Teachim Olketa Hambol Wan for Wakabaot Followim Wei Bilong God
1. Wanem nao insaed wei for mek disaepol?
1 Pipol savve long olketa disaepol bilong Christ long taem bilong hem olsem olketa bilong “Datfala Wei.” (Acts 9:2) Trufala Christian Wei hem samting wea affectim full laef bilong man. (Prov. 3:5, 6) Dastawe, taem iumi conductim olketa Bible study, iumi need for duim moa samting winim wei for teachim nomoa stretfala savve abaotem olketa teaching bilong Bible. Iumi mas helpem tu olketa Bible student for wakabaot followim wei bilong Jehovah.—Ps. 25:8, 9.
2. Wanem nao savve muvim Bible student for followim olketa komandment bilong God?
2 Love for Jehovah and for Jesus: Hem barava hard samting for pipol wea no perfect changem tingting, toktok, and fasin bilong olketa for followim will bilong God! (Rom. 7:21-23; Eph. 4:22-24) Nomata olsem, love for God and Son bilong hem muvim olketa hambol wan for duim disfala hard samting. (John 14:15; 1 John 5:3) Hao nao iumi savve helpem olketa Bible student bilong iumi for mekem grow disfala love?
3. Hao nao iumi savve helpem student for mekem grow love for Jehovah and for Jesus?
3 Helpem student bilong iu for savve gud long wanem kaen person nao Jehovah. Wanfala brata hem sei olsem: “Pipol hard for lovem wanfala man sapos olketa no savve long hem, so start long barava firstfala study, mi teachim olketa Bible student nem bilong God from Bible, and mi iusim eni chance wea kamap for mekhae long olketa fasin bilong Jehovah.” Wei for mekhae long example bilong Jesus hem nambawan wei for duim diswan. (John 1:14; 14:9) And tu, mekius long review box long end long each chapter bilong Savve buk for helpem student ting raonem olketa nambawan fasin bilong God and Son bilong hem.
4. (a) Why nao staka student faendem hem hard for duim preaching waka? (b) Hao nao iumi savve helpem olketa student taem olketa start for tekpart long Christian ministry?
4 Teach Thru Long Gudfala Example Bilong Iu: From iumi olketa teacher and iumi leadim narawan, iumi showim olketa narawan wanem hem minim for wakabaot followim wei bilong God thru long samting iumi duim. (1 Cor. 11:1) Olsem example, plande Bible student no getius long wei for go storyim biliv bilong olketa long olketa stranger. Dastawe, maet iumi needim patient fasin and savve for helpem olketa student mekem grow kaen love, faith, and fasin for no fraet wea bae helpem olketa for tekpart long preaching waka and for mek disaepol. (2 Cor. 4:13; 1 Thess. 2:2) Wei wea iumi barava laek for leadim olketa student bilong iumi bae muvim iumi for waka witim olketa and sapotim olketa taem olketa start for tekpart long Christian ministry.
5. Hao nao gudfala example hem helpem olketa student for lukim wanem nao insaed wei for followim olketa komand bilong God?
5 Example bilong iu savve teachim olketa student abaotem olketa nara important part bilong Christian living. Taem iu visitim olketa wea sik or story long naesfala wei witim olketa narawan long taem bilong olketa kongregeson meeting, olketa lukim gudfala example bilong love. (John 15:12) Taem iu help for klinim Kingdom Hall or iu helpem olketa narawan, iu teachim olketa hao for duim samting for narawan. (John 13:12-15) Taem olketa lukim living bilong iu hem simpol, olketa bae savve wanem hem minim ‘for aftarem kingdom firstaem.’—Matt. 6:33.
6. Wanem nao savve kamap from wei for helpem olketa hambol wan servem Jehovah?
6 Hem barava hard waka for teachim olketa narawan abaotem Word bilong God and for mekem pipol kamap disaepol. Bat man savve barava hapi taem hem lukim olketa hambol wan “gohed for wakabaot long truth”!—3 John 4.