ANSA FOR OLKETA BIBLE KWESTIN

Hu nao rulim disfala world?

Scenes of war, crime, violence, and disasters — Sapos God rulim disfala world, waswe, bae staka pipol safa olsem?

Staka pipol tingse God nao rulim disfala world. Bat sapos datwan hem tru, waswe, iu tingse staka pipol bae safa? (Deuteronomy 32:4, 5) Bible sei disfala world hem stap long paoa bilong Satan.—Readim 1 John 5:19.

Hao nao gogo Satan start for kontrolem olketa man? Start long taem wea God wakem Adam and Eve, wanfala angel bighed againstim God and switim tufala for bighed tu. (Genesis 3:1-6) Tufala disaed for followim datfala bighed angel, Satan, and hem kamap ruler bilong tufala. Olmaeti God nomoa fit for rulim pipol, bat hem laekem olketa for stap anda long hem bikos olketa lovem hem. (Deuteronomy 6:6; 30:16, 19) Sorre samting nao, staka pipol duim sem samting olsem Adam and Eve, and olketa disaed for followim Satan.—Readim Revelation 12:9.

Hu nao bae stretem olketa problem long disfala world?

Waswe, bae God letem Satan for gohed rulim disfala world? Nomoa! God bae iusim Jesus for finisim evri nogud samting wea Satan hem duim.—Readim 1 John 3:8.

God bae givim paoa long Jesus for finisim Satan. (Rome 16:20) Then, God nao bae rulim evri man and olketa bae hapi and stap long peace, wea hem nao wanem God laekem long firstaem.—Readim Revelation 21:3-5.

For savve moa, lukim chapter 3 long disfala buk, Wanem Nao Really Samting wea Bible Teachim? wea Olketa Jehovah’s Witness pablisim.

Disfala buk stap tu long www.jw.org