tingim hao end hem klosap?
• Why nao olketa Christian long first century mas tingim evritaem hao end hem klosap and duim samting followim datwan?
• Hao nao iumi savve gohed for tingim long bigfala wei moa hao end hem klosap?
[Blurb long page 11]
Yeartext for 2007 hem: “Bigfala day bilong Jehovah hem klosap.” —Zephaniah 1:14.
[Piksa long page 9]
Olsem long taem bilong Noah, pipol wea tok spoelem samting bae seke fogud taem Jehovah distroem pipol
[Piksa long page 10]
Olketa Christian mas kwiktaem duim samting taem olketa lukim “army camp raonem” Jerusalem