Leta From Governing Body
Dear Olketa Brata and Sista:
Dadi bilong iumi long heven, Jehovah, hem showimaot nambawan example bilong love. Dastawe Bible sei: “God hem love.” (1 John 4:8) Jehovah hem Olmaeti God, bat no enitaem Bible sei, “God hem paoa.” God hem lovem pipol and showimaot datwan taem hem rulim olketa. Datwan nao mekem iumi laek for worshipim hem!
Iumi hapi bikos Jehovah no forcem iumi for worshipim hem. Hem no wanfala raf ruler. Hem laekem iumi for worshipim hem bikos iumi lovem hem. From iumi lovem hem and iumi savve hem lovem iumi and rul bilong hem stret, iumi laek for stap anda long rul bilong hem. God hem evritaem duim stret samting and hem showimaot hem lovem olketa man start long taem bilong Adam and Eve.
Jehovah no forcem Adam and Eve for obeyim hem, bat hem letem tufala for disaed seleva. Sapos tufala barava lovem Jehovah and tinghae long wanem hem duim for tufala, bae tufala no duim samting wea Satan laekem and sin againstim Jehovah.
Staka year bihaen datwan, Moses sei olsem long olketa Israelite: “Tuday mi putim laef and gud samting front long iu, and tu, dae and nogud samting.” (Deut. 30:15) Olketa Israelite free for disaedem wanem olketa laek for duim. Joshua talem sem kaen toktok long olketa tu. Hem sei: “Sapos iufala no laek for worshipim Jehovah, distaem iufala chusim hu nao iufala bae worshipim.” Olketa Israelite sei long Joshua: “Bae mifala no lusim Jehovah.” (Josh. 24:15, 16) Iumi tu garem sem tingting olsem olketa. Iumi bae “no lusim Jehovah” bikos iumi lovem hem.
Iumi olketa tru Christian free for disaedem samting. Nomata hem responsibility bilong olketa elder for givim advaes and samfala taem olketa mas givim kaonsel, olketa no bossim or kontrolem laef or faith bilong narawan. Aposol Paul sei: “Mi no sei mifala boss long faith bilong iufala, bat mifala waka tugeta witim iufala for mekem iufala hapi. Faith bilong iufala nao hem mekem iufala strong.”—2 Cor. 1:24.
Taem iumi duim samting bikos iumi laek for duim and no from eniwan forcem iumi, datwan bae mekem iumi hapi tumas! Jehovah laekem iumi for duim gud samting bikos iumi lovem hem. Toktok bilong Paul showimaot why datwan hem important. Hem sei: “Maet mi salem evri samting wea mi garem for feedim pipol wea poor. Maet mi savve givim body bilong mi olsem sakrifaes tu from mi laek for tok praod. Bat sapos mi no garem love, mi no kasem eni gud samting.”—1 Cor. 13:3.
Jehovah hapi tumas for lukim staka million brata and sista worshipim hem bikos olketa lovem hem long full heart bilong olketa!
Jehovah lovem evriwan wea faithful for worshipim hem. Hem barava lovem iufala olketa pikinini and teenager wea showimaot iufala lovem hem and no disfala world wea mekem man tingim hemseleva nomoa. Mifala tu barava lovem iufala.—Luke 12:42, 43.
Last year, iufala olketa brata and sista, and olketa young wan iusim 1,748,697,447 hour for talemaot gud nius bikos iufala lovem Jehovah. From iufala lovem Jehovah and olketa narawan, 7,782,346 pablisa duim preaching waka evriwea long world. Iumi hapi for lukim 268,777 niu wan baptaes for showimaot olketa dedicate long Jehovah. Staka hem olketa young wan. Diswan minim 5,168 niu wan nao baptaes evri weekend. Iumi hapi tumas long datwan!
Long disfala taem bilong end, pipol bilong God mas deal witim staka problem, hard taem, persecution, sik, and wei for olo. Nomata olketa samting olsem kasem iumi, iumi disaed strong for “no givap.” Mifala barava lovem iufala evriwan.—2 Cor. 4:16.
Olketa brata bilong iufala,
Governing Body Bilong Olketa Jehovah’s Witness