Leson 6
Wanem Nao Kingdom Bilong God?
Wea nao Kingdom bilong God hem stap? (1)
Hu nao King bilong hem? (2)
Waswe, samfala bae rul withim disfala King? Sapos olsem, haomas pipol? (3)
Wanem nao show aot iumi stap long olketa last day distaem? (4)
Wanem nao Kingdom bilong God bae duim for olketa man long future? (5-7)
1. Taem hem stap long earth, Jesus teachim olketa follower bilong hem for prea for Kingdom bilong God. Wanfala kingdom hem gavman wea king nao hem leadim. Kingdom bilong God hem wanfala spesel gavman. Hem stap long heven and bae rul ovarem disfala earth. Hem bae mekem nem bilong God kamap holy. Hem bae mekem will bilong God kamap long earth olsem hem go ahed long heven.—Matthew 6:9, 10.
2. God promisim hao Jesus bae kamap King long Kingdom bilong Hem. (Luke 1:30-33) Taem Jesus stap long earth, hem prove-im way wea hem bae wanfala perfect Ruler wea kaen and followim justice. Taem hem go back long heven, hem no kamap King long Kingdom bilong God long semtaem. (Hebrews 10:12, 13) Long 1914, Jehovah givim paoa long Jesus wea Hem promisim for hem. Start long datfala taem, Jesus rul long heven olsem King wea Jehovah markem.—Daniel 7:13, 14.
3. Jehovah choosim samfala faithful man and woman long earth tu for go long heven. Olketa bae rul withim Jesus olsem king, judge, and priest ovarem olketa man. (Luke 22:28-30; Revelation 5:9, 10) Jesus kolem olketa hia wea bae rul withim hem long Kingdom bilong hem, wanfala “little flock.” Namba bilong olketa hem 144,000.—Luke 12:32; Revelation 14:1-3.
4. Taem Jesus kamap King, hem torowem Satan and olketa badfala angel bilong hem from heven kam daon long earth. Dastawe olketa samting kamap no gud tumas long earth start kam long 1914. (Revelation 12:9, 12) Olketa war, hangre, sik, fasin for brekem law wea big tumas—evri samting hia they part bilong wanfala “saen” wea show aot Jesus hem rul distaem and disfala system hem klosap for finis.—Matthew 24:3, 7, 8, 12; Luke 21:10, 11; 2 Timothy 3:1-5.
5. Klosap nao Jesus bae judge-im pipol, divaedem olketa olsem shepherd hem divaedem olketa sheepsheep from olketa goat. “Olketa sheepsheep” nao pipol wea prove-im olketa stap loyal under long rul bilong hem. Olketa bae kasem laef olowe long earth. “Olketa goat” nao pipol wea rejectim Kingdom bilong God. (Matthew 25:31-34, 46) Klosap nao, Jesus bae finisim evriwan wea olsem goat. (2 Thessalonians 1:6-9) Sapos iu laek for kamap wanfala “sheepsheep” bilong Jesus, iu mas listen long message bilong Kingdom and live followim samting iu learnim.—Matthew 24:14.
6. Distaem planti kantri stap long earth. Evriwan garem gavman bilong hemseleva. Planti taem olketa kantri hia faetem each other. But Kingdom bilong God bae change-im evri gavman bilong man. Hem nomoa bae rul olsem gavman ovarem disfala earth. (Daniel 2:44) Then war, badfala fasin, and raf fasin bae finis. Evri pipol bae stap tugeta long peace and wan mind.—Micah 4:3, 4.
7. Insaed long Wan Thousand Year Rul bilong Jesus, olketa faithful man bae kamap perfect, and full earth bae kamap paradaes. Long end bilong disfala wan thousand year, Jesus bae duim finis evri samting wea God askim hem for duim. Then hem bae givim go back Kingdom long Father bilong hem. (1 Corinthians 15:24) Hem gud for iu talem olketa fren and famili member bilong iu abaotem samting wea Kingdom bilong God bae duim.
[Piksa long page 13]
Under long rul bilong Jesus, fasin for hate or for againstim man wea garem different color skin bae finis