Waswe, Iu Garem “Fasin for Weit”?

“Iufala mas kamap wanem kaen man long holy fasin and waka wea showimaot fasin for lovem God, weitim and tingim evritaem day bilong Jehovah wea bae kam!”—2 PETER 3:11, 12.

1, 2. Wanem example nao iumi savve iusim wea showimaot “fasin for weit” saed long day bilong Jehovah?

TINGIM sapos wanfala famili weitim olketa visitor wea bae kam for kaikai. Taem for olketa arrive hem klosap. Waef hem busy for duim olketa last samting for redyim kaikai. Hasband bilong hem and olketa pikinini help for mek sure evri samting hem redy. Evriwan hapi. Tru nao, full famili hapi from olketa visitor klosap for arrive and olketa luk forward long naesfala kaikai and gudfala wei for kaban tugeta.

² Iumi olketa Christian weitim samting wea barava moa important. Wanem nao datwan? Iumi evriwan weitim “day bilong Jehovah”! Go kasem datfala taem, iumi mas olsem profet Micah, wea sei: “Jehovah nao bae mi go ahed for luk aotem. Mi bae showimaot fasin for weit long God bilong salvation bilong mi.” (Micah 7:7) Waswe, datfala toktok minim hem no duim eni samting taem hem weit? Nomoa. Planti waka stap.

3. Olsem 2 Peter 3:11, 12 talem, wanem kaen tingting nao olketa Christian mas garem?

³ Aposol Peter helpem iumi for garem stretfala tingting taem iumi weit. Hem sei: “Iufala mas kamap wanem kaen man long holy fasin and waka wea showimaot fasin for lovem God, weitim and tingim evritaem day bilong Jehovah wea bae kam!” (2 Peter 3:11, 12) Lukim hao disfala toktok hem talemaot samting. Peter no askem wanfala kwestin. Long tufala leta bilong hem wea God muvim hem for raetem, hem storyim wanem kaen pipol nao olketa Christian mas kamap olsem. Hem encouragem olketa tu for go ahed for duim “holy fasin and waka wea showimaot fasin for lovem God.” Nomata samting olsem 30 year hem go pas finis from taem wea Jesus Christ givim saen bilong “taem bilong end bilong disfala system,” olketa Christian long datfala taem mas go ahed for luk aot. (Matthew 24:3) Olketa mas “weitim and tingim evritaem” hao day bilong Jehovah hem klosap.

4. Wanem nao hem minim for “tingim evritaem day bilong Jehovah wea bae kam”?

⁴ Datfala Greek word wea olketa transleitim “tingim evritaem” hem minim “mekem hariap.” Hem tru, iumi no savve mekem day bilong Jehovah ‘hariap’ long really wei. For tok stret, iumi “no savve long datfala day or hour” wea Jesus Christ bae kam for judgem olketa enemy bilong Dadi bilong hem. (Matthew 24:36; 25:13) Wanfala reference buk explainim hao verb wea datfala toktok “mekem hariap” hem kam from, hem minim “‘for duim kwiktaem’ and so hem join witim wei ‘for strong for duim samting, busy long wanfala samting.’” So Peter encouragem olketa Christian brata for barava wantem tumas day bilong Jehovah for kam. Olketa savve duim diswan long wei for tingim evritaem datfala day. (2 Peter 3:12) From datfala “bigfala day bilong Jehovah wea fit for mekem man fraet” hem kam klosap distaem, iumi shud garem semkaen tingting.—Joel 2:31.

Weit Witim “Holy Fasin”

5. Hao nao iumi savve showimaot iumi barava want tumas for lukim “day bilong Jehovah”?

⁵ Sapos iumi barava want tumas for stap laef long day bilong Jehovah, iumi bae showimaot diswan thru long “holy fasin and waka wea showimaot fasin for lovem God.” Datfala toktok “holy fasin” maet remindim iumi abaotem kaonsel bilong Peter taem hem sei: “Olsem olketa pikinini wea obey, finis for followim olketa samting wea iufala laekem bifor, taem iufala no garem savve, bat, for fitim datfala Holy Wan wea kolem iufala, iufala tu mas kamap holy long evri fasin bilong iufala, from olketa raetem finis: ‘Iufala mas holy, from mi nao holy.’”—1 Peter 1:14-16.

6. Wanem nao iumi mas duim for iumi holy?

⁶ For iumi holy, iumi mas go ahed for klin long body, mind, fasin, and long spiritual wei. Waswe, iumi mek redy for “day bilong Jehovah” long wei for mek sure iumi holy from iumi each wan garem nem bilong Jehovah? Hem no isi for keepim holy fasin olsem bikos olketa standard bilong world saed long fasin barava gogo daon. (1 Corinthians 7:31; 2 Timothy 3:13) Waswe, iumi luksavve hao olketa standard bilong iumi saed long fasin hem kamap moa and moa difren from standard bilong world wea gogo daon? Sapos nomoa, iumi garem problem. Waswe, nomata olketa standard bilong iumi wanwan hem maet evritaem moa hae winim world, hem tu start for gogo daon? Sapos olsem, iumi need for duim samting for stretem diswan for mekem God hapi.

7, 8. (a) Wanem samting nao maet mekem iumi forgetim hao hem important tumas for garem “holy fasin”? (b) Wanem nao iumi maet need for duim for stretem diswan?

⁷ From pornography hem stap long Internet and from hem isi for pipol lukim haed, wanfala doctor hem sei hao samfala wea bifor no garem chance for lukim dirty samting olsem, distaem olketa garem “staka chance saed long sex.” Sapos iumi luk aotem dirty samting olsem long Internet, iumi ting nating long komand bilong Bible for “no tasim eni samting wea dirty.” (Isaiah 52:11) Waswe, hem showaot iumi really “tingim evritaem day bilong Jehovah wea bae kam”? Or waswe, maet long tingting bilong iumi datfala day bae delay, and nomata sapos iumi spoelem tingting bilong iumi witim dirty samting, iumi still garem taem for kamap klin moa bihaen? Sapos iumi garem problem saed long pornography hem barava important for iumi prea strong long Jehovah for hem ‘mekem eye bilong iumi no lukim rabis samting and keepim iumi laef long wei bilong hem’!—Psalm 119:37.

⁸ Bigfala haf bilong Olketa Jehovah’s Witness, nomata young or olo, keepim olketa hae standard bilong God saed long fasin and stap klia from olketa dirty samting bilong disfala world. From olketa luksavve hao taem hem short tumas and warning bilong Peter hao “day bilong Jehovah bae kam olsem man for steal,” olketa go ahed for showimaot “holy fasin.” (2 Peter 3:10) Samting olketa duim pruvim olketa “weitim and tingim evritaem day bilong Jehovah wea bae kam.”a

Weit Witim “Waka wea Showimaot Fasin for Lovem God”

9. Fasin for lovem God shud muvim iumi for duim wanem samting?

⁹ For iumi tingim evritaem day bilong Jehovah, hem barava important tu for iumi duim “waka wea showimaot fasin for lovem God.” For garem “fasin for lovem God” hem minim for garem respect for God wea muvim iumi for duim samting wea hem hapi long hem. Feeling for loyal long Jehovah savve muvim iumi for duim waka wea showimaot fasin for lovem God. Hem will bilong hem for “evri difren kaen man mas sev and kasem stretfala savve bilong truth.” (1 Timothy 2:4) God “no laekem eniwan for dae bat hem laekem evriwan for repent.” (2 Peter 3:9) So, fasin bilong iumi for lovem God shud muvim iumi for waka moa hard for helpem pipol lane abaotem Jehovah and followim hem.—Ephesians 5:1.

10. Why nao iumi shud gard againstim “giaman paoa bilong olketa richfala samting”?

¹⁰ Sapos iumi luk aotem firstaem Kingdom bilong God, laef bilong iumi bae fulap witim waka wea showimaot fasin for lovem God. (Matthew 6:33) Diswan minim iumi mas garem balance tingting saed long olketa material samting. Jesus givim disfala warning: “Keepim eye bilong iufala open and gard againstim evrikaen fasin for kavet, bikos nomata sapos wanfala man garem planti samting laef bilong hem no kam from olketa samting wea hem garem.” (Luke 12:15) Nomata iumi maet tingse hem hard tumas for wei for lovem selen for spoelem iumi, hem gud for iumi tingim hao “wari bilong disfala system and giaman paoa bilong olketa richfala samting” savve “blokem datfala word” bilong God. (Matthew 13:22) Maet iumi faendem hard for kasem selen fitim need bilong iumi. Long samfala ples long world planti pipol tingse for kasem gudfala living olketa mas muv go long wanfala rich kantri and lusim famili for samfala year. Samfala pipol bilong God tu garem diskaen tingting. Sapos olketa go long nara kantri, olketa maet fit for provaedem staka gud samting for famili bilong olketa. Bat, hao nao spiritual living bilong famili long hom? From hed bilong famili no stap, waswe, bae olketa garem spiritual strong wea olketa bae needim for go ahed laef long day bilong Jehovah?

11. Hao nao wanfala man wea go waka long nara kantri hem showimaot hao waka wea showimaot fasin for lovem God hem moa important winim riches?

¹¹ Wanfala man from Philippines wea go waka long Japan hem lanem truth bilong Bible from Olketa Jehovah’s Witness long there. Taem hem lanem from Bible olketa responsibility bilong hem saed long hedship, hem luksavve hem need for helpem famili bilong hem for worshipim Jehovah. (1 Corinthians 11:3) Waef bilong hem wea stap long hom hem barava againstim niu religion bilong hem and laekem hem for go ahed for sendem kam selen winim wei for kam bak and teachim famili olketa biliv bilong hem from Bible. Bat, from disfala man luksavve taem hem short and hem wari abaotem famili bilong hem, diswan muvim hem for go bak long hom. Gudfala samting kamaot from wei wea hem deal witim famili bilong hem long patient and loving wei. Gogo, famili bilong hem garem wan mind long tru worship, and waef bilong hem join insaed full-taem ministry.

12. Why nao iumi mas putim olketa spiritual samting firstaem long laef bilong iumi?

¹² Maet iumi savve markem iumi witim pipol wea stap insaed wanfala building wea bone. Waswe, bae hem wise for ran olabaot for sevem olketa material samting from building wea bone and klosap for foldaon? Or waswe, hem barava moa important for sevem pipol—iumiseleva and famili bilong iumi and olketa narawan wea stap long datfala building? Olsem tu, disfala wicked system hem kwiktaem gogo for finis, and laef bilong pipol stap long danger. From iumi luksavve long diswan, iumi shud putim olketa spiritual samting firstaem long laef bilong iumi and strong for duim disfala waka for preachim Kingdom wea savve sevem laef bilong pipol.—1 Timothy 4:16.

Iumi Mas “No Garem Eni Mark”

13. Iumi laek for wanem kaen man taem day bilong Jehovah hem kam?

¹³ For strongim hao hem important tumas for garem fasin for weit, Peter hem sei: “Olketa wea mi lovem, from iufala weitim olketa samting hia, duim best bilong iufala mekem long end, [God] bae lukim hao iufala no garem eni mark and no dirty, and stap long peace.” (2 Peter 3:14) For join witim encouragement bilong hem for garem holy fasin and duim waka wea showimaot fasin for lovem God, Peter strongim hao long end, hem important for Jehovah lukim hao iumi klin thru long spesol blood bilong Jesus. (Revelation 7:9, 14) Diswan minim man mas showimaot faith long sakrifaes bilong Jesus and kamap wanfala servant bilong Jehovah wea dedicate and baptaes finis.

14. Wanem nao hem minim for “no garem eni mark”?

¹⁴ Peter encouragem iumi for duim best bilong iumi for “no garem eni mark.” Waswe, iumi mek sure tokpiksa kaleko bilong iumi, wea hem Christian fasin bilong iumi, no garem eni mark from disfala world? Taem iumi lukim wanfala mark long really kaleko bilong iumi, iumi stretawe trae for aotem datwan. Sapos hem wanfala best kaleko bilong iumi, iumi barava trae hard for klinim. Waswe, iumi feel olsem tu sapos Christian kaleko bilong iumi garem mark long tokpiksa wei, bikos long eni wik point long fasin bilong iumi?

15. (a) Why nao olketa Israelite mas mekem olketa smol string long botom long skirt bilong olketa? (b) Hao nao olketa servant bilong Jehovah distaem difren from nara pipol?

¹⁵ Olketa Israelite mas mekem “olketa smol string long botom long skirt bilong olketa” and “putim wanfala blue string antap long olketa smol string wea hange long botom bilong skirt.” For wanem? Mekem olketa no forgetim olketa komandment bilong Jehovah, obeyim olketa, and ‘pruvim olketa holy’ long God bilong olketa. (Numbers 15:38-40) Hem showaot klia hao iumi olketa servant bilong Jehovah difren from disfala world bikos iumi obeyim olketa law and principle bilong God. Olsem example, iumi klin saed long fasin, iumi respectim wei wea blood hem holy, and iumi stap klia long evrikaen wei for worshipim idol. (Acts 15:28, 29) Planti pipol respectim iumi for wei wea iumi disaed strong for stap klin.—James 1:27.

Iumi Mas “No Dirty”

16. Wanem nao iumi mas duim for mek sure iumi “no dirty”?

¹⁶ Peter talem tu hao iumi mas “no dirty.” Hao nao iumi savve duim diswan? Planti taem iumi savve klinim wanfala mark long kaleko, bat sapos samting hem dirty hem moa serious winim wanfala mark. Samting wea dirty hem savve minim samting insaed hem rong or no stret. Aposol Paul encouragem olketa Christian brata long Philippi: “Go ahed for duim evri samting and no garem fasin for komplen and raoa, mekem iufala no garem blame and no guilty, olketa pikinini bilong God wea no garem eni dirty mark midolwan long wanfala badfala and olabaot genereson, wea midolwan long diswan iufala shaen olsem olketa laet insaed long world.” (Philippians 2:14, 15) Sapos iumi followim datfala kaonsel, iumi bae stap klia long wei for komplen and raoa and stretfala reason bae muvim iumi for servem God. Love for God and neiba bae muvim iumi for preachim “disfala gud nius bilong kingdom.” (Matthew 22:35-40; 24:14) And tu, iumi bae go ahed for talemaot disfala gud nius nomata planti pipol no minim why iumi volunteer for spendem taem and strong for helpem nara pipol lane abaotem God and Word bilong hem, Bible.

17. Olketa wanem samting nao shud muvim iumi taem iumi reach aot for olketa privilege insaed Christian kongregeson?

¹⁷ From iumi laekem Jehovah lukim iumi “no dirty,” iumi shud lukluk gud long wanem nao muvim iumi long evri samting wea iumi duim. Iumi lusim finis wei bilong disfala world wea duim samting for olketa selfish reason nomoa, olsem for kasem riches or paoa. Sapos iumi reach aot for kasem olketa privilege insaed Christian kongregeson, olketa stretfala reason, and love bilong iumi for Jehovah and nara pipol shud muvim iumi. Hem gud tumas for lukim olketa spiritual man “reach aot for waka bilong overseer” from olketa hapi and garem hambol tingting wea muvim olketa for waka hard for Jehovah and olketa Christian brata bilong olketa. (1 Timothy 3:1; 2 Corinthians 1:24) Tru nao, olketa wea kasem mark for serve olsem olketa elder ‘shepherdim flock bilong God . . . long willing wei; no from olketa laek for kasem selen long wei wea no honest, bat from olketa barava want for duim; no long wei for bossim olketa wea God ownim, bat long wei for kamap example long olketa sheep.’—1 Peter 5:1-4.

Iumi Mas “Stap Long Peace”

18. Pipol savve long olketa wanem fasin bilong Olketa Jehovah’s Witness?

¹⁸ Last samting, Peter talem iumi for “stap long peace.” For duim diswan, iumi mas garem peace witim Jehovah and neiba bilong iumi. Peter strongim hao hem important for iumi garem “barava strongfala love for each wan” and for keepim peace witim olketa Christian brata bilong iumi. (1 Peter 2:17; 3:10, 11; 4:8; 2 Peter 1:5-7) For keepim disfala peace, iumi mas garem love midolwan long iumiseleva. (John 13:34, 35; Ephesians 4:1, 2) Love and peace bilong iumi hem barava showaot long taem bilong olketa international convention. Long wanfala convention long Costa Rica long 1999, wanfala man wea sellim samting long airport hem kros bikos olketa Witness wea welkamim olketa visitor blokem ples wea hem sellim samting mekem pipol no lukim. Bat, long mek-tu day hem lukim love and peace wea showaot long welkam wea olketa visitor kasem, nomata olketa lokol Witness no meetim olketa bifor. Long lastfala day, datfala man join for welkamim olketa visitor and hem ask for wanfala Bible study.

19. Why nao hem important tumas for aftarem peace witim olketa Christian brata bilong iumi?

¹⁹ Wei wea iumi barava willing for aftarem peace witim olketa spiritual brata and sista bilong iumi maet affectim wei wea iumi really luk forward for day bilong Jehovah and niu world wea hem promisim for kam. (Psalm 37:11; 2 Peter 3:13) Tingim sapos hem hard for iumi keepim peace witim Christian brata. Waswe, bae iumi stap long peace witim hem long Paradaes? Sapos wanfala brata garem samting againstim iumi, iumi shud kwiktaem ‘mek peace witim hem.’ (Matthew 5:23, 24) Sapos iumi laek for garem peace witim Jehovah, hem important tumas for iumi duim diswan.—Psalm 35:27; 1 John 4:20.

20. Long olketa wanem wei nao iumi showimaot iumi garem “fasin for weit”?

²⁰ Waswe, iumiseleva “weitim and tingim evritaem day bilong Jehovah wea bae kam”? Wei wea iumi garem holy fasin, nomata insaed disfala dirty world, showimaot iumi barava want tumas for lukim end bilong wicked fasin. And tu, waka wea iumi duim wea showimaot fasin for lovem God showimaot klia hao iumi barava wantem day bilong Jehovah for kam and for stap anda long rul bilong datfala Kingdom. And wei wea iumi hope for stap long datfala peaceful niu world hem showaot klia from wei wea iumi aftarem peace witim olketa Christian brata bilong iumi distaem. Long olketa wei olsem, iumi showimaot iumi garem “fasin for weit” and “tingim evritaem day bilong Jehovah wea bae kam.”

[Footnote]

Waswe, Iu Remember?

• Wanem nao hem minim for “tingim evritaem day bilong Jehovah wea bae kam”?

• Hao nao iumi savve showimaot “fasin for weit” saed long olketa samting iumi duim?

• Why nao “waka wea showimaot fasin for lovem God” hem important tumas?

• Wanem nao iumi mas duim mekem Jehovah lukim hao iumi “no garem eni mark, no dirty and stap long peace”?

[Piksa long page 11]

“Fasin for weit” hem showaot long holy fasin

[Olketa Piksa long page 12]

Waka for preachim Kingdom savve sevem laef bilong pipol

[Piksa long page 14]

Taem iumi weitim day bilong Jehovah, iumi mas aftarem peace witim olketa narawan