Toktok Bilong Jehovah Hem Laef

Olketa Main Point From Buk Bilong Revelation​—⁠II

WANEM nao bae kasem pipol wea worshipim Jehovah God and olketa wea no worshipim hem? Waswe long Satan witim olketa demon bilong hem? Taem Jesus Christ hem rul for wan thousand year, wanem gud samting nao bae olketa man wea obeyim God kasem? Revelation 13:1 go kasem 22:21 hem ansarem olketa kwestin hia and olketa nara important kwestin.a Olketa chapter hia storyim last 9-fala long 16-fala vision wea aposol John lukim klosap long end long first century C.E.

John hem sei: “Man wea readim big olketa toktok long disfala profesi and olketa wea herem, bae hapi. Olketa wea obeyim toktok wea stap long hem tu bae hapi.” (Rev. 1:3; 22:⁠7) Taem iumi readim buk bilong Revelation and followim toktok wea stap long hem, datwan helpem iumi luksavve wanem nao mekem iumi laek worshipim God. Hem savve strongim faith wea iumi garem long God and Son bilong hem, Jesus Christ, and mekem iumi garem nambawan hope.b​—⁠Heb. 4:​12.

SEVENFALA ANGEL KAPSAETEM SEVENFALA BOWL WEA FULAP LONG KROS BILONG GOD

(Rev. 13:1–​16:⁠21)

Revelation 11:18 hem sei: “Pipol long olketa kantri kros tumas and hem taem for kros bilong [God] for kam, and hem taem for . . . finisim olketa wea spoelem earth.” Mek-eit vision storyim why nao God hem showimaot kros bilong hem. Hem storyim samting wea datfala “wild animal . . . wea garem tenfala horn and sevenfala hed” hem duim.​—⁠Rev. 13:⁠1.

Long mek-naen vision, John lukim “datfala Pikinini Sheepsheep hem standap long Maunt Zion” witim “wan handred and foti-foa thousand.” God “baem olketa finis from pipol long world.” (Rev. 14:​1, 4) Bihaen datwan, hem herem olketa angel talemaot olketa toktok. Long mek-ten vision, John lukim “sevenfala angel wea tekem kam sevenfala trabol.” Luk olsem Jehovah nao talem olketa angel hia for kapsaetem “sevenfala bowl wea fulap long kros bilong God” long olketa difren sekson long world bilong Satan. Olketa bowl hia garem olketa judgment and warning abaotem panis wea God bae mekem kamap. (Rev. 15:1; 16:⁠1) Tufala vision hia story abaotem olketa nara judgment wea join witim datfala mek-thri trabol and taem angel blowim mek-seven trumpet.​—⁠Rev. 11:​14, 15.

Ansa for Olketa Bible Kwestin:

13:8​—⁠Wanem nao “buk bilong laef wea hem bilong datfala Pikinini Sheepsheep”? Diswan hem wanfala tokpiksa buk wea garem nem bilong olketa wea bae rul witim Jesus Christ long Kingdom long heven. Hem garem nem bilong olketa anointed Christian tu wea stap yet long earth and wea bae go long heven.

13:​11-​13​—⁠Long wanem wei nao wild animal wea garem tufala horn hem act olsem dragon and mekem fire kamaot long skae? Wild animal hia wea garem tufala horn hem piksarem England and America World Paoa. From hem toktok olsem dragon, datwan showimaot hem tok raf, forcem pipol, and duim raf samting long pipol for mekem olketa saedem hem. Taem hem mekem fire kamaot long skae, datwan showimaot hem laek act olsem wanfala tru profet bikos hem tingse hem finisim olketa nogud samting long tufala world war and olketa gavman wea Communist.

16:17​—⁠Wanem nao datfala “air” wea angel pourimaot mek-seven bowl long hem? Datfala “air” piksarem tingting bilong Satan. Hem nao “tingting wea olketa son wea no obey garem.” Evriwan wea followim rabis world bilong Satan brithim disfala tokpiksa air wea savve poisonim man.​—⁠Eph. 2:⁠2.

Wanem Nao Iumi Lanem?

13:​1-4, 18. “Wanfala wild animal” wea piksarem olketa gavman bilong man hem “kamaot from sea.” Sea hia piksarem barava staka pipol wea olobaot nomoa. (Isa. 17:​12, 13; Dan. 7:​2-8, 17) Satan nao mekem kamap datfala wild animal and givim paoa long hem. Namba bilong wild animal hem 666, wea piksarem wei wea hem nating perfect. From iumi luksavve hu nao datfala wild animal, datwan mekem iumi no tinghae long hem and no worshipim hem olsem pipol long world duim.​—⁠John 12:31; 15:⁠19.

13:​16, 17. Nomata sapos iumi kasem hardfala taem for duim olketa samting long laef, olsem for “baem or salem eni samting,” iumi mas no duim samting wea showimaot iumi followim datfala wild animal. Sapos iumi garem ‘mark bilong wild animal long hand or forhed bilong iumi,’ datwan showimaot animal hia kontrolem tingting bilong iumi and wanem iumi duim.

14:​6, 7. Samting wea datfala angel talem hem showimaot iumi mas no isisi long disfala waka for talemaot gud nius abaotem Kingdom bilong God. Iumi mas helpem olketa Bible study for gohed fraet long Jehovah and mekhae long Hem.

14:​14-​20. Bihaen waka for “harvestim earth” hem finis, wea minim for hipimap olketa wea bae stap laef, hem taem nao for datfala angel torowem “datfala grape tree bilong earth” long “ples for aotem juice from olketa grape, wea disfala ples hem piksarem kros bilong God.” Taem diswan hem happen, datfala grape tree, wea hem nao olketa gavman long world bilong Satan and “olketa rabis frut” bilong hem, olketa bae finis olowe. Iumi mas no letem eni samting long disfala grape tree spoelem iumi.

16:​13-​16. “Olketa rabis toktok wea thrifala demon talem” hem for mekem olketa king long earth no saedem Jehovah taem olketa angel kapsaetem sevenfala bowl wea fulap long kros bilong God. Bat olketa rabis toktok hia hem for mekem olketa againstim Jehovah.​—⁠Matt. 24:​42, 44.

16:21. Taem disfala world hem barava klosap finis, maet olketa strongfala judgment message bilong Jehovah wea iumi talemaot againstim world bilong Satan hem barava strong tumas olsem ice. Nomata olsem, staka pipol bae gohed talem barava nogud samting for spoelem God.

KING HEM RUL

(Rev. 17:1–​22:⁠21)

“Bigfala Babylon,” wea hem nao evri giaman religion, hem wanfala rabis sekson long world bilong Satan. Mek-11 vision storyim hem olsem wanfala “jury woman” wea “sidaon antap long wild animal wea red fogud.” Datfala wild animal wea disfala jury woman sidaon antap long hem barava killim hem dae long “tenfala horn” bilong hem. (Rev. 17:​1, 3, 5, 16) Mek-12 vision storyim datfala jury woman olsem wanfala “big taon.” Hem talemaot hao datfala taon bae foldaon and hao pipol bilong God mas kwiktaem “go aot from hem.” Staka pipol sorre tumas taem datfala big taon foldaon. Bat olketa long heven barava hapi tumas bikos “hem taem nao for marit bilong datfala Pikinini Sheepsheep.” (Rev. 18:​4, 9, 10, 15-​19; 19:⁠7) Mek-13 vision storyim man wea raedem “white horse” hem go faetem olketa nation. Hem finisim rabis world bilong Satan.​—⁠Rev. 19:​11-​16.

Waswe long “datfala snek from bifor kam, wea hem nao Satan”? Wanem taem nao bae olketa “torowem hem go long lake bilong fire”? Hem nao wanfala samting wea mek-14 vision storyim. (Rev. 20:​2, 10) Mek-15 and mek-16 vision story abaotem samfala samting wea bae kamap long wan thousand year wea Christ hem rul. Long end bilong datfala “revelation” wea John lukim, hem lukim ‘wanfala river wea hem nao wata bilong laef. River hia hem ran go daon long midol long bigfala road,’ and “eniwan wea laek tumas for drink” savve kam drinkim wata hia.​—⁠Rev. 1:1; 22:​1, 2, 17.

Ansa for Olketa Bible Kwestin:

17:16; 18:​9, 10​—⁠Why nao “olketa king long earth” sorre tumas bihaen olketa finisim Bigfala Babylon? Hem bikos olketa tingim olketa seleva nomoa. Bihaen olketa king long earth finisim Bigfala Babylon, olketa just luksavve nao hao Bigfala Babylon barava helpem olketa. Taem Bigfala Babylon stap hem mekem hem luk olsem olketa nogud samting wea olketa king duim hem olraet nomoa. Bigfala Babylon helpem olketa tu for switim young pipol for joinim army. And nara samting tu, hem helpem olketa king hia for mekem pipol stap anda long olketa.

19:12​—⁠Jesus garem nara nem, bat why nao hem nomoa savve long disfala nem? Luk olsem disfala nem hem piksarem position and spesol waka wea Jesus garem long day bilong Lord, olsem Isaiah 9:6 storyim. Jesus nomoa savve long disfala nem bikos olketa waka wea hem garem hem spesol and hem nomoa savve minim hae position wea hem kasem. Nomata olsem, Jesus givim samfala spesol waka hia long 144,000. Hem olsem hem ‘raetem niufala nem bilong hem long olketa.’​—⁠Rev. 3:​12.

19:14​—⁠Hu nao bae raedem olketa horse witim Jesus taem Armageddon hem kam? ‘Olketa army long heven’ wea bae raedem olketa horse witim Jesus taem Armageddon hem kam, hem olketa angel and olketa anointed Christian wea stap long heven finis.​—⁠Matt. 25:​31, 32; Rev. 2:​26, 27.

20:​11-​15​—⁠Nem bilong hu nao stap long ‘buk bilong laef’? Nem bilong olketa wea stap long disfala buk wea bae kasem laef olowe nao hem olketa anointed Christian, datfala big crowd, and olketa ‘gud pipol wea bae laef bak moa.’ (Acts 24:15; Rev. 2:​10; 7:⁠9) Nem bilong ‘olketa nogud pipol wea bae laef bak’ bae stap long “datfala buk bilong laef” sapos olketa “duim olketa samting wea stap long olketa buk” wea iumi bae kasem insaed long datfala wan thousand year wea Jesus rul. Bat datwan no minim nem bilong olketa stap olowe long datfala buk. Nem bilong olketa anointed Christian bae stap olowe long datfala buk sapos olketa faithful go kasem taem olketa dae. (Rev. 3:⁠5) Nem bilong olketa wea stap long earth bae stap olowe long datfala buk sapos olketa faithful taem datfala last test hem kamap long end bilong wan thousand year wea Jesus rul.​—⁠Rev. 20:​7, 8.

Wanem Nao Iumi Lanem?

17:​3, 5, 7, 16. “Bigfala savve from antap” hem helpem iumi for savve “long mining wea hem stap haed abaotem datfala woman and datfala wild animal [wea red fogud] wea woman hia sidaon antap long hem.” (Jas. 3:​17) Long firstaem datfala tokpiksa wild animal hem League of Nations, bat bihaen hem start moa olsem United Nations. From iumi savve long mining abaotem datfala woman and datfala wild animal, datwan strongim iumi for gohed preachim gud nius abaotem Kingdom bilong God and for talemaot day bilong Jehovah for judgem pipol.

21:​1-6. Iumi barava bilivim hao taem Kingdom hem rul, olketa nambawan samting wea Bible talem bae kamap tru. Why nao iumi barava bilivim datwan? Bikos Bible hem sei: “Evri samting hem kamap tru finis!”

22:​1, 17. Datfala ‘river wea hem nao wata bilong laef’ hem piksarem olketa samting wea Jehovah duim for mekem olketa man wea obey for gud bak moa from sin and dae. Iumi savve kasem lelebet wata hia distaem. Iumi hapi for kam and “drinkim disfala wata bilong laef wea free” and for talem nara pipol tu for kam drinkim!

[Footnotes]

[Piksa long page 5]

Olketa man wea obey bae kasem staka gud samting taem Kingdom hem rul!