Olketa Barava Willing for Go​—Long Micronesia

KATHERINE hem growap long United States and taem hem 16 year hem baptaes and kamap wanfala Jehovah’s Witness. Hem waka hard long ministry bat staka pipol no interest long Kingdom message long ples wea hem stap. Hem sei: “Mi savve readim olketa experience abaotem pipol wea prea long God for sendem eniwan for helpem olketa for savve long hem. Staka taem nao mi laek for faendem eniwan olsem, bat datwan nating happen nomoa.”

Bihaen Katherine preach long sem territory for plande year, hem tingting for muv long nara ples wea pipol interest long Kingdom message. Bat hem no sure sapos hem bae fit for duim datwan. Long full laef bilong hem, wantaem nomoa hem lusim famili bilong hem for tufala week and insaed datfala tu week, evriday nao hem tingim famili bilong hem. Nomata olsem, hem laekem tumas for helpem pipol wea laek for savve long Jehovah. Bihaen hem ting raonem samfala ples wea hem laek for go long hem, hem raet long branch office long Guam and olketa sendem information wea hem needim. Long July 2007, taem Katherine hem 26 year, hem muv go long Saipan, wanfala island long Pacific Ocean, wea hem 10,000 kilometer from hom bilong hem. Wanem nao happen taem hem kasem long there?

GOD ANSAREM TUFALA PREA

No longtaem bihaen Katherine kasem long there, hem meetim Doris, wanfala woman wea samting olsem 45 year, wea laek studyim Bible. Bihaen olketa finisim chapter thri long Wanem Bible Teachim buk, Katherine start for wari. Doris hem gohed gud long study bilong hem bat Katherine no sure sapos hem nao stret wan for study witim Doris. Katherine sei: “No enitaem mi conductim Bible study witim eniwan and long tingting bilong mi Doris needim wanfala sista wea garem bigfala savve, or samwan wea tufala sem age for study witim hem.” Katherine prea long Jehovah for helpem hem faendem wanfala sista wea fit for study witim Doris. Then hem redi for go talem Doris bae hem askem nara sista for study witim hem.

Katherine sei: “Taem mi no story yet long Doris abaotem datwan, hem sei hem laek for storyim wanfala problem long mi. Bihaen mi herem story bilong hem, mi storyim hao Jehovah helpem mi for deal witim semkaen problem tu. Hem sei thankiu long mi.” Then Doris talem Katherine: “Jehovah iusim iu for kam helpem mi. Firstaem wea iu kam long haos bilong mi, mi readim Bible bilong mi for tu-thri hour finis. Mi krae and askem God for sendem eniwan for kam helpem mi for minim Bible. Then nomoa iu noknok long door nao. Jehovah ansarem prea bilong mi!” Evritaem Katherine storyim datwan, hem savve krae. Hem sei: “Samting wea Doris talem hem ansarem prea bilong mi. Jehovah helpem mi for luksavve mi nao fit for duim datfala study.”

Long 2010 Doris hem baptaes and distaem hem tu garem tu-thri Bible study. Katherine sei: “Mi hapi fogud for helpem samwan for worshipim Jehovah. Hem nao samting wea mi laek for duim for longtaem finis!” Distaem Katherine hem wanfala spesol pioneer long Kosrae, wanfala island long Pacific.

HAO FOR DEAL WITIM THRIFALA HARD SAMTING

Winim wan handred brata and sista from olketa nara kantri (wea age bilong olketa from 19 year go kasem 79 year) go long olketa ples long Micronesia wea needim samfala pablisa moa. Erica hem muv long Guam long 2006 taem hem 19 year. Hem sei: “Mi barava enjoyim wei for pioneer long territory wea staka pipol interest for lanem truth. Mi thankiu tumas long Jehovah for helpem mi duim disfala waka. Diswan nao hem best samting for duim long laef!” Olketa narawan wea duim diswan garem sem feeling olsem Erica tu. Distaem Erica hem hapi for duim spesol pioneer waka long Ebeye long Marshall Islands. Nomata olsem, olketa wea pioneer long nara kantri feisim olketa hard samting tu. Bae iumi storyim thrifala hard samting wea olketa savve feisim and lukim hao nao olketa wea muv long Micronesia deal witim olketa samting hia.

Laef hem difren. Long 2007, Simon wea hem 22 year hem go long Palau. Hem waka bat pei bilong hem smol nomoa taem hem markem witim selen wea hem kasem taem hem waka long hom bilong hem long England. Simon sei: “Mi mas lane for no peim evri samting wea mi laekem. Distaem mi mas chusim kaikai wea fitim selen wea mi garem, and mi go long olketa difren stoa for faendem kaikai wea cheap. Taem eni samting hem nogud, mi peim olketa second hand spare part and mi faendem eniwan for helpem mi for fixim datwan.” From hem mas mekem laef bilong hem simpol, hao nao datwan helpem hem? Simon sei: “Datwan helpem mi for lanem wanem nao important long laef and mi no needim staka samting. Plande samting happen wea pruvim Jehovah hem evritaem lukaftarem mi. Insaed sevenfala year wea mi stap long hia, mi evritaem garem kaikai and ples for stap.” Tru nao, Jehovah hem sapotim olketa wea garem simpol laef and Kingdom hem first samting long laef bilong olketa.—Matt. 6:32, 33.

Misstim hom and famili. Erica sei: “Mi lovem tumas famili bilong mi, and mi wari nogud mi bae misstim olketa gogo bae mi no duim gud ministry bilong mi nao.” Wanem nao helpem hem for deal witim diswan? Hem sei: “Bifor mi go, mi readim samfala article long Wastaoa for helpem mi deal witim wei for misstim famili. Datwan redyim tingting bilong mi for deal witim disfala hard samting. Wanfala long olketa article hia storyim wanfala mami wea sei olsem long gele bilong hem: ‘Jehovah nao savve keepim iu gud winim mi.’ Datfala toktok barava strongim mi.” Hannah and hasband bilong hem, Patrick, muv go long Majuro long Marshall Islands. Hannah spendem staka taem witim olketa brata and sista long kongregeson, and datwan helpem hem for no misstim tumas hom and famili bilong hem. Hannah sei: “Mi evritaem thankiu long Jehovah for olketa brata and sista raonem world bikos olketa tu olsem famili bilong mi. Sapos olketa no sapotim mi, bae mi no savve stap long disfala ples wea needim samfala pablisa moa.”

Garem olketa fren. Simon sei: “Taem iu kasem wanfala niu ples, evri samting nao difren. Samfala taem mi misstim wei for talem olketa joke and for narawan minim gud joke bilong mi.” Erica sei: “Long firstaem, mi feel olsem mi no garem eni fren, bat datwan helpem mi for ting raonem why nao mi muv kam long hia. Mi muv kam long hia for duim moa samting for Jehovah, and no for kasem samting for miseleva.” Hem sei tu: “ Gogo mi garem olketa gudfala fren, and datwan hem spesol samting long mi.” Simon traem best for lanem Palauan languis, and datwan helpem hem for showimaot love long olketa brata and sista long datfala ples. (2 Cor. 6:13) From hem traem best for lanem datfala languis, datwan mekem olketa brata for lovem hem tu. Tru nao, taem olketa wea kam from nara kantri and olketa brata and sista long kongregeson waka tugeta, datwan mekem evriwan for fren gud tugeta. Wanem nao olketa nara gud samting wea olketa wea willing for muv long nara kantri kasem?

“HARVESTIM STAKA SAMTING”

Aposol Paul sei: “Man wea plantim staka seed bae harvestim staka samting.” (2 Cor. 9:6) Disfala toktok hem fitim olketa wea duim moa samting long ministry. Wanem gud samting nao olketa hia kasem long Micronesia?

Long Micronesia, staka pipol still interest for studyim Bible, so olketa wea laek muv go long there savve garem chance for study witim pipol wea willing for followim wanem olketa lanem and gohed gud long spiritual wei. Patrick and Hannah go preach tu long Angaur, wanfala smol island wea 320 pipol nomoa stap long hem. Bihaen olketa preach long there for tufala month, tufala startim study witim wanfala woman wea garem wanfala pikinini. Hem barava laekem wanem hem lanem, and changem staka samting long laef bilong hem. Hannah sei: “Evritaem wea mifala lusim hem bihaen long study, mitufala luk long mitufala and sei: ‘Thankiu nao Jehovah!’” Hannah sei tu: “Mi savve Jehovah savve iusim eniwan for helpem disfala woman, bat from mifala muv kam long disfala ples, mifala faendem disfala woman and helpem hem for savve long Jehovah. Wei wea mitufala study witim disfala woman hem mekem mifala barava hapi!” Olsem Erica talem: “Taem iu helpem samwan for savve long Jehovah, iu bae hapi narawe!”

WASWE, IU TU SAVVE DUIM DISWAN?

Staka kantri needim samfala moa brata and sista for helpem olketa preachim gud nius. Waswe, iu fit for go help long eni ples olsem wea garem need? Prea long Jehovah for strongim iu for laek duim moa samting long ministry. Storyim diswan witim olketa elder long kongregeson, circuit overseer, or witim olketa brata and sista wea duim diswan finis. Sapos iu laekem moa information abaotem ples wea iu laek go long hem, raet go long branch office wea lukaftarem datfala kantri.a Maet iu tu olsem plande thousand brata and sista, wea young, olo, singol, or marit, wea kasem staka blessing bikos olketa barava willing for muv go long ples wea garem need.