Jesus Bae Leadim Olketa wea Fit Long Olketa Springwata Bilong Laef
“Disfala Lamb . . . bae lukaftarem olketa, and bae leadim olketa long olketa springwata bilong laef.”—REV. 7:17.
1. Wanem nao Bible kolem olketa anointed Christian, and wanem nao Jesus markem olketa for duim?
BIBLE hem kolem olketa anointed Christian wea lukaftarem olketa samting bilong Christ long earth “datfala faithful and wise slave.” Long 1918 Christ hem chekim datfala “slave” and hem lukim hao olketa anointed wan hia long earth nao faithful for givimaot spiritual “kaikai long barava taem.” Dastawe Jesus, wea hem Masta, hem hapi for markem olketa for lukaftarem “evri samting bilong hem.” (Readim Matthew 24:45-47.) Taem olketa anointed wan duim olsem, olketa helpem pipol bilong Jehovah long disfala earth bifor olketa go long heven.
2. Wanem nao olketa samting bilong Jesus?
2 Wanfala masta hem garem paoa ovarem olketa samting bilong hem, and hem savve iusim olketa long wei wea hem laekem. Jehovah nao markem Jesus Christ for kamap King. Olketa samting bilong Jesus Christ nao hem evri samting long disfala earth wea join witim datfala Kingdom. Diswan minim tu “wanfala big crowd” wea aposol John lukim long vision. John story olsem abaotem datfala big crowd: “Mi lukim wanfala big crowd wea no eni man savve kaontem, wea kam from evri nation, tribe, pipol, and languis, olketa standap front long throne and front long Lamb, and olketa werem white kaleko; and olketa holem olketa leaf bilong palm tree.”—Rev. 7:9.
3, 4. Wanem nambawan hope nao datfala big crowd kasem?
3 Jesus kolem datfala big crowd olketa “nara sheep” bilong hem. (John 10:16) Olketa garem hope for stap olowe insaed paradaes long earth. Olketa barava sure Jesus “bae leadim olketa long olketa springwata bilong laef” and “God bae aotem krae from eye bilong olketa.” From olketa garem hope olsem, olketa “wasim finis kaleko bilong olketa long blood bilong Lamb and kaleko bilong olketa kamap white moa.” (Rev. 7:14, 17) From olketa showimaot faith long sakrifaes bilong Jesus, long tingting bilong God hem olsem olketa werem ‘white kaleko.’ God talem hao olketa raeteous and olketa kamap fren bilong Hem, olsem Abraham.
4 And tu, from God talem hao datfala big crowd hem raeteous, olketa garem hope for stap laef taem disfala nogud world hem finis evribit long datfala big trabol. (Jas. 2:23-26) Olketa savve fren gud witim Jehovah, and olsem wanfala sekson, olketa garem nambawan hope for stap laef bihaen Armageddon. (Jas. 4:8; Rev. 7:15) Disfala big crowd no followim tingting bilong olketa seleva bat olketa willing for followim lead bilong King long heven and olketa anointed brata bilong hem long earth.
5. Wanem nao datfala big crowd duim for sapotim olketa anointed brata bilong Christ?
5 Olketa anointed Christian kasem finis bigfala persecution from world bilong Satan and olketa bae gohed for kasem diswan. Nomata olsem, olketa savve datfala big crowd bae sapotim olketa. Nomata samfala anointed Christian nomoa stap distaem, plande thousand pipol moa joinim datfala big crowd evri year. From olketa anointed wan hia no staka, and from samting olsem 100,000 Christian kongregeson nao stap long full world, olketa no fit for lukaftarem evri kongregeson hia. Dastawe olketa man wea fit from datfala big crowd waka olsem olketa kongregeson elder for sapotim olketa anointed wan. Olketa elder hia help for lukaftarem plande million Christian wea “datfala faithful and wise slave” nao kasem waka for lukaftarem.
6. Olsem Isaiah talem finis, long wanem wei nao olketa nara sheep sapotim olketa anointed Christian?
6 Profet Isaiah talem finis hao olketa nara sheep bae willing for sapotim olketa anointed Christian. Hem sei olsem: “Diswan nao samting wea Jehovah talem: ‘Olketa wakman bilong Egypt wea no kasem pei and olketa bisnisman bilong Ethiopia and olketa Sabean pipol wea barava tol tumas bae kam long iufala, and olketa bae kamap slave bilong iufala. Olketa bae wakabaot followim iufala.’ ” (Isa. 45:14) Long tokpiksa wei, olketa Christian distaem wea garem hope for stap long earth wakabaot followim lead bilong anointed slave sekson and Governing Body bilong hem. Olsem ‘olketa wakman wea no kasem pei,’ olketa nara sheep willing for iusim strong and material samting bilong olketa for sapotim preaching waka long full world wea Christ markem olketa anointed wan for duim long earth.—Acts 1:8; Rev. 12:17.
7. Datfala big crowd kasem training for duim wanem kaen waka long future?
7 Distaem, datfala big crowd kasem training from olketa anointed Christian. And disfala big crowd nao olketa first wan wea bae stap insaed long niu world bihaen Armageddon. Olketa hia mas strong long spiritual wei and olketa mas willing and fit for duim samting wea Masta hem talem. Samting wea olketa duim distaem bae showimaot long King, Christ Jesus, sapos hem fit for iusim olketa. Wei wea man showimaot hem faithful distaem, hem showimaot long King hao hem bae willing for followim lead bilong hem long niu world.
Datfala Big Crowd Showimaot Olketa Garem Faith
8, 9. Long wanem wei nao datfala big crowd showimaot olketa garem faith?
8 Olketa nara sheep showimaot faith bilong olketa long samfala wei moa. First wei, olketa sapotim olketa anointed wan taem olketa talemaot gud nius abaotem Kingdom bilong God. (Matt. 24:14; 28:19, 20) Mek-tu wei, olketa willing for followim eni toktok wea kam from Governing Body.—Heb. 13:17; readim Zechariah 8:23.
9 Mek-thri wei, datfala big crowd sapotim olketa anointed brata taem olketa followim olketa toktok bilong Jehovah insaed long living bilong olketa. Olketa trae for garem fasin olsem ‘love, hapi, peace, no givap kwiktaem, kaen long narawan, duim gudfala samting, garem faith, no raf, and kontrolem seleva.’ (Gal. 5:22, 23) Distaem, maet hem no isi for garem olketa fasin hia from plande pipol duim nomoa “olketa nogud samting wea man laek for duim.” Nomata olsem, datfala big crowd disaed strong for stap klia long “wei for durong, no klin, olobaot, worshipim idol, samting wea join witim devildevil, for enemy long narawan, faet, jealous, kros, raoa, wei for divaed, wei for followim wanfala man, wei for heitim man bikos long wanem hem garem, wei for drunk, olketa party wea pipol savve drunk and olobaot, and olketa kaen samting olsem.”—Gal. 5:19-21.
10. Wanem nao datfala big crowd disaed strong for duim?
10 From iumi no perfect, hem no isi for iumi showimaot olketa Christian fasin, for stap klia long olketa nogud samting wea man laek for duim, and for againstim hevi wea kam from world bilong Satan. Samfala samting wea savve mekem iumi feel wikdaon nao hem olketa wik point bilong iumi, iumi mistek lelebet, or body bilong iumi no mas strong. Nomata olsem, iumi disaed strong for no letem olketa samting hia daonem strongfala faith bilong iumi and love wea iumi garem for Jehovah. Iumi savve Jehovah bae duim samting wea hem promisim, wea hem nao for mekem datfala big crowd stap laef bihaen datfala big trabol.
11. Wanem nao samfala teknik wea Satan iusim for mekem faith bilong olketa Christian wikdaon?
11 Nomata olsem, iumi lukaot evritaem bikos iumi savve main enemy bilong iumi nao hem Devil, and hem no savve givap kwiktaem. (Readim 1 Peter 5:8.) Hem trae for iusim olketa apostate and olketa narawan for mekem iumi tingse olketa biliv bilong iumi hem laea wan. Bat plande taem datfala plan bilong hem no waka. And tu, nomata samfala taem persecution mekem preaching waka slow daon, plande taem hem strongim go moa faith bilong olketa wea kasem persecution. Dastawe plande taem Satan iusim wanfala wei wea hem tingse bae mekem faith bilong iumi wikdaon. Taem man hem feel wikdaon, hem nao taem wea Satan trae for spoelem feeling bilong hem. Olketa Christian long first century kasem warning long disfala danger samting. Bible hem sei: “Lukluk gud long datwan [Christ] wea stand strong taem olketa sinner tok spoelem hem.” Why nao olsem? “Mekem iufala no kamap taed and wikdaon.”—Heb. 12:3.
12. Long wanem wei nao kaonsel insaed Bible hem strongim olketa wea wikdaon?
12 Waswe, enitaem iu garem diskaen tingting for givap and lusim Jehovah? Waswe, samfala taem iu tingim iu iusles nomoa? Sapos olsem, no letem Satan iusim kaen tingting olsem for stopem iu for worshipim Jehovah. Wei for studyim Bible, prea strong, gogo long meeting olowe, and hipap witim olketa brata and sista bae mekem iu strong and no “wikdaon.” Jehovah promisim finis for helpem pipol bilong hem for kasem strong moa, and iumi savve trustim promis bilong hem. (Readim Isaiah 40:30, 31.) Gohed for busy long olketa Christian waka and busy for helpem nara pipol. Stap klia long olketa samting wea savve mekem iumi no garem taem for duim olketa spiritual samting. Then bae iu kasem strong for gohed nomata iu feel wikdaon.—Gal. 6:1, 2.
Kamaot From Datfala Big Trabol and Go Insaed Long Niu World
13. Bihaen long Armageddon, wanem kaen waka nao bae olketa nara sheep duim?
13 Bihaen long Armageddon, plande pipol wea no raeteous wea laef bak bae need for lanem olketa teaching bilong Jehovah. (Acts 24:15) Olketa need for lane abaotem ransom sakrifaes bilong Jesus, and tu, olketa mas lane for showimaot faith long datfala sakrifaes mekem olketa savve kasem gud samting from datwan. Olketa mas lusim evribit olketa teaching bilong false religion wea olketa followim bifor and lusim nogud wei bilong olketa tu. Olketa mas lane for werem olsem kaleko olketa niu fasin wea showimaot olketa kamap trufala Christian. (Eph. 4:22-24; Col. 3:9, 10) Bihaen long Armageddon, olketa nara sheep bae garem staka waka for duim. Bae olketa hapi tumas for duim olketa waka hia for Jehovah, from nogud world distaem bae no stap moa for putim enikaen hevi long olketa or mekem olketa busy long nara samting!
14, 15. Pipol wea no dae long datfala big trabol and olketa raeteous man wea resurrect, bae story tugeta abaotem wanem kaen samting?
14 Olketa faithful servant bilong Jehovah wea dae finis bifor Jesus duim ministry long earth bae need for lanem plande samting tu. Olketa bae hapi tumas for faendemaot hu nao man wea kamap Messiah, from olketa dae firstaem bifor hem kam. Long laef bilong olketa bifor, olketa showimaot finis hao olketa willing for Jehovah lanem olketa. Tingim wei wea iumi bae hapi tumas for helpem olketa. Olsem example, iumi savve minim go long Daniel hao olketa profesi wea hem raetem hem kamap tru!—Dan. 12:8, 9.
15 Tru nao, olketa wea resurrect bae lanem plande samting from iumi, bat iumi bae askem plande samting long olketa tu. From Bible talem iumi lelebet samting nomoa abaotem wanem hem happen bifor, olketa bae talem iumi full story abaotem datwan. Iumi bae hapi tumas for savve moa samting abaotem fasin bilong Jesus taem iumi story witim kasin bilong hem, John Baptaesa! Olketa samting wea iumi bae herem from olketa faithful witness hia bae helpem iumi for minim gud moa Bible. Olketa faithful servant bilong Jehovah wea dae finis, wea diswan minim tu eniwan long datfala big crowd wea dae long disfala taem, bae kasem “wanfala resurrection wea moabeta.” Olketa hia start for worshipim Jehovah taem olketa stap yet insaed world bilong Satan. Olketa bae hapi tumas for gohed worshipim Jehovah insaed niu world wea living hem barava gud tumas!—Heb. 11:35; 1 John 5:19.
16. Olsem profesi hem talem, olketa wanem samting nao bae happen long Judgment Day?
16 Long taem bilong Judgment Day, olketa scroll bae open. Olketa scroll hia and Bible nao main samting wea God bae iusim for judgem evri man wea stap long datfala taem for disaed hu nao fit for kasem laef olowe. (Readim Revelation 20:12, 13.) Kam kasem end bilong Judgment Day, evri man bae kasem chance finis for showimaot sapos hem laek sapotim rul bilong Jehovah or nomoa. Waswe, bae hem sapotim Kingdom bilong God and letem Lamb for leadim hem long “olketa springwata bilong laef”? Or waswe, bae hem les for stap anda long datfala Kingdom? (Rev. 7:17; Isa. 65:20) Long datfala taem, evriwan long earth kasem chance finis for disaed seleva wanem olketa laek duim, bikos sin wea kam from Adam and olketa nogud pipol bae no stap for spoelem tingting bilong olketa. No eniwan bae fit for kwestinim sapos lastfala judgment bilong Jehovah hem stret or nomoa. Olketa man nomoa wea wicked bae finis evribit.—Rev. 20:14, 15.
17, 18. Why nao olketa anointed Christian and olketa nara sheep hapi for weitim Judgment Day?
17 From olketa anointed Christian fit for kasem Kingdom, olketa barava luk forward for rul long Judgment Day. Datwan hem nambawan privilege for olketa! From olketa garem datfala hope, olketa laek followim kaonsel wea Peter givim for olketa anointed brata long first century. Hem sei: “From God hem kolem and chusim iufala, iufala mas duim best bilong iufala for mekem diswan kamap tru for iufala; bikos sapos iufala gohed for duim diswan iufala bae nating fail. Tru nao, iufala bae fit for go insaed long kingdom bilong Lord and Man for sevem iumi, Jesus Christ, wea datwan bae stap for olowe.”—2 Pet. 1:10, 11.
18 Olketa nara sheep hapi from olketa anointed brata bilong olketa bae kasem datfala nambawan hope long future. Olketa disaed strong for sapotim olketa anointed wan hia. From olketa nara sheep kamap fren bilong God distaem, olketa laek duim best bilong olketa for servem Hem. Insaed long Judgment Day, olketa bae hapi for sapotim evri arrangement bilong God taem Jesus leadim olketa long olketa springwata bilong laef. Then Jehovah bae tingim olketa olsem olketa servant bilong hem for olowe!—Rom. 8:20, 21; Rev. 21:1-7.
Waswe, Iu Remember?
• Wanem nao olketa samting bilong Jesus?
• Wanem nao datfala big crowd duim for sapotim olketa anointed brata bilong olketa?
• Datfala big crowd garem wanem kaen waka and hope distaem?
• Wanem nao tingting bilong iu abaotem Judgment Day?
[Piksa on page 25]
Datfala big crowd wasim finis kaleko bilong olketa long blood bilong Lamb and kaleko bilong olketa kamap white moa
[Piksa on page 27]
Wanem nao iu laek askem long olketa faithful wan wea bae resurrect?