Wanfala Niu World wea God Promisim
BIBLE, wea hem nao Word bilong God, mekem iumi garem hope taem hem sei: “Bat iumi weitim niu heven [skae] and niu earth wea hem promisim, wea evriwan bae garem raeteous fasin.—2 Peter 3:13.
Wanem nao datfala “niu heven [skae]”? Bible iusim olketa word olsem heven and skae for piksarem wei for rul. (Acts 7:49) Datfala “niu heven [skae]” wea 2 Peter 3:13 storyim, hem niu gavman wea bae rul ovarem earth. Hem niu bikos hem nao bae changem rul bilong world distaem (skae); hem wanfala niu samting tu saed long wei wea purpose bilong God hem gohed for fulfill. Hem nao datfala Kingdom wea Jesus hem teachim iumi for prea for hem. (Matthew 6:10) From God nao datwan wea mekem kamap and from God stap long heven, olketa kolem diswan “kingdom bilong heven.”—Matthew 7:21.
Wanem nao datfala “niu earth”? Hem no minim disfala graon, from Bible talem klia hao pipol bae stap long disfala earth for olowe. Datfala “niu earth” hem nao wanfala niu community bilong olketa man. Hem niu from wicked pipol distroe finis. (Proverbs 2:21, 22) Evriwan wea laef bae givim honor and obeyim Creator and bae duim evriting wea hem laekem olketa for duim. (Psalm 22:27) Distaem pipol from evri kantri kasem invitation for lanem evriting wea hem wantem iumi for duim and for live followim datwan. Waswe, iu duim datwan?
Insaed niu world bilong God, evriwan bae respectim rul bilong Hem. Waswe, love for God muvim iu for obeyim hem? (1 John 5:3) Waswe, iu showimaot diswan insaed haos bilong iu? long wakples or long skul? long wei wea iu iusim laef bilong iu?
Insaed datfala niu world, olketa man bae wan mind taem olketa worshipim tru God. Waswe, iu worshipim Creator bilong universe and earth? Waswe, worship bilong iu barava mekem iu wan mind witim olketa narawan wea worshipim God long evri kantri, tribe, and languis?—Psalm 86:9, 10; Isaiah 2:2-4; Zephaniah 3:9.
[Box long page 17]
God wea Promisim Evriting Hia
Hem nao Creator bilong universe and earth. Hem nao datwan wea Jesus Christ kolem “datfala only tru God.”—John 17:3.
Staka long olketa man mekhae long olketa god wea olketa seleva wakem. Planti million pipol baodaon front long olketa image wea no garem laef. Olketa narawan mekhae long olketa organization bilong olketa, olketa teaching wea no garem spiritual faondeson, or followim nomoa feeling bilong olketa seleva. Nomata olketa wea sei olketa iusim Bible, olketa nating mekhae long nem bilong datwan wea Bible sei hem “datfala tru God.”—Deuteronomy 4:35.
Creator story olsem abaotem hemseleva: “Mi nao Jehovah. Hem nao nem bilong mi.” (Isaiah 42:5, 8) Disfala nem kamap samting olsem 7,000 taem insaed Bible long languis wea olketa iusim for raetem Bible long firstaem. Jesus Christ teachim olketa follower bilong hem for prea olsem: “Dadi bilong mifala wea stap long heven, mekem nem bilong iu hem kamap holy.”—Matthew 6:9.
Wanem kaen fasin nao datfala tru God garem? Hem sei hemseleva nao datwan wea “garem mercy and kaenfala fasin, slow for kros and wea fulap witim loving-kaeness and truth” and hao hem mas panisim man wea min for brekem olketa komandment bilong hem. (Exodus 34:6, 7) History showimaot hao diswan hem barava tru taem hem deal witim olketa man.
Iumi mas ting long datfala nem and datwan wea garem datfala nem olsem holy. From hem Creator and Sovereign Bilong Universe, hem fit for kasem worship bilong iumi and wei for obeyim hem. Waswe, iu givim olketa samting hia long hem?
[Box/Piksa long page 18]
Wanem Nao Olketa Change wea “Niu Heven [Skae] and Niu Earth” Mekem Kamap?
Earth kamap Paradaes Luke 23:43
Wanfala world wea love hem John 13:35;
mekem pipol from evri kantri, Revelation 7:9, 10
tribe, and languis garem wan mind
Peace kamap evriwea long world, Psalm 37:10, 11;
trufala sef living for evriwan Micah 4:3, 4
Waka wea mekem man satisfae, Isaiah 25:6; 65:17, 21-23
staka kaikai
Sik, sorre, dae hem finis Isaiah 25:8;
Full world garem pipol Revelation 15:3, 4
wea wan mind for worshipim tru God
[Box/Piksa long page 19]
Waswe, Bae Iu Kasem Gud Samting?
God kanduit laea!—Titus 1:2.
Jehovah hem sei: “Toktok bilong mi . . . bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.”—Isaiah 55:11.
Jehovah hem start finis for creatim “niu heven [skae] and niu earth.” Datfala gavman long heven hem start finis. Hem putim finis faondeson for “niu earth.”
Bihaen hem story abaotem samfala nambawan samting wea datfala “niu heven [skae] and niu earth” bae duim for olketa man, Revelation showim samting wea God seleva, datfala Sovereign Bilong Universe, hem talem: “Lukim! Mi bae mekem evri samting kamap niu.” And tu hem sei: “Raetem, from olketa toktok hia hem faithful and tru.”—Revelation 21:1, 5.
Barava important kwestin nao, Waswe, iumi duim finis evriting wea iumi need for duim mekem iumi fit for kamap part bilong datfala “niu earth” wea anda long datfala “niu heven [skae]”?