STUDY 29

Saond Bilong Voice

HEM no just wanem man hem talem wea savve affectim pipol bat wei wea hem talem tu. Waswe, hem tru hao iu moa willing for lisin long man wea story long iu sapos hem garem voice wea here naes, showimaot feeling, wei for fren and kaen, winim sapos voice bilong hem cold or raf?

For voice garem naesfala saond hem needim moa samting winim wei wea iu mekem hem kamaot nomoa. Fasin bilong man tu maet insaed long diswan. Taem wanfala man hem grow long savve and wei for followim truth bilong Bible, olketa change long toktok bilong hem bae showaot. Olketa fasin wea followim God olsem love, hapi, and kaenfala fasin showaot long voice bilong hem. (Gal. 5:22, 23) Taem hem barava interest long narafala pipol, datwan bae showaot long voice bilong hem. Taem fasin for tinghae hem changem spirit for komplen, olketa word wea man talem and saond long voice showimaot diswan. (Lam. 3:39-42; 1 Tim. 1:12; Jude 16) Nomata sapos iu no savve long languis wea pipol story long hem, sapos wanfala man hem here praod, no willing for acceptim samting, judgem man, and raf, and narafala man hem here olsem hambol, patient, kaen, and loving, hem no hard for iu luksavve hao tufala difren tumas.

For samfala, saond bilong voice wea nogud maet kamaot from wanfala sik wea spoelem larynx or problem saed long body wea man born kam witim. Kaen problem olsem maet hard tumas for stretem evribit long disfala system. Bat, planti taem, for lane for iusim olketa part bilong body for toktok long stretfala wei savve mekem diswan kamap moabeta.

First samting, hem important for luksavve hao saond bilong voice hem difren for evri difren man. Goal bilong iu hem no for mekem voice bilong iu olsem voice bilong nara man. Bat, trae for mekem voice bilong iu kamap moabeta. Wanem nao savve helpem iu for duim olsem? Tufala main samting.

Breathe Long Stretfala Wei. For kasem best samting from voice bilong iu, iu need for garem inaf air and for kontrolem gud wei wea iu breathe. Sapos iu no duim, voice bilong iu maet here wik, and wei wea iu toktok maet no smooth.

Sekson bilong lungs wea moa big hem no long top long chest; disfala sekson hem luk big nomoa from olketa bon long shoulder. Waed part bilong lungs nao hem antap long diaphragm. Diaphragm hem join long olketa botom rib and hem nao separatem chest from sekson bilong bele.

Sapos iu fulimap top sekson nomoa long lungs bilong iu taem iu breathe-in, kwiktaem nomoa bae iu shortwind. Voice bilong iu bae no garem paoa, and bae iu kwiktaem kamap taed. For breathe long stretfala wei, iu need for sidaon or standap stret and stretem shoulder bilong iu. Trae hard for no mekem big nomoa top part long chest bilong iu taem iu breathe-in for toktok. Fulimap botom part bilong lungs firstaem. Taem iu go ahed for fulimap disfala part, botom part bilong olketa rib bilong iu bae muv go aot long saed. Long semtaem, diaphragm bae muv go daon, and lelebet muvim bele and intestines, mekem belt or nara kaleko bilong iu feel taet long bele. Bat lungs no stap long bele, olketa bihaen olketa rib. For testim iuseleva, putim hand long each saed long botom rib bilong iu. Then breathe big. Sapos iu breathe long stretfala wei, iu bae no taetem bele bilong iu and liftimap olketa shoulder. Bat bae iu feelim olketa rib bilong iu muv ap and go aot lelebet.

Next samting, lane for kontrolem wei wea wind bilong iu hem go aot. No westem datfala wind long wei for letem hem go aot wantaem. Isisi letem hem go aot. No trae for kontrolem diswan long wei for taetem olketa masol long throat. Datwan bae kwiktaem mekem voice here olsem hae tumas or olsem iu forcem. Olketa masol long bele and olketa intercostal masol (midol long olketa rib) muv for aotem datfala wind, and diaphragm hem affectim hao fast nao datfala wind hem go aot.

Olsem wanfala man for ran hem train for wanfala resis, wanfala speaker savve lanem stretfala wei for kontrolem wei wea hem breathe taem hem exercise. Standap stret and stretem shoulder, breathe big for fulimap botom part bilong lungs, and then isisi letem datfala wind go aot taem iu kaont slow and trae for kasem hae namba bifor wind hem finis. Then practicem wei for read big taem iu breathe long sem wei.

Mekem Olketa Masol Relax. Narafala important wei for garem gudfala saond bilong voice—hem for relax! Bae iu sapraes taem iu lukim hao iu bae barava kamap moabeta taem iu lane for relax taem iu toktok. Mind and body mas relax, bikos wari long mind savve mekem olketa masol taet.

Iu savve mekem mind bilong iu relax long wei for garem stretfala tingting abaotem olketa wea lisin long iu. Sapos olketa nao pipol iu meetim long field ministry, remember hao nomata sapos iu studyim Bible for tu-thri month nomoa, iu savve long samfala important samting saed long purpose bilong Jehovah wea iu savve sharem long olketa. And iu visitim olketa bikos olketa needim help, nomata sapos olketa luksavve long datwan or nomoa. Long narasaed, sapos iu givim tok long wanfala Kingdom Hall, klosap evriwan long audience bilong iu pipol bilong Jehovah. Olketa nao olketa fren bilong iu, and olketa wantem iu for win. Olketa nara speaker long world no feisim audience wea fren witim and lovem olketa olsem audience wea iumi feisim evritaem.

Tingim olketa masol long throat bilong iu and trae hard for mekem olketa relax. Remember hao vocal cords bilong iu seksek taem air hem go pas long olketa. Saond bilong voice hem change taem olketa masol long throat hem taet or hem relax, olsem saond bilong string long guitar or violin hem change taem hem moa taet or moa slak. Taem vocal cords bilong iu relax, saond hem moa low. For mekem olketa masol long throat relax hem help tu for keepim spes insaed nose hem open, and diswan bae barava affectim saond long voice bilong iu.

Mekem full body bilong iu relax—olketa knee, hand, shoulder, and nek bilong iu. Diswan bae helpem iu for mekem voice strong, wea iu needim for mekem voice bilong iu kasem man wea farawe lelebet. Disfala strongfala voice savve kamaot from full body, bat wei for no relax hem stopem diswan. Saond bilong voice, wea kam from larynx, hem no travel go thru spes long nose and feis nomoa bat olketa bon long chest, teeth, and insaed top long mouth. Evri part hia hem join tugeta for mekem voice strong. Sapos iu putim hevi samting antap long timba sekson bilong wanfala guitar, saond bae nomoa nao; no eniting mas stap long datfala timba for letem saond travel long hem for mekem saond hem strong. So, olketa bon long body bilong iumi, wea olketa masol holem, hem olsem tu. Sapos voice bilong iu hem strong, iu savve kontrolem gud and iusim for showimaot olketa difren feeling. Iu bae no need for forcem voice bilong iu for story long bigfala audience.

TOKTOK—HEM KAM FROM WEA?

Air wea kam from lungs bilong iu nao mekem evri saond bilong voice. Lungs duim waka for pushim air thru long windpipe go insaed long larynx, or voice box, wea hem stap long midol long throat. Insaed long voice box, long tufala saed, iu garem tufala barava smol masol wea nem bilong olketa hem vocal cords. Olketa nao main samting wea mekem saond kamap. Tufala masol hia nao openem and satem ples wea air savve go thru long larynx, for letem air kam insaed and go aot and tu for stopem olketa nara samting for go insaed lungs. Taem man breathe nomoa and air hem go pas long vocal cords hem no mekem eni saond. Bat taem man laek for toktok, olketa masol kamap taet raonem vocal cords, and olketa seksek taem lungs forcem air for go pas long olketa. Diswan nao mekem saond kamaot.

Taem vocal cords taet tumas olketa seksek moa fast and olketa saond wea kamaot hem moa hae. Long narasaed, sapos man mekem vocal cords relax, olketa low saond kamaot. Bihaen hem lusim larynx, olketa saond wave kam long top part bilong throat, wea olketa kolem pharynx. Then hem kam insaed mouth and nasal cavity. Long there samfala nara saond join witim for changem, mekem moa laod, and strongim datfala main saond. Top long insaed bilong mouth, and tu tongue, teeth, lips, and jaw join tugeta for divaedem olketa saond wave wea seksek, mekem taem hem kamaot, hem toktok wea man savve minim.

Human voice hem olsem mirakol samting, no eniting wea man wakem hem semsem. Hem savve showimaot olketa difren feeling olsem soft kaenfala love, and tu, raf, or strongfala heit. Taem hem trainim gud, voice bilong man savve garem olketa saond bilong thrifala octave and savve garem naesfala music saond and tu wei for toktok wea savve muvim heart.

HAO FOR WINIM SAMFALA PROBLEM

Voice wea wiki. Soft voice no minim hem wiki. Sapos hem here naes, narafala pipol maet hapi for lisin long hem. Bat for duim gudfala samting, hem mas laod inaf.

For mekem pipol herem voice bilong iu, iu need for mekem hem moa strong. Hem minim iu mas lane for mekem full body hem relax, long wei wea disfala leson hem storyim. For mekem body relax and for practicem wei for mekem tiun witim mouth wea sat savve help. Lips shud tasim each other lelebet nomoa. Taem iu mekem tiun witim mouth sat, feelim wei wea hed and chest bilong iu seksek.

Samfala taem voice bilong man maet here olsem wiki bikos hem sik or no sleep gud. Sapos datwan kamap moabeta, voice bae kamap moabeta.

Voice wea hae tumas. For taetem vocal cords savve mekem voice moa hae. Voice wea no relax bae mekem olketa wea lisin no relax tu. Iu savve mekem saond bilong voice moa low taem iu mekem olketa masol long throat relax wea savve mekem vocal cords no taet tumas. Practicem datwan taem iu story evriday. For breathe big savve help tu.

Voice wea here olsem nose hem blok. Samfala taem problem olsem maet kamap from samting really blokem nose, bat klosap evritaem hem no olsem. Samfala taem man hem taetem olketa masol long throat and mouth and diswan satem olketa spes insaed nose mekem hem hard for air go pas. Diswan mekem toktok bilong hem here olsem nose hem blok. For missim diswan, man mas relax.

Voice wea raf. Sapos man garem kaen voice olsem, pipol bae no mas interest for story witim hem. Hem maet mekem pipol feel fraet.

For samfala, hem showimaot need for go ahed for trae hard for changem fasin bilong olketa. (Col. 3:8, 12) Sapos man hem duim datwan finis, for followim olketa principle bilong wei for trainim voice savve help. Mekem throat and jaw relax. Diswan bae mekem voice here moa naes and bae stopem wei for hem no klia bikos mouth no open gud.