Study Givim Reward

WASWE, iu lukim pipol taem olketa chusim frut? Klosap evriwan bae lukim color and size bilong hem for savve sapos hem ripe. Samfala smelem datfala frut. Olketa narawan tasim and skwisim. Samfala moa scalem taem olketa holem tufala frut long tufala hand and feelim which wan nao garem moa wata insaed. Wanem nao tingting bilong pipol hia? Olketa ting raonem olketa difren samting, tingim hao each wan hem difren, rememberim samfala wea olketa bin chusim bifor, and markem wanem olketa lukim distaem witim wanem olketa lukim bifor. Olketa bae kasem reward wea teist naes bikos olketa lukluk gud long diswan.

Bat, olketa reward for studyim Word bilong God hem barava moa big. Taem kaen study olsem kamap important samting long laef bilong iumi, faith bilong iumi hem kamap moa strong, love bilong iumi kamap moa deep, ministry hem garem moa frut, and olketa disison bilong iumi givim moa pruv hao iumi garem wisdom wea followim God and fasin for luksavve. Abaotem olketa reward olsem, Proverbs 3:15 hem sei: “Hem winim evri narafala samting wea iu laekem tumas.” Waswe, iu go ahed for kasem olketa reward olsem? Wei wea iu study maet samting wea affectim diswan.—Col. 1:9, 10.

Wanem nao study? Hem moa samting winim wei for readim samting nomoa. Hem needim iumi for iusim mind bilong iumi for spendem taem for ting raonem gud datfala subject. Hem needim wei for ting raonem samting iu readim, markem datwan witim samting wea iu savve finis long hem, and for luksavve long olketa reason for samting olketa raetem. Taem iu study, ting raonem gud eni idea wea maet iu no herem bifor. Tingim tu hao iuseleva savve followim long wei wea moa big kaonsel from Bible. Olsem wanfala witness bilong Jehovah, iu bae need tu for tingim hao nao iu savve iusim datfala information for helpem narawan. Hem klia, study hem needim wei for ting raonem.

Redyim Mind Bilong Iu

Taem iu redyim evri samting for study, iu redyim olketa samting olsem Bible bilong iu, olketa pablikeson wea iu bae needim, wanfala baero, and maet wanfala note buk. Bat waswe, iu redyim heart bilong iu tu? Bible talem iumi hao Ezra “redyim heart bilong hem for lukluk long law bilong Jehovah and for duim and for teachim rul and justice long Israel.” (Ezra 7:10) Wanem nao insaed long wei for redyim heart olsem?

Prea hem helpem iumi for studyim Word bilong God witim tingting wea fitim. Iumi wantem heart bilong iumi, iumiseleva nao, for followim olketa instruction wea Jehovah hem givim long iumi. Long start bilong each taem iu study, askem Jehovah for helpem iu witim spirit bilong hem. (Luke 11:13) Askem hem for helpem iu for minim samting iu bae studyim, wei wea datwan join witim purpose bilong hem, hao datwan savve helpem iu for luksavve wanem nao hem gud and wanem nao hem nogud, hao iu shud followim olketa principle bilong hem long laef bilong iu, and hao datfala information hem affectim wei wea iu fren witim hem. (Prov. 9:10) Taem iu study, “go ahed for askem God” for wisdom. (Jas. 1:5) Ting raonem long honest wei hao datfala information hem fitim iu taem iu askem help bilong Jehovah for aotem olketa barava nogud samting wea iu wantem and olketa nogud tingting. Evritaem “givim ansa long Jehovah witim wei for sei thankiu” for olketa samting wea hem showimaot long iumi. (Ps. 147:7) Disfala wei for study witim prea hem lead go long wei for klos long Jehovah, bikos diswan helpem iumi for givim ansa long hem taem hem story long iumi thru long Word bilong hem.—Ps. 145:18.

Wei for acceptim and givim ansa olsem mekem pipol bilong Jehovah difren from olketa nara student. Hem fasin bilong olketa wea no lovem God for daotem and challengem samting wea olketa readim. Bat datwan hem no wei for tingting bilong iumi. Iumi trustim Jehovah. (Prov. 3:5-7) Sapos iumi no minim samting, iumi no praod for sei diswan mas rong. Taem iumi lukaotem and dig for olketa ansa, iumi weit long Jehovah. (Mic. 7:7) Olsem Ezra, iumi garem goal for duim and for teachim samting wea iumi lanem. Witim kaen feeling bilong heart olsem, iumi bae kasem olketa nambawan reward from study bilong iumi.

Hao for Study

Winim wei for start long paragraf wan and go ahed olsem kasem end, firstaem spendem taem for luk thru long full article or chapter. Startim diswan witim wei for ting raonem title bilong hem. Diswan hem theme bilong samting wea iu bae studyim. Then tingting gud long hao nao olketa subheding join witim title. Lukluk gud long eni piksa, chart, or teaching box long datfala article. Askem iuseleva: ‘From olketa samting hia, wanem nao mi hope for lanem? Long wanem wei nao bae hem savve helpem mi?’ Diswan givim purpose long study bilong iu.

Then lukim olketa point. Olketa Wastaoa study article and samfala buk garem olketa kwestin. Taem iu readim each paragraf, wei for andalaenem ansa bae helpem iu. Nomata sapos hem no garem eni study kwestin, iu maet laek for andalaenem olketa important point wea iu want for rememberim. Sapos wanfala point hem niu long iu, spendem lelebet taem long datwan for mek sure iu minim gud. Lukaotem eni tokpiksa or wei for pruvim samting wea iu savve iusim long field ministry or wea iu savve iusim insaed long wanfala tok wea iu bae givim. Tingim hu nao samfala wea disfala information savve strongim faith bilong olketa sapos iu sharem witim olketa. Markem olketa point wea iu want for iusim, and reviewim olketa taem iu finisim study bilong iu.

Taem iu studyim datfala information, readim olketa scripture wea olketa no raetem insaed long paragraf. Ting raonem hao each scripture hem join witim samting wea paragraf hem talem.

Maet iu faendem olketa point wea iu no minim gud or wea iu bae laek for kasem moa information abaotem. Winim wei for letem olketa samting hia pullim mind, raetem daon olketa point hia and studyim moa long narataem. Planti taem iumi kasem mining bilong olketa point olsem long nara part bilong datfala information. Sapos nomoa, iu savve duim research long datwan. Wanem nao olketa samting wea maet iu duim research long hem? Maet wanfala scripture wea iu no minim gud. Or maet iu no minim hao scripture hem fitim samting wea paragraf storyim. Maet iu feel olsem iu minim wanfala idea long datfala information bat iu bae faendem hem hard for minim datwan long narawan. Winim wei for leavim nomoa, maet hem wise for duim research long olketa samting hia bihaen iu finisim samting wea iu start for studyim finis.

Taem aposol Paul raetem leta bilong hem long olketa Hebrew Christian, hem stop hafwe long datfala leta and sei: “Diswan nao main point.” (Heb. 8:1) Waswe, iu duim semkaen samting for remindim iuseleva samfala taem? Tingim why nao Paul hem duim olsem. Long olketa chapter bifor long leta bilong hem, Paul showim finis hao Christ olsem bigfala Hae Priest bilong God hem go insaed long heven finis. (Heb. 4:14–5:10; 6:20) Bat wei wea Paul strongim datfala main point long start bilong chapter 8, hem redyim mind bilong olketa wea readim leta bilong hem for ting raonem gud hao diswan join witim laef bilong olketa. Hem showimaot hao Christ hem standap front long God for olketa and openem wei for olketa savve go insaed long datfala “holy ples” long heven. (Heb. 9:24; 10:19-22) Wei wea hope bilong olketa hem sure, bae help for muvim olketa for followim olketa kaonsel wea bae kam bihaen long disfala leta abaotem faith, wei for stand strong, and Christian fasin. Olsem tu, taem iumi study, wei for lukluk strong long olketa main point bae helpem iumi for luksavve long hao nao datfala information point go long theme, and bae strongim long mind bilong iumi olketa gudfala reason for iumi followim datfala information.

Waswe, study seleva bae muvim iu for duim samting? Diswan hem important kwestin. Taem iu lanem samting, askem iuseleva: ‘Hao nao diswan shud affectim wei for tingting bilong mi and olketa goal long laef bilong mi? Hao nao mi savve followim disfala information saed long wei for stretem wanfala problem, disaedem samting, or for kasem wanfala goal? Hao nao mi savve iusim diswan witim famili bilong mi, long field ministry, long kongregeson?’ Ting long olketa kwestin hia witim prea and ting raonem really samting long laef wea iu savve iusim disfala savve long hem.

Bihaen iu finisim wanfala chapter or article, duim short review. Lukim sapos iu savve rememberim olketa main point and pruv wea saportim olketa. Diswan bae helpem iu for rememberim information for iusim long future.

Wanem Nao for Studyim

Olsem pipol bilong Jehovah, iumi garem planti samting for studyim. Bat wea nao for start? Each day, hem gud for studyim text and olketa koment from Lukluk Long Olketa Scripture Evriday. Each week, iumi attendim olketa kongregeson meeting, and study wea iumi duim for prepare for olketa bae helpem iumi for kasem moa samting wea savve helpem iumi. Samfala wise for markem taem for studyim samfala Christian pablikeson wea stap bifor olketa lanem truth. Olketa narawan chusim samfala verse insaed Bible reading bilong olketa for studyim long wei wea moa deep.

Waswe sapos living bilong iu no letem iu for studyim gud evri information bilong olketa kongregeson meeting? Stap klia long trap for kwiktaem preparem datfala information, or long wei wea moa worse, for no studyim eni part bilong hem bikos iu kanduit preparem full meeting. Bat, disaedem haomas nao iu savve studyim, and studyim gud datwan. Duim olsem each week. Gogo, trae for garem moa taem for prepare for olketa nara meeting.

“Buildimap Famili Bilong Iu”

Jehovah hem luksavve hao olketa famili hed mas waka hard for provaed for famili bilong olketa. “Preparem waka bilong iu aotsaed,” Proverbs 24:27 hem sei, “and redyim olketa samting bilong iu long field.” Bat, iu mas tingim tu olketa spiritual need bilong famili bilong iu. Dastawe, datfala verse hem go ahed for sei: “Bihaen iu mas buildimap famili bilong iu.” Hao nao famili hed savve duim diswan? Proverbs 24:3 hem sei: “Thru long fasin for luksavve [wanfala famili] bae barava stap strong.”

Hao nao fasin for luksavve bae helpem famili bilong iu? Fasin for luksavve hem paoa bilong mind for luksavve long moa samting winim samting wea klia nomoa. Iumi savve sei hao famili study wea barava help, hem start witim wei for iu lukluk gud long famili bilong iu. Long wanem wei nao olketa famili member bilong iu muv ahed long spiritual wei? Lisin gud taem iu story witim olketa. Waswe, olketa garem wei for komplen or feel kros? Waswe, olketa aftarem material samting evritaem? Taem iu waka long field ministry witim olketa pikinini bilong iu, waswe, olketa hapi for showimaot long nara pikinini hao olketa Jehovah’s Witness? Waswe, olketa enjoyim program wea iu markem for duim famili Bible reading and study? Waswe, olketa barava followim wei bilong Jehovah long laef bilong olketa? Wei for lukluk gud bae showimaot long iu, olsem famili hed, wanem nao iu mas duim for putim and buildimap olketa spiritual fasin insaed each famili member.

Chekim olketa Wastaoa and Wekap! for olketa article wea deal witim olketa need wea famili garem. Then talem famili firstaem wanem nao iufala bae studyim, mekem olketa savve ting raonem datfala information. Keepim wanfala loving feeling long taem bilong study. Long wei wea no mekem olketa feel shame or for hotem olketa, mekhae hao information iu studyim hem important, taem iu storyim hao nao datwan hem barava fitim samfala need bilong famili. Helpem each member for tekpart. Helpem each wan for luksavve hao Word bilong Jehovah hem “perfect” for provaedem wanem iumi needim long laef.—Ps. 19:7.

Kasem Olketa Reward

Pipol wea luksavve bat wea no garem spiritual wei for minim samting, savve studyim universe, samting wea happen long world, and olketa seleva tu, bat fail for kasem really mining bilong olketa samting wea olketa lukim. Long narasaed, witim help bilong spirit bilong God, pipol wea evritaem studyim Word bilong God fit for luksavve God nao wakem universe, wei wea Bible profesi fulfill, and hao evri samting hia join witim purpose bilong God for blessim olketa man wea faithful.—Mark 13:4-29; Rom. 1:20; Rev. 12:12.

Nomata diswan hem nambawan, hem shud no mekem iumi for kamap praod. Bat, wei for lukluk gud long Word bilong God evriday hem helpem iumi for stap hambol. (Deut. 17:18-20) Hem protectim iumi tu from “giaman paoa bilong sin” bikos taem Word bilong God hem barava stap insaed long heart bilong iumi, sin no garem sem paoa for winim wei wea iumi disaed strong for againstim datwan. (Heb. 2:1; 3:13; Col. 3:5-10) So iumi bae “wakabaot fitim Jehovah witim goal for mekem hem hapi evribit taem [iumi] go ahed for garem frut long evri gudfala waka.” (Col. 1:10) Hem nao goal bilong iumi for studyim Word bilong God, and taem iumi kasem diswan hem nao reward wea winim eni narawan.