Long vision bilong aposol John, “olketa scroll hem open,” and “olketa wea dae finis kasem judgment followim samting olketa scroll talem, fitim samting olketa duim.” Waswe, olketa scroll hia talem nomoa evri samting wea man duim bifor hem dae? Nomoa, pipol bae no kasem judgment for samting olketa duim bifor olketa dae. Hao nao iumi savve long datwan? Bible hem sei: “Man wea dae no guilty nao for sin bilong hem.” (Romans 6:7) So taem olketa wea dae finis laef bak, olketa stap klin front long God, from hem no tingim sin bilong olketa nao. Dastawe, masbi olketa scroll hia talem olketa nara samting wea God laekem pipol for duim. For kasem laef olowe, olketa wea no dae long Armageddon and olketa wea resurrect mas obeyim olketa komandment bilong God, wea insaed diswan hem olketa samting wea hem laekem olketa for duim insaed datfala wan thousand year. So man wanwan bae kasem judgment followim samting hem duim insaed datfala Judgment Day.

Judgment Day bae givim plande billion pipol first chance wea olketa kasem for lanem will bilong God and duim datwan. Diswan minim wanfala big waka for teachim pipol bae kamap. Tru nao, “raeteous fasin nao samting wea pipol long datfala gud land bae barava lanem.” (Isaiah 26:9) Nomata olsem, no evriwan bae willing for duim will bilong God. Isaiah 26:10 hem sei: “Nomata man wea wicked kasem gudfala samting, hem bae nating lanem raeteous fasin. Hem bae duim samting wea no stret long land bilong stretfala fasin and bae hem no lukim haefala position bilong Jehovah.” Wicked pipol hia bae kasem panis for dae for olowe insaed datfala Judgment Day.​—Isaiah 65:20.

Kasem end bilong Judgment Day, olketa man wea laef yet bae “garem laef” evribit bikos olketa bae perfect. (Revelation 20:5) So insaed Judgment Day, olketa man bae kasem bak wei for perfect olsem long firstaem. (1 Corinthians 15:24-​28) Then wanfala last test bae kamap. Jesus bae letem Satan go aot from prison bilong hem and letem hem for trae pullim olketa man awe from God, wea diswan bae last taem for hem savve duim datwan. (Revelation 20:​3, 7-​10) Olketa wea no letem hem for pullim olketa bae enjoyim nao wei wea datfala Bible promis hem fulfill evribit, wea sei: “Olketa wea raeteous bae kasem earth olsem present, and olketa bae stap for olowe long hem.” (Psalm 37:29) Tru nao, Judgment Day bae wanfala blessing for evriwan wea faithful!

FOR klosap foti year bifor long year 1914, olketa Bible student gohed for talemaot hao olketa bigfala samting bae kamap long datfala year. Wanem nao olketa samting hia, and wanem nao pruvim hao 1914 hem wanfala barava important year?

Long Luke 21:24, Jesus hem sei: “Olketa nation bae gohed for purubutim Jerusalem, go kasem datfala sekson bilong taem wea God markem for olketa nation hem finis.” Long bifor, Jerusalem hem kapitol taon bilong nation bilong olketa Jew, and tu, hem ples wea olketa king long laen bilong King David olketa rul. (Psalm 48:​1, 2) Bat olketa king hia difren from olketa king bilong olketa nara nation. Olketa sidaon long “throne bilong Jehovah” wea datwan showimaot olketa rul anda long hem. (1 Chronicles 29:23) So Jerusalem hem piksarem rul bilong Jehovah.

Bat ‘olketa nation start for purubutim’ rul bilong God long wanem taem, and hao nao olketa duim datwan? Diswan hem happen long 607 B.C.E. taem olketa bilong Babylon tekovarem Jerusalem. No eniwan sidaon long “throne bilong Jehovah” nao, and wei for wanfala king rul from laen bilong David hem finis go kasem wanfala taem long future. (2 Kings 25:​1-​26) Waswe, disfala wei for ‘purubutim’ Jerusalem bae gohed for olowe? Nomoa, bikos profesi bilong Ezekiel sei olsem abaotem Zedekiah, wea hem nao lastfala king wea rul long Jerusalem: “Aotem turban, and tekaotem crown. . . . Bae no eniwan werem diswan go kasem taem wea man wea garem raet saed long law hem kam, and mi mas givim long hem.” (Ezekiel 21:26, 27) Man wea “garem right saed long law” for garem datfala crown bilong David hem Christ Jesus. (Luke 1:​32, 33) So wei wea olketa nation ‘purubutim Jerusalem’ bae finis taem Jesus kamap King.

Wanem taem nao datfala barava important samting bae happen? Jesus showimaot hao olketa Gentile bae rul for wanfala sekson bilong taem wea God markem. Daniel chapter 4 helpem iumi savve long haomas year nao datwan. Hem storyim wanfala profesi dream bilong Nebuchadnezzar, wea hem king bilong Babylon. Hem lukim wanfala mamaeti tree wea olketa katem daon. Smol haf wea stap yet no savve grow moa bikos olketa putim iron and copper raonem hem. And wanfala angel hem sei: “Hem mas stap olsem for sevenfala taem.”​—Daniel 4:​10-​16.

Samfala taem long Bible, tree savve piksarem rul bilong wanfala kantri. (Ezekiel 17:22-​24; 31:​2-5) So wei for katem daon datfala tokpiksa tree hem piksarem wei wea rul bilong God, wea showaot thru long olketa king long Jerusalem, hem finis long datfala taem. Nomata olsem, datfala vision showimaot hao olketa nation bae no ‘purubutim Jerusalem’ for olowe, datwan bae gohed for “sevenfala taem” nomoa. Haomas year nao datwan?

Revelation 12:​6, 14 showimaot hao thri and haf taem, hem “wan thousand tu handred and sixti day.” So “sevenfala taem” hem tu-taems 1,260 day, wea datwan hem 2,520 day. Bat olketa nation bilong olketa Gentile no finis for ‘purubutim’ rul bilong God 2,520 day bihaen Jerusalem hem distroe. So luk olsem disfala profesi storyim wanfala sekson bilong taem wea barava moa long winim datwan. Taem iumi tingim hao Numbers 14:34 and Ezekiel 4:6 sei “wanfala day for wanfala year,” “sevenfala taem” bae hem 2,520 year.

Datfala 2,520 year start long October 607 B.C.E., wea hem nao taem wea olketa bilong Babylon tekova long Jerusalem and aotem from throne bilong hem datfala king from laen bilong David. Datfala 2,520 year hem end long October 1914. Long datfala taem, “sekson bilong taem wea God markem for olketa nation” hem end, and Jesus Christ kamap King bilong God long heven.a​—Psalm 2:​1-6; Daniel 7:​13, 14.

Olsem Jesus hem talem, olketa barava bigfala samting olsem olketa war, bigfala hangre, olketa earthquake, and olketa bigfala sik, bae gohed taem hem “stap moa” olsem King long heven. (Matthew 24:​3-8; Luke 21:11) Olketa samting hia barava pruvim hao 1914 hem year wea Kingdom bilong God long heven hem start for rul and hem year wea “olketa last day” bilong disfala wicked world hem start.​—2 Timothy 3:​1-5.

NO STAKA taem nao Bible storyim datfala angel wea garem nem Michael. Bat taem hem storyim hem, evritaem Michael hem duim samting. Long buk bilong Daniel, Michael hem faetem olketa wicked angel; long leta bilong Jude, hem raoa witim Satan, and long Revelation, hem war againstim Devil and olketa demon bilong hem. Wei wea Michael defendim rul bilong Jehovah and faetem olketa enemy bilong God, hem fitim mining bilong nem bilong hem, wea datwan hem, “Hu Nao Olsem God?” Bat hu nao Michael?

Samfala taem, pipol savve iusim tufala nem for sem man. Olsem example, long Bible, nara nem bilong Jacob hem Israel, and nara nem bilong aposol Peter hem Simon. (Genesis 49:​1, 2; Matthew 10:2) Olsem tu, Bible showimaot hao Michael hem nara nem for Jesus Christ, bifor and bihaen hem stap long earth. Iumi tingim samfala reason from Bible for why iumi savve talem datwan.