3. Wat nao Jehovah laekem olketa fren blo hem for duim?

Jehovah lovem evri pipol “bat Hem fren gud witim olketa wea raeteous.” (Proverbs 3:32, NW) Jehovah laekem olketa fren blo hem for traem best for duim olketa samting wea hem sei hem gud, and no duim olketa samting wea hem sei hem nogud. Samfala tingse hem hard for olketa duim evri samting wea Jehovah laekem olketa for duim. Bat, Jehovah savve gud lo iumi. Hem hapi lo olketa wea lovem Hem and traem best for mekem Hem hapi.​—Sams 147:11; Acts 10:34, 35.

Evriwan laekem olketa fren wea honest. Jehovah tu expectim olketa fren blo hem for honest. Bat hem no isi for faendem olketa fren wea honest bikos iumi stap lo world wea staka pipol no honest. Wanem gud samting nao man savve kasem taem hem honest lo evri samting?

1. Wat nao barava important reason for honest?

Taem iumi honest lo nara pipol, iumi showim lo Jehovah iumi lovem and respectim hem. Tingim diswan: Jehovah savve lo evri samting wea iumi tingim and duim. (Hebrew 4:13) Hem lukim taem iumi honest, and datwan mekem hem hapi. Bible sei: “Jehovah barava heitim man wea laea, bat Hem fren gud witim olketa wea raeteous.”​—Proverbs 3:32, NW.

2. Wat nao samfala samting wea iumi savve honest lo hem evriday?

Jehovah laekem iumi for “mas tok tru long olketa narafala pipol olowe.” (Sekaraea 8:16, 17) Wat nao datwan minim? Iumi mas no laea or givim rong information taem iumi story lo famili, olketa wokmate, olketa brata and sista, or olketa wea waka for gavman. Pipol wea honest no steal from olketa narawan or ravem olketa. (Readim Provebs 24:28 and Ephesus 4:28.) Olketa peim tu evri tax blo olketa. (Rome 13:5-7) Lo olketa samting hia and lo olketa nara wei tu, iumi laek for “honest lo evri samting.”​—Hebrew 13:18.

3. Wat nao olketa gud samting wea man savve kasem taem hem honest?

Taem pipol savve iumi honest, olketa bae trustim iumi. Iumi helpem evriwan for feel sef lo kongregeson, wea olsem wanfala famili wea lovem each other. Iumi garem gud konsens. Taem iumi honest, datwan savve “mekem pipol barava tinghae long teaching bilong God wea sevem iumi,” and hem mekem olketa narawan tu for laek worshipim Jehovah.​—Titus 2:10.

DIG GO MOA

4. For honest hem mekem Jehovah hapi

Readim Sams 44:21 and Malakae 3:16, then discussim tugeta olketa kwestin hia:

• Lo tingting blo iu, why nao hem no stret for tingse iumi savve haedem tru samting from Jehovah?

• Lo tingting blo iu, hao nao Jehovah feel taem iumi talem tru samting nomata lo taem wea hem no isi for duim datwan?

5. Iumi mas honest evritaem

VIDEO: Wanem Nao Savve Mekem Man for Hapi?​—Gudfala Konsens (2:32)

Readim Hebrew 13:18, then discussim tugeta wanem iumi savve duim for honest . . .

• lo famili.

• lo waka or skul.

• lo olketa nara situation.

6. Iumi kasem gud samting taem iumi honest

Firstaem, maet luk olsem taem man honest datwan savve mekem hem kasem problem. Bat for evritaem honest hem nao best samting for duim. Readim Sams 34:12-16, then discussim tugeta kwestin hia:

• Wat nao gud samting iu kasem taem iu honest?

1. Hasband and waef wea honest garem gudfala marit

2. Boss trustim wakaman wea honest

3. Olketa wea waka for gavman tinghae lo olketa citizen wea honest

MAIN POINT

Jehovah laekem olketa fren blo hem for honest lo evri samting wea olketa talem and duim.

Review

• Wat nao samfala samting iumi savve honest lo hem?

• Why nao hem no stret for tingse iumi savve haedem samting from Jehovah?

• Why nao iu laek for honest evritaem?

FAENDAOT MOA

Hao nao olketa parents savve teachim pikinini for honest?

Talem Tru Samting Evritaem (1:44)

Why nao hem gud for iumi duim samting wea iumi promis for duim?

Man wea Keepim Promis, Kasem Blessing (9:09)

Read abaotem sapos iumi mas peim tax nomata olketa mis iusim.

“Hao, Iu Mas Peim Olketa Tax?” (The Watchtower, September 1, 2011)

Wat nao mekem wanfala man wea no honest bifor for changem laef blo hem and duim waka wea hem honest lo hem?

“Mi Lanem Hao Jehovah Garem Mercy and Savve Forgive” (The Watchtower, May 1, 2015)

2. Hao, olketa fren iumi chusim hem important lo Jehovah?

Jehovah hem chusim gud olketa fren blo hem. Bible sei, “Hemi [fren gud witim] olketa stretfala man.” (Provebs 3:32) Hao nao feeling blo Jehovah if iumi chusim olketa fren wea no lovem hem? Bae hem barava feel nogud! (Readim James 4:4.) Bat Jehovah bae hapi and fren witim iumi if iumi fren witim pipol wea lovem hem, and no fren witim nogud pipol.​—Sams 15:1-4.