Sharem “Gudfala Samting” Long Wei for Kaen and Welkamim Narawan (Matt. 12:35a)
Iumi evriwan hapi for sharem “gudfala samting” witim olketa narawan long wei for “kaen long pipol and welkamim olketa.” (Rome 12:13) Olketa elder kasem direction for mekem arrangement for peim kost bilong gogo bilong olketa visiting speaker and for lukaftarem olketa saed long kaikai. Bat maet iumi savve hol bak from iumi tingse iumi no garem inaf samting, or maet iumi tingse haos bilong iumi hem no fitim. Wanem Jesus talem long Martha savve helpem iumi for winim kaen tingting olsem. (Luke 10:39-42) Hem sei “stret samting” nao hem for associate tugeta and for encouragem narawan, hem no kaikai or naesfala haos. Taem iumi followim wanem Bible talem, iumi evriwan savve sharem “gudfala samting” witim olketa nara brata and sista bilong iumi.—3 John 5-8.