“Eureka Drama” Helpem Staka for Lanem Truth

“EUREKA!” Disfala word minim, “Mi faendem nao!” Long mek-19 century staka pipol go long California, U.S.A., for faendem gold. Taem eniwan faendem gold hem savve singaot big olsem: “Eureka!” Bat Charles Russell and olketa nara Bible Student, faendem samting wea winim gold. Hem nao truth insaed Bible. And olketa laekem tumas for storyim datwan long nara pipol.

Kasem midol long 1914, staka million pipol long olketa bigfala taon lukim finis datfala “Photo-Drama of Creation.” Diswan hem movie wea hem eit hour, wea International Bible Students Association (I.B.S.A.) nao wakem. Disfala movie garem olketa kala piksa, olketa slide, toktok wea go witim datfala movie, and naesfala music. Disfala movie hem abaotem history bilong olketa man start long creation go kasem end bilong wan thousand year wea Christ rul.—Rev. 20:4.a

Bat waswe long olketa wea stap long olketa smol taon and long bakwei? Long August 1914, I.B.S.A. releasem “Eureka Drama” for helpem pipol hia tu. Diswan hem samfala part bilong datfala “Photo-Drama,” bat hem no long tumas and hem no garem olketa movie wea garem saond. Olketa wakem thrifala difren Eureka Drama, and hem long samfala difren languis tu. First wan, hem “Eureka X” wea garem toktok wea olketa recordim and music. Mek-tu, hem “Eureka Y” wea garem evri recording witim olketa kala slide wea luk naes. And mek-thri, hem “Eureka Family Drama,” wea olketa wakem for showim long olketa haos, and hem garem samfala toktok wea olketa recordim and olketa song. Hem no expensive for peim olketa phonograph and projector for showim drama hia.

From olketa Bible Student no needim bigfala screen or film projector for pleim datfala drama, olketa go pleim long olketa ples aotsaed long taon. From diswan staka pipol moa herem Kingdom message. Olketa savve pleim datfala “Eureka X” long day or naet. Slide projector wea olketa iusim for showim “Eureka Y” hem no needim paoa bat olketa savve iusim gas for ranem. Wanfala Watch Tower long Finnish languis sei olsem: “Mifala savve showim olketa piksa hia long eni ples.” And hem nao samting wea olketa duim!

Olketa Bible Student no rentim olketa big theater for showim datfala Drama, bat faendem olketa ples wea free olsem class rum, kot haos, train station, and olketa big haos wea garem bigfala rum insaed. Staka taem olketa showim disfala drama long open air, and iusim wanfala big white kaleko wea olketa hangem long wall bilong eni building olsem screen. Anthony Hambuch sei: “Long area wea olketa farmer plantim olketa frut tree, olketa savve putim olketa log for pipol sidaon and lukluk long datfala drama.” Olketa wea go raon for showim datfala “Eureka Drama” iusim wanfala wagon wea olketa kolem “Drama wagon” for karem olketa samting for datfala drama, basket bilong olketa, and olketa samting wea olketa iusim for camp and kuki.

Samfala taem olketa pleim Eureka drama for tu-thri nomoa, bat samfala taem staka handred nao attend. Long United States, long wanfala taon wea population bilong hem 150 pipol, 400 pipol nao kam lukim datfala “Eureka Drama” insaed wanfala skul building. Long nara ples, samfala pipol wakabaot 8 kilometer for kam and nara 8 kilometer for go bak. Long Sweden, olketa neiba bilong Charlotte Ahlberg wea kam long smol haos bilong hem for herem datfala drama, “olketa barava tinghae” long datwan. Long wanfala taon long Australia wea duim mining, wantaem samting olsem 1,500 pipol nao kam lukim datfala drama. The Watch Tower hem sei long olketa hae skul and college, “olketa professor and student laekem tumas olketa piksa and olketa nambawan phonograph recording” bilong datfala drama. Olketa showim tu datfala “Eureka Drama” long olketa cinema.

MEKEM GROW OLKETA SEED BILONG TRUTH

Olketa Bible Student savve iusim “Eureka Drama” long “Class Extension Work,” wea diswan hem wei wea olketa Bible Student sendem olketa speaker for givim olketa tok long pablik and startim olketa niu study class. Iumi no barava savve haomas pipol nao lukim datfala “Eureka Drama.” Staka team wea showim datfala “Eureka Drama” savve showim datwan staka taem. Nomata olsem, long 1915, long 86 team wea showim datfala “Drama,” 14-fala nomoa givim report evritaem. Nomata olketa no savve long barava stretfala namba, report long end bilong datfala year sei winim wan million pipol nao lukim datfala “Drama.” Samting olsem 30,000 long olketa ask for olketa Bible pablikeson.

Nomata maet staka pipol distaem no rememberim datfala “Eureka Drama,” luk olsem plande million pipol long Australia, Argentina, South Africa, British Isles, India, and olketa island long Caribbean lukim diswan. Staka long olketa hia hapi tumas bikos olketa faendem truth long Bible, wea diswan hem winim gold.