Hem Barava Important for Study Seleva and Duim Famili Worship!
1. Wanem nao Governing Body barava interest for duim for iumi distaem, and why nao olsem?
1 Olsem long first century, Governing Body hem barava interest for lukaftarem pipol bilong Jehovah. (Acts 15:6, 28) From datfala big trabol hem klosap tumas, hem important for evri pablisa mas barava fren gud witim Jehovah. Wanem nao bae iu duim long datfala taem wea bifor, iu go long Kongregeson Buk Study? Hem gud for evriwan savve iusim taem hia for duim famili worship. Sapos iumi iusim gud taem hia, diswan bae helpem iumi for studyim gud toktok bilong God and kasem gud samting from wanem iumi lanem.—Ps. 1:1-3; Rom. 11:33, 34.
2. Wanem nao olketa famili and olketa wea no marit savve duim long taem bilong famili worship?
2 Taem for Famili Worship: Famili hed mas duim waka wea Jehovah askem olketa for duim, hem nao for garem gudfala famili Bible study evritaem. (Deut. 6:6, 7) Olketa brata and sista wea no marit and wea no garem eni waka for lukaftarem famili, savve iusim taem hia for studyim Bible and for duim research. Hem important tumas for iumi evriwan ‘iusim gud taem’ for duim study seleva and for ting raonem wanem iumi studyim, mekem iumi fit for gohed fren gud witim Jehovah long olketa ‘taem wea nogud tumas.’—Eph. 5:15, 16.
3, 4. Wanem nao samfala idea wea iumi savve iusim, and wanem nao for tingim taem iumi duim study?
3 Wanem for Iusim: Watch Tower Publications Index or Watchtower Library long CD-ROM, savve helpem iu faendem samting for studyim wea evriwan long famili savve enjoyim. Famili savve lukluk long olketa story long Wastaoa wea savve kamap evritaem, olsem: “Wanem Nao Bae Mekem Famili Stap Gud?,” “Lanem Pikinini Bilong Iu,” and “For Young Pipol.” Awake! tu garem olketa “Young Pipol Ask” story and staka naesfala story abaotem olketa samting wea Jehovah wakem.
4 Taem famili readim Bible tugeta and no hariap nomoa for finisim, datwan bae helpem evriwan long famili for tingim and followim wanem olketa lanem. (Heb. 4:12) Samfala taem maet iu savve lukim and story raonem wanfala long olketa video wea organization wakem. Iu savve chusim staka difren samting for studyim and iu savve duim long staka difren wei. Iu savve askem famili bilong iu wanem nao olketa laek studyim and hao olketa laek for duim.
5. Why nao hem important tumas distaem for study seleva and duim famili worship?
5 Why Hem Important Distaem: Taem iumi barava fren gud witim Jehovah, datwan bae helpem iumi for “stand strong and lukim wei wea Jehovah bae sevem [iumi].” (Ex. 14:13) Olketa mami and dadi needim savve wea kam from God for leadim pikinini bilong olketa ‘midolwan long wanfala nogud and olobaot genereson.’ (Phil. 2:15) Olketa pikinini needim help, mekem olketa savve wanem for duim, and no followim nogud wei bilong olketa nara pikinini long skul distaem. (Prov. 22:3, 6) Olketa wea marit bae hapi taem olketa fren gud witim Jehovah, wea hem nao mek-thri long datfala “rope wea garem thrifala string.” (Eccl. 4:12) Iumi mas iusim gud taem wea iumi garem for strongim iumiseleva long “holy faith”!—Jude 20.