Jehovah Hem Big Winim Heart Bilong Iumi

“JEHOVAH hem hapi long olketa wea fraet long hem,” man wea raetem psalm hem sei. Tru tumas, Creator hem hapi for lukim evri servant bilong hem trae hard for saportim olketa raeteous mark bilong hem. God blessim olketa loyal wan bilong hem, encouragem olketa, and comfortim olketa long taem bilong sorre. Hem savve hao olketa worshiper bilong hem no perfect, so hem no ova tumas long wanem hem expectim from olketa.—Psalm 147:11.

Hem no hard for iumi bilivim hao Jehovah garem bigfala love for olketa servant bilong hem. Bat, luk olsem samfala pipol wari tumas long wik point bilong olketa, so olketa tingse Jehovah bae no savve lovem olketa. Olketa maet ting olsem: “Mi no gud tumas so hem hard for Jehovah lovem mi.” Hem tru, iumi evriwan garem olketa nogud feeling samfala taem. Bat luk olsem samfala faet evritaem againstim wei for feel iusles.

Wei for Feel Iusles

Long Bible taem planti faithful wan safa from feeling for wikdaon. Job heitim laef and tingse God lusim hem finis. Wantaem, Hannah, wea kamap mami bilong Samuel, wari tumas and krae from hem no garem pikinini. David hem “barava baodaon low tumas,” and Epaphroditus hem wari tumas bikos nius abaotem sik bilong hem mekem olketa brata bilong hem sorre.—Psalm 38:6; 1 Samuel 1:7, 10; Job 29:2, 4, 5; Philippians 2:25, 26.

Waswe long olketa Christian distaem? Maet sik, olo age, or narafala problem bilong man seleva stopem samfala for duim moa samting wea olketa laek for duim long holy service. Diswan maet mekem olketa for tingse olketa no kasem mark bilong Jehovah and olketa narawan wea biliv. Or samfala maet blamem olketa seleva evritaem for olketa mistek bifor, olketa daotem sapos Jehovah forgivim olketa finis. Maet olketa narawan wea kam from famili wea garem hardfala living bilivim hao no fit for pipol lovem olketa. Hao nao hem olsem?

Samfala growap long famili wea olketa no showimaot love bat selfish fasin, fasin for tok spoelem man, and fraet. Olketa maet no garem chance for savve long wanfala dadi wea barava lovem olketa, wea luk for eni chance for praisem and encouragem olketa, wea no tingim olketa smol mistek and wea redy for forgivim olketa big rong tu, and wea loving wei bilong hem mekem evriwan long famili feel sef. From olketa no garem dadi long earth wea garem love, olketa maet faendem hard for luksavve wanem nao hem minim for garem wanfala Dadi long heven wea garem love.

Example, Fritz hem raet olsem: “Wei bilong dadi bilong mi for no showimaot love barava affectim mi taem mi pikinini and taem mi young.a Hem no savve givim praise, and mi nating feel klos long hem. Tru nao, klosap evritaem, mi fraetem hem.” From diswan, Fritz, wea hem winim 50 year distaem, still savve feel olsem hem iusles. And Marfarette hem sei: “Dadi and mami bilong mi nating kaen and no garem love. Taem mi start for studyim Bible, mi faendem hard for minim wanfala dadi wea garem love.”

Nomata wanem nao reason, olketa feeling olsem showimaot hao samfala taem samting wea muvim iumi long service bilong iumi for God hem, no love, bat guilty feeling or fraet. Iumi ting olsem best bilong iumi hem no mas gud. Wei wea iumi want for mekem Jehovah and olketa brata bilong iumi hapi maet mekem iumi feel olsem iumi no fit. From diswan, iumi maet fail for kasem goal bilong iumi, putim blame long iumiseleva, and feel wikdaon.

Wanem nao iumi savve duim? Maet iumi need for tingim moa hao Jehovah hem barava kaen tumas. Wanfala man wea minim gud disfala love bilong God hem aposol John.

“God Hem Big Winim Heart Bilong Iumi”

Long end bilong first century C.E., John raet olsem long olketa wea garem sem biliv: “From diswan bae iumi savve iumi garem truth, and bae iumi mekem heart no wari front long hem abaotem eni samting wea heart bilong iumi maet judgem iumi, bikos God hem big winim heart bilong iumi and savve long evri samting.” Why nao John raetem olketa toktok hia?—1 John 3:19, 20.

John savve gud hao wanfala servant bilong Jehovah savve feel guilty long hemseleva insaed heart. Maet John seleva garem olketa feeling olsem. Samfala taem Jesus stretem John, wanfala young man wea savve kros kwiktaem, from hem ova tumas taem hem deal witim pipol. Tru nao, Jesus givim John and brata bilong hem James ‘mek-tu nem Boanerges, wea minim Olketa Son Bilong Thunder.’—Mark 3:17, Luke 9:49-56.

Insaed next 60 year, John hem change and kamap wanfala Christian wea balance, garem love, and mercy. Kasem taem wea hem, olsem lastfala aposol wea still laef, raetem firstfala leta bilong hem wea kam from God, hem savve hao Jehovah no askem reason for evri mistek. Bat hem garem feeling, kaen, gud tumas, Dadi wea kea long pipol, wea garem bigfala love for evriwan wea lovem hem and worshipim hem long truth. John raet olsem: “God hem love.”—1 John 4:8.

Jehovah Hapi Long Service Bilong Iumi for Hem

God savve long olketa wik point bilong iumi wea iumi born kam witim, and hem minim diswan. David hem raet olsem: “From hem savve gud hao hem wakem iumi, hem tingim hao iumi dust.” Jehovah luksavve hao problem long living mekem iumi kamap olsem distaem. For tok stret, hem savve gud long iumi winim wei wea iumi savve long iumiseleva.—Psalm. 103:14.

Hem savve hao planti long iumi laek for change, bat hem hard for winim olketa wik point bilong iumi. Iumi savve markem problem bilong iumi witim aposol Paul, wea raet olsem: “From gud samting wea mi wantem mi no duim, bat nogud samting wea mi no wantem hem nao wanem mi go ahed for duim.” Iumi evriwan insaed long sem faet. From diswan, samfala taem heart bilong iumi savve mekem iumi wikdaon.—Romans. 7:19.

Rememberim diswan evritaem: Wei wea Jehovah ting long iumi hem moa important winim wei wea iumi ting long iumiseleva. Taem hem lukim hao iumi trae for mekem hem hapi, hem no ting smol long diswan bat hem hapi tumas. (Proverbs 27:11) Nomata samting wea iumi duim luk olsem hem smol long eye bilong iumi, hem hapi tumas witim willing fasin bilong iumi and gudfala samting wea muvim iumi. Hem no lukim wanem iumi duim nomoa, hem luksavve tu long samting wea iumi want for duim; hem luksavve long olketa hope and feeling bilong iumi. Jehovah savve readim heart bilong iumi.—Jeremiah 12:3; 17:10.

Olsem example, planti Jehovah’s Witness garem wei for feel shame and kwaet, pipol wea no laek for haem seleva. Long pipol olsem, wei for preachim gud nius from haos tu haos hem bigfala challenge. Bat, from olketa barava want for servem God and for helpem neiba bilong olketa, nomata olketa wea savve shame tu lane hao for story witim olketa neiba and for story abaotem Bible. Maet olketa tingse olketa duim smol samting nomoa, and maet diswan no mekem olketa hapi. Heart bilong olketa maet mekem olketa for tingse ministry bilong olketa hem no mas gud. Bat Jehovah hem barava hapi long hard waka wea pipol hia duim long service. And tu, olketa no savve sure abaotem wanem taem and wea nao olketa seed bilong truth wea olketa plantim bae start for grow, and garem frut.—Ecclesiastes 11:6; Mark 12:41-44; 2 Corinthians 8:12.

Olketa nara Witness safa from health problem wea go ahed for longtaem or olketa gogo for olo. Wei for attendim meeting long Kingdom Hall savve garem planti pain and hevi for olketa. Wei for lisin long wanfala tok abaotem preaching waka mekem olketa ting bak long wanem olketa duim bifor and wanem olketa still want for duim, nomata sik stopem olketa. Olketa maet feel guilty bikos olketa no fit for followim kaonsel long wei wea olketa laek for duim. Nomata olsem, iumi sure hao Jehovah tinghae long fasin bilong olketa for loyal and stand strong. Sapos olketa go ahed for stap loyal, hem bae no forgetim faithful fasin bilong olketa.—Psalm 18:25; 37:28.

“Mekem Heart Bilong Iumi No Wari”

Taem John kamap olo, luk olsem hem minim staka samting abaotem kaenfala fasin bilong God. Remember hao hem raet olsem: “God hem big winim heart bilong iumi and savve long evri samting.” And tu, John encouragem iumi for “mekem heart bilong iumi no wari.” Wanem nao John minim long datfala toktok?

Vine’s Expository Dictionary of Old and New Testament Words hem sei, Greek word olketa transleitim “no wari” hem minim “for barava muvim, for win ovarem, for switim.” For minim long nara wei, for mekem heart bilong iumi no wari, iumi need for winim heart bilong iumi, for switim hem for bilivim hao Jehovah hem lovem iumi. Hao?

Fritz, wea iumi storyim firstaem insaed disfala article, serve olsem elder long wanfala kongregeson bilong Olketa Jehovah’s Witness for winim 25 year finis and hem faendem hao wei for study seleva savve mekem heart bilong hem for no daotem love bilong Jehovah. “Mi studyim Bible and olketa buk bilong iumi evritaem and long careful wei. Diswan helpem mi no for tingim samting wea go pas finis bat for lukim klia nambawan future bilong iumi. Samfala taem, mi ting bak long samting wea go pas finis, and mi feel olsem God bae hard for lovem mi. Bat, mi faendem hao wei for study evritaem hem strongim heart bilong mi, mekem grow faith bilong mi, and helpem mi for stap hapi and balance.”

Tru, Bible reading and wei for ting raonem maet no changem barava problem bilong iumi. Nomata olsem, hem changem wei for ting long problem bilong iumi. Wei for putim tingting from Word bilong God insaed heart bilong iumi helpem iumi for ting olsem God. And tu, study helpem iumi for grow long wei for minim kaenfala fasin bilong God. Gogo iumi bae acceptim hao Jehovah hem no blamem iumi for living wea iumi kasem taem iumi pikinini and hem no blamem iumi long wei wea iumi sik long body and mind. Hem savve long hevi wea planti long iumi garem—nomata saed long feeling or long body—hao no iumiseleva nao kosim.

Hao nao long Margarette, wea iumi storyim firstaem? Taem hem savve long Jehovah, wei for studyim Bible helpem hem tumas. Hem, olsem Fritz, need for stretem tingting bilong hem abaotem wanfala dadi. Prea nao helpem Margarette for strongim wanem hem lanem thru long study. Margarette hem sei: “Mi ting long Jehovah olsem wanfala klos fren, from mi minim wei for garem olketa loving fren winim wanfala loving dadi. Isisi, mi lanem hao for pourimaot olketa feeling bilong mi, daot, wari, and olketa trabol bilong mi long Jehovah. Mi story evritaem long hem insaed prea, and long semtaem mi joinim tugeta evri niu samting wea mi lanem abaotem hem, olsem mi joinim samting tugeta for kamap wanfala piksa. Samfala taem bihaen, feeling bilong mi for Jehovah hem grow gogo mi minim nao hao for ting long hem olsem wanfala loving Dadi.”

Kamap Free From Evri Wari

Taem disfala wicked system still stap, no eni wan savve kamap free from olketa wari. For samfala Christian diswan minim olketa maet start for wari or daotem seleva moa and diswan kosim bigfala wari. Bat iumi sure hao Jehovah savve long gud samting wea muvim iumi and hard waka wea iumi duim long service bilong hem. Hem bae nating forgetim love wea iumi showimaot for nem bilong hem.—Hebrews 6:10.

Insaed long niu earth anda long Kingdom Bilong Messiah, evri faithful man bae kamap free from olketa hevi bilong system bilong Satan. Datwan bae barava strongim iumi! Then iumi bae lukim moa pruv hao Jehovah hem kaen tumas. Go kasem datfala taem, letem iumi evriwan trustim hao “God hem big winim heart bilong iumi and savve long evri samting.”—1 John 3:20.

[Footnote]

[Blurb long page 30]

Jehovah hem no wanfala raf ruler bat hem wanfala loving Dadi, wea kaen tumas, and kea long pipol

[Piksa long page 31]

Wei for studyim Word bilong God helpem iumi for ting olsem God