Olketa Natural Disaster​—Waswe, Hem Pruvim God No Tingim Iumi?

WANEM SAMFALA PIPOL TALEM: “From God rulim world hem nao mekem olketa natural disaster for happen, so masbi God no tingim iumi.”

WANEM BIBLE TALEM: “Full world hem stap long paoa bilong Satan.” (1 John 5:19) Waswe, datwan hem tru? Tingim diswan: Sapos world hem stap anda long paoa bilong Satan, hem nao mas bihaenem wei wea olketa man tingim distaem nomoa, selfish, and greedy olsem hem. Datwan savve helpem iumi for minim why olketa man barava spoelem environment bilong olketa. Staka savveman sei wei for no lukaftarem gud environment hem nao maet samting wea savve kosim olketa natural disaster, mekem olketa natural disaster worse, and hem mekem olketa natural disaster hia for affectim staka pipol.

So why nao God letem Satan for rulim world? Tingim, firstfala man and woman, Adam and Eve, againstim rul bilong God. Start long datfala taem kam kasem distaem staka pipol no laek for stap anda long rul bilong God. From datwan, olketa man stap anda long rul bilong Satan, wea hem enemy bilong God. Dastawe Jesus sei Satan hem “man wea rulim disfala world.” (John 14:30) Waswe, bae Satan rul for olowe? Nomoa!

Nomata Jehovaha letem Satan for rul, hem no hapi taem iumi safa anda long rul bilong Satan. Olsem example, taem God lukim olketa nogud samting wea kasem nation bilong Israel, Bible sei God no hapi for lukim olketa safa. (Isaiah 63:9) Klosap nao God bae duim samting for finisim rul bilong Satan! Hem markem Son bilong hem, Jesus Christ, for kamap King wea bae rul for olowe.

GOD HEM TINGIM IUMI: Taem Satan rulim pipol hem no protectim olketa from olketa natural disaster, bat taem Jesus rul bae hem duim datwan. Jesus protectim olketa disaepol bilong hem taem wanfala big wind hem kamap. Bible hem sei: “Hem tok strong long wind and sei long sea: ‘Kwaet!’ Semtaem nomoa, wind hem stop and sea hem fine nao.” Olketa disaepol sei: “Wanem kaen man nao diswan? Nomata wind and sea bat obeyim hem tu.” (Mark 4:37-41) Datfala samting wea Jesus duim mekem iumi sure hem bae protectim evriwan wea stap anda long rul bilong hem.—Daniel 7:13, 14.