Mekem Grow Wei for Obey Taem End Hem Kam Klosap

“Olketa pipol bae obeyim [Shiloh].”—GENESIS 49:10.

1. (a) Long bifor, wanem nao pipol mas duim planti taem for obeyim Jehovah? (b) Saed long wei for obey, Jacob talem wanem profesi?

PLANTI taem wei for obeyim Jehovah minim man mas obeyim olketa wea stand for hem. Samfala long olketa hia hem olketa angel, laen dadi, judge, priest, profet, and olketa king. Olketa kolem tu throne bilong olketa king bilong Israel, throne bilong Jehovah. (1 Chronicles 29:23) Bat, sorre tumas, planti ruler bilong Israel no obeyim God and diswan kosim bigfala trabol for olketa seleva and pipol wea olketa rul ovarem. Nomata olsem, Jehovah givim hope for olketa loyal wan bilong hem; hem comfortim olketa witim promis for appointim wanfala nambawan King, wea olketa raeteous wan bae hapi tumas for obeyim. (Isaiah 9:6, 7) Taem hem redy for dae, Jacob talem profesi olsem abaotem disfala future ruler: “Datfala iron stik bae no lusim Judah, and stik bilong komanda mas stap witim hem, go kasem taem Shiloh hem kam; and olketa pipol bae obeyim hem.”—Genesis 49:10.

2. Wanem nao mining bilong “Shiloh,” and hem bae rul ovarem wanem?

² “Shiloh” hem Hebrew word wea minim “Datwan wea Garem Raet.” Tru nao, Shiloh bae kasem full raet for rul olsem datfala iron stik piksarem, and paoa for givim komand, olsem datfala stik bilong komanda piksarem. And tu, royal rul bilong hem no just ovarem olketa laen pikinini bilong Jacob, bat evri “pipol.” Diswan hem agree witim promis bilong Jehovah long Abraham: “Seed bilong iu bae tekovarem gate bilong olketa enemy bilong hem. And thru long seed bilong iu evri nation bilong earth bae barava blessim olketa seleva.” (Genesis 22:17, 18) Jehovah showimaot klia hu nao datfala “seed” long 29 C.E. taem hem anointim Jesus bilong Nazareth witim holy spirit.—Luke 3:21-23, 34; Galatians 3:16.

First Kingdom Bilong Jesus

3. Jesus start for rul ovarem wanem samting taem hem go ap long heven?

³ Taem Jesus go ap long heven hem no stretawe start for rul ovarem olketa pipol long disfala world. (Psalm 110:1) Nomata olsem, hem kasem wanfala “kingdom” wea garem olketa wea stap anda long hem and obeyim hem. Aposol Paul showimaot klia wanem nao datfala kingdom taem hem raet: “[God] tekem iumi [olketa Christian wea spirit anointim] aot from paoa bilong darkness and putim iumi go insaed long kingdom bilong Son wea hem lovem.” (Colossians 1:13) Disfala wei for sev hem start long Pentecost 33 C.E. taem olketa faithful follower bilong Jesus kasem holy spirit.—Acts 2:1-4; 1 Peter 2:9.

4. Hao nao olketa first disaepol bilong Jesus showimaot olketa obey, and, wanem nao Jesus kolem disfala grup?

⁴ Olsem “olketa ambassador wea stand for Christ,” olketa disaepol wea spirit anointim obey and start for hipimap olketa narawan wea bae kamap “olketa citizen” insaed datfala spiritual kingdom. (2 Corinthians 5:20; Ephesians 2:19; Acts 1:8) And tu, olketa hia mas go ahed for “barava garem wan mind witim sem wei for tingting” for mekem King bilong olketa, Jesus Christ, appruvim olketa. (1 Corinthians 1:10) Olsem wanfala grup, olketa kamap wanfala “faithful and wise slave,” or olketa faithful wakman.—Matthew 24:45; Luke 12:42.

Kasem Blessing From Olketa Obeyim “Wakman” Bilong God

5. From taem bifor kam, hao nao Jehovah teachim pipol bilong hem?

⁵ Evritaem Jehovah provaedem olketa teacher for pipol bilong hem. Olsem example, bihaen olketa Jew kam bak from Babylon, Ezra and samfala nara man wea fit no just readim Law bilong God long pipol, bat olketa “explainim” datfala law and ‘givim mining long hem and helpem pipol luksavve’ long Word bilong God.—Nehemiah 8:8.

6, 7. Hao nao slave class provaedem spiritual kaikai long barava taem thru long Governing Body, and why nao hem fitim for iumi stap anda long datfala slave class?

⁶ Long first century, taem kwestin kamap abaotem circumcision long 49 C.E., governing body bilong datfala slave class ting raonem datfala kwestin and prea for help. Olketa kasem ansa wea wan mind witim olketa Scripture. Taem olketa sendem aot leta for announcem datfala disison, olketa kongregeson obeyim datwan and kasem bigfala blessing from God. (Acts 15:6-15, 22-29; 16:4, 5) Long sem wei distaem, faithful slave thru long Governing Body mekem klia samfala important kwestin saed long Christian wei for no teksaed, wei wea blood hem holy samting, and saed long olketa drug and tobacco. (Isaiah 2:4; Acts 21:25; 2 Corinthians 7:1) Taem pipol bilong Jehovah obeyim Word bilong hem and datfala faithful slave, hem blessim olketa.

⁷ Taem pipol bilong God stap anda long datfala slave class, olketa showimaot tu hao olketa stap anda long Masta, Jesus Christ. Disfala wei for stap anda hem minim moa samting distaem bikos Jesus garem moa paoa, olsem Jacob talem insaed profesi bilong hem taem hem redy for dae.

Shiloh Hem Kamap Ruler Bilong Earth wea Garem Raet

8. Long wanem wei and wanem taem nao Christ kasem moa paoa?

⁸ Profesi bilong Jacob talem hao “olketa pipol bae obeyim” Shiloh. Hem klia, Christ bae no rulim spiritual Israel nomoa. Hu nao bae hem rul ovarem? Revelation 11:15 hem ansa olsem: “Kingdom ovarem world hem kamap kingdom bilong Lord and Christ bilong hem, and hem bae rul olsem king for olowe and olowe.” Bible showimaot hao Jesus kasem datfala paoa long end bilong “sevenfala taem” bilong profesi—“taem bilong olketa nation wea set finis”—long 1914.a (Daniel 4:16, 17; Luke 21:24) Long datfala year, taem bilong Christ for “stap moa” olsem Messiah King hem start, and tu, taem bilong hem for “go ahed for rul midolwan long olketa enemy bilong [hem].”—Matthew 24:3; Psalm 110:2.

9. Wanem nao Jesus duim taem hem kasem Kingdom bilong hem, and hao nao diswan affectim olketa man, especially olketa disaepol bilong hem?

⁹ Bihaen Jesus kasem paoa olsem king, first samting wea hem duim hem for torowem datfala man wea barava no obey—Satan—witim olketa demon bilong hem “kamdaon long earth.” Start kam long datfala taem, olketa wicked spirit hia kosim bigfala trabol and problem for olketa man winim enitaem bifor, and tu olketa apim nogud wei bilong world wea mekem hem wanfala hardfala challenge for olketa wea laek for obeyim Jehovah. (Revelation 12:7-12; 2 Timothy 3:1-5) Tru nao, main target bilong Satan hem olketa anointed wan bilong Jehovah, “wea obeyim evri komandment bilong God and wea garem waka for witness abaotem Jesus,” and olketa “nara sheep” wea fren bilong olketa.—Revelation 12:17; John 10:16.

10. Olketa wanem Bible profesi wea bae fulfill pruvim Satan bae fail for winim war bilong hem againstim olketa tru Christian?

¹⁰ Nomata olsem, Satan bae fail bikos diswan hem “day bilong Lord,” and no eni samting savve stopem Jesus for ‘winim faet bilong hem evribit.’ (Revelation 1:10; 6:2) Olsem example, hem bae appruvim evribit each wan bilong 144,000 spiritual Israelite. And tu, hem bae protectim “wanfala big crowd, wea no eni man savve kaontem, wea kamaot from evri nation and tribe and pipol and languis.” (Revelation 7:1-4, 9, 14-16) Bat, long wei wea difren from olketa anointed fren bilong olketa, olketa hia bae stap anda long Jesus long earth. (Daniel 7:13, 14) Wei wea disfala sekson stap finis long earth distaem pruvim Shiloh hem barava Ruler bilong datfala “kingdom ovarem world.”—Revelation 11:15.

Distaem Nao Hem Taem for “Obeyim Gud Nius”

11, 12. (a) Hu nomoa bae stap laef taem disfala system hem finis? (b) Olketa wea followim “spirit bilong world” garem wanem kaen fasin?

¹¹ Evriwan wea laek for kasem laef olowe mas lane for obey, bikos Bible talem klia hao “olketa wea no savve long God and olketa wea no obeyim gud nius abaotem Lord bilong iumi Jesus” bae no stap laef bihaen day bilong God for pei bak. (2 Thessalonians 1:8) Bat, disfala wicked world and spirit bilong hem for bighed for againstim olketa Bible law and principle minim hem no isi for iumi obeyim datfala gud nius.

¹² Bible sei disfala wei for bighed againstim God hem “spirit bilong world.” (1 Corinthians 2:12) Taem hem raet long olketa first-century Christian long Ephesus, aposol Paul explainim wei wea disfala spirit affectim pipol. Hem sei: “Bifor iufala wakabaot followim system bilong disfala world, followim ruler bilong paoa bilong air, datfala spirit wea waka distaem long olketa son wea no obey. Yes, midolwan long olketa, iumi evriwan duim samting bifor followim wanem body bilong iumi hem laekem, duim samting wea body and tingting bilong iumi wantem, and iumi fit for kasem judgment olsem olketa nara pipol.”—Ephesians 2:2, 3.

13. Hao nao olketa Christian savve win for againstim spirit bilong world, and wanem gud samting kamaot from datwan?

¹³ Hem gud tumas hao olketa Christian long Ephesus no go ahed olsem olketa slave bilong spirit for no obey. Bat, olketa kamap olketa pikinini wea obeyim God taem olketa stap anda long spirit bilong hem and harvestim staka gudfala frut bilong datwan. (Galatians 5:22, 23) Long sem wei distaem, spirit bilong God—nambawan paoa long universe—hem helpem planti million pipol for obeyim Jehovah, and from diswan olketa “garem full trust long datfala hope go kasem end.”—Hebrews 6:11; Zechariah 4:6.

14. Hao nao Jesus givim warning for olketa Christian wea stap long olketa last day abaotem olketa samting wea bae testim fasin bilong olketa for obey?

¹⁴ Remember tu, hao iumi garem strongfala saport bilong Shiloh. Hem and Dadi bilong hem bae no letem eni enemy—nomata demon or man—mekem fasin bilong iumi for obey kasem test wea iumi no fit for winim. (1 Corinthians 10:13) Bat, for helpem iumi long disfala spiritual faet, Jesus storyim samfala problem wea iumi bae feisim long olketa lastfala day distaem. Hem duim diswan thru long sevenfala leta wea hem givim long aposol John insaed wanfala vision. (Revelation 1:10, 11) Olketa leta hia garem gudfala kaonsel for olketa Christian long datfala taem, bat really olketa message hia hem for “day bilong Lord,” wea start long 1914. Dastawe, hem barava fitim for iumi tingting strong long olketa!b

Stap Klia Long Wei for No Interest, Dirty Fasin, Wei for Lovem Material Samting

15. Why nao iumi mas careful for no garem sem problem wea affectim kongregeson long Ephesus, and hao nao iumi savve duim datwan? (2 Peter 1:5-8)

¹⁵ First leta bilong Jesus hem for kongregeson long Ephesus. Bihaen hem praisem datfala kongregeson for wei wea hem stand strong, Jesus hem sei: “Bat, mi garem disfala samting againstim iu, from iu lusim nao datfala love wea iu garem firstaem.” (Revelation 2:1-4) Distaem tu, samfala wea olketa strongfala Christian bifor, lusim barava strongfala love for God wea olketa garem bifor. Diswan savve mekem wei wea olketa fren witim God hem wikdaon and olketa mas stretem diswan kwiktaem. Hao nao olketa savve mekem love bilong olketa strong moa? Long wei for evritaem studyim Bible, attendim olketa meeting, prea, and wei for ting raonem spiritual samting. (1 John 5:3) Hem tru, diswan minim man mas “waka hard,” bat gud samting savve kamaot from datwan. (2 Peter 1:5-8) Sapos taem iu lukluk long iuseleva long honest wei iu luksavve love bilong iu hem no strong olsem bifor, stretem diswan kwiktaem long wei for obeyim kaonsel bilong Jesus: “No forgetim love wea iu garem firstaem, and repent and duim samting wea iu duim bifor.”—Revelation 2:5.

16. Wanem nao olketa spiritual danger wea stap insaed olketa kongregeson long Pergamum and Thyatira, and why nao toktok bilong Jesus for olketa hem fitim distaem tu?

¹⁶ Olketa Christian long Pergamum and Thyatira kasem praise for wei wea olketa garem faithful fasin, fasin for go ahed strong and willing spirit. (Revelation 2:12, 13, 18, 19) Nomata olsem, long sem wei wea Balaam and Jezebel spoelem Israel bifor thru long dirty fasin and Baal worship, samfala wea showimaot sem spirit affectim olketa Christian hia. (Numbers 31:16; 1 Kings 16:30, 31; Revelation 2:14, 16, 20-23) Bat waswe long taem bilong iumi—“day bilong Lord”? Waswe, semkaen nogud samting stap for spoelem iumi distaem? Yes, bikos main reason why samfala pipol bilong God disfellowship distaem, hem dirty fasin. Dastawe, hem barava important for iumi no kaban witim eniwan—insaed or aotsaed long kongregeson—wea savve barava spoelem fasin bilong iumi! (1 Corinthians 5:9-11; 15:33) Olketa wea want for stap anda and obeyim Shiloh bae stap klia evribit tu from nogud hapitaem and tu pornography insaed olketa buk or long internet.—Amos 5:15; Matthew 5:28, 29.

17. Hao nao tingting bilong olketa long Sardis and Laodicea abaotem spiritual saed bilong olketa hem difren from wei wea Jesus ting long datwan?

¹⁷ Tu-thri man long kongregeson long Sardis nomoa kasem praise. Datfala kongregeson garem “nem,” or luk olsem hem laef, bat wei wea olketa barava no interest long spiritual samting hem big tumas, dastawe long eye bilong Jesus hem ‘dae finis.’ Wei wea olketa obeyim gud nius hem olsem samting wea olketa duim nating. Olketa barava garem blame! (Revelation 3:1-3) Kongregeson long Laodicea hem semsem. Hem tok praod and sei, “Mi rich,” bat long eye bilong Christ hem ‘barava no fit and no stap gud and poor and blind and naked.’—Revelation 3:14-17.

18. Hao nao iumi savve stap klia long wei for hafhaf long spiritual wei long eye bilong God?

¹⁸ Distaem, samfala wea faithful Christian bifor foldaon long sem wei for no obey. Maet olketa letem spirit bilong world spoelem feeling bilong olketa for hariap, wea mekem olketa hafhaf nomoa saed long Bible study, prea, olketa Christian meeting, and ministry. (2 Peter 3:3, 4, 11, 12) Hem important tumas for olketa obeyim Christ and mekius long olketa spiritual riches—yes, “baem from [Christ] gold wea olketa klinim long fire”! (Revelation 3:18) For garem olketa trufala riches hia man mas ‘rich long olketa gudfala waka, no hol bak, redy for share.’ Taem iumi aftarem olketa spiritual samting hia, iumi ‘barava sure for hipimap for iumiseleva gudfala faondeson for future, mekem iumi savve hol strong long datfala really laef.’—1 Timothy 6:17-19.

Kasem Praise for Wei wea Olketa Obey

19. Jesus givim wanem praise and encouragement for olketa Christian long Smyrna and Philadelphia?

¹⁹ Olketa kongregeson long Smyrna and Philadelphia olketa nambawan example long wei for obey, from Jesus no repruvim olketa insaed olketa leta bilong hem. Hem sei long olketa long Smyrna: “Mi savve long trabol wea kasem iu and wei wea iu poor tumas—bat iu rich.” (Revelation 2:9) Datwan hem barava difren from olketa long Laodicea wea tok praod abaotem material riches, bat really olketa poor fogud! Hem tru, Devil hem no hapi for lukim eniwan wea faithful and obeyim Christ. Dastawe, Jesus givim warning: “No fraet long olketa samting wea bae kasem iu. Lukim! Devil bae go ahed for torowem samfala long iufala insaed long prison for mekem iufala kasem test evribit, and mekem iufala kasem trabol for tenfala day. Pruvim iuseleva faithful go kasem dae, and mi bae givim iu crown bilong laef.” (Revelation 2:10) Long sem wei, Jesus praisem olketa long Philadelphia taem hem sei: “Iu keepim word bilong mi [or, obeyim mi] and no giaman long nem bilong mi. Mi bae kam kwiktaem. Go ahed for hol strong long samting wea iu garem, mekem no eniwan savve tekem crown bilong iu.”—Revelation 3:8, 11.

20. Hao nao planti million distaem obeyim toktok bilong Jesus, and olketa duim diswan nomata wanem kaen samting happen?

²⁰ Long “day bilong Lord,” wea start long 1914, wanfala faithful remnant and planti million nara sheep wea fren bilong olketa, olketa tu obeyim word bilong Jesus long wei wea olketa strong for share long ministry and go ahed faithful. Olsem olketa brata bilong olketa long first-century, samfala safa from olketa obeyim Christ, samfala go insaed olketa prison and concentration camp. Olketa narawan obeyim toktok bilong Jesus long wei for garem ‘simpol eye,’ nomata rich living and greedy fasin stap raonem olketa. (Matthew 6:22, 23) Tru nao, from olketa obey nomata long evri difren kaen living and samting wea happen, olketa tru Christian go ahed for mekem heart bilong Jehovah hapi.—Proverbs 27:11.

21. (a) Datfala slave class bae go ahed for fulfillim wanem spiritual responsibility? (b) Hao nao iumi savve showimaot iumi barava want for obeyim Shiloh?

²¹ Taem datfala big trabol hem kakam klosap, datfala “faithful and wise slave” bae go ahed strong for obeyim Masta, Christ. Insaed diswan hem wei for redyim spiritual kaikai long barava taem for famili bilong God. So iumi mas go ahed for tinghae long nambawan theocratic organization bilong Jehovah and olketa samting wea datwan provaedem. Long wei olsem, iumi showimaot iumi stap anda long Shiloh, wea bae rewardim evriwan wea obeyim hem witim laef olowe.—Matthew 24:45-47; 25:40; John 5:22-24.

[Olketa Footnote]

Waswe, Iu Remember?

• Profesi wea Jacob talem taem hem redy for dae storyim wanem waka wea Jesus bae duim?

• Hao nao iumi showimaot iumi luksavve Jesus hem Shiloh, and wanem kaen spirit nao iumi mas stap klia long hem?

• Olketa leta for sevenfala kongregeson long Revelation garem wanem kaonsel wea fitim taem bilong iumi?

• Long olketa wanem wei nao iumi savve followim example bilong olketa long Smyrna and Philadelphia kongregeson bifor?

[Olketa Piksa long page 18]

Jehovah blessim pipol bilong hem from olketa obeyim datfala faithful “wakman”

[Piksa long page 19]

Paoa bilong Satan mekem wei for obeyim God olsem wanfala challenge

[Olketa Piksa long page 21]

Strongfala wei for fren witim Jehovah helpem iumi for obeyim hem