Hao Disfala World Bae Finis
“Iufala no stap long darkness. Man wea stap long darkness bae seke long datfala day, olsem man for steal bae seke taem daylaet kasem hem.” —1 THESS. 5:4.
1. Wanem nao bae helpem iumi for gohed lukaot and no givap taem iumi kasem hard taem?
KLOSAP olketa barava bigfala samting bae happen long disfala earth. Iumi savve long diswan bikos long olketa Bible profesi wea kam tru. Dastawe iumi mas gohed for lukaot. Wanem nao bae helpem iumi for duim datwan? Aposol Paul encouragem iumi for “no gohed for tingting abaotem samting wea iumi savve lukim, bat iumi tingting abaotem samting wea iumi no savve lukim.” Hem gud for iumi tingim evritaem reward wea iumi bae kasem, wea hem nao laef olowe long heven or long earth. Paul talem disfala toktok for encouragem olketa Christian for tingting strong long reward wea olketa bae kasem sapos olketa faithful long God. Diswan bae helpem olketa for no givap taem olketa kasem hard taem and persecution.—2 Cor. 4:8, 9, 16-18; 5:7.
2. (a) Wanem nao iumi mas duim for gohed garem strongfala hope? (b) Wanem nao bae iumi storyim long disfala study and long nextfala study?
2 Iumi lanem disfala important samting from toktok bilong Paul: For gohed garem strongfala hope, iumi mas no tingting nomoa abaotem olketa samting wea iumi savve lukim, bat iumi mas tingting strong abaotem olketa important samting wea bae happen wea iumi no lukim yet. (Heb. 11:1; 12:1, 2) Bae iumi storyim tenfala samting wea bae happen long future wea join witim hope bilong iumi for laef olowe.a
SAMTING WEA BAE HAPPEN BIFOR END HEM KAM
3. (a) Wanem samting nao 1 Thessalonica 5:2, 3 story abaotem wea no happen yet? (b) Wanem nao bae olketa world leader duim, and maet hu nao joinim olketa?
3 Long leta bilong Paul for olketa long Thessalonica hem storyim wanfala samting wea bae happen wea iumi no lukim yet. (Readim 1 Thessalonica 5:2, 3.) Paul hem storyim “day bilong Jehovah.” Datfala day bae start taem false religion hem distroe and bae hem finis long Armageddon. Just bifor day bilong Jehovah hem start, olketa world leader bae sei “Iumi garem peace and stap gud nao!” Maet diswan hem samting wea happen wantaem nomoa, or maet hem happen samfala taem. Maet olketa nation long world tingse olketa klosap stretem samfala big problem wea olketa garem. Waswe long olketa bigman bilong religion? Olketa part long disfala world, so maet olketa join witim olketa world leader for sei “Iumi garem peace and stap gud nao!” (Rev. 17:1, 2) Sapos olketa duim olsem, bae olketa duim sem samting wea olketa false profet long Judah duim bifor, wea sei: “Peace stap nao! Peace stap nao!” Bat Jehovah sei no eni peace hem stap.—Jer. 6:14; 23:16, 17.
4. Wanem nao iumi luksavve long hem, wea staka pipol no minim?
4 Nomata hu nao sei “Iumi garem peace and stap gud nao!” datwan showimaot day bilong Jehovah bae hem start nao. Dastawe Paul savve sei: “Olketa brata, iufala no stap long darkness. Man wea stap long darkness bae seke long datfala day, olsem man for steal bae seke taem daylaet kasem hem. Iufala evriwan olketa son bilong laet.” (1 Thess. 5:4, 5) Nomata staka pipol no luksavve hao olketa samting wea happen long world distaem hem join witim Bible, iumi luksavve long mining bilong olketa samting hia. Long wanem wei nao disfala profesi abaotem taem wea pipol sei “Iumi garem peace and stap gud nao!” bae hem kam tru? Iumi mas weit and lukluk. Dastawe iumi mas “gohed wekap and garem gudfala tingting.”—1 Thess. 5:6; Zeph. 3:8.
FALSE RELIGION NO SAVVE HEM BAE FINIS
5. (a) Wanem nao bae happen wea showimaot “bigfala trabol” hem start? (b) Hu nao hem olsem “wanfala queen” wea tingse hard for eni nogud samting kasem hem?
5 Wanem nao next samting wea bae happen? Paul sei: “Long taem wea pipol sei: ‘Iumi garem peace and stap gud nao!’ then seknomoa olketa bae finis.” First samting wea bae finis hem evri false religion long world. Bible kolem olketa false religion “Bigfala Babylon,” and nara nem bilong hem “datfala jury woman.” (Rev. 17:5, 6, 15) Datfala attak againstim evri false religion, wea insaed diswan hem olketa religion wea sei olketa Christian, hem nao start bilong “bigfala trabol.” (Matt. 24:21; 2 Thess. 2:8) Staka pipol bae seke long diswan. Why nao olsem? Bikos datfala jury woman tingse hem “wanfala queen” and “no enitaem bae [hem] sorre.” Hem tingse hard for eni nogud samting kasem hem. Bat bae hem faendaot tingting bilong hem no stret. Bae hem finis kwiktaem nomoa, olsem hem finis “insaed wanfala day nomoa.”—Rev. 18:7, 8.
6. Hu nao bae distroem false religion?
6 Bible sei wanfala “wild animal” wea garem “tenfala horn” bae attakim datfala jury woman. Buk bilong Revelation showimaot disfala wild animal hem piksarem United Nations (UN). “Tenfala horn” hia hem piksarem evri gavman wea sapotim datfala “wild animal wea kala bilong hem red.”b (Rev. 17:3, 5, 11, 12) Wanem nao bae happen long datfala jury woman? Olketa kantri wea member bilong UN bae tekem evri riches bilong hem, bae olketa mekem pipol luksavve long evri nogud wei bilong hem, bae olketa distroem hem, and “bonem hem long fire.” Datwan nao bae hem end bilong false religion.—Readim Revelation 17:16.
7. Wanem nao bae mekem datfala “wild animal” attakim false religion?
7 Profesi long Bible showimaot tu wanem nao bae mekem datfala “wild animal” attakim false religion. Jehovah bae mekem olketa world leader for “garem tingting for duim samting wea hem laekem,” wea hem nao for olketa distroem datfala jury woman. (Rev. 17:17) Staka war and problem long world kamap bikos long religion. So maet olketa nation tingse bae hem gud samting for olketa sapos olketa distroem datfala jury woman. Taem olketa world leader attakim datfala jury woman, bae olketa tingse olketa followim tingting bilong olketa seleva. Bat really, God nao iusim olketa for distroem evri false religion. So wanfala sekson bilong Satan bae attakim nara sekson bilong hem, and hard for hem stopem datwan.—Matt. 12:25, 26.
OLKETA ATTAKIM PIPOL BILONG GOD
8. Wanem nao attak bilong “Gog from land bilong Magog”?
8 Taem false religion hem distroe finis, pipol bilong God bae “stap sef” yet and luk olsem “no eni wall stap raonem olketa.” (Ezek. 38:11, 14) Wanem nao bae happen long olketa hia wea worshipim Jehovah wea luk olsem no eni samting protectim olketa? From samting wea Bible talem, hem luk olsem “staka pipol” bae attakim olketa. Bible kolem diswan attak bilong “Gog from land bilong Magog.” (Readim Ezekiel 38:2, 15, 16.) Hao nao iumi shud ting long datfala attak?
9. (a) Wanem nao main important samting long wanfala Christian? (b) Wanem nao iumi shud duim distaem for strongim faith bilong iumi?
9 Iumi savve abaotem disfala attak long pipol bilong God, bat iumi no wari tumas abaotem datwan. Main important samting long iumi nao, hem no for iumi sev, bat for pipol tinghae long nem bilong Jehovah and for luksavve hem nomoa fit for rul. Insaed long Bible, winim 60 taem nao Jehovah sei long olketa nation: “Iufala mas savve mi nao Jehovah.” (Ezek. 6:7; lukim footnote.) Iumi barava interest for lukim wei wea datfala important part long profesi bilong Ezekiel bae kam tru. And iumi sure “Jehovah hem savve hao for sevem pipol wea faithful long hem. Hem bae sevem olketa from olketa hard taem.” (2 Pet. 2:9) Go kasem datfala taem, iumi laek for traem best for strongim faith bilong iumi mekem iumi gohed faithful long Jehovah nomata wanem hard samting kasem iumi. Hao nao iumi savve duim diswan? Iumi shud prea, studyim Bible and ting raonem wanem iumi lanem, and talemaot message abaotem Kingdom long nara pipol. Datwan bae strongim hope bilong iumi for laef olowe, and datfala hope bae kamap olsem “wanfala anka” wea helpem iumi for gohed faithful long God.—Heb. 6:19; Ps. 25:21.
OLKETA NATION MAS SAVVE HU NAO JEHOVAH
10, 11. Hao nao Armageddon bae start, and wanem nao bae happen long Armageddon?
10 Wanem bigfala samting nao bae happen taem olketa attakim pipol bilong Jehovah? Jehovah bae iusim Jesus and olketa army long heven for helpem pipol bilong Hem. (Rev. 19:11-16) Datwan nao hem “datfala war wea bae kamap long bigfala day bilong Olmaeti God” wea Bible kolem datwan Armageddon.—Rev. 16:14, 16.
11 Long Ezekiel Jehovah sei olsem abaotem disfala war: “Mi bae sendem wanfala sword againstim Gog long olketa maunten bilong mi. Olketa soldia bae faetem each other.” Olketa wea sapotim Satan bae konfius and fraet, and bae olketa start for killim dae each other. Jehovah hem sei: “Mi bae mekem fire and salfa foldaon long [Gog] and long army bilong hem and long pipol wea kam witim hem.” (Ezek. 38:21, 22) Taem God duim diswan, olketa hia bae luksavve long wanem samting?
12. Wanem nao olketa nation mas luksavve long hem?
12 Olketa nation bae luksavve olketa finis bikos Jehovah nao givim komand for Jesus and army bilong hem for distroem olketa. Then maet olketa wea sapotim Satan talem sem toktok olsem olketa long Egypt bifor wea ran bihaenem olketa Israelite long Red Sea, and wea singaot and sei: “Jehovah barava faet for olketa”! (Ex. 14:25) Long datfala taem olketa nation mas luksavve hu nao Jehovah. (Readim Ezekiel 38:23.) Wanem taem nao bae olketa samting hia start for happen?
NO ENI NARA WORLD PAOA MOA BAE KAMAP
13. Wanem nao samfala samting wea iumi savve abaotem mek-faev part bilong image wea Daniel hem story abaotem?
13 Wanfala profesi long buk bilong Daniel helpem iumi for luksavve long taem wea iumi stap long hem. Daniel hem story abaotem wanfala image wea olketa wakem from olketa difren kaen metal, wea hem luk olsem wanfala man. (Dan. 2:28, 31-33) Disfala image hem piksarem olketa world paoa wea duim samting wea barava affectim pipol bilong God long bifor and distaem tu. Faevfala world paoa hia nao hem Babylon, Media and Persia, Greece, Rome, and wanfala last wan wea rul distaem. Profesi bilong Daniel showimaot olketa feet and toe bilong datfala image hem piksarem disfala last world paoa. Long World War I, Britain and America start for barava fren gud and waka tugeta. So mek-faev part long image bilong Daniel hem nao datfala England and America World Paoa. Feet nao hem last part bilong datfala image, so diswan showimaot no eni nara world paoa bae changem hem. Feet and olketa toe bilong datfala image wea iron and clay, hem piksarem wei wea datfala England and America World Paoa hem no strong.
14. Wanem world paoa nao bae rul taem Armageddon hem kam?
14 Long disfala profesi, wanfala big ston hem piksarem Kingdom bilong God wea hem kamaot from wanfala maunten long 1914. Datfala maunten hem piksarem raet bilong Jehovah for rul. Klosap nao datfala ston bae bangam feet bilong datfala image. Long Armageddon, feet and evri nara part bilong datfala image bae pisis evribit. (Readim Daniel 2:44, 45.) So datfala England and America World Paoa bae stap yet taem Armageddon hem kam. Bae hem gud tumas for lukim disfala profesi hem kam tru!c Bat wanem nao Jehovah bae duim long Satan?
WANEM NAO BAE KASEM MAIN ENEMY BILONG GOD?
15. Bihaen Armageddon, wanem nao bae kasem Satan and olketa demon bilong hem?
15 First samting, Satan bae lukim evri part long organization bilong hem long earth olketa distroe. Then wanfala samting bae kasem Satan. Aposol John nao hem story abaotem datwan. (Readim Revelation 20:1-3.) Hem sei: “Wanfala angel hem kam daon from heven. Hem holem key bilong datfala hol wea deep tumas.” Datfala angel hem Jesus Christ, wea bae torowem Satan and olketa demon bilong hem long datfala hol wea deep tumas and olketa bae stap long there for wan thousand year. (Luke 8:30, 31; 1 John 3:8) Taem diswan hem happen, datwan hem minim wei for killim hed bilong datfala snek hem start nao.d—Gen. 3:15.
16. Taem Satan hem insaed long “datfala hol wea deep tumas” bae hem hao?
16 Wanem nao “datfala hol wea deep tumas” wea Christ torowem Satan and olketa demon insaed long hem? Greek word wea olketa iusim for diswan savve minim “barava deep,” olsem wanfala tokpiksa hol wea no garem botom. Jehovah and datfala angel wea “holem key bilong datfala hol wea deep tumas,” tufala nomoa savve aotem Satan and olketa demon bilong hem from datfala ples. Satan bae stap long there “mekem hem no laea moa long olketa pipol long evri kantri long world.” Bible hem sei Satan hem olsem “wanfala lion wea singaot big.” Bat taem hem insaed long datfala hol wea deep tumas, bae hem stap kwaet nao!—1 Pet. 5:8.
OLKETA SAMTING WEA BAE HAPPEN BIFOR PEACE HEM KAM
17, 18. (a) Wanem nao faevfala samting wea iumi storyim long disfala study wea no happen yet? (b) Wanem nao bae start bihaen evri samting hia happen?
17 Klosap nao olketa barava bigfala samting bae happen. Bible sei bifor end hem kam, pipol bae sei: “Iumi garem peace and stap gud nao!” Iumi interest for lukim hao datfala profesi bae kam tru. Then iumi bae lukim Bigfala Babylon hem finis, datfala attak bilong Gog from land bilong Magog, and Armageddon. Jesus bae torowem Satan and olketa demon bilong hem insaed long “datfala hol wea deep tumas.” Bihaen evri samting hia happen and evri nogud samting hem finis, wan thousand year rul bilong Christ bae start and laef bae barava difren. Long datfala taem, full earth bae garem peace.—Ps. 37:10, 11.
18 Long disfala study, iumi story abaotem faevfala “samting wea iumi no savve lukim,” wea no happen yet. Long next study bae iumi storyim nara faevfala “samting wea iumi no savve lukim” wea iumi mas gohed for tingting abaotem olketa.
a Bae iumi storyim faevfala samting long disfala study and nara faevfala long nextfala study.
b Lukim Revelation—Its Grand Climax at Hand! page 251-258.
c Daniel 2:44 sei Kingdom “bae smasem and finisim evri gavman hia.” Datfala toktok “evri gavman hia” hem minim olketa world paoa wea olketa difren part bilong datfala image hem piksarem. Bat nara Bible profesi wea story abaotem diswan sei “olketa king evriwea long earth” bae hipap for faet againstim Jehovah long “datfala war wea bae kamap long bigfala day bilong Olmaeti God.” (Rev. 16:14; 19:19-21) So olketa gavman wea datfala image piksarem and evri nara gavman tu bae distroe long Armageddon.
d Wei for killim hed bilong datfala snek bae hem finis long end bilong datfala wan thousand year taem olketa torowem Satan and olketa demon bilong hem long “datfala lake bilong fire and salfa.”—Rev. 20:7-10; Matt. 25:41.