Wanem Nao First Samting Long Laef Bilong Iu?
1 Hao nao iu bae ansarem datfala kwestin? Hem tru, iumi evriwan laek for putim Kingdom hem first samting long laef bilong iumi. (Matt. 6: 33) Bat maet iumi tingim diswan, ‘Waswe, olketa samting wea mi chusim hem showimaot datwan?’ Bible encouragem iumi olsem: ‘Gohed for lukluk sapos iu followim yet olketa tru teaching.’ (2 Cor. 13:5) Hao nao iumi savve mek sure iumi putim Kingdom hem first samting long laef bilong iumi?
2 Hao Iumi Iusim Taem: Firstaem hem gud for ting raonem hao nao iumi iusim taem bilong iumi. (Eph. 5: 15, 16) Haomas taem long week nao iumi iusim for stap witim olketa fren, or lukluk long television or Internet? Maet iumi bae sapraes taem iumi raetem haomas taem iumi spendem long olketa samting hia and markem witim haomas taem iumi iusim for duim olketa spiritual samting. Waswe, iumi waka ovataem for kasem staka material samting and iumi no garem taem nao for duim olketa spiritual samting? Haomas taem nao iumi misstim olketa meeting or ministry from iumi go long hapitaem or iumi go long garden?
3 Markem Taem for Olketa Samting wea Barava Important: Staka long iumi no garem taem for duim evri samting wea iumi laek for duim. Dastawe for putim Kingdom hem first samting long laef, iumi need for luksavve long “olketa samting wea barava important,” then iumi markem taem for duim olketa samting hia. (Phil. 1:10) Samfala long olketa samting hia hem wei for studyim Bible, duim ministry, lukaftarem famili, and go long olketa Christian meeting. (Ps. 1: 1, 2; Rom. 10:13, 14; 1 Tim. 5:8; Heb. 10:24, 25) Olketa nara samting olsem exercise lelebet and gudfala hapitaem hem helpem iumi tu. (Mark 6:31; 1 Tim. 4:8) Bat olketa samting hia wea no important tumas mas no stopem iumi for putim Kingdom hem first samting long laef.
4 Wanfala young brata disaed for duim full-taem ministry and no aftarem hae education for faendem waka. Datwan showimaot hem putim Kingdom hem first samting long laef bilong hem. Hem lanem wanfala difren languis and hem muv go for serve long ples wea garem bigfala need. Hem sei: “Mi barava hapi for stap long hia. Ministry long hia hem barava naes tumas! Bae hem gud tumas sapos evri young wan duim samting olsem and hapi olsem mi. No eni samting hem winim wei for iusim evri samting iumi garem for servem Jehovah.” Iumi savve kasem plande blessing taem iumi putim Kingdom hem first samting long laef bilong iumi, bat samting wea moa important, iumi mekem Dadi bilong iumi long heven hem hapi.—Heb. 6:10.