Waswe, Iu Savve ‘Kam Long Macedonia for Helpem Mifala’?
1 Staka long iumi savve gud long olketa toktok antap and wanem happen long datfala taem. (Acts 16:6-10) Paul and Barnabas lovem pipol. Tufala willing for duim samting for helpem pipol. Distaem tu, pipol bilong Jehovah willing for helpem nara pipol. (Ps. 110:3) Staka muv long nara kongregeson mekem olketa savve helpem datfala kongregeson for preach long territory wea olketa no duim staka taem and for encouragem olketa. Iumi savve, olketa wea duim datwan kasem staka blessing olsem Paul and Barnabas.
2 Iumi mas no feel olsem wei for muv long kongregeson wea needim help, hem samting wea olketa elder and olketa pioneer nomoa savve duim. Samfala taem branch office savve kasem olketa leta from olketa circuit overseer and samfala kongregeson wea askem samfala famili for go helpem olketa and for helpem olketa long preaching waka.
3 Hem important for tingim wanem nao mekem iumi for laek muv long nara kongregeson wea needim help. Iumi duim datwan, bikos iumi laek for helpem datfala kongregeson. Wanfala brata and waef bilong hem witim boy bilong tufala, wea stap long olketa kongregeson wea needim help, talem hao from living bilong olketa ples hem no semsem, staka taem iumi bae no garem evri samting wea iumi laekem. Hem sei: “Taem iu muv for helpem nara kongregeson, no tingse kongregeson shud change for fitim wanem iu laekem, bat hem gud for sapotim olketa, and trustim Jehovah taem iu lukaotem waka, ples for stap and olketa nara samting wea iu needim. Tinghae long samting wea Jehovah givim long iu.” Olketa samting hia, hem olketa gud idea for iumi followim!
4 Hem gud for tingim long olketa ples olsem wea needim help, maet hem no isi for faendem waka, maet for rentim haos and peim olketa samting wea iu needim hem expensive tumas, and maet ples hem hot or cold tumas. Bifor iu muv, hem gud for iu ting raonem and prea abaotem firstaem. (Luke 14:28) Hem important for evriwan long famili for prea tugeta long Jehovah for helpem olketa for disaedem stret samting. And hem important for evriwan long famili for sapotim wanem olketa disaedem. Waswe, iufala willing for lusim samfala samting and changem samfala samting long laef?
5 Wanem nao iu shud duim sapos iu disaed for muv go long nara kongregeson? Firstaem, lukim samting wea English Organized buk long page 111 hem talem. Bihaen, raetem wanfala leta and givim long service komiti. Olketa bae sendem datfala leta long branch office.
6 And sapos iu savve long eni ples wea iu laek for go help long hem, hem gud for talem long branch office. Branch office bae sendem nem and address bilong olketa kongregeson wea needim help mekem iu savve raet go long olketa for savve moa long samfala samting abaotem olketa.
7 From disfala world klosap for finis, hem gud sapos iumi savve helpem olketa brata and sista and olketa hambol pipol wea laek for savve long tru samting. Mifala prea for iufala long disfala important samting. Jehovah bae helpem iumi evriwan taem iumi gohed for duim disfala preaching waka.—Acts 4:29.