Jehovah Showimaot Olketa Samting wea “No Longtaem Nomoa Mas Happen”
“Olketa toktok hia hem olketa samting wea Jesus Christ showimaot klia long distaem. Jesus kasem olketa samting hia from God for showim olketa wakaman bilong God olketa samting wea no longtaem nomoa mas happen.”—REV. 1:1.
WANEM NAO ANSA BILONG IU?
Wanem part bilong datfala maeti image nao piksarem England and America World Paoa?
Hao nao vision wea John lukim showimaot United Nations hem kasem paoa from England and America World Paoa?
Hao nao olketa vision wea Daniel and John lukim showimaot evri gavman bilong olketa man bae finis?
1, 2. (a) Taem iumi comparem olketa profesi wea Daniel and John raetem, datwan helpem iumi for minim wanem samting? (b) Wanem nao first hed go kasem mek-six hed bilong datfala wild animal piksarem?
TAEM iumi comparem olketa profesi wea Daniel and John raetem, datwan savve helpem iumi for minim staka samting wea happen long world distaem and wea bae happen long future. Wanem nao iumi savve lanem from vision bilong John abaotem datfala wild animal wea garem sevenfala hed, and vision bilong Daniel abaotem animal wea garem tenfala horn, and samting wea Daniel talem abaotem datfala maeti image? Taem iumi savve long mining bilong olketa profesi hia, datwan shud mekem iumi laek duim wanem samting?
2 Tingim vision bilong John abaotem datfala wild animal. (Rev., chap. 13) Olsem iumi storyim long study bifor diswan, first hed go kasem mek-six hed bilong datfala animal piksarem Egypt, Assyria, Babylon, Media and Persia, Greece, and Rome. Satan iusim evri world paoa hia for attakim pipol bilong God bikos hem heitim pikinini bilong datfala woman. (Gen. 3:15) Rome nao hem world paoa taem John raet abaotem vision bilong hem, and hem strongfala paoa for staka handred year bihaen datwan. Bat gogo mek-seven hed bilong datfala animal hem changem Rome. Datfala mek-seven hed hem piksarem wanem world paoa? Wanem nao datfala world paoa duim long pikinini bilong woman?
ENGLAND AND AMERICA KAMAP WORLD PAOA
3. Wanem nao datfala animal wea garem tenfala horn hem piksarem, and wanem nao tenfala horn hia piksarem?
3 Iumi fit for luksavve wanem nao datfala mek-seven hed hem piksarem sapos iumi comparem samting wea John talem long Revelation chapter 13 abaotem datfala wild animal, witim samting wea Daniel talem abaotem animal wea garem tenfala horn.a (Readim Daniel 7:7, 8, 23, 24.) Datfala animal wea garem tenfala horn hem piksarem Rome. (Lukim chart long page 12 and 13.) Long mek-faev century C.E., Rome, wea hem world paoa long datfala taem, hem start for divaed. Tenfala horn bilong datfala animal wea Daniel lukim hem piksarem olketa gavman wea kamaot from Rome.
4, 5. (a) Wanem nao datfala smol horn hem duim? (b) Wanem nao mek-seven hed bilong datfala wild animal hem piksarem?
4 Long profesi bilong Daniel abaotem datfala animal wea garem tenfala horn, hem storyim narafala smol horn wea grow and changem thrifala long tenfala horn hia. Datfala profesi hem kam tru taem Britain, wea Rome hem rulim long firstaem, hem start for kamap strong. Nara thrifala kantri wea Rome hem rulim tu hem Spain, Netherlands, and France, and olketa strong winim Britain go kasem mek-17 century. Bat Britain faetem thrifala kantri hia and kamap strong winim olketa. Long mek-18 century, Britain hem start for kamap strong winim eni nara kantri long world. Bat long datfala taem hem no mek-seven hed bilong datfala wild animal yet.
5 Nomata Britain kamap strong, olketa colony bilong Britain long North America olketa kasem independence. Britain no stopem America for kamap wanfala strong kantri, and hem iusim navy bilong hem for protectim America tu. Long 1914, taem day bilong Lord hem start, rul bilong Britain hem big winim eni narawan long history, and America hem garem staka bigfala bisnis winim eni nara kantri long world.b Long World War I, America and Britain barava fren gud tugeta, and from datwan tufala kamap England and America World Paoa. Disfala world paoa nao hem mek-seven hed bilong datfala wild animal. Wanem nao disfala mek-seven hed hem duim long pikinini bilong datfala woman?
6. Wanem nao mek-seven hed bilong datfala wild animal hem duim long pipol bilong God?
6 No longtaem bihaen day bilong Lord hem start, datfala mek-seven hed attakim pipol bilong God, wea datwan minim olketa brata bilong Christ wea stap yet long earth. (Matt. 25:40) Jesus sei samfala pikinini bilong datfala woman bae stap yet long earth taem day bilong Lord hem start, and bae olketa busy for duim waka wea Jesus givim long olketa. (Matt. 24:45-47; Gal. 3:26-29) Datfala England and America World Paoa faetem olketa anointed Christian hia. (Rev. 13:3, 7) Long World War I hem persecutim olketa, tambuim samfala buk bilong olketa, and putim samfala wea leadim datfala waka long prison. Datwan klosap stopem preaching waka bilong olketa. Jehovah luksavve diswan bae happen and hem showimaot diswan long John. Bat God talem hem tu olketa pikinini bilong datfala woman bae duim moa datfala preaching waka. (Rev. 11:3, 7-11) Evri samting hia hem happen olsem Jehovah hem talem.
ENGLAND AND AMERICA WORLD PAOA AND FEET WEA IRON AND CLAY
7. Wanem part bilong datfala maeti image nao hem piksarem sem samting olsem mek-seven hed bilong datfala wild animal?
7 Feet bilong datfala maeti image piksarem sem samting wea mek-seven hed bilong datfala wild animal hem piksarem. Tufala evriwan piksarem England and America World Paoa. Britain hem kamaot from Rome, and from America hem kamaot from Britain, hem stret for sei America tu hem kamaot from Rome. Dastawe feet bilong datfala maeti image garem iron insaed. Bat feet hia garem clay insaed tu. (Readim Daniel 2:41-43.) Feet hia wea garem iron and clay insaed hem piksarem sem samting wea mek-seven hed bilong datfala wild animal hem piksarem, wea hem nao rul bilong England and America World Paoa. Samting wea man wakem from iron and clay hem no strong olsem samting wea man wakem from iron. Long sem wei, datfala England and America World Paoa hem no strong olsem Rome. Wanem nao mekem hem no strong?
8, 9. (a) Wanem nao datfala mek-seven world paoa duim wea showimaot hem strong olsem iron? (b) Wanem nao clay long feet bilong datfala image hem piksarem?
8 Samfala taem datfala England and America World Paoa hem strong olsem iron. Olsem example, hem showimaot hem strong olsem iron taem hem winim World War I and World War II. Kam kasem distaem, hem duim staka nara samting tu wea showimaot hem strong.c Nomata olsem, start kam long taem wea datfala world paoa hem rul, datfala iron hem mix witim clay.
9 For longtaem finis, olketa wea worshipim Jehovah laek for savve wanem nao feet bilong datfala image hem piksarem. Daniel 2:41 showimaot feet wea iron and clay hem piksarem wanfala gavman nomoa, no staka. So clay hem piksarem wanfala samting insaed long datfala England and America World Paoa wea mekem hem no strong olsem Rome, wea hem iron. Profesi bilong Daniel hem sei datfala clay hem piksarem “evri difren kaen pipol,” wea minim olketa man nating. (Dan. 2:43) Pipol nao mekem datfala England and America World Paoa no strong long wei wea olketa campaign for raet bilong olketa, iusim olketa union for kasem raet long waka, and wei wea samfala kantri laek independent. Pipol nao stopem disfala world paoa for no strong olsem iron. Nara samting tu, pipol no savve agree saed long politik, and taem wanfala bigman hem win long election long tu-thri vote nomoa, hem no garem paoa for duim wanem hem promis for duim. Daniel hem sei: “Datfala gavman bae strong and bae hem wik tu.”—Dan. 2:42; 2 Tim. 3:1-3.
10, 11. (a) Wanem nao bae happen long “feet” bilong datfala image? (b) Wanem nao iumi savve abaotem olketa toe bilong datfala image?
10 Distaem, Britain and America gohed fren gud tugeta, and plande taem olketa waka tugeta long olketa important samting wea happen long world. Long profesi abaotem datfala maeti image, feet nao last part bilong hem. Long profesi abaotem datfala wild animal, mek-seven hed nao hem last hed. Diswan showimaot no eni nara world paoa bae changem datfala England and America World Paoa. Nomata hem no strong olsem Rome, wea hem nao iron leg bilong datfala image, datfala England and America World Paoa bae no isisi lusim paoa bilong hem, bat wanfala samting nao bae finisim hem.
11 Waswe, haomas toe datfala image garem hem piksarem eni samting? Long samfala nara vision Daniel storyim samfala namba. Olsem example, Daniel talem namba bilong horn wea samfala animal garem. Olketa namba hia hem important. Bat Daniel no storyim haomas toe nao datfala image garem. So luk olsem haomas toe datfala image garem hem no important, olsem haomas hand, finger, leg, or feet wea datfala image garem hem no important tu. Bat Daniel hem sei olketa toe hia hem iron and clay. Datwan showimaot England and America nao bae world paoa taem datfala “ston,” wea piksarem Kingdom bilong God, hem bangam feet bilong datfala image.—Dan. 2:45.
ENGLAND AND AMERICA AND DATFALA WILD ANIMAL WEA GAREM TUFALA HORN
12, 13. Wanem nao datfala wild animal wea garem tufala horn hem piksarem, and wanem nao hem duim?
12 Nomata datfala England and America World Paoa hem iron and clay, olketa vision wea Jesus givim long John showimaot datfala world paoa bae gohed for duim samfala important samting long olketa last day. John lukim wanfala wild animal wea garem tufala horn and wea toktok olsem wanfala big snek. Wanem nao disfala animal hem piksarem? From hem garem tufala horn, hem piksarem tufala gavman wea waka tugeta. So disfala animal tu hem piksarem datfala England and America World Paoa, bat long disfala vision hem duim wanfala samting wea difren.—Readim Revelation 13:11-15.
13 Datfala animal wea garem tufala horn hem talem olketa long earth for wakem wanfala karving wea luk olsem datfala wild animal wea garem sevenfala hed. John sei disfala karving wea luk olsem datfala wild animal bae kamap, then bae hem nomoa, then bae hem kamap moa. Diswan hem samting wea happen long wanfala organization wea kamap bihaen World War I. Britain and America talem olketa nara kantri for join insaed disfala organization. Goal bilong disfala organization hem for evri kantri mas waka tugeta and garem wan mind.d Nem bilong datfala organization hem League of Nations. Taem World War II hem start, datfala League of Nations hem nomoa nao. Taem datfala war gohed, pipol bilong God sei profesi long Revelation showimaot datfala organization bae kamap moa. Datwan hem happen, and nem bilong datfala organization distaem hem United Nations.—Rev. 17:8.
14. Why nao John sei datfala karving wea luk olsem datfala wild animal hem “mek-eit king”?
14 John sei datfala karving wea luk olsem wild animal wea garem sevenfala hed hem nao “mek-eit king.” Bat datfala wild animal hem garem sevenfala hed nomoa, no eitfala hed. So why nao John hem sei datfala karving hem wanfala “king”? Disfala karving hem luk olsem datfala wild animal nomoa. Paoa wea disfala karving hem kasem, hem kam from olketa kantri wea member bilong United Nations, especially from England and America World Paoa. (Rev. 17:10, 11) So John kolem disfala karving wanfala “king” bikos hem kasem paoa for duim wanfala samting wea bae affectim full world.
KARVING WEA LUK OLSEM WILD ANIMAL HEM FINISIM JURY WOMAN
15, 16. Wanem nao datfala jury woman hem piksarem, and hao nao pipol ting long religion distaem?
15 John storyim tu wanfala jury woman wea sidaon antap long wanfala wild animal wea kala bilong hem red. Disfala animal nao hem datfala karving wea luk olsem wild animal wea garem sevenfala hed. Nem bilong jury woman hia hem “Bigfala Babylon.” (Rev. 17:1-6) Disfala jury woman hem piksarem evri false religion, wea main part bilong hem nao olketa religion wea sei olketa Christian. Olketa false religion barava sapotim datfala karving wea luk olsem datfala wild animal, wea hem nao datfala League of Nations and United Nations, and trae for kontrolem olketa.
16 Bible hem sei Bigfala Babylon hem sidaon antap long staka “wata.” Wata hia piksarem pipol wea sapotim hem. Bat long day bilong Lord, pipol no strong for sapotim hem olsem bifor. Hem olsem olketa wata hia “hem drae nao.” (Rev. 16:12; 17:15) Olsem example, long firstaem wea datfala karving wea luk olsem wild animal hem showaot, olketa religion wea sei olketa Christian olketa garem bigfala paoa long staka kantri. Bat distaem, staka pipol no respectim olketa religion and bigman bilong olketa. Staka pipol sei religion nao kosim olketa problem long world. Olketa narawan sei evri religion mas finis.
17. Wanem nao klosap for happen long false religion, and why nao olsem?
17 False religion bae no isisi lusim paoa bilong hem gogo hem nomoa nao. Datfala jury woman bae gohed garem bigfala paoa and trae for mekem olketa gavman duim wanem hem laekem. Bat klosap nao God bae “mekem olketa [gavman] garem tingting for duim samting wea hem laekem.” (Readim Revelation 17:16, 17.) Jehovah bae mekem olketa gavman long disfala world bilong Satan, wea United Nations nao stand for olketa, for attakim false religion. Datfala jury woman bae no fit for kontrolem nao olketa gavman hia, and bae hem lusim tu evri riches bilong hem. Twenti or thirti year go finis staka pipol tingse religion bae gohed strong and pipol bae evritaem respectim religion. Bat distaem datwan hem start for change. Nomata olsem, datfala jury woman bae no isisi lusim paoa bilong hem. Seknomoa bae hem finis nao.—Rev. 18:7, 8, 15-19.
OLKETA WILD ANIMAL FINIS NAO
18. (a) Wanem nao bae datfala wild animal duim, and wanem nao bae kamaot from datwan? (b) Long Daniel 2:44 hem sei Kingdom bilong God bae finisim olketa wanem gavman? (Lukim box long page 17.)
18 Bihaen false religion hem finis, datfala wild animal, wea hem nao olketa gavman long earth wea Satan kontrolem, bae hem attakim Kingdom bilong God. Olketa gavman long earth bae no fit for attakim Kingdom bilong God long heven, so bae olketa faet againstim olketa long earth wea sapotim datfala Kingdom. Diswan minim olketa faetem God nao. (Rev. 16:13-16; 17:12-14) Daniel storyim samfala samting abaotem datfala faet. (Readim Daniel 2:44.) Datfala wild animal wea Revelation 13:1 hem story abaotem, datfala karving wea luk olsem hem, and datfala wild animal wea garem tufala horn, bae evriwan finis.
19. Wanem nao klosap for happen, and wanem nao iumi mas duim distaem?
19 Iumi stap long taem wea mek-seven hed bilong datfala animal hem rul. Go kasem taem wea God finisim datfala animal, bae hem no garem eni nara hed moa. Datfala mek-seven hed wea hem England and America World Paoa, hem nao bae rul taem false religion hem finis. Evri samting long olketa profesi bilong Daniel and John barava kam tru. Iumi sure klosap nao false religion bae finis and Armageddon bae kam. God talem iumi evri samting wea bae happen. Waswe, bae iumi obeyim olketa warning wea olketa profesi hia talem? (2 Pet. 1:19) Iumi mas obeyim Jehovah distaem and sapotim Kingdom bilong hem.—Rev. 14:6, 7.
[Olketa Footnote]
a Long Bible, namba ten savve piksarem full namba bilong samting. So tenfala horn hia hem piksarem evri gavman wea kamaot from Rome.
b Long mek-18 century Britain garem bigfala paoa, and America kasem independence finis. Bat vision wea John lukim showimaot tufala hia bae start for rul olsem wanfala world paoa long start long day bilong Lord. Olketa profesi long buk bilong Revelation olketa kam tru long “day bilong Lord.” (Rev. 1:10) Long World War I nao Britain and America start for waka tugeta olsem wanfala world paoa.
c Long World War II, datfala England and America World Paoa hem spoelem staka samting, olsem profesi bilong Daniel hem talem. (Dan. 8:24) Olsem example, America dropim tufala nuclear bomb long wanfala enemy bilong datfala world paoa. Datwan hem firstaem for eni kantri iusim kaen bomb olsem, and olketa barava spoelem staka samting.
d Lukim Revelation—Its Grand Climax at Hand! page 240, 241, 253.
[Box long page 17]
HU NAO “EVRI GAVMAN HIA” WEA DANIEL 2:44 STORYIM?
Profesi long Daniel 2:44 hem sei Kingdom bilong God “bae smasem and finisim evri gavman hia.” Datfala profesi hem storyim nomoa olketa gavman wea datfala image hem piksarem.
Daniel 2:44 hem no storyim wanem bae happen long evri nara gavman bilong olketa man. Bat profesi long Revelation hem storyim moa samting abaotem diswan. Hem sei “olketa king evriwea long earth” bae hipap for againstim Jehovah long “datfala war wea bae kamap long bigfala day bilong Olmaeti God.” (Rev. 16:14; 19:19-21) So olketa gavman wea datfala image piksarem and evri nara gavman tu bae finis long Armageddon.